1 नबुकदनेस्सर राजे धरतीपोर्‍याआ देसो देसोअ आन जुदी-जुदी बाशा गोगनारा माअहोंहों सिट्टीम ए खबर लेखीत मोकल्यी:

"तुमाआं हाजोज ओवुहूं जोवे! 2 वोडाम वोडे देवे माआं काजे जो समत्कार देखाड़्यू, तों तुमुहूं कोत देखाड़ुहूं कोअहो.

3 "तियाआ देखाड़ल्या समत्कार केताहा जबरदस्त होय!

तियाआ समत्कारोम केतीही वोडी सेक्ती होये!

तियाआ राज ताम हादाफल्योअ आन पिढ़ीन पिढ़ी जाआं रोय."

4 "आंय नबुकदनेस्सर माआं राजवाड़ाम हाजीहुतेहे रोतुतो, आन वोडी खुशालीम ओतू. 5 माहूं जों होपनो पोड़्यो तिहीं वाअहीं आंय बित गोयु; आन पोलांगीपोअ लोटलोटू जे विसार माआं मोनोमेहें आया आन जे गोठी मी देख्यी, तिहीं वाअहीं आंय फिकरेम पोड़ीत गोयुतो. 6 ताहां आंय आदेश आप्यू के बाबेलोअ आखा जाणकारोहों माआ होपनाआ अर्थ कोत आपे तेहें काजे माआ सामने हुजुर कोअहूं जोवे. 7 जेहेलाम बोड़वा, खास्द्यां जाणकार, आन भविश्यवाणी कोअनारा राजवाड़ाम आवया, आन आंय तियांहां माआ होपनो कोताप्यो; पोन ते होपनाआ अर्थ ने कोत सेका. 8 आखरीपोअ दानियेल माआ सामने आवयू, जियाआ नाव माआ देवताआ नावोपोअ रोत बेलतशस्सर मिक्योतो, आन जियामेहें पवित्र देवहोंअ आत्मा रोहे; आंय दानियेलोहो माआ होपनो कोत आप्यो आन तियाहा ओं कोयो: 9 ए बेलतशस्सर, तु ते आखा जाणकारोअ मुख्यू होय, माहूं मुंदू होय के तामेहें पवित्र देवोअ आत्मा रोहे, आन ताआ काजे कोड्लीज बी दोड़ाअली गोठीइ अर्थ कोत आपीइलोअ किज कठीण कायनाहां; तियाहा काजे आंय जों होपनो पाल्योहो, तों होपनो आन तियाआ अर्थ माहूं कोत आप."

10 "जेहेलाम आंय आथरुपोअ लोटीत रोयुतो, तेहेलाम आंय दर्शन पाल्यो: आंय पाल्यो, के धरतीइ पोरापोर एक साड़ ठांअल्यो होय, आन तों जुदो उसो वाद्योहो. 11 तों साड़ वोडो पोहात मजबुत ओत गोयोहो, आन तों जुगोअ एतोहो वाद्योहो, आन पुरी धरतीइ मेरे-कोरे रोत देखाअतोतो. 12 तियाआ पाने देख्याम हाजेबी, आन तियाआ फलवे जुदे लागेते, आन तियाआ फलवे एतेहे लागेते के आखे जनवारे तियांहां खात कोइत ताराइत सेकतेते आन तियाआ सावलामेहें धरतीइ आखे जनवारे आराम लेतेते, आन तिया साड़ोअ उसे जुगोमेर्‍येए आखे सिड़े बोहतेते, आन आखे जनवारे तियावाअहीं पोहाअतेते.

13 "आंय पोलांगीपोअ दर्शन पालीइलाअ वेले की देख्यो, के एक होरगाम रोत पवित्र देवदूत उतरीत आयू. 14 तिये वोडा आवाजोम आअड़ीत कोइत कोयो, ‘साड़ोहो वाडीत टाका, या साड़ोअ डाल्यी सिंदी द्या, आन याआ पाने सेंदड़ी द्या, याआ फलवे उडाड़ी द्या; याआ निसे रोत जनवारे सेटे जाते रोअहूं जोवे, आन सिड़े याआ डालीपोअ रोत उडीत जाअहूं जोवे. 15 तेबी याआ खुटोहो मुलेन होंअको पुयींजमेहें रोअहूं द्या, आन तियाहा लोड़ाआ आन इस्लेए पोट्टावाअहीं बांदीत कोइत रानोमेर्‍याआ निला खोड़ोअ विसमेहें रोअहूं द्या.’

"ताहां तो जुगोमेर्‍याअ साकलावाअहीं पिग्या कोए आन जोंगल्या जनवारोअ होस पुयींपोऱ्योअ खोड़ खाया कोअहूं जोवे. 16 तियाआ मोन माअहुंउं होसर्‍योअ ने रोअहूं जोवे, पोन जनवारोअ होस बोदलात जाअहूं जोवे आन एहें कोइत तियापोअ हांत वोरह्ये सेकुहूं जोवे. 17 ओ आदेश जागल्या पवित्र देवदूतोअ निर्णयोंवाअहीं आन ए गोठ पवित्र माअहुंउं वसनोवाअहीं निहींयी के, ‘जें जिवते होय तें जांइत लेअहूं जोवे, के आखाम रोत वोडू देव मोनवीइ राजोम राज कोअहे, आन तों राज जियाहा आपो लागे तियाहा तो आपी देहे, आन तो हानाम हाना माहुंहूं बी तियापोअ नेमी देहे.’"

18 "आंय नबुकदनेस्सर राजा ओंज होपनो पाल्यो. तियाहा काजे बेलतशस्सर, तु याआ अर्थ माहूं कोत आप, काहाके माआं राज्यामेहें बिहीरु कोड्लुज जाणकार याआ अर्थ माहूं नाहां समजाड़ीत सेकतू, पोन तामेहें तोम पवित्र देवहोंअ आत्मा रोहे, तिहीं वाअहीं तु याहा समजाड़ीत सेकेहे."

19 ताहरुउ दानियेल जियाअ नाव बेलतशस्सर बी ओतो, एक ताल जाआं बितू रोयु, आन इतवी इतवीइ फिकरेम पोड़्यु. ताहां राजा कोनु वोल्यू, "बेलतशस्सर, या होपना वाअहीं नेताहां याआ अर्थावाअहीं तु फिकरेम मा पोड़ही." बेलेतशेस्सरे कोयो, "ए माआ मालिख, ओं होपनो ताआ दुस्मोनोपोअ, आन याआ अर्थ ताआ दुस्मोनोपोअ उतरुहूं जोवे! 20 जिया साड़ोहो तुमे देख्यो, जों वोडो आन मजबुत ओत गोयोहो, आन जों जुगोअ एतोहो उसो आन जों धरतीइ मेरे-कोरे रोत देखाअतोतो; 21 जियाआ पाने हाजे बी आन फलवे जाअखीलेहे ओते, जिहीं वाअहीं आखाहाज खाअहूं जोड़तोतो; जियाआ थुड़ी धरतीपोर्‍येए आखे जनवारे रोतेते, आन जियाआ डालीपोअ जुगोमेर्‍येए आक्खे सिड़े बोहतेते."

22 "राजा, तों साड़ तुज होय. तु वोडू आन सेक्तीमान ओत गोयु, ताआ महिमा वाद्यी आन जुगोम जाआं पोतीत गोयी, आन ताआ सालती धरतीइ मेरे-कोरे जाआं पोसर्‍यीही. 23 राजा, तुमे जो एका पवित्र खबऱ्या देवदूतोहो होरगाम रोत उतरीइत्लाहा आन एहें कोत्लाहा देख्यू के, ‘या साड़ोहो वाडीत टाका आन आरवी द्या, पोन खुटोहो मुलेन होंअके पुयींम रोअहूं द्या, आन याहा लोड़ाआ आन इस्लेए पोट्टा वाअहीं बांदीत कोइत रानोमेर्‍याआ निला साराम रोअहूं द्या; ताहां तो जुगोमेर्‍याआ साकलावाअहीं पिग्या कोए, आन तियाहा हांत वोरह्ये जाआं जनवारोंअरीज रोअहूं पोड़े.’"

24 "राजा, याआ अर्थ जों वोडाम वोडे देवे ठरवीत लेदोहो तों ओं होय के, ओं ताअरी ओवे. 25 ताहूं माअहुंउं विसमेहें रोत निहींत जाअहूं पोड़े, आन जोंगल्या जनवारोअरी रोअहूं पोड़े; तू बोलदोअ होस सारु खाही आन जुगोमेर्‍याअ साकला वाअहीं पिग्या कोअही; आन हांत वोरह्ये निहींत जाय तिहींइं फासाड़ी, ताहां ताहूं मुंदू जाय के मोनव्योअ राज्यामेहें राज कोअनारु वोडाम वोडू तोज होय, आन तियाहा आपो लागे तियाहा तो राज होपी देहे. 26 तिया साड़ोअ खुटोहो मुलेनहुले रोअहूं देअलोअ आदेश जोड़्युहू, याआ अर्थ ओं होय के, ताआ राज ताहूं फाशोअ वापिस जोड़े; आन जाहां ताहूं मुंदू जाय के दुन्याआ मालिख होरगाजमेहें होये, ताहां तु फाश्युउ राज कोइत सेकही. 27 तिहीं वाअहीं, ए राजा, माआं गोठ मानित ले, के जर तू पाप सोड़ीत कोइत हाजे कामे कोउ वोलही, आन खाराब कामे सोड़ीत कोइत गरब्योंपोअ दया-माया कोउ वोलही, ताहां ओत सेकेहे के एहेलोहो कोअहीं ताहां ताहूं होक जोड़ीत सेकेहे."

28 ओं आक्खो नबुकदनेस्सर राजाअरी ओवयो. 29 बारा मोयना सेका तिहींइं फासाड़ी जाहां तो बाबेलोअ राजवाड़ापोअ फिऱ्या कोअतुतो, ताहरुउ तो कोनु वोल्यु, 30 "ओं बाबेल केतोहो वोडो राज होये! जियाहा मीज माआं दोमोपोअ आन सेक्तीवाअहीं राजधानीम रोअलोअ काजे बोणायोहो, आन सोताआ महिमा आन वोडायीइ काजे बोहाड़्योहो!"

31 ओं वसन राजाआ मुखोम रोत निठो ने निठो तेहेंज जुगोम रोत आवाज आयू, "ए राजा नबुकदनेस्सर, ताआ बाप्तिमेहें ओ आदेश निहींयुहू: राज ताआ आथोम रोत निहीत गोयोहो! 32 आन ताहूं माअहोंम रोत निहींत जाअहूं पोड़े, आन जनवारोअरी रोअहूं पोड़े; आन हांत वोरह्ये जाआं बोलदोअ होस सारु खाअहूं पोड़े; ताहां तू जांइत लेही के आखाम रोत वोडू देव, मोनव्योम राज कोअहे, आन तो जियाहा आपो लागे तियाहा राज आपी देहे."

33 तेहेलाजमेहें ओं वसन नबुकदनेस्सर राजाआ बाप्तिमेहें पुरो ओवो. तियाहा माअहूंमेहें रोत काडी देदू, आन तो बोलदोअ होस सारु खानू वोल्यु, आन तियाआ डिल जुगोमेर्‍याआ साकला वाअहीं पिगतोतो, तेतोज नाहां पोन तियाआ सिंग्ये मोरागाआ फिसाआ होस आन तियाआ नोखे सिड़ाआ नोखोअ होस वादीत गोये.

34 ते हांत वोरह्ये सेकीत गोये तिहींइं फासाड़ी, राजा नबुकदनेस्सर सोताआ नजर होरगाअहें टाक्यीन कोयो, "माआं ओकल फाशीइ जेहेलीन तेहेलीज ओत गोयी; ताहां मी वोडाम वोडा देवोअ धन्यवाद कोअयो, आन जो सादा जिवतु होय तियाआ स्तुती आन महिमा एहें कोत कोउ वोल्यू:

"तियाआ सालती हादाजलम्यीइं होय,

आन तियाआ राज्य पिढ़ीन पिढ़ी जाआं टिकीत रोनारो होय.

35 धरतीइ आखे रोनारे तियाआ सामने किज नाहां गोणाअते,

आन तो होरगामेर्‍यीइ सेना,

आन धरतीपोअ रोनाराआ विसमेहें तियाआज इश्शाआ पुरमाणे काम कोअहे;

आन कोडोज तियाहा रुकीत कोइत,

‘तुमे ओं की कोअयो?’ कोत नाहां फुसीत सेकतो."

36 "तेहेलाजमेहें, माआं ओकल फाशीइ जेहेलीन तेहेलीज ओत गोयी; आन माआं राज्याआ महिमाआ काजे माआं सालती आन माआं राजटोपू मापोअ फाशुउ आवीत लागू. माआं मंत्री आन माआं आधिकारी माहूं मिलीइलाअ काजे आवा वोल्या, आन आंय माआं राज्याम मजबुत ओत गोयु; आन माआं फाश्यीइ वादार वोडाय ओवी वोल्यी."

37 "ओमे आंय नबुकदनेस्सर होरगाअ राजाहा वोंदोहो; आन तियाआ स्तुती आन महिमा कोअहो, काहाके तियाआ आखे कामे खोरे, आन तियाआ आखी गोठी सिदी होय; आन जे माहें वोडायी वाअहीं सालतेहे, तियांहां तो निसे कोइत सेकेहे."