1 आग्रिप्पे पौलुसोहो कोयो, "ताहूं ताआ बाप्तिम गोगीइलाआ परवांगी होय." ताहां पौलुस आथ आगाड़ी कोइत उत्तर आपू वोल्यू, 2 "राजा आग्रिप्पा, जेत्ती गोठीइ यहुदी मापोअ आरोप लागाड़तेहे, आज तुमाआ सामने तियांआं उत्तर आपीइलामेहें आंय सोताहा नसीब समजोहो, 3 खास कोइत याअकाजे के तुमू यहुदीइ आखो वेवारो आन विवादोहो जांअताहा. तियाहा काजे आंय विनंती कोअहो, धिर खेटीत माआं गोठ उनाआ.

4 "हानुज रोत आंय केहें कोइत जिवयू तों आखा यहुद्याहां मुंदू होय. आमाआं जातीइ माअहूं मेहें आन येरुसालेमोमेहें माआं जिवन केहेलोह ओतो तों तियांहां मुंदू होये. 5 जर ते साक्शी आपनारे ओय, ताहां हानुज रोत माहूं ओलखीइतेहे के आंय फरिसी होय कोत माआं पंथाआ आखाम रोत कठीण पंथाआ पुरमाणे साल्यु.✝ 6 आन ओमे वेगाआ डायहांहां देवे आपल्या आथवसनोअ बाप्तिम मी आशा तोअयीही तिहींइं वाखरी इंहीं मापोअ न्याय निवाड़ू सालेहे. 7 तियाज वायदाअ पुरो ओवीइलाआ आशा लागाड़ीत, आमाआं बारा पारवाड़ी तियांआं पुरा मोनो वाअहीं रातेन दिही देवोअ सेवा कोअते आयेहे. ए राजा, यीज आशाआ बाप्तिमेहें यहुदी मापोअ आरोप लागाड़तेहे! 8 देव मोल्याहां फाशुउ जिवाड़त्लू, यी गोठीपोअ तुमामेर्‍याआ वार जोओंहों विश्वास काहा नाहां बोहतू?

9 "ईसु नासरीइ नावोअ विरुद्दाम माहूं खुब काही कोअहूं जोवे एहेलोह माहूं बी लागतोतो. 10 आन तेहलोज मी येरुसालेम होयरोम कोअयो; काहाके मुख्य पुंजारां पोअ रोत तेहलुहू आधिकार बी जोड़्युतो. तिहींज वाअहीं ताम जाअखीलाहा देवोअ माअहुंहूं जेलेम टाक्ये, आन जियांहां माइत टाकी देदे, तियांआं विरुद्ध माआं बी सहमती आप्यीते. 11 हारेक आराधनालयोम आंय तियांहां तारास देय-देय बोलजबरीज ईसुउ निंदा कोआड़तुतो, तेतोज नाहां पोन खोतेए बाल्लायी एतुहू गांडवात गोयू के बाहेर्‍याअ गावोंमेहें बी जात कोइत तियांहां तारास देतुतो.✝

12 "यीज धुंदेमेहें जेहेलाम आंय मुख्य पुंजारां पोअ रोत आधिकार आन आदेश-पत्र लेत कोइत दमिश्कमेहें जातुतो; 13 ताहां, महाराज! वाटेज दिहेए वेले जुगोम रोत दिहो रोत बी वादार एक उजालो, माआं आन माअरीइ हात्योओं शारी सोमकीर सोमकीइत्लो देखाअयो. 14 जाहां आमू आक्खा पुंयपोअ पोड़ीत गोया, ताहां इब्री बाशामेहें माहूं एहें कोइत गोगत्लो एक आवाज होंबलाअयू, ‘शाऊल, शाऊल, तू माहूं काहा तारास देहे? पेराणा पोअ लात देअलो ताआ काजे कठीण होय.’ 15 आंय कोयो, ‘तू कोडू होय?’ प्रभु कोयो, ‘आंय ईसु होय, जियाहा तू तारास देहे, 16 पोन तू उठ, आन ताआ गुडापोअ उबू रो; काहाके आंय याआ काजे दर्शन ताहूं आप्यो के जे गोठी तुमे देख्यीही, जियींहीं आंय ताहूं देखाड़ीहीं तियीं गोठीइ ताहूं सेवक आन साक्शीदार कोत ठरवीत सेको. 17 आन आंय ताहूं यां इस्राएलवाला रोत आन बिगर यहुद्यां रोत वासाड़ीहीं, जियांआं जागे आंय ओमे ताहूं याअकाजे मोकलोहो, 18 के तू तियांआं डोआ उगाड़े के ते आंदाराम रोत उजालाअहें, आन सैतानोअ आधिकारोम रोत देवोअहें फिरे; मोन्ज्ये मापोअ विश्वास मिकीइला वाअहीं तियांहां पापोअ माफी जोड़ीत सेके आन माआं निवड़ीइल्या माअहोंअरी जागू जोड़ीत सेके.’

19 "तियाहा काजे राजा आग्रिप्पा, आंय तिया होरगाआ दर्शनोअ गोठ ने टाल्यी. 20 पोन पेल दमिश्कोअ, तिहींइं फासाड़ी येरुसालेमोअ, आन ताहरेए यहुदीयाअ पुरा देसोअ रोनाराहां, आन बिगर यहुदीही समजाड़तू रोयू, के मोन फेरवा आन देवोअहें फिरीत कोइत मोन फिरावीलाअ लायक काम कोआ.✝ 21 यीं गोठीइ वाखरी यहुदी माहूं मंदिरोमेहें तोइत कोइत माइत टाकीइलाअ कोशित कोअयी. 22 पोन देवोअ मदतो वाअहीं आज आंय इंहीं उबू रोत कोइत हानान वोडाआ सामने साक्शी आपोहो, आन तियीं गोठीही सोड़ीत किज नाहां कोतू जे भविश्यवक्ता आन मोशे बी कोयीते के ओवनारी होय, 23 आन तियाआ परमाणे ख्रिस्ताहा दुख वेठीइलो आवे, आन तोज आखा रोत पेल मोल्याम रोत जिवीत उठीत कोइत, आमाआं माअहूंम आन बिगर यहुदीमेहें सुटका आपनारा उजालाअ परसार कोए."✝

24 जेहेलाम तो एहें कोइत उत्तर आप्या कोअतुतो, तेहेलाम फेस्तुसे आअड़ीत कोयो, "पौलुस, तू गांडू होय. जाअखी विद्या वाअहीं तू गांडवात गोयुहू."

25 पोन पौलुसे कोयो, "माननीय फेस्तुस, आंय गांडू नाहां, पोन खोरी गोठ आन ओकलेए गोठी कोहो. 26 जे गोठी आंय साती ठोकीत सामने गोगोहो, ते गोठी राजाहा बी मुंदू होय; आन माहूं विश्वास होय के यीं गोठीमेर्‍यीइ कोड्लीज गोठ तियांप रोत आडल नाहां निकाअयी, काहाके ए घटना एखा खुणामेहें नाहां ओवी. 27 राजा आग्रिप्पा, केहें तू भविश्यवक्ताआ विश्वास कोअहे के? होव, माहूं मुंदू होय के तू विश्वास कोअहे."

28 ताहरुउ आग्रिप्पे पौलुसोहो कोयो, "ताआ एतीज गोठी वाअहीं आंय ख्रिस्ती बोणीत जाहीं एहेलोह ताहूं लागत्लो के?"

29 पौलुसे कोयो, "देवोहो माआं प्रार्थना होय, के थोड़ीज ओय नेत जाअखी ओय, निस्तु तू एतुज नाहां, पोन जेते माहें आज माआ गोठी उनाअतेहे, यीं बेड़ीही सोड़ीत तें आक्खे माआं होस बोणीत जाअहूं जोवे."

30 ताहां राजा आन राज्यपाल आन बिरनीके आन तियांअरी बोहनारे उठीत उबे रोये; 31 आन आंगेज जात कोइत तियां तियांआज कोने वोल्ये, "ओ माटी ते किज नाहां कोतू, जों मोतोअ डोंड नेत जेलेमेहें केंडुहूं जोगोहो ओय." 32 आग्रिप्पे फेस्तुसोहो कोयो, "जर ओ माटी कैसरोअ न्याय ने मागतू ताहां सुटीत सेकतुतो."