1 "माआं यहुदी पायहों, जों आंय ओमे तुमाआं सामने कोतापोहो तों माआं उत्तर उनाआ!" 2 तियाहा तियांअरी इब्री बाशामेहें गोगत्लू उनाइत तें जाअखेज ठावके ओत गोये, ताहां पौलुसे कोयो:

3 "आंय ताम यहुदी माटी होय, जो किलिकियाआ तारसुसोमेहें उबज्यु; पोन या होयरोम गमालिएल गुराआ जागे बोहीत सिकाअयु, आन वेगाआ डायहांआं कायदाआ खरी रितीवाअहीं सिकाअयु; आन देवोअ काजे एहेलिही धुंद ओती, जेहलीही धुंद आज तुमू आखा होय. 4 आंय या पंथाआ माहुंहूं एतुहू तारास देदू के तियांहां माआड़ीत बी देदे. आंय माट्योहोंन बोईंहीं बांदी-बांदीइ जेलेमेहें टाकी देदे. 5 यी गोठीइ काजे डाया पुंजारकां आन पुरु पोन्सू बी साक्शी होय, के माहूं तियांप रोत दमिश्कवालां यहुद्याहां लेखल्यो आदेश पत्र जोड़्यो, ताहां आंय तों लेत कोइत तिहींइं विश्वासी माहुंहूं बी बांदीत कोइत येरुसालेमोम लेतावीइलोअ काजे आन तियांहां डोंड आपाड़ीलाआ काजे दमिश्कमेहें वाट लागुतो.✝

6 "जेहेलाम आंय साली-सालीइ दमिश्क होयरोअ आहने पोतू, ताहां एहेलोहो ओवो के एक आंदास माजन दिहेए वेले एक्काइज एक वोडी उजेड़ जुगोम रोत माआं शारु मेरे सोमक्यी. 7 आन आंय पुयींपोअ ओदरीत पोड़्यु आन ओ आवाज उनाअयू, ‘शाऊल, शाऊल, तू माहूं काहा तारास देहे?’ 8 आंय उत्तर आप्यो, ‘प्रभु, तू कोडू होय?’ तिये माहूं कोयो, ‘आंय ईसु नासरी होय, जियाहा तू तारास देहे.’ 9 माआ जोड़ीदारहों उजेड़ ते देख्यू, पोन जो माअरी गोगतुतो तियाआ आवाज ने उनाअया. 10 ताहां आंय कोयो, ‘ए प्रभु, आंय की कोअ?’ प्रभु माहूं कोयो, ‘उठीत कोइत दमिश्कोम जा, आन जों किबी देवे ताआ काजे ठरव्योहो तों ताहूं कोइलोअ आवे.’ 11 जाहां तिया उजाला वाअहीं आंय आंद्लू ओत गोयू, ताहां आंय माआ जोड़ीदारोंअ आथ तोइत कोइत दमिश्कमेहें आयू.

12 "ताहरुउ हनन्या नावोअ कायदाआ पुरमाणे सालनारु एक भगत माटी ओतू, तियाआ तिहीं रोनारा आखा यहुद्यामेहें जाअखु मानपान ओतू. 13 तो माआं जागे आयू, आन उबू रोत कोइत माहूं कोयो, ‘ए पाही शाऊल, फाशुउ पालु वोल!’ तेताजमेहें माहूं देखाओ वोल्यो आन आंय तियाअहें पाल्य. 14 ताहां तिये कोयो, ‘आपाआ वेगाआ डायहांआं देवे ताहूं तियाआ इश्शा ओलखे तेहें, आन तियाआ धर्मी सेवकोहो पाले तेहें आन तियाआ कोल्यी गोठी उनाय तेहें काजे निवड़्युहू. 15 मोन्ज्ये जे गोठी तुमे देख्यीही आन उनाअयुहू ते आखा माअहुंउं सामने कोत कोइत तू तियाआ तियीं साक्शी बोणीत सेकही. 16 आन ओमे काहा वाआ लागाड़ेहे? उठ, तियाआ नावोम बाप्तिस्मा ले, आन तियाहा प्रार्थना कोअ आन ताआ पाप तुवीत ले.’

17 "जेहेलाम आंय फाशुउ येरुसालेमोम आवित कोइत मंदिरोम प्रार्थना कोअया कोअतुतो, तेहेलाम आंय दर्शन देख्यो. 18 आन तिहींमेहें प्रभु देखाअयू, जो माहूं कोहे, ‘तावणी कोइत येरुसालेमोम रोत वेगु निहीत जा; काहाके तें माआं बाप्तिमेहें ताआ साक्शी ने माने.’ 19 ताहां मी कोयो, ‘प्रभु, ते तोम सोताहा जांअताहा के आंय तापोअ विश्वास कोअनाराहां जेलेमेहें टाकतुतो आन गावों-गावों आराधनालयोमेहें मार देवाड़तुतो. 20 जेहेलाम ताआ साक्शीदार स्तिफनोहों माअताते, तेहेलाम आंय बी तिहीं उबू रोत रोयुतो आन यी गोठीम पेलाअयुतो, आन तियाहा माअनाराआ आंगड़े सांबालतुतो.’ 21 तेहेलाम प्रभु माहूं कोयो, ‘जातुरो: काहाके आंय ताहूं बिगर यहुदीइ जागे दूर-दूर मोकलिहीं.’"

22 माहें तियाआ एती गोठ जाआं उनाइत रोयेन, ताहरेए खुब जोरे आअड़्ये, "एहेला माहुंहूं का माईंत टाका! याआ जिवता रोअलाअ लायकी कायनाहां!" 23 जेहेलाम तें माहें आअड़ीते जात आंगड़े काडीत गुंउंवीइते आन जुगोमेहें तुलो ऊडाड़तेते; 24 ताहरुउ रोमी सेयनिकोअ अधिकाऱ्ये कोयो, "याहा किल्लाम लेत जावा, आन फोमहूं सापका देत कोइत कोबलावा. ताहां एं यहुदी माहें की गोठी वाअहीं याआ विरुद्दामेहें एहेलेहे आअड़ीइतेहें तों माहूं बी समजाय." 25 जाहां तियां पौलुसोहो सांबड़ाआ दोअड़ा वाअहीं बांद्यु, ताहां तिये तिहीं आहने उबु ओतू तिया आधिकाऱ्योहो कोयो, "तुमू एका रोमनवाला माट्योहो, आन तोबी विण सुकीज, सापका देएलो ओं कायदाअ पुरमाणे ठीक होय के?"

26 ओं उनाइत कोइत आधिकार्‍ये रोमन सेयनिकोअ मुख्याआ जागे जात कोइत कोयो, "तू ओं की कोअहे? ओ ते रोमी माटी होय."

27 ताहां रोमन सेयनिकोअ मुख्ये तियाआ जागे आवित कोइत कोयो, "माहूं को, तू रोमनवालू होय?" तिये कोयो, "होव."

28 ओं उनाइत कोइत रोमी सेयनिकोअ फुद्दारे कोयो, "जाअखीलाहा पोशा आप्या ताहां जात माहूं रोमन बोणिइलोअ पद जोड़्योहो." पोन पौलुस कोयो, "आंय ताम जल्मार्‍युज रोमनवालू होय."

29 ताहां जें माअहें तियाआ सौकीशी कोअनारे ओते, तें ताब्बुड़ तियाआ जागे रोत सेटे होरकीत गोये; आन रोमन सेयनिकोअ फुद्दार बी ओ रोमनवालू होये आन आंय याहा बांद्युहू, एहेलोह जाइंत कोइत तोबी बित गोयू.

30 यहुदी माहें पौलुसोपोअ किहाआ आरोप लागाड़तेहे तों वारुहूं जाइंलाआ इश्शा वाअहीं रोमन सेयनिकोअ फुद्दारे बिहीरे दिही तियाआ बेड़ी सोड़ी देदी; मुख्य पुंजारा आन पुरी महासभाहा टोलू वोले तेहें आदेश आप्यू, आन ताहरुउ पौलुसोहो निसे लेत जात कोइत तियांआं सामने उबू कोइ देदू.