1 अंताकियाअ मंडड़ीमेहें थोड़ाक भविश्यवक्ता आन मास्तर ओता; जेहेंकोइत बरनबास आन शिमोन जियाहा नीगर कोतेहे; आन कुरेनीइं रेवासी लूकियुस, आन आधिकारी हेरोदोअ दुध-पाही* मनाएन, आन शाऊल. 2 जेहेलाम ते उपास तोइत प्रभुउ भक्ती कोअतेते, तेहेलाम पवित्र आत्मे कोयो, "माआं काजे बरनबास आन शाऊलोहो तिया कामोअ काजे आलांग कोआ जियांअ काजे आंय तियांहां हाद्याहा."

3 ताहराअ ते उपास आन प्रार्थना कोइत बरनबास आन शाऊलोपोअ आथ मिकीत कोइत तियांहां वाटे लागाड़्या.

4 बरनबास आन शाऊल पवित्र आत्मा वाअहीं मोकलीइल्या सिलुकियामेहें गोया; आन तिहीं रोत जाहाजीमेहें बोहीत कोइत सायपरस यी जागे गोया; 5 आन सलमीस होयरोम पोतीत कोइत, देवोअ वसन यहुदीइ आराधनालयोमेहें कोताप्य, आन योहान तियांआं सेवक ओतू.यहुदी आराधनालयोअ सामनेवालु भाग (सिनेगाग)

6 ते तिया पुरा बेटोपोअ ओवताज पाफुस पोत्या तिहीं तियांहां बार-ईसु नावोअ एक यहुदी बोड़वू आन ठोग भविश्यवक्तू मिल्यू. 7 तो राज्यपाल सेरगियुस पौलुसोअरी ओतू, जो समजदार माटी ओतू. तिये बरनबास आन शाऊलोहो तियाआ जागे हादीत कोइत देवोअ वसन उनाइलोअ इश्शा कोअयी. 8 पोने एलीमास बोड़वे, तियाआ नावोअ अर्थ ओंज होय, तियांआं विरोद कोइत राज्यपालोहो विश्वास ने कोअहूं जोवे कोत रुकीइलाआ कोशित कोअयी. 9 ताहरुउ शाऊले जियाअ नाव पौलुस बी होय, तिये पवित्र आत्मा वाअहीं पोआइत कोइत तियाअहें नजर लागाड़ीत पाल्यो आन कोयो, 10 "ए आखी खाराबी आन आखी ठगरायी वाअहीं पोआला सैतानोअ पोर्‍या, हाजी गोठीइ दुस्मोन, तु प्रभुउ सिदी वाट वाकड़ी कोइलोअ ने सोड़नारु के? 11 ओमे देख, प्रभुउ आथ तापोअ पोड़्युहू; आन तू थोड़ाक दिही जाआं आंदलू ओत जाही आन दिही ने देखाय."

ताहरुउ तेताजमेहें तियाहा साको-साकोज देखाओ वोल्यो आन तियाहा आंदारो देखाओ वोल्यो, ताहरुउ तो एखो तियाहा आथे तोइत लेत जाय तेहें कोत जेहें तेहेंज सापलू वोल्यू. 12 ताहरुउ राज्यपाल जो ओयोतो तियाहा देखीत कोइत आन प्रभुउ हिकवोणो वाअहीं बोगलात कोइत विश्वास कोअयू.

13 पौलुस आन तियाआ हाती पाफुसोम रोत जाहाजीमेहें बोहीत कोइत पंफूलिया भागोअ पिरगा सेहरोमेहें आया; आन योहान तियांहां सोड़ीत कोइत येरुसालेमोमेहें वोलीत आवतू रोयू. 14 पौलुस आन बरनबास पिरगा सेहरोम रोत वाट लागा आन पिसिदिया भागोअ अंताकियामेहें पोत्या; आन यहुदीइ आरामोअ दिही आराधनालयोमेहें जात कोइत बोहीत गोया. 15 ताहराआ नियम आन भविश्यवक्ताआ पुस्तक वाशोन ताहराअ आराधनालयोअ आधिकार्‍यों तियांआं जागे कोत मोकल्यो, "ए पाही, जर माअहुंउं प्रोत्साहनोअ काजे तुमू काविंहीं कोनारा ओय ताहां कोवा."

16 ताहरुउ पौलुस उठीत कोइत आन आथोवाअहीं ईशारु कोइत कोयो, "ए इस्राएलवालां, आन देवोअ भक्ती कोअनारा उनाआ: 17 इस्राएली माअहुंउं देवे आपाअ वेगाअ डायहांहां निवड़्या, आन जेहेलाम एं माअहें मिसर देसोमेहें जिवण्ये ओते, ताहां तिये तियांहां वादाड्ये; आन वोडी सेक्ती वाअहीं तो तियांहां काडीत लेतायू. 18 तो सालीही वोरह्ये जाआं जंगलोमेहें तियांआं वेठतू रोयू, 19 आन कनान देसोमेहें हांत राज्याहा आरवीत कोइत इस्राएल वालाहां वारस हक्क आप्यो.

20 "यीं गोठीही आंदासीज हाड़ा शार होव वोरह्ये ओवे, तिहींइं फासाड़ी तिये शमुवेल भविश्यवक्ताआ जागे जाआं तियांमेएं न्याय निवाड़ू कोअनारा ठरव्या. 21 तिहीं फासाड़ी तियां एक राजा माग्यू; ताहां देवे सालीही वोरह्योअ काजे बिन्यामीनोअ जातीम रोत किशोअ पोर्‍या शाऊलोहो तियांपोअ राजा ठरव्यू 22 ताहरुउ शाऊलोहो काडीत कोइत दाविदोहो तियांआं राजा ठरव्यू; जियाअ बाप्तिमेहें तिये साक्शी आप्यी, ‘माहूं इसायोअ पोर्‍यू दाविद, माआं मोनोअ गोमतुज जोड़ीत गोयुहू; तोज माआं इश्शा पुरी कोए.’ 23 देव तियाआ वायदाआ पुरमाणे तियाज दाविदोअ पारवाड़ीमेहें रोत इस्राएलोअ काजे एका तारनाराहा, मोन्ज्ये ईसुहू मोकल्यू. 24 जियाआ आविइलाअ पेल योहाने आक्खा इस्राएलोमेहें मोन फिरावोअ बाप्तिस्माआं परसार कोअयू. 25 जेहेलाम योहानोअ सेवा पुरी ओवुहूंज ओती, तेहेलाम तिये कोयो, ‘तुमू माहूं की समजीइताहा? आंय तो नाहां जियाआ तुमू वाट जोवताहा! पोन पाला, माआं फासाड़ी एक जोउं आवनारु होये, जियाआ गुडामेएं खाहड़े काडुहूं बी माआं लायकी नाहां.’

26 "माआं पाव्हीइला, तुमू जे अब्राहामोअ पोर्‍ये होये; आन तुमू जे देवोहो बितेहे, तुमाआं जागे या तारणोअ वसन मोकलाअयोहो! 27 काहाके येरुसालेमोमेएं रोनारे आन तियांआं डायहां, तियाहा ने ओलख्यु आन नाहां भविश्यवक्ताआ गोठी समज्यी, जे हारेक यहुदी आरामोअ दिही वासतेहे, तेबी ईसुहू दोशी ठरवीत कोइत तियी गोठीही पुरी कोअयी. 28 तियांहां माइलोअ जोगीही कोड्लीज सुक ने जोड़्यी तेबी तियां पिलातोहो रावणी कोअयी के तियाहा माईंत टाकुहूं जोवे. 29 ते तियाआ बाप्तिमेहें नियमोअ पुस्तकोमेहें जो किबी लेख्योहो, तों पुरो ओवीइलाआ फासाड़ी तियाहा क्रुस खांबोपोअ रोत उतार्‍यू आन माहणोम मिक्यू. 30 पोन देवे तियाहा मोल्याम रोत जिवतु कोअयू, 31 आन तो तियांहां जे तियाअरी गालीलोम रोत येरुसालेमोमेहें आयेते, डाहटा दिही जाआं देखाअतू रोयू; इस्राएली माअहुंउं सामने ओमे तेंज तियाआ साक्शीदार होय. 32 आमू तुमुहूं तिया आथवसनोअ बाप्तिमेहें ए हाजी बातमी कोत आपताहा, जों वेगाआ डायहांअरी लेदोतो 33 के देवे ईसुहू जिवाड़ीत कोइत, तोज वायदो आपाअ पोर्‍याअ काजे पुरो कोअयो; जेहलोहो दुसरा भजनोमेहें बी लेख्योहो:

"तू माआं बेटुह्हू होय;

आंय ताआ आब्हू बोण्युहूं."

34 आन तियाआ मोल्याम रोत जिवाड़ीइलाअ बाप्तिमेहें बी देवे एहें कोइत कोयो, के तो केदिहीं ने जिरे:

"आंय दाविदोहो आपल्यू पवित्र आन पाक्कू आशिर्वाद

तुमुहूं आपिहीं."

35 तियाहा काजे तिये फाशोअ एका भजनोमेहें बी कोयोहो,

"तू ताआ इमानदार सेवकोहो ने जिरुहूं देही."

36 काहाके दाविद तोम देवोअ ईश्शाअ पुरमाणे तियाआ दिहोमेहें सेवा कोइत हुवीत गोयू, आन तियाआ तोड़ वेगाअ डायहांअरी डाटी देदो, आन तियाआ तोड़ माहणोम जिरीत बी गोयो. 37 पोन जियाहा देवे जिवाड़्यू, तो जिरीत ने सेकू. 38 तियाहा काजे, पाव्हीइला, तुमू जाईंत ल्या, के ईसु वाअहीं तुमुहूं पापोअ माफीइ खबर जोड़्यीही 39 आन जियीं गोठीमेहें तुमू मोशेए कायदावाअहीं निर्दुस ने ठरीत सेकतेते, तियीं आखीज गोठीमेहें हारेक विश्वास कोअनारो ईसु वाअहीं निर्दुस ठरेहे. 40 तियाहा काजे सांबालीत रोवा, एहेलोहो ने ओवुहूं जोवे के भविश्यवक्ताआ पुस्तकोमेहें जो कोअयोहो, तो तुमापोअ बी आवित पोड़े:

41 "ए निंदा कोअनारां, पाला,

आन बोगलाआ, आन

आरवाइत जावा!

काहाके आंय तुमाआं दिहोमेहें एक काम कोअहो,

एहेलोहो काम के जर एखू तुमाअरी तियाआ गोठी

समजाड़े, ताहां तुमू केदिहीं विश्वास ने कोअहा!"

42 जेहेलाम पौलुस आन बरनबास बारथे निहीत्ला तेहेलाम माअहें तियांहां रावणी कोए वोल्ये के आगल्याआ आरामोअ दिही आमुहूं ए गोठी फाशीइ कोतापजा. 43 जेहेलाम सभा उठीत गोयी तेहेलाम यहुदी आन यहुदीइ विश्वास मानित सालनारा भक्तोंम रोत वारुज जोएं पौलुस आन बरनबासोअ फासाड़ी जाने वोल्ये; आन तियां तियांहां गोठी कोइत समजाड़्यो के देवोअ मेरवानीमेहें मजबुत रोजा.

44 आगल्याआ आरामोअ दिही होयरोमेर्‍येए आखेज कोअलेहे माअहें प्रभुउ वसन उनाइलोअ काजे टोलू वोलीत गोये. 45 पोन यहुदी गर्दीही पालीत कोइत खोते वाअहीं पोआइत गोया, आन निंदा कोइत पौलुसोअ गोठीइ विरुद्दाम गोगा वोल्या. 46 ताहां पौलुस आन बरनबास हिमते वाअहीं कोयो, "देवोअ वसन पेल तुमुहूं कोत आपाअतो याआ गरज ओती; पोन जाहां तुमू तियाहा सेटे हारताहा, आन सोताहा अमर जिवनोअ लायकीइ नाहां ठरीवता, ताहां पाला, आमू बिगर यहुदीइ जागे जाताहा. 47 काहाके प्रभु आमुहूं आदेश आयुहू:

"आंय ताहूं बिगर यहुदीइ काजे

उजालो ठरव्योहो,

काहाके तू धरतीइ मेरे कोपरे जाआं

तारणोअ बाआ बोणुहूं जोवे."

48 ओं उनाइत कोइत बिगर यहुदी खुस ओत गोये, आन प्रभुउ वसनोअ स्तुती कोए वोल्ये; आन जेतेहे कायम जिवनोअ काजे निवाड़ाअयेते, तियां विश्वास कोअयू.

49 ताहरोअ प्रभुउ वसन तिया आक्खा मुलखोमेहें पसरो वोल्यो. 50 पोन यहुदी माट्यों भक्तण बोईंहीं आन होयरो मेर्‍याआ पुढार्‍योहों पोडकावया, आन पौलुस आन बरनबासोअ विरुद्दाम कांय-कांय कोत कोइत तियांहां तियांआं गावोंअ हिंवोंअ बारथे काडी देदा. 51 ताहराअ ते तियांआं सामने तियांआं गुडाअरी तुलो फोकड़ीत कोइत इकुनियुम जाता रोया. 52 आन अंताकिया मंडड़ीइ विश्वासी खुसी वाअहीं आन पवित्र आत्मा वाअहीं भारपुर पोआते गोये.