प्रेशित 23

1 पौलुसे महासभाअहें एक सारकी नजरेवाअहीं पाल्यो आन कोयो, "माआं इस्राएली पायहों, आंय आज जाआं देवोअ काजे बिलकुल खोरा विसारोवाअहीं जिवन जिवतु रोयुहू." 2 डाये पुंजारके हनन्ये तिहीं जागेज उबा रोत रोयाते तियांहां पौलुसोअ कानसावणाम थापुड़ देयतेहें आदेश आप्यू. 3 तांहा पौलुसे तियाहा कोयो, "ए सुनो हारल्या पितड़ा,✝23:3 मत्तय 23:27,28 देव ताहूं देय. तू कायदाआ पुरमाणे माआ न्याय कोऊ बोठुहू, तेबी फाशुउ कायदाआ विरुद्दाम माहूं देएलाआ आदेश आपेहे!"

4 जे पौलुसोअ आहने उबा रोयाते तियां कोयो, "केहें तू देवोअ पुंजाराहा गाइ देत्लू के?"

5 पौलुसे कोयो, "ए पायहों, माहूं ने मुंदू ओतू के ओ डायु पुंजारु होय; काहाके लेख्योहो: ‘तुमाआं पुढार्‍योअ विरुद्दाम तू बाक्ती गोठी मा कोही.’"✝23:5 निर्ग 22:28

6 फाशुउ पौलुस ओं ओलखीत कोइत के एक भाग सादूकीइ आन एक भाग फरिसीइ होय, सभामेहें आअड़ीत कोइत कोयो, "पायहों, आंय फरिसी आन फरिसीइ घराणाआ माटी होय.✝23:6 प्रेशित 26:5; फिलि 3:5 मोल्याआं आशा आन फाशोअ जिवीत उठीइलाआ बाप्तिम इंहीं माआं सौकीशी ओवेहे."

7 जाहां तिये ए गोठ कोयी ताहां फरिसी आन सादूकीमेहें भान्गड़ी ओनी वोल्यी; आन सभामेहें बेन भाग पोड़ीत गोया. 8 काहाके सादूकी माअहें ते ओं कोतेहे, के नाहां फाशोअ जिवीत उठीइलो, नाहां देवदुत आन नाहां आत्मा;✝23:8 मत्तय 22:23; मार्क 12:18; लुक 20:27 पोन फरिसी ओं आखो मानतेहे. 9 ताहां वोडु तुदड़ू उठ्यू आन थोड़ाक फरिसीइ वोगर्‍याआ कायदाआ मास्तर ओता ते, उठीत उबा रोया आन एहें कोत कोइत सुलाआ वोल्या, "आमुहूं या माट्योमेहें किज सुक नाहां देखाअती, आन जर एखु आत्मा नेत देवदुत तियाअरी गोग्युय ताहां किमें?"

10 जाहां जाअखीज भान्गड़ मातीत गोयी, ताहां तें पौलुसोअ तुकड़ा-हुकड़ा ने कोइ देय तो रोमी सेयनिकोअ मुख्यू बियू, आन उतरीत कोइत तियाहा तियांआं विसमेहें रोत जबरजस्ती काडीत किल्लाम लेत जाय तेहें सेयनिकोहो आदेश आप्यू.

11 तियीज राती प्रभु पौलुसोअ आहने उबू रोत कोइत कोयो, "तू धिर खेट; काहाके जेहलीही तुमे येरुसालेमोमेहें माआं साक्शी आप्यी, तेहेंज कोइत ताहूं रोमोमेहें बी साक्शी आपुहूं पोड़े."

पौलुसोहो माईंलाआ कदर

12 जाहां दिही उगु ताहां यहुदी एक गोठ कोइते आन शप्पत खादी के जाअहूं जाआं आमू पौलुसोहो ने माईंत टाको, ताअहूं जाआं रोटा-पाअयोंहों आमू आथ ने लागाड़नारा. 13 जियां ए शप्पत खादीते, ते सालिही जोओं रोत वादार ओता. 14 तियां मुख्य पुंजारा आन डायहांआं जागे जात कोइत कोयो, "आमू पौलुसोहो माईंत ने टाको ताअहूं जाआं रोटा-पाअयोंहों आथ ने लागाड़नारा कोत शप्पत खादीही. 15 ताहां ओमे महासभाअरी रोमी सेयनिकोअ मुख्याहा सोमजाड़ा के ते तियाहा तुमाआं जागे लेतावे, आन एहेलोह कोवड़ावजा के तुमू तियाआ बाप्तिमेहें फाशीइ बी वारुहूं सौकीशी कोअनाराहा; पोन आमू तियाहा पोतीइलाआ पेलुज माईंत टाकीइलाअ काजे तियार रोहूं."

16 ते तियाहा माअनारा होय एहेलोह पौलुसोअ पांअजुह्हू उनाअयू, ताहरुउ तो किल्लामेहें जात कोइत पौलुसोहो खबर आप्यी. 17 पौलुसे आधिकाऱ्योमेर्‍याआ एका जोओंहों तियाआ जागे हादीत कोइत कोयो, "या जुवानोहों रोमी सेयनिकोअ मुख्याआ जागे लेत जा, ओ तियाहा किवानीइ तेबी कोनारु होय." 18 ताहरोअ तिये तियाहा रोमी सेयनिकोअ मुख्याआ जागे लेत जात कोयो, "जेलेमेर्‍युउ पौलुस माहूं हादीत कोइत विनंती कोअयी के ओ जुवान रोमी सेयनिकोअ मुख्याहा किवानीइ तेबी कोनारु होय; याहा तियाआ जागे लेत जावा."

19 रोमी सेयनिकोअ मुख्ये तियाहा आथेज तोइत आंगेज लेत जात फुशो, "तू माहूं की कोनारु ओतुतो को?"

20 तिये कोयो, "पौलुसोहो तियाआ बाप्तिम वारुहूं सौकीशी कोइलो होय, एहें कोवड़ावित यहुदी आधिकार्‍यों हांदाआ पौलुसोहो महासभामेहें लेतावे तेहें कोत ताहूं विनंती कोइलोअ मान्य कोअयोहो. 21 पोन तियांआं मा मानही, काहाके तियांमेर्‍येआ सालिही रोत वादार जोंओं होय जे तियाहा माईलाआ फाट लागाहा. तियां ओं ठरवीत लेदोहो के जाअहूं जाआं पौलुसोहो ने माएं, ताअहूं जाआं रोटू नेन पाईं ने पिनारा."

22 ताहां रोमी सेयनिकोअ मुख्ये तिया जुवानोहो ए गोठ कोत मोकल्यी, "कोडाहाज मा कोही के तुमे माहूं ए गोठ कोयीही."

पौलुसोहो फेलिक्स राज्यपालोअ जागे मोकलीइलोअ

23 ताहरुउ सेयनिकोअ मुख्ये बेन आधिकाऱ्योहों हादीत कोइत कोयो, "बेन होव सेयनिक, सत्तर कोड़ापोअ बोहनारा सेयनिक, आन बेन होव डाफावाला सेयनिक, आज राती नोव वाजे तेहेलाम केसरियाहा जाअलाआ काजे तियार कोइत मिका. 24 आन पौलुसोहो राज्यपाल फेलिक्सोअ जागे होकेहे पोताड़ीत सेके तेहें कोड़ा तियार मिका." 25 तिये एहें कोइत सिट्टी बी लेख्यी:

26 "माननीय फेलिक्स राज्यपालोहो क्लौदियुस लूसियासोअ सलाम. 27 या माट्योहो यहुदी आधिकार्‍यों तोइत माईंत टाकीइलाआ कोअल्यो, पोन माहूं मुंदू गोयू के ओ रोमनवालू होये, ताहां सेयनिक लेत जात कोइत मी याहा टाकाड़्यू. 28 ते तियापोअ की गोठी वाअहीं आरोप लागाड़ताहा तो माहूं जाइंत लेअलोअ ओत्लो तियाहा काजे आंय तियाहा तियांआं महासभामेहें लेत गोयू. 29 तेहेलाम माहूं एहेलुहू मुंदू गोयू के माईंत टाकीइलाअ नेत बांदीइलाआ जोगीही तियामेहें किज सुक कायनाहां. पोन तियापोर्‍युउ तियांआं आरोप तियांआं कायदाआ प्रश्नाआं बाप्तिम ओतू. 30 तियाहा माईलाअ फाट लागेहे कोत माआं कानोपोअ पोड़्यो, ताहां आंय लगेज तियाहा ताआ जागे मोकली देदू; आन आरोप लागाड़नाराहां बी आदेश आप्यू के ते ताआं सामने तियापोअ आरोप लागाड़े."

31 जेहलुहू सेयनिकोहो आदेश जोड़्युतो, तेहेंज कोइत ते पौलुसोहो लेत कोइत राताम-रात अन्तिपत्रिसोमेहें आया. 32 बिहीरे दिहे ते कोड़ापोअ बोहनाराहां तियाअरी जायतेहें काजे सोड़ीत कोइत ते किल्लाम वापिस वोल्या. 33 तियां केसरियाम पोतीत कोइत राज्यपालोहो सिट्टी आप्यी; आन पौलुसोहो बी तियाआ सामने उबू कोअयू. 34 राज्यपाल सिट्टी वासीत कोइत फुशो, "ओ कोड्ला इलाखाआ होय?" आन किलिकियाआ होय कोत मुंदू पोड़्यू. 35 ताहां तिये कोयो, "जाहां तापोअ आरोप लागाड़नारे बी आवे, ताहां आंय ताआ की होय तो पालिहीं." आन तिये हेरोदोअ किल्लामेहें तियाआ राखवाली कोइत मिके तेहें आदेश आप्यू.