1 "दारा नावोअ मादी राजाआ सालतीइ पेलठा वोरह्योमेहें तियाहा आधार आन ताकत आपिइलाआ काजे आंयुज उबू रोत गोयू."

2 "ओमे आंय ताहूं खोरी गोठ कोहो, पाल, फारसोअ राज्यामेहें ओमे तिन राजा उठे; आन तिहींइं फासाड़ी एक शोवथु राजा उठे. ओ राजा तियां फारसवाला राजां रोत जाअखू मालदार रोय; आन तो राज सालाड़ीइलो काजे पोशाआ वापर कोए, आन बाकी माअहोंहों ग्रीस राज्याआ विरुद्दामेहें उरी सोड़वे."

3 "तिहींइं फासाड़ी एक वोडी ताकतेवालू राजा उठे आन तियाआ राज्य वादाड़े, आन तियाहा पोटे तेहेलोहो तो राज कोए. 4 पोन तियाआ जम ने बोहे तेहेंज तियाआ राज्य टुटीत कोइत शारी ओरी वाटाइत जाय; तिहीं रोत तियाआ राज्याहा पेल होय तेहलीही सेक्ती ने जोड़े आन तियाआ पारवाड़ीही बी किज ने जोड़े; काहाके तियाआ राज्य उपटीत बिहीराआ ताबाम जातो रोय."

5 "ताहां देहामाआं मिसर*11:5 मिसर इजिप्त देश देशोअ राजा सेक्ती वालू बोणे: पोन तियाआज एक सेनापती तियाहा हारवीत कोइत तो राज कोउ वोले आन तोज जम बोहाड़ीत लेय. 6 थोड़ेक वोरह्ये सेकीत गोये तिहींइं फासाड़ी, ए बेनू एकमेकाहा मिले, आन देहामा देसोअ राजाआ पोर्‍यी पालामा वोल्याआ सिरिया देसोअ राजाअरी शांती करारोअ काजे वेहेवाल कोइत लेय; पोन तियीइ ताकत ने रोय, माअहें तियीइ आन तियीइ पोऱ्याआ विरुद्दाम उठे आन तियीही तिया देशोम लेत आवनाराहां नेहें माइत टाके. 7 फाशोअ तियीइज कुटूंबामेहें रोत एक जोऊं देहामाआं वोल्याआ राजाआ जागू लेत लेय, आन तो पालामाआ राजाआ सेनाअरी लड़ाय कोइत जिकीत जाय. 8 तो तियांआं देवताआं मुर्ती, लोड़ाआ आथिवल्यी मुर्ती आन होना-सांदीइ मोगवाड़्यी वस्तु बुउसीत कोइत मिसरोमेहें लेतावे; ताहरुउ थोड़ेक वोरह्ये जाआं पालामाआं वोल्याआ राजाअरी लड़ाय ने कोए. 9 तिहीं रोत तो राजा देहामाआं देसोअ राजाअरी लड़ाय कोऊ आवे, पोन फाशुउ तियाआ देसोम जातु रोय."

10 "फाशाआ तियाआ पोर्‍या लड़ाय सुरु कोई देय आन वोडी वोडी सेयनिकोअ तुकड़ी टोलू वाले, आन हाडाअतेज देशोअ विसमेहें रोत सोरके आन वोलीइली वेले तियाआ गोडोअ जागे जाआं आवित ठोकाय. 11 ताहां देहामाआं वोल्युउ राजा खिजवाय, आन निहींत कोइत पालामा वोल्याआ राजाअरी लड़ाय कोउ वोले, आन तो राजा लड़ायीइ कोअते वोडी गर्दी टोलू वाले, पोन ते गर्दी देहाम्या राजाआ आथोम होपात जाय. 12 तियी गर्दीही जिकीत कोइत तो तियाआ मोनोम वोडाय कोए, आन तो लाखो माअहोंहों माए, पोन तियाआ जित जाअखी ने टिके.

13 "काहाके पालामा देसोअ राजा आवीत कोइत पेल्लीइ गर्दी रोत जाअखी वोडी गर्दी टोलू वाले; आन थोड़ाक दिहोम नेत थोड़ेक वोरह्ये सेलाय; तेहेलाम तो वोडी सेना आन धन लेत आवे. 14 तियां दिहोमेहें वारुज माअहें देहाम्या देसोअ राजाआ विरुद्दाम उठे; आन ताआज माअहोंमेहें रोत नुकसान कोअनारे उठीत पोड़े, जिहीं वाअहीं ए दर्शनोअ गोठ पुरी ओत जाय; पोन तें उदड़ीज ठोकात पोड़े. 15 ताहां पालामा देसोअ राजा आवीत कोइत केंडवारीत लेय आन मजबुत होयरोहो लेत लेय; आन आन देहामा देसोअ ने ते पुडारी उबा रोय आन ने वोडा बाहादीर, काहाके कोडामेहें उबा रोअलोअ ताकत ने रोय. 16 ताहां जो बी तियांआं विरुद्दामेहें आवे, तो सोताआ इश्शा पुरी कोए, आन तो आथोमेहें आरवाइलोअ सेक्ती लेत मुख्य देसोमेहें उबू रोय आन तियाअरी टक्कर लेनारु कोडुज ने रोय.

17 "ताहां तो तियाआ राजोअ पुरी ताकतो वाअहीं, थोड़ाक हाजा माअहोंहों आरी लेत कोइत आवे, आन तियाआ इश्शाआ परमाणे काम कोअया कोए. तो तियाआ राज्य बिगाड़ीलोअ काजे तियाहा एक बोईं आपे; पोन ते टिकीत ने रोय आन ते ने तिया राजाआ बोणे. 18 ताहां तो विसगाल्या दोर्‍याआ मेरेए देसोंअरी लड़ाय कोऊ आवे, आन वारुज होयरोहों जिकीत लेय, पोन तियाआ एक सेनापती तियाआ वोडाय काडीत टाके. 19 ताहां तो राजा तियाआ देसोअ मजबुत किल्लामेहें फाशुउ जाय, पोन तो कमजोर ओत पोड़े आन सेलात जाय.

20 "ताहां तियाआ जागापोअ एखु एहेलुहू उठे, जो मुख्य राज्यामेहें फालू टोलु कोअनाराहा फिरवे; पोन थोड़ाक दिही सेकीत जाय तेहेलाम तो खोते वाअहीं नाहां, पोन बिगर लड़ाय कोअयेज आरवाइत जाय."

21 "तियाआ जागापोअ एक खाराब राजा गादीपोअ बोहे, जो राजा बोणिइलोअ लायक ने रोय, पोन तो गुल्यी गुल्यी गोठी वाअहीं राज्य मिलवीत लेय. आन जाहां माअहें पोलेमेहें पोड़ीत रोय तेहेलाम तो बिगर सुसना कोअयेज गादीपोअ बोहीत जाय. 22 ताहां तियाआ सेक्तीमान सेना वाअहीं माअहें आन शप्पतोअ पुडारी बी ठोगाइत आरवाइत जाय. 23 काहाके तो तियाअरी ठोगोअ करार कोए, आन थोड़ाज माअहोंहों आरी लेत कोइत जिकीत जाय. 24 तो बिगर कोताज मालदार देसोपोअ लड़ाय कोए; जों काम तियाआ डायहां आन डायहांआं डायहां ने कोअयोय, तियाहा तो कोए; आन लुटल्या मालधनोमेहें रोत वाट्या कोए. तो थोड़ेक वोरह्ये जाआं मजबुत होयरो पोअ ताबू लेअलाआ विसार कोअतु रोय.

25 "ताहां तो देहामा देसोअ राजाआ विरुद्दाम वोडी सेना लेत तियाआ ताकत आन हिम्मत वादाड़े, देहामा देसोअ राजाआ खुब वोडी आन ताकतवाली सेना लेत कोइत लड़ाय ते कोए, पोन तियाहा ने टिकाय, काहाके माअहें तियाआ विरुद्दामेहें विसार कोए. 26 तियाआ रोटू खानारे बी तियाहा हारवी देय; तियाआ सेना आरवाइत जाय, तियाआ वारुज माअहें मोए. 27 ताहां ते बेनु राजा लबाड़ी कोआ वोले, ते एकाज टेबलोपोअ बोहीत कोइत ठोगोअ गोठी कोए, पोन यावाअहीं किज ने ओवे; काहाके यी गोठीइ सेवट वेलेपोअ ओवे. 28 ताहां पालामाआं राजा वोडी लुट लेत तियाआ देसोम आवे, आन तियाआ मोन सोकी शप्पतेए विरुद्दाम रोय, तो तियाआ इश्शा पुरी कोइत तियाआ देसोमेहें आवतु रोय.

29 "बोराबर वेल आवताज तो फाशुउ देहामा देसोअहें जाय, पोन तो पेल जिकुहू तेहेलोहो ओमे तियाहा ने जिकाये. 30 काहाके कित्तीवालाआं जाहाजी तियाआ विरुद्दामेहें आवे, आन तो नाराज ओवित फासकुंड्या फिरे, आन सोकी शप्पतेए वाखरी खिजवात कोइत तियाआ इश्शा पुरी कोए. तो आवीत कोइत सोकी शप्पत तोड़नाराआ कालजी लेय. 31 ताहां तियाआ सेयनिक उबा रोत कोइत मजबुत सोका जागाहा एठु कोए, आन दाडख्युउ होमबली बोंद कोए. ते तियी खाराब वस्तुहू उबी कोए, जे एठी समजाअहे. 32 आन जें माअहें पापी ओत कोइत तियी शप्पतेहे तोड़े, तियांहां तो गुल्यी गुल्यी गोठ कोत आपित विण-भक्तीवाले बोणावी देय; पोन जें माअहें तियांआं देवोअ आदेश माने, तें हिम्मत कोइत वोडे वोडे कामे कोए. 33 माअहोंहों सिकाड़नारे हुशार माअहें वारुज जोअहों समजाड़े, तेबी तें वारुज दिही जाआं तारवाई वाअहीं माआंय आन आगी वाअहीं पेटाय, आन जेलीमेहें टाकाय, कोएं लुटाय, एहें कोइत वोडी आफतोमेहें पोड़ीत रोय. 34 जेहेलाम ते आफतोमेहें पोड़ीत रोय तेहेलाम तियांहां खुब कमी मदत जोड़े, पोन वारुज माअहें गुल्यी गुल्यी गोठ कोत आपित तियांमेहें सान्बात जाय; 35 आन थोड़ेक समजदार माअहें पोड़े, तें काहा कोत पोड़े, काहाके, तें सोके आन साफसुफ ओवुहूं जोवे. ए दशा सेवट जाआं रोय, काहाके ए आखी गोठी सेवटीपोअ बोराबर वेलेपोअ ओवनारी होय.

36 "ताहां तो राजा तियाआ इश्शाआ पुरमाणे काम कोए, आन सोताहा आखा देवोम रोत वोडू कोवड़ावे; तेहेंज आखा देवताआ बोगवानोअ विरुद्दामेहें बी बाक्ती गोठी कोए. जाअहूं जाआं देवोअ खोत ठावकी ने ओत जाय ताअहूं जांआं तिया राजाआ कामोंअ जिक ओवती रोय; काहाके जों किबी पाक्को कोइत ठरवीत लेदोहो तों हुदाअलीज पुरो ओवनारो होय. 37 तो तियांआं डायहांआं देवोअ विसार ने कोए, ने बोईंइं बाप्तिम मेरेए सिंता कोए आन ने कोडा देवोअ; काहाके तो सोताहा आंय आखाम रोत वोडू कोत समजे. 38 तो तियाआ राजपदोपोअ टिकीत कोइत गोडोअ देवताआज पुंजन कोए, एक एहेला देवोअ जियाहा तियाआ डाये बी ने ओलखीइतेते. तो होनो, सांदी, मोगलू डोण आन गोवणो आपीत कोइत तियाआ पुंजन कोए. 39 तियां पारका देवताआ मदते वाअहीं पाक्का किल्लाअरी लड़ाय कोए, आन जो कोडो तियाहा माने तियाहा तो वोडू मान आपे, आन तियाआ लाभोअ कोअते तियाआ देसोअ जागाहा वाटी देय.

40 "सेवट्याआ दिहोम मिसर देसोअ राजा लड़ाय कोउ वोले; पोन सिरिया देसोअ राजा पुत्याआ होस जाअखीलां कोड़ाआ गाडे, कोड़ापोअ बोहनारा सेयनिक आन वोडा टोला लेत आवेन ताहरुउ लड़ाय कोए. एहें कोइत तो वारुज देसोमेहें पसरीत जाय, आन तियांमेहें रोत निहींत जाय. 41 तो मुख्य देसोमेहें बी आवे, आन वारुज देस उजड़ीत जाय, पोन एदोमी, मोवाबी आन मुख्य मुख्य आम्मोनवाले यां माहुंउं देस तियाआ आथोम रोत वासात जाय. 42 तो वारुज देसोंअरी लड़ाय कोए आन मिसर देस बी ने वासाय. 43 तो मिसर देसोअ होना-सांदीइ खजानो आन आखी रोमेगोमे एहेली वस्तुउ मालिख बोणीत जाय; आन लुबी कुशोवाले माअहें बी तियाआ ताबाम ओवे वोले. 44 तेहेलाम तो उगतामा आन पालामाआं वोल रोत बातमी उनाइत कोइत बित जाय, आन वोडी खोतेए बाल्लायी वारुज जोओंहों आरवीइलाअ कोअते निहींत पोड़े. 45 तो बेनु दोर्‍याआ विसमेहें सोका मुख्य डोगोअ जागे तियाआ राज तोंबू उबु कोआड़े; एतोहो कोअताज वाआ तो सेलात जाय, आन कोडो तियाअ मदत ने कोए."