प्रेशित 18

करिन्थ सेहरोम पौलुस

1 तिहींइं फासाड़ी पौलुस एथेन्स होयर टाकीत करिन्थमेहें आयू. 2 तिहीं तियाहा अक्विला नावोअ एक यहुदी मिल्यू, जियाअ जल्म पोन्तुसोमेहें ओयोतो. तो तियाआ लाडी प्रिस्किल्लाअरी इटली रोत तेहेलाजमेहें आयुतो, काहाके क्लौदियुसे आखा यहुदीही रोम सेहरोम रोत निहीत जाअलाअ आदेश आप्युतो. तियाहाज काजे पौलुस तियांहां मिलू गोयू. 3 पौलुसोअ आन तियांआं एकुज धंदू ओतू, तियाहा काजे तो तियांअरी रोयू आन तियांअरी तंबू बोणावीइलाअ काम कोअयो, काहाके तंबू बोणावीलाअ तियांआं धंदू ओतू. 4 तो हारेक आरामोअ दिही आराधनालयोमेहें वाद-विवाद कोइत यहुदीही आन युनानीही कोल्यी गोठी पोअ विश्वास मिके तेहें काजे तो कोत समजाडीइलोअ कोशित कोअतुतो.

5 जेहेलाम सिलास आन तिमथ्या मकिदुनियाम रोत आया, ताहां पौलुस वसन कोतापीइलाअ धुंदेमेहें यहुदीही साक्शी कोतापू वोल्यू के ईसुज ख्रिस्त होय. 6 पोन जेहेलाम तें विरोद आन निंदा कोए वोल्ये, ताहां तिये तियाआ आंगड़े झटकीत कोइत कोयो, "तुमाआं रक्त तुमाआंज बोसी रोये! आंय निर्दुस होय. ओमे रोत आंय बिगर यहुद्याआं जागे जानारु." 7 तिहीं रोत उठीत कोइत तो तितुस युस्तुस नावोअ देवोअ एका भक्तोअ कोअमेहें आयू; तियाआ कोअ आराधनालयोहो लागीत ओतो. 8 ताहरुउ आराधनालयोअ पुडारी क्रिसपुसे तियाआ पुरो घराणो मिलीत प्रभुपोअ विश्वास मिक्यू; आन वारुज करिन्थवालां उनाइत कोइत विश्वास मिक्यू आन बाप्तिस्मा लेदो. 9 प्रभु एकी राती दर्शनोवाअहीं पौलुसोहो कोयो, "मा बिही, पोन कोतूज जा आन बोंद मा रोही; 10 काहाके आंय ताअरी होंव, आन कोडोज ताआ नुकसान ने कोइत सेके; काहाके या गावोमेहें माआं जाअखीलेहे माअहें होय." 11 तियाहा काजे तो तियांमेहें देवोअ वसन सिकाडतू जात डेड़ वोर्ह्ये जाआं रोयू.

12 जेहेलाम गल्लियो अखाया देसोअ राज्यपाल ओतू, ताहां यहुदी माअहें एकी कोइत पौलुसोअहें सालित आये, आन तियाहा कोर्ठोम लेतावीत कोने वोल्ये, 13 "ओ माअहुंहूं समजाडेहे के देवोअ भक्ती एहेली रिती वाअहीं कोअहूं जोवे, जे कायदाअ विरुद्दाम होये."

14 जाहां पौलुस गोगुहूंज कोअतुतो, तेहेलाम गल्लियो यहुद्याहां कोयो, "ए यहुदीया वाला, जर ए काविंहीं अन्याय नेत सुकीइ गोठ रोती, ताहां बोराबर रोतो के आंय तुमाआं उनाअतू. 15 पोन जर ए गोठी भान्गडीइ शब्दाअ, आन नावोअ, आन तुमाआं जागर्‍याअ कायदाअ बाप्तिमेहें ओय, ताहां तुमुहूंज मुंदू; काहाके आंय एहेली गोठीइ न्यायी नाहां बोणनारु." 16 आन तिये तियांहां कोर्ठाम रोत काडी देदे. 17 ताहरेए आखे माअहें आराधनालयोअ पुडारी सोस्थेनेसोहो तोइत कोइत कोर्ठोअ सामने देदू. पोन गल्लियो यीं गोठी पोअ किज दिहान ने देदो.

अंताकियाम वापिस वोलीइलो

18 पौलुस जाअखीला दिही जाआं तिहीं रोयू. ताहरुउ विश्वासी पायहोंअरी रोत विदा ओत कोइत किंख्रियामेहें याअकाजे मुन्को कात्रायो, काहाके तिये पालनी तोअयीते,✝18:18 गणती 6:18 आन जाहाजेपोअ सिरिया जानु वोल्यू आन तियाअरी प्रिस्किल्ला आन अक्विला ओते. 19 तिये इफिसोम पोतीत कोइत प्रिस्किल्लान अक्विलाहा तिहीं सोड्ये, आन तो आराधनालयोमेहें जात कोइत यहुद्यांअरी तोणाउ वोल्यू. 20 जेहेलाम तियां तियाहा विनंती कोअयी, "आमाअरी फाशाअ थोड़ाक दिही रो." ताहां तो ने मान्यू; 21 पोन ओं कोत कोइत तियांअहीं रोत जानु वोल्यू, "जर देवोअ इश्शा ओय ताहां आंय तुमाआं जागे फाशुउ आविहीं." ताहरुउ तो इफिसोमेहें रोत जाहाजेम बोहीत कोइत जातू रोयू;

22 आन केसरियामेहें उतरीत कोइत येरुसालेमोम गोयू आन मंडड़ीही सलाम कोइत अंताकियाम आयू. 23 ताहरुउ थोड़ाक दिही रोत कोइत तो तिहीं रोत निहींयू, आन एकी वोगेहे रोत गलातिया आन फ्रूगिया मुलखोमेहें आखा सेलाहा मजबुत कोअतू फिर्‍यू.

इफिस आन करिन्थ होयरोमेहें अपुल्लोस

24 अपुल्लोस नावोअ एक यहुदी, जियाअ जल्म अलेक्झांद्रियामेहें ओयोतो, जो हुशार माटी ओतू आन वसनोहों वारुहूं जांअतुतो, तो इफिसोमेहें आयू. 25 तिये प्रभुउ मार्गाआ शिक्शण लेदोतो, आन मोन लागाड़ीत कोइत ईसुउ बाप्तिम वारुहूं वारुहूं उनाअतू आन सिकाड़तुतो, पोन निस्ती योहानोअ बाप्तिस्माआं गोठ तियाहा मुंदू ओती. 26 तो आराधनालयोमेहें बिन्दास ओत कोइत गोगु वोल्यू, पोन प्रिस्किल्ला आन अक्विला तियाआ गोठी उनात कोइत तियाहा तियांआं जागे लेत गोये आन देवोअ वाट तियाहा जाअखी वारुहूं कोताप्यी. 27 जेहेलाम अपुल्लोसे ठरव्यो के तियी तोड़ उतरीत कोइत अखायामेहें जाअलोहो, ताहां विश्वासी पायहों तियाहा हिम्मत आपीत कोइत अखायावाला विश्वास्याहां लेख्यो के ते तियाहा वारुहूं मिलुहूं जोवे; आन तिये तिहीं पोतीत कोइत तियां माअहोंअ खुब मदत कोअयी जियां देवोअ मेरवानी वाअहीं विश्वास कोअयुतो. 28 काहाके तो वसनोअ आधारो वाअहीं ईसु ओज ख्रिस्त होये कोत वोडी हिम्मतो वाअहीं यहुदी माअहोंअ आगाड़ी कोतू रोयू.