1 शाऊल तियाआ खुनोमेहें सामिल ओतू.

तेदिहीं रोत येरुसालेमोमेर्‍यीइ मंडड़ीपोअ वोडू तारास सुरु ओत गोयू, आन प्रेशितोहों सोड़ीत बाकी आखे विश्वासी यहुदीया आन शोमरोन देसोमेहें वेरासेर ओत गोये. 2 थोड़ेक विश्वासी पाव्हीइले स्तिफनोअ तोड़ोहो माहणोमेहें ओज्यो आन तियाआ कोअते खुब रोड्ये.

3 शाऊल मंडड़ीही आरवीत टाकीइलोअ कोशित कोअतुतो; आन कोओं कोओं जात कोइते माट्योहोंन बोईंहीं ओडी ओडीइ जेलेमेहें टाकतुतो.✝

4 जें वेरासेर ओत गोयेते तें विश्वासी माहें जिहीं गोये तिहीं हाजी बातमी कोते फिर्‍ये; 5 आन फिलीप शोमरोन सेहरोमेहें जात कोइते माअहूंमेहें ख्रिस्ताआ परसार कोउ वोल्यू. 6 जे गोठी फिलीप्पे कोयी ते गोठी माअहें कान देत उनाअतेते आन जे समत्कार तो देखाड़तुतो तियांहां तें देखतेते. 7 काहाके डाहटा जोओंमेहें रोते पुते किगलीइतेज निहींत गोये, आन डाहाटा जोओंमेहें रोत लखवाअ बिमारीवाले आन लेंगड़े बी हुदरीत गोये; 8 आन तिया सेहरोमेहें जुदी खुसी आवित लागी.

9 यारोत पेल तिया सेहरोमेहें शिमोन नावोअ एक माटी ओतू, जो जादूमंतर कोइत शोमरोनोअ माअहुंहूं बोगलाडतुतो आन सोताहा महान समजीइतुतो. 10 हानेन वोडे आक्खे तियाहा मान आपते जात कोतेते, "ओं माहुंउं देवोअ तेए सेक्ती होय, जियीही महान सेक्ती कोतेहे." 11 तिये तियांहां खुब पेल रोत तियाआ जादू वाअहीं बोगलाडीत मिक्येते, तिहींज वाअहीं तें तियाहा जास्ती मानतेते. 12 पोन जेहेलाम तियां फिलीप्पोअ गोठीपोअ विश्वास कोअयू जो देवोअ राजोअ आन ईसु ख्रिस्ताआ बाप्तिम हाजी बातमी कोत आपतुतो, ताहां माअहें माटीन बोईं बाप्तिस्मा लेने वोल्ये. 13 ताहां शिमोने बी विश्वास कोअयू आन बाप्तिस्मा लेत कोइत फिलीप्पोअरी रोनु वोल्यू. आन तो समत्कार आन वोडे वोडे ताकतवाले कामे ओवत्ले देखीत कोइत बोगलाअतुतो.

14 जेहेलाम येरुसालेमोमेहें रोनारा प्रेशितहों उनाअया के शोमरोनोअ माअहूं देवोअ वसन मानित लेदोहो ताहां पेत्र आन योहानोहो तियांआं जागे मोकल्या. 15 ते बेनू जात कोइत तियां विश्वासी माअहुंहूं पवित्र आत्मा जोड़े तेहें काजे प्रार्थना कोअयी. 16 काहाके तिहीं ताअहूं जाआं तियांमेहें कोडाज पोअ पवित्र आत्मा ने उतर्‍युतो; तियां तोम फक्त प्रभु ईसुउ नावो वाअहीं बाप्तिस्मा एतोज लेदोतो. 17 ताहराअ पेत्र आन योहान तियांपोअ आथ मिक्या आन तियांहां पवित्र आत्मा जोड़्यू.

18 जेहेलाम शिमोने देख्यो, के प्रेशितोंअ आथ मिकताज वाआ विश्वासी माअहोंहों पवित्र आत्मा जोड़ेहे, ताहां तिये तियांआं जागे पोशा लेतावीत कोयो, 19 "ओ आधिकार माहूं बी आपा, मोन्ज्ये जिया कोडापोअ आंय आथ मेकिहीं तियाहा पवित्र आत्मा जोड़ीत सेके."

20 पेत्रे तियाहा कोयो, "ताआ पोशा ताअरी फुकाय, काहाके तुमे देवोअ दान पोशा वाअहीं वेसातो लेअलोअ विसार कोअयू. 21 यी गोठीमेहें नाहां ताआ इसु आन नाहां ताआ भाग होय, काहाके ताआ मोन देवोअ हुंबर सिदो कायनाहां. 22 तियाहा काजे ताआ यी खाराबीइहें रोत मोन फेरवीत कोइत प्रभुहू प्रार्थना कोओ, मोन्ज्ये ओत सेकेहे के तो ताआ मोनोअ विसार माफ कोइ देय. 23 काहाके माहूं देखाअहे के तू पित्राअ होस कडवू आन पापोअ जालेम पोड़्युहू."

24 शिमोने तियां पेत्र आन योहानोहो कोयो, "तुमू माआं काजे प्रभुहू प्रार्थना कोआ के जे गोठी तुमू कोयो, ते मापोअ ने आवुहूं जोवे."

25 ताहराअ ते बेनू साक्शी कोताप्यी आन प्रभुउ वसन कोताप्योन ताहराअ येरुसालेमोम वोलीत गोया, आन शोमरोनोअ डाहटा गावोमेहें हाजी बातमी होंबलाड़ताज गोया.

26 ताहरोअ प्रभुउ एके देवदुते फिलीप्पोहो कोयो, "उठ आन बुड्तामाआं वोगेहे तियी वाटे जा, जे येरुसालेमोम रोत गाजाअहें जाहे." ए रेटामेर्‍यीइ वाट होये. 27 फिलीप्प उठीत कोइत गोयू, ताहां इथीओपिया देसोअ एक माहुंउं आवत्लो देखाअयो, तों इजड़ाआ जातीइ ओतो आन तों इथीओपिया देसोअ राणी कन्दाकेए मंत्री आन पोशाअ कारभारी ओतो. तों भक्ती कोइलोअ काजे येरुसालेम आयोतो. 28 तों तियाआ गाडापोअ बोहीत रोयोतो, आन यशया भविश्यवक्ताआ पुस्तक वासतो वासतो जातोतो. 29 तेहेलाम पवित्र आत्मे फिलीप्पोहो कोयो, "आहने जात कोइत या कोड़ाआ गाडाअ जागेहे जा" 30 फिलीप तियाआ वोगेहे गुगदीइतुज गोयू आन तियाहा यशया भविश्यवक्ताआ पुस्तक वासत्लाहा उनाअयू, आन तियाहा फुशो "तु जों वासेहे तों ताहूं समजाअहे के?"

31 तिये कोयो, "जाअहूं जाआं एखो माहूं ने समजाड़े ताअहूं जाआं ओं माहूं कि कोइत समजाये?" आन तिये फिलीप्पोहो गाडापोअ सोढ़ीत कोइत तियाआ जागे बोहे तेहें काजे विनंती कोइत हाद्यू. 32 वसनोअ जो भाग तों वासतोतों, तो भाग ओ होय:

"तो माईंलोअ काजे लेत जातेहे तिया मेडाआ होस ओतू,

आन जेहें कोइत मेडो तियाआ रुंगहे कात्रीइनाराअ आगाड़ी ठावकोज रोहे,

तेहेंज कोइत तिये बी तियाआ सोब ने उगाड़्यी.

33 तियाहा निसेए कोत गोण्यू, तियाआ न्यायनिवाड़ू नाहां ओत सेकू.

तियी पिढ़ीइ माअहोंअ गोठी कोडो फोड़ीत कोत आपे?

काहाके धरतीपोर्‍योअ तियाआ जिवन सेलाइत गोयोहो."

34 ताहरोअ तिये आधिकार्‍ये फिलीप्पोहो फुशो, "आंय ताहूं रावण्या कोअहो, ओ भविश्यवक्ता कोडाआ बाप्तिम कोहे, आपाअ के बिहीरा एखाअ बाप्तिमेहें?" 35 ताहरुउ फिलीप्पे गोगीइलाअ सुरुवात कोअयी, आन तियाज वसनोम रोत सुरु कोइत तियाहा ईसुउ हाजी बातमी कोताप्यी. 36 वाटे सालता सालता ते एका पाअयों जागे पोता. ताहरुउ आधिकारी कोहे, "देख इंहीं पाईं होय, ओमे माहूं बाप्तिस्मा लेअहूं की वांदो होय?" 37 फिलीप्पे कोयो, "जर तू पुरा मोनोवाअहीं विश्वास कोअतुय ताहां बाप्तिस्मा लेत सेकेहे." तिये कोयो, "आंय विश्वास कोअहो के, ईसु ख्रिस्त देवोअ बेटुह्हू होये."

38 ताहां तिये आधिकार्‍ये गाडाअ सालाडनाराहा गाडो उबो राखे तेहें कोयो, आन फिलीप्पे आधिकार्‍योहो बाप्तिस्मा आप्यो. 39 जेहेलाम ते पाअयोंमेहें रोत बारथे निहीया, ताहां प्रभुउ आत्मा फिलीप्पोहो विसीत लेत जातू रोयू, तिहीं रोत तिया आधिकार्‍योहो तो फिलीप ने देखाअयू, ताहरुउ तो खुस ओवतुज तियाआ वाटे लागीत गोयू. 40 फिलीप्पोहो मुंदू गोयू के तो अश्दोदोमेहें होये, आन जाअहूं जाआं केसरिया सेहरोमेहें ने पोतू, ताअहूं जाआं तो गांवों गांवों हाजी बातमी कोतूज गोयू.