प्रेशित 27

पौलुस जाहाजेम बोहीत रोम होयरोम जात्लू

1 जेहेलाम जाहाजेम बोहीत इटली जाअलोअ आमाआं ठरीत गोयो, ताहां तियां पौलुस आन थोड़ाक बिहीरा जेलार्‍यांहां बी यूलियुस नावोअ औगुस्तुसोअ रोमी सेयनिकोअ एका आधिकाऱ्योअ आथोम होपी देदा. 2 अद्रमुथियुमोअ एकी जाहाजेम बोहीत कोइत आमू तियीही सोड़ी देदी, जे आसियाआ मेरेए वोल जानारीज ओती, आन अरिस्तर्खुस नावोअ थेस्सलनीकेए एक मकिदुनियावालू विश्वासी बी आमाअरी ओतू. 3 बिहीरे दिही आमू सिदोनोमेहें पोता, आन यूलियुसे पौलुसोपोअ मेरवानी कोइत तियाहा दोस्त्योअहीं रोत मदत स्विकारे तेहें जाअहूं देदू. 4 तिहीं रोत हावा हुम्बीज ओती, तिहीं वाअहीं आमू जाहाज सोड़ीत सायपरस बेटोअ मेरे-मेरे जाना वोल्या; 5 आन किलिकिया आन पंफूलियाआ आहनेए दोर्‍याम ओवताज लूसियाआ मुरा नावोअ बंदरोमेहें उतर्‍या. 6 तिहीं आधिकाऱ्योहो अलेक्झान्डरीया वालाआ एक जाहाज इटली जात्ली मिल्यी, ताहां आमुहूं तिये तिहींम बोहाड़ी देदा. 7 आमू जाअखीलाहा दिही जाआं बागे-बागे सालीत कोइत जेमतेम कनिदुसोअ सामने पोता, काहाके हावा आमुहूं आगाड़ी जाअहूंन्ने देतीते, आमू सलमोनेए सामनेज रोत ओवताज क्रेतेए आडल रोत जाना वोल्या; 8 आन तियाआ होड़ीज होड़ीज जात कोइत "शुभलंगरबारी" नावोअ एकी जागे बोले पोत्या, जिहीं रोत लसया गांव आहने ओतो.

9 जेहेलाम वारुज दिही सेकित गोया आन जलप्रवास कोइलोमेहें तारास याअकाजे ओवतुतो, काहाके उपासोअ दिही ओमे खुटाअयाते. ताहां पौलुसे तियांहां एहें कोत कोइत समजाड़्या, 10 "ए माट्यों, माहूं जी या प्रवासोमेहें धोकू आन नुकसान ओवे एहेलोह देखाअहे, निस्त मालोन जाहाजोअ एतोज नाहां, पोन आपाआ जिवोअ बी नुकसान ओवनारोहो." 11 पोन आधिकार्‍ये पौलुसोअ गोठी रोत वादार कप्तान आन जाहाजोअ मालख्योअ गोठी पोअ ध्यान देदो. 12 तों बंदरगा*27:12 बंदरगा जाहाज उबो राखीइलोअ ठिकाण हियालाम रोअलाआ काजे ने हाजो ओतो, तियाहा काजे वारुज जोंओंअ विसार ओतू के तिहीं रोत जाहाज सोड़ीत कोइत जर ओत सेके ताहां फिनिक्सोम पोतीत कोइत तिहीं हियालू सेकाड़े. ओं ते क्रेतेए एक बंदरगा होय जो देहाम-बुड्ताम आन पालाम-बुड्तामाअहें सोब कोइत खुलो होय.

दोऱ्याम वादुउ

13 जाहां जार-जारीही देहामी हावा साली वोल्यी, ताहराआ आपाआ काम पुरो ओवो कोत समजीत कोइत लंगर फेड़्यीन कोर तोइत क्रेतेए आहने रोत जाना वोल्या. 14 पोन एकुज तालेन धरतीइहें रोत एक वोडु वादुउ लागू वोल्यू, जियाहा "यूरकुलीन" कोतेहे. 15 जाहां वादुउ जाहाजोअहें आवित ठोकाअयू, ताहां ते तियाआ सामने टिकीत ने सेकी, तियाहा काजे आमू तियीही वोहुहूं देदी आन एहेंज कोइत वोहताज जाता रोया. 16 ताहराआ कौदा नावोअ एका हाना एवडाहा बेटोअ होड़ीज वोहता-वोहता आमू बोले कोइत नावड़ाहा ताबाम कोइत सेका. 17 ताहराअ जाहाजेए सांबालनारा तियाहा ओढीत कोइत मांय लेताया आन वोग पालित कोइत जाहाजेहे निसे रोत्ते उसे जाआं आपकीत बांद्यी, आन जाहाज सुर्ती नावोअ निंडी रेटावाली जागे जात ठोकाय यी बिकेवाअहीं पोड़दू निसे उतारीत लेदू, ताहां वाराअरी वोहताज जाता रोया. 18 जाहां आमू वादुउ वाअहीं जाहाजीमेहें बुसकण्याआं आन धक्का खादा, ताहां बिहरे दिही ते जाहाजेमेर्‍योअ सामान दोर्‍याम उडाड़ा वोल्या; 19 आन तिसरे दिही तियां सोताआ आथोवाअहीं जाहाजेए सामान बी उडाड़ी देदो. 20 जाहां वारुज दिही जाआं ने दिही, ने तारा देखाअया आन जुदू जोरे वादुउ सालतू रोयू, ताहां आखरीमेहें आमाआं वासाइलाअ आखी आशा बी खुटात गोयी.

21 जाहां ते वारुज दिही जाआं फुकल्याज ओता, तेहेलाम पौलुसे तियांआं विसमेहें उबू रोत कोइत कोयो, "ए माअहूं, तुमू माआं गोठ मानित कोइत क्रेते रोत जाहाज ने सोड़ता ताहां हाजो ओतो, ताहां ए आफत ने आवती आन ने ओं नुकसान भोगुहूं पोड़तो. 22 पोन ओमे आंय तुमुहूं समजाड़ोहो के हिम्मत मिका, काहाके तुमामेर्‍याआ कोडाआज जिवोअ नुकसानी ने ओवे, निस्ती जाहाज एतीज आरवाय. 23 काहाके देव जियाअ आंय होय, आन जियाअ सेवा कोअहो, तियाआ देवदुते हांस्तीइ राती माआं जागे आवित कोइत कोयो, 24 ‘ए पौलुस, मा बिही! ताहूं कैसरोअ सामने उबो रोअलोअ जरुरी होय. पाल, ताअरी होय तियां आखाहा देवे ताहूं आपी देदेहे.’ 25 तियाहा काजे, ए माट्यों, हिम्मत मिका; काहाके माहूं देवोपोअ विश्वास होय, काहाके जेहलोहो माहूं कोयोहो, तेहेंज कोइत ओवे. 26 पोन आपुहूं एखा उनावाअहीं रुकाअहूं पोड़े."

27 जाहां सौदावी रात आयी, आन आमू अद्रिया दोर्‍यामेहें भटकीइता फिरताते, तेहेलाम पोरापोर रातीइ वेलेहे जाहाजेए सांबालनारा आंदास कोअयू के आपू एखी पुयींइं आहने पोतताहा. 28 तियां पाईं केतोहो उंडो होय तों मोजीत पाल्यो, ताहां सालीही मिटर निहींयो, आन आगाड़ी जात कोइत फाशोअ मोजीत पाल्यो, ताहां तीस मिटर निहींयो. 29 ताहां डोणाट्यी जागेहे ठोकाइलाआ बिके वाअहीं तियां जाहाजेए फासाड़ीइ वोगेहे शार लंगर टाक्या, आन हुसत्लाहा वाट जोवा वोल्या. 30 पोन जेहेलाम जाहाजेए राखवाली जाहाजेम रोत नाहींइलाआ कोशित कोअताते, आन आगाड़ी रोत लंगर टाकीइलाअ नाटक कोइत नावड़े दोर्‍यामेहें उतारी देदे; 31 ताहां पौलुसे आधिकाऱ्योहो आन सेयनिकोहो कोयो, "जर ए जाहाजेम ने रोया, ताहां तुमू बी ने वासाइत सेकहा." 32 ताहां सैनिकहों दोअड़े तोड़ीत नावड़े ओदारी देदे.

33 जेहेलाम हुजुहूं कोअतोतो, तेहेलाम पौलुसे ओं कोत कोइत आखाहा रोटू खायतेहें समजाड़्यो, "आज शौदा दिही ओत गोया, तुमू सिंता कोइ-कोईइ फुकल्याज रोया, आन वाहीं रोटू ने खादू. 34 तियाहा काजे तुमुहूं समजाड़ोहो के वाजिहीं रोटू खात ल्या, जिहीं वाअहीं तुमू वासाअहा; काहाके तुमामेर्‍याआ कोडाआज मुन्काआ एक सिंग्यो बी ने ओदरे." 35 एहें कोत कोइत तिये रोटू विशू आन आखाआ सामने देवोअ धन्यवाद कोअयो आन मुड़ीत कोइत खानु वोल्यू. 36 ताहराअ ते आखा बी हिम्मत कोइत रोटू खाना वोल्या. 37 आमू आखा मिलीत कोइत जाहाजेम बेन होव सत्तरेन सोव जोआं ओता. 38 जेहेलाम ते रोटू खात कोइत ताराअया, ताहां आखे गोंवें दोर्‍यामेहें टाकीत कोइत जाहाज ओलवी कोआ वोल्या.

जाहाज आरवाइलो

39 जेहेलाम दिही उगू, तेहेलाम तो देस तियांहां ने ओलखाअयू, पोन एक पुयींइं भाग देख्यू जियाअ मेरेए भाग शौकड़्यू ओतू, आन विसार कोअयू के जर ओत सेके ताहां याज पोअ जाहाज उबी कोअहूं. 40 ताहां तियां लंगरोहो सोड़ीत कोइत दोर्‍याम टाकी देदी आन पाताआ गाठ सोड़ी देदा, आन वाराआ हुंबर आगल्युउ पोड़दू सोढ़वीत कोइत मेरे पोअ आवा वोल्या. 41 पोन बेन दोर्‍याअ मिलनोअ जागा पोअ रोत कोइत तियां जाहाजेहे रुकीत मिक्यी, आन आगाड़ीइ भाग ते धक्का खात कोइत फुटीत गोयू आन टोलीत ने सेकू; पोन फासाड़ीइ भाग उपाड़ाआ मारो वाअहीं टुटू वोल्यू.

42 ताहां जेलार्‍या आखा तोरीत कोइत निहीत जाय कोत ते सैनिकहों ओ विसार कोअयू के माइत टाकत्ला. 43 पोन आधिकार्‍ये पौलुसोहो वासाड़ीलोअ इश्शा वाअहीं तियांआं ए योजना रुकी देदी आन एहें कोयो, के जे तोरीत सेकताहा, ते पेल उडीत कोइत मेरेपोअ निहीत जावा; 44 आन बाकी रोय ते पाट्यापोअ, आन जाहाजेए एकदी वस्तुउ आधार लेत निहींत जाय. एहें कोइत पुरे माहें मेरेपोअ वासाइत निहींये.