प्रेशित 10

कुरनेलियुस आन पेत्र

1 केसरियामेहें कुरनेलियुस नावोअ एक माटी ओतु, जो इटलीयन नावोअ सेयनिकोअ तुकडीइ आधिकारी ओतू. 2 तो देवोहो बित सालनारु भगत माटी ओतू, आन तियाआ पुरो कुटूंब मिलीत देवोअ आराधना कोअतेते, आन गरीब यहुदी माअहुंहूं दान आपतुतो, आन हमेशा देवोहो प्रार्थना कोअतुतो. 3 एक दिही तिये तिनेक वाजता दर्शनोमेहें वारुहूं देख्य के देवोअ एक देवदुत तियाआ जागे मायते आवित कोहे, "ए कुरनेलियुस!"

4 कुरनेलियुसे तियाहा ध्यान लागाड़ीत पाल्य आन बित कोइत कोयो, "ए प्रभु! की होय?" देवदुते तियाहा कोयो, "ताआ प्रार्थना आन ताआ दानधरम देवोहो गोम्योहों आन तो ताहूं उत्तर आपीइलाअ काजे तियार होय; 5 आन ओमे याफा गांवोम थोड़ेक माहें मोकलीत कोइत पेत्र कोतेहे तिया शिमोनोहो हादीत ले. 6 तो सांबड़ाआ धंदू कोअनारा शिमोनोअहीं पावणू होये, आन तियाआ कोअ दोर्‍याअ टेको पोअ होये." 7 ताहरुउ देवदुत जातू रोयू आन कुरनेलियुसे तियाआ बेन सेवकोहोंन तियाआ एका भगत सिपायोहो नेहें आहने हाद्या. 8 आन तियांहां ओवली आखी गोठी कोत देखाड़ीत याफामेहें मोकल्या.

पेत्राआ दर्शन

9 बिहरे दिही ते साली सालीइ जेहेलाम याफा गांवोंअ आहने पोत्या, तेहेलाम दिहेए वेले पेत्र कोओपोअ प्रार्थना कोऊ सोढ्यू. 10 तियाहा फुक लागीन काविंहीं खांव लागो, रोटाअ तियारी सालुज ओती तेहेलाम तो बेसुद ओत गोयु; 11 आन तिये देख्य, के जुग उगड़ीत गोयो; आन एक बासन वोडा सादराआ होसे शारु खुणा ताइंत धरती पोअ उतरेहे. 12 जियामेहें धरतीइ बादी जातीइ शार गुडावाले जनवारे, आन होरतींडनारे जंतू, आन जुगोमेएं सिड़े ओते. 13 ताहरुउ तियाहा एक आवाज होंबलाअयू, "ए पेत्रा उठ! आन माईंत कोइत खा."

14 पोन पेत्रे कोयो, "नाहां प्रभु! आजिबात नाहां; काहाके आंय केदीहींज एठी आन खाराब वस्तू नाहां जी खादी." 15 फाशुउ बिहीरी वारी पेत्र आवाज उनाअयू, "जो किबी देवे सोको कोअयोहो, तियाहा तू एठो मा कोही." 16 तीन वारी जाआं एहेंज कोइत ओवो; आन लगेज तो सादरो जुगोमेहें विसाइत गोयो.

17 जेहेलाम पेत्र तियाआ मोनोम विसार कोअतुतो, के ओं दर्शन जो आंय देख्योहो ओं की ओत सेकेहे, तेताजमेहें कुरनेलियुसे मोकलीइल्ये माहें शिमोनोअ कोअ फुसते फुसते खोलीम आवित बाअणाअहीं उबे रोये. 18 आन हाद कोइत फुशो, "केहें पेत्र कोतेहे तो शिमोन, इंहींज पावणू होय के?"

19 पेत्र तिया दर्शनोअ बाप्तिमेहें विसार कोअयाज कोअतुतो, तेहेलाम आत्मा तियाहा कोयो, "देख तीन माटी ताहूं होदताहा. 20 तियाहा काजे उठीत कोइत निसे जा, आन ठावकुज तियांअरी जा; काहाके तियांहां मीज मोकल्याहा." 21 ताहरुउ पेत्र निसे उतरीत कोइत तियां माट्योहों कोयो, "जियाहा तुमू होदताहा, तो आंयुज होये. तुमू की कामे आवल्या?"

22 तियां कोयो, "कुरनेलियुस सेयनिकोअ आधिकारी होये, जो धर्मी आन देवोहो बित सालनारु आन बादे यहुदी माहें तियाहा हाजू गणत्ले, तियाहा एके देवदुते कोयो के ताहूं तियाआ कोअ हादीत कोइत तू जो कोय तो वसन उनाय."

कुरनेलियुसोअहीं पेत्र

23 ताहरोअ पेत्रे तियांहां कोअमेहें हाद्यान तिहींज रात काड्यी. बिहीरे दिही पेत्र तियांअरी गोयू, आन याफा गांवोंमेर्‍येए थोड़ेक विश्वासी तियाअरी गोये. 24 बिहीरे दिही ते केसरिया सेहरोम पोत्या, आन कुरनेलियुस तियाआ कुटूंबाहा आन दोस्त्योहों टोलू कोइत पेत्राअ वाट जोवतुतो. 25 जेहेलाम पेत्र कोअमेहें आवतुतो, तेहेलाम कुरनेलियुस तियाहा मिल्यू, आन पेत्राअ पागे पोड़ीत तियाहा वोंद्यू; 26 पोन पेत्र तियाहा उठाड़ीत कोइत कोयो, "उठीत उबू रो, आंय बी माहुंउंज होय." 27 आन तियाअरी गोठी कोअतूज मायते गोयू, आन वारुज माअहें टिग वोलीत रोल्ये पालित कोइत 28 तियांहां कोयो, "तुमुहूं मुंदू होय के बिगर यहुदीया वालाअरी सबंध मिकीइलो नेत तियाअहीं जाअलो यहुदीइ काजे पाप होये, पोन देवे माहूं कोयोहो के कोड्ला बी माहुंहूं एठो नेत खाराब ने कोअहूं जोवे. 29 तियाहा काजे जेहेलाम माहूं तुमू हाद्यू तेहेलाम आंय शुपशाप आयू. ओमे आंय फुसोहो के माहूं की कामोअ काजे हाद्यू?"

30 कुरनेलियुसे कोयो, "यीज वेले, पुरा तीन दिही ओवा, आंय माआं कोअमेहें दिहे तिनेक वाजता प्रार्थना कोअतुतो; तेहेलाम एक माटी समक्ये आंगड़े पोवित कोइत, माआं सामने आवित उबू रोयू. 31 आन कोनु वोल्यू, ‘ए कुरनेलियुस, ताआ प्रार्थना उनाइत लेदीही आन ताआ दान आपीइलो देवोअ सामने ओर कोआयेहे. 32 तियाहा काजे एखाहा याफा सेहरोम मोकलीत कोइत जियाआ पुरो नाव शिमोन पेत्र होय तियाहा हादाड़. तो दोर्‍याअ मेरे पोअ शिमोन, सांबड़ाआ धंदू कोअनाराअ कोअमेहें पावणू होये.’ 33 ताहां मी ताब्बुड़ ताआ जागे माअहें मोकल्ये, आन तूमे हाजो कोअयो जो आवित लागू. ओमे आपू बादे देवोअ सामने होय, काहाके जों किबी देव ताहूं कोयोहो तों उनाइत सेको."

पेत्राअ बाशण

34 ताहरुउ पेत्र कोनु वोल्यू, "ओमे माहूं समजाइत गोयो के देव कोडाअरी भेदभाव नाहां कोअतु. 35 माहुंउं कोड्ली बी पारवाड़ीइ काहा नाहां रोतो, जर तो देवोअ भक्ती कोअतोय आन हाजो काम कोअतोय, तो देवोहो पोटेहे. 36 ईसु ख्रिस्त, जो आखाआ प्रभु होय, तिया वाअहीं देवे होकेए हाजी बातमी गाजाडीइलोअ वेले तियाआ वसन इस्राएलोअ आखा माअहोंअ जागे मोकल्यो. 37 ते घटना तुमुहूं मुंदू होय, जे योहानोअ बाप्तिस्माआं परसारोअ फासाड़ी गालीलोम रोत सुरवात ओत कोइत पुरा यहुदीया भागोमेहें पसरीत गोयी: 38 देव केहें कोइत नासरेथवाला ईसुहू पवित्र आत्मा आन सेक्ती वाअहीं अभिशेक कोअयू; तो हाजे कामे कोअतू आन बादाहा जें सैतानोअ*10:38 सैतानोअ इब्लीस सेक्ती वाअहीं बांदाअले ओते, तियांहां हुदारतू फिर्‍यू, काहाके देव तियाअरी ओतू.✝10:38 यश 61:1-3 39 आमू तियां बादा कामोअ साक्शीदार होय; जें तिये यहुदीया देसोम आन येरुसालेमोमेहें बी कोअये, आन तियां ईसुहू क्रुस खांबोपोअ टांगीत कोइत माईंत टाक्यु. 40 तियाहा देवे तीन दिहोम जिवाड़्यू आन देखाड़ीत बी देदुहू; 41 बादा माअहूं पोअ नाहां पोन तियां साक्शीदारों पोअ जियांहां देवे पेलुज रोत निवड़्येते, ते साक्शीदार आमूज होये, ईसु मोतोम रोत जिवित उठल्यू तेहेलाम आमूज तियाअरी खादोन पिदो; 42 आन तिये आमुहूं आदेश आप्यू के माअहूं मेहें परसार कोआ आन साक्शी आपा, के ओ तोज होय जियाहा देव जिवताआं आन मोल्याआं न्याय कोअनारु ठरव्युहू. 43 तियाआ आखा भविश्यवक्ता साक्शी आपताहा के जो कोडो बी तियापोअ विश्वास मिके, तियाहा तियाआ नावोअ सेक्ती वाअहीं पापोअ माफी जोड़े."

बिगर यहुद्याहां पवित्र आत्मा जोड़त्लू

44 पेत्र ए गोठी कोयाज कोअतुतो, तेहेलाम पवित्र आत्मा वसन उनाअनारा आखा माअहूं पोअ उतरीत आयू. 45 आन जेतेहे खतना ओवले विश्वासी माअहें पेत्राअरी आयेते, तें बोगलाअये के बिगर यहुदी पोअ बी देवे तियाआ पवित्र आत्माआं दान ओली देदोहो. 46 काहाके ते तियांहां जुदी जुदीज बाशा गोगत्ले आन देवोअ स्तुती कोअत्ले उनाअया तेहेलाम पेत्रे कोयो, 47 "केहें एखू यां माअहुंहूं पांअयोंअ बाप्तिस्मा ने कोअहूं जोवे कोत रुकीत सेकेहे के, जियांहां आपाअ होसूज पवित्र आत्मा जोड़्युहू?" 48 आन पेत्रे आदेश आप्यू के तियांहां ईसु ख्रिस्ताआ नावो वाअहीं बाप्तिस्मा आपुहूं जोवे. ताहरेए तियां तियाहा थोड़ाक दिही जाआं तियांअरी रोय तेहें रावणी कोअयी.