प्रेशित 25

वोडा राजाअ सामने पौलुसोअ रावणी

1 तिया मुलखोम पोतीइलाआ तीन दिहोअ फासाड़ी फेस्तुस केसरिया रोत येरुसालेम गोयू. 2 ताहां डाया पुंजारा आन यहुदी पुढार्‍यों तियाआ सामने पौलुसोअ विरुद्दाम आरोप लागाड़्यु; आन तियाहा विनंती कोअयी. 3 तियां फेस्तुसोहो रावणी कोअयी के तो पौलुसोहो येरुसालेम हादाड़े, काहाके तियां पौलुसोहो वाटेज माइत टाकीइलाअ कदर काड्यीते. 4 फेस्तुसे उत्तर आप्यो, "पौलुस केसरियाम जेलेम होय, आन आंय सोताहा तिहीं उतवाल जाहीं." 5 फाशोअ कोयो, "तुमामेर्‍याअ जे पुडारी होय ते आरी आवजा, आन जर ये माट्ये काविहीं खाराब काम कोअयोय ताहां ते तियापोअ दोश लागाडे."

6 फेस्तुस तियांआं विसमेहें आंठेक-दोहेक दिही रोत कोइत केसरिया जातु रोयू; आन बिहरे दिही न्यायनिवाड़ाआ कोर्ठोम बोहीत कोइत पौलुसोहो लेतावे तेहें आदेश आप्यू. 7 जेहेलाम तो आयू ताहां जे यहुदी येरुसालेमोम रोत आयाते. तियां केंडवारीत उबा रोत कोइत तियापोअ जाअखीलाहा कठीण आरोप लागाड़्या, जियांअ पुरावू ते ने आपीत सेकताते. 8 पोन पौलुसे उत्तर आप्यो, "आंय नाहां यहुदीइ कायदाआ, नाहां मंदिरोअ, नाहां कैसरोअ विरुध्दाम काविंहीं पाप कोअयू."

9 ताहरुउ फेस्तुसे यहुद्याहां खुस कोइलोअ इश्शा वाअहीं पौलुसोहो कोयो, "केहें ताआ इश्शा होय के येरुसालेमोमेहें जात कोइत तिहीं माआं सामने ताआ न्यायनिवाड़ु ओवे?"

10 पौलुसे कोयो, "आंय कैसरोअ न्यायनिवाड़ाआ कोर्ठोअ सामने उबू होय; माआ न्यायनिवाड़ु इहींज ओवुहूं जोवे. तुमुहूं ताम होसकोअतीज मुंदू होय के मी यहुद्याआ किज गुनू नाहां कोअयू. 11 जर आंय गुनेगार ओय आन माइत टाकुहूं जोगोहो काविहीं काम कोअयोय, ताहां माआं मोइलाआ बी तियारी होय; पोन जियीं गोठीइ ए मापोअ आरोप लागाड़ताहा, जर तियांमेर्‍यीइ कोड्ली बी गोठ खरी ने ठर्‍यी, ताहां कोडोज माहूं यांआं आथोम होपतीज नाहां सेकतो. आंय कैसरोहो रावणी कोअहो."

12 ताहरुउ फेस्तुसे सल्लागारोअरी सभा हादीत गोठी कोयीन ताहरुउ उत्तर आप्यो, "तुमे कैसरोपोअ न्याय माग्युहू, ताहां तू कैसरोअ जागेज जाही."

राजा आग्रिप्पा आन बिरनीकेए सामने पौलुस

13 थोड़ाक दिहोअ फासाड़ी आग्रिप्पा राजा आन बिरनीके केसरियामेहें आवित कोइत फेस्तुसोहो मिल्या. 14 ते वारुज दिही तिहीं रोया तिहींइं फाटी फेस्तुसे पौलुसोअ बाप्तिमेहें राजाहा कोयो: "एक माटी होय, जियाहा फेलिक्स जेलेमेहें सोड़ीत गोयुहू. 15 जेहेलाम आंय येरुसालेमोम ओतू, तेहेलाम मुख्य पुंजारु आन यहुदी डायहां तियाआ सौकीशी कोअयी आन तियांआं इश्शा ओती के तियाहा डोंडोअ आदेश जोड़े. 16 पोन मी तियांहां उत्तर आप्यो, कोड्ला बी माहुंहूं जाअहूं जाआं गुनेगारोहो तियापोअ गुनू लागाड़नाराआ सामने उबू रोत कोइत गुनाआं उत्तर आपीइलाअ संदी ने जोड़े, ताअहूं जाआं डोंडोअ काजे होपी देअलोअ एहेलिही सवाय रोमनवालाआ कायनाहां. 17 तियाहा काजे ते इंहीं टोलवाअला, तेहेलाम आंय जारिक बी वाआ ने लागाड़्यी, पोन दुसरे दिही न्यायनिवाड़ाआ कोर्ठोम बोहीत कोइत तिया माट्योहो सामने लेतावे तेहें आदेश आप्यू. 18 जाहां तियाआ गुनू लागाड़नारा उबू रोया, ताहां जेहलुहू आंय समजीइतुतो तेहलुहू कठीण गोठीइ गुना तियां नाहां लागाड़्यु. 19 पोन ते तियांआं पंथाआ आन ईसु नावोअ एका माट्योअ बाप्तिम वादावाद कोअताते, जो मोइत गोयूतो आन पौलुस तियाहा जिवतु होय कोतूतो. 20 माहूं यीं गोठीइ मुंदू की कोइत जोड़े कोत विसारोम पोड़्यू? तियाहा काजे आंय पौलुसोहो फुशो, ‘केहें तू येरुसालेमोम जाही के तिहीं ताआ यीं गोठीइ फैसलू ओवे?’ 21 पोन जाहां पौलुसे न्याय माग्यू के तियाआ यी केसेए फैसलू सम्राटोअ जागे ओवुहूं जोवे, ताहां मी आदेश आप्यू के जाअहूं जाआं आंय कैसरोअ जागे ने मोकलो ताअहूं जाआं याहा देखरेखीम मिका."

22 ताहरुउ आग्रिप्पे फेस्तुसोहो कोयो, "आंय बी तिया माट्योअ गोठ उनाअहूं कोअहो." तिये कोयो, "तू हांदाआ उनाइत लेही."

23 बिहरे दिही जाहां आग्रिप्पा आन बिरनीके वारुहूं तियारी कोइत आया आन रोमी सेयनिकोअ मुख्या आन गांवोंमेर्‍याआ मुख्य पुढार्‍योंअरी सभागृहामेहें आया, ताहां पौलुसोहो लेतावे तेहें काजे फेस्तुसे आदेश आप्यू. 24 फेस्तुसे कोयो के, "राजा आग्रिप्पा, आन आखा माअहूं जे इंहीं आमाअरी होय, तुमू या माट्योहो पालताहा, जियाआ बाप्तिमेहें आखा यहुद्यां येरुसालेमोम आन इंहीं बी आअड़ी-आअड़ीइ माहूं विनंती कोअयी के ओ माटी जिवतो रोअलाआ लायकीइ नाहां. 25 पोन आंय जांइत लेदो के माइत टाकाय एहेलोहो ये किज नाहां कोअयो; आन जेहेलाम ये सोताहाज माननीय राजाआ न्याय माग्यू, ताहां आंय याहा रोम मोकलीइलोअ निर्णय कोअयो. 26 माहूं याआ बाप्तिमेहें किज पाक्की गोठ ने जोड़यी के माआं मालख्योअ जागे लेखो. तियाहा काजे याहा तुमाआं सामने आन खास कोइत राजा आग्रिप्पा, तुमाआं सामने लेतायुहू के सौकीशी ओवे तिहीं रोत माहूं वाजीहीं लेखुहूं जोगोहो जोड़े. 27 काहाके जेलार्‍यापोर्‍युउ आरोप वारुहूं स्पश्ट ने कोअता आवे ताअहूं जाआं एहेलोज मोकलीइलो माहूं बोराबर नाहां देखाअतो."