प्रेशित 21

पौलुसोअ येरुसालेमोमेहें जाअलोअ

1 आमू तिहीं रोत जाताहामे कोत जाहाजेम बोठा आन पाद्राज कोस बेटोपोअ आवित पोता, आन बिहीरे दिही रुदुसोमेहें आन तिहीं रोत पतरा होयरोम आया. 2 तिहीं एक फिनीके जानारी जाहाज मिल्यी, आन आमू तियी जाहाजेम बोहीत कोइत आगाड़ी निहीया. 3 जेहेलाम आमुहूं सायपरस बेट देखाअ वोल्यो, ताहां आमू तियाहा बांगाड्यीइ वोल टाकी देत सिरिया जात कोइत सुरोमेहें उतर्‍या; काहाके तिहीं जाहाजेमेर्‍युउ माल उतारीलुउ ओतू. 4 सेलाहां मिलीत कोइत आमू तिहीं हांत दिही जाआं रोया. तियां आत्माआं सिकाड़ल्या वाअहीं पौलुसोह कोयो के येरुसालेमोमेहें पाग मा मिक्ही. 5 जाहां ते दिही पुरा ओत गोया, ताहां आमू तिहीं रोत जाना वोल्या; आन आक्खे बोईंन पोर्‍ये आमुहूं गावोंअ बारथे जाआं मिके आये; आन आमू दोर्‍याआ मेरेपोअ मांड्या पोड़ीत कोइत प्रार्थना कोअयी, 6 तिहीं रोत आमू एकानेकाहा जाजाम कोत कोइत वेराअया, आमू ते जाहाजेम बोठा पोन तें जिवज्योअ कोओअहें वोलीत गोये.

7 ताहराआ आमू सुरोम् रोत जाहाजेम बोहीत् कोइत पतुलिमायिसोम पोत्या, आन विश्वासी पायहोंहों मिल्यान् ताहराआ तियांअरी एक दिही रोया. 8 बिहीरे दिही आमू तिहीं रोत निहीत कोइत केसरियामेहें आया, आन हाजी बातमी परसार् कोअनारा फिलीप्पअ कोअमेहें जो हांत जोओं मेर्‍युउ एक ओतू; जात कोइत तियाअहीं रोया. 9 तियाआ शार कुवांरी पोर्‍यी ओती, जे भविश्यवाणी कोअतीते. 10 जेहेलाम आमू तिहीं वारुज दिही रोत सुका, ताहां अगबुस✝21:10 प्रेशित 11:28 नावोअ एक भविश्यवक्तू यहुदीया रोत आयू. 11 तिये आमाआं जागे आवित कोइत पौलुसोअ पोट्टू माग्यू, आन सोताआ आथेन गुडा बांदीत कोइत कोयो, "पवित्र आत्मा एहें कोहे के, ओ पोटटू जिया माहुंउं होय, तियाहा येरुसालेमोमेहें यहुदी एहेंज कोइत बांदे, आन बिगर यहुदीइ आथम होपी देये."

12 "जेहेलाम आमू ए गोठी उनाअया, ताहां आमू आन तिहींइं माअहें नेहें तियाहा विनंती कोअयी के येरुसालेमोमेहें मा जाही. 13 पोन पौलुसे उत्तर आप्यो, ओं तुमू की कोअतेहे, एहें कोइत रोड़ी-रोड़ीइ तुमू माआं दिल तोड़तेहे? आंय ते प्रभु ईसुउ नावोअ काजे येरुसालेमोम निस्तू बांदाइलाआ काजे एतुज नाहां, पोन मोइलाअ काजे बी तियार होंव."

14 जाहां तो ने मान्यू ताहां आमू एहें कोत कोइत ठावका ओत गोया, "प्रभुउ इश्शा पुरी ओवे."

15 यां दिहोअ फासाड़ी आमू तियारी कोअयी आन येरुसालेमोमेहें जाना वोल्या. 16 केसरियामेर्‍याआ बी थोड़ाक सेला आमाअरी आवा वोल्या, आन सायपरस वाला मनासोन नावोअ एका जुना सेलाअहीं रोय तेहें काजे ते आमुहूं लेताया.

पौलुस याकोबोह मिलत्लू

17 जेहेलाम आमू येरुसालेमोम पोत्या, ताहां विश्वासी पाही खुसी वाअहीं आमुहूं मिल्या. 18 बिहीरे दिही पौलुस आमुहूं लेत कोइत याकोबोअ जागे गोयू, जिहीं आखा डायहां टोलू वोलीत रोयाते. 19 ताहां तिये तियांहां सलाम कोइत, जे जे कामे देवे तियाआ सेवकायी वाअहीं बिगर यहुदीमेहें कोअयेते, एक एक कोइत आक्खे कोताप्ये. 20 तियां ओं उनाइत कोइत देवोअ महिमा कोअयी, आन तियाहा कोयो, "पाही, तू देखीत सेकेहे के यहुदी मेर्‍येए केताहा हाजार माअहूं विश्वास कोअयुहू; आन आखे मोशेए कायदाआ धुंदीमेहें होये. 21 तियांहां ताआ बाप्तिम् एहेलोह सिकाड़्यह के तू बिगर यहुदीमेहें रोनारा यहुदीही मोशेए कायदाप रोत वोलीत जायतेहें सिकाड़ेहे, आन कोहे, के तुमाआं पोर्‍याआ खतना मा कोअहा आन रिती रिवाजपोअ मा सालहा. 22 ताहरोअ की कोअहूं जोवे? माअहें नक्की होम्बिलनारे के तू आयुहू. 23 तियाहा काजे जो आमू ताहूं कोताहा, तों कोअ. आमाआं जागे शार माटी होय जियां पालनी तोअयिही. 24 तियांहां लेत कोइत तियांअरी सोताहा सोकु ओव्; आन तियांआं काजे खर्स आप् के ते सिंग्ये कात्रावे. ताहां आखे जाईंत लेय के जे गोठी तियांहां ताआ बाप्तिमेहें कोयीही, ते वाहीं बी खरी कायनाहां पोन तू सोताहा बी कायदाहा मानित कोइत तियाआ पुरमाणे सालेहे. 25 पोन तियां बिगर यहुदीइ बाप्तिमेहें जियां विश्वास कोअयुहू, आमू ओ निर्णय कोइत लेखीत मोकल्योहो के तें मुर्तीइ सामने गाराहा कोअल्यो माहां, रक्त, गलु टिबलीत माअल्या जनवारोअ माहां आन सिनालो यां रोत सेटे रोअहूं जोवे.✝21:25 प्रेशित 15:29 "

26 ताहरुउ पौलुस तियां माट्योहों आरी लेत कोइत, आन बिहीरे दिही तियांअरी सोकु ओत कोइत मंदिरोम गोयू, आन सोको ओवीइलाआ दिही, मोन्ज्ये तियांमेर्‍याआ हारेकोअ काजे गाराहा आपीइलोअ दिही कोयों पुरा ओवे तो तिहीं कोत देदो.

पौलुस मंदिरोमेहें तोआयू

27 जाहां हांत दिही पुरा ओवुहूं कोअताते, ताहराआ आसियावाला यहुदी माट्यों पौलुसोहो मंदिरोमेहें देखीत कोइत आखा माहुंहूं पोड़काये, आन एक्काइज आअड़ीत कोइत तियाहा तोइत लेदू. 28 "ए इस्राएलवाला, मदत कोआ; ओ तोज माटी होय, जो आपाआ माहुंउं, कायदाआ, आन या जागाआ विरुद्दाम आखी जागे माहुंहूं सिकाड़ेहे, तेतोज नाहां पोन ये युनानी माहुंहूं बी मंदिरोमेहें लेतावीत कोइत या सोका जागाहा एठु कोअयुहू." 29 याआ रोत पेल तियां इफिसवाला त्रुफिमुसोह तियाअरी गावोंमेहें देख्युतो,✝21:29 प्रेशित 20:4 आन समज्याते के पौलुस तियाहा मंदिरोमेहें लेतायुहू.

30 ताहरोअ पुरा गावोंमेहें दोंगू मातीत गोयू, आन माहें गुगदीइतेज टोलू वोल्ये आन पौलुसोहो तोइत कोइत मंदिरोअ बारथे ओढ़ीत लेताये, आन ताब्बुड़ बाअणे वालीत देदे. 31 जेहेलाम ते तियाहा माइत टाकीइलाअ कोअतेते, ताहरुउ रोमी सेयनिकोअ मुख्याहा खबर पोती के पुरा येरुसालेमोमेहें दोंगू ओवेहे. 32 ताहरुउ तो ताबुड़ सेयनिकोहों आन आधिकारीही लेत कोइत तियांआं जागे निसे गुगदीत आयू; आन तियां रोमी सेयनिकोअ मुख्याहा आन सेयनिकोहों देखीत कोइत पौलुसोहो मार देएलाआ सोड़ी देदो. 33 ताहरुउ रोमी सेयनिकोअ आधिकारी आहने आवित कोइत तियाहा तोइत लेदू; आन बेन हाकले वाअहीं बांदीइलाआ आदेश आपीत कोइत फुसू वोल्यू, "ओं कोडो होय आन ये की गुनू कोअयुहू?" 34 पोन गर्दीमेहें रोत एखु की कोय बिहीरो की कोय आअड़ीते रोये. जाहां गर्दी वाअहीं तो खोरी गोठ जाइंत ने सेकू, ताहां तियाहा किल्लामेहें लेत जाअलाअ आदेश आप्यू. 35 जेहेलाम तो पायत्रीइ जागे पोत्यु, ताहां एहेलोहो ओवो के गर्दीइ दाबावोवाअहीं सेयनिकोहों तियाहा उसलीत लेत जाअहूं पोड़्य. 36 काहाके माअहुंउं गर्दी ओं आअड़ीइतीज तियाआ फासाड़ी आवतीते, "याहा माइत टाकी द्या."

पौलुस वासाइत जात्लु

37 जेहेलाम ते पौलुसोह किल्लामेहें लेत जाअहूं ओता, तेहेलाम तिये रोमी सेयनिकोअ मुख्याहा कोयो, "आंय ताअरी गोठी मिकीत सेकोह के?" तिये कोयो, "ताहूं ग्रीक बाशा आवड़ेहे के? 38 केहें तू तो मिसरवालू ते नाहां, जो यां थोड़ाक दिहोअ पेल लबाड़ी कोइत शार हाजार दहशतवादी माहुंहूं जंगलोमेहें लेत गोयू?"

39 पौलुसे उत्तर आप्यो, "आंय ताम तारसुसवालू यहुदी माटी होये! किलिकियाआ नावासी होयरोअ रेवासी होय. आंय ताहूं विनंती कोअहो के माहूं यां माअहोंअरी गोठी कोअहूं दे."

40 जाहां तिये परवानगी आप्यी, ताहां पौलुसे पायत्री पोअ उबू रोत कोइत माहुंहूं आथोवाअहीं इशारु कोअयू. जेहेलाम तें ठावके ओत गोये, ताहां तो इब्री बाशामेहें गोगु वोल्यू: