1 दितवारोअ दिही सिंजीवड़ाअरीही जाहां आंदारोज ओतो, मरिया मग्दालिनी माहणोअहीं आवयी, आन डोणोहो माहणों पोअ रोत होरकीइल्यु देख्यू. 2 ताहां ते गुगद्यी आन शिमोन पेत्र आन तिया बिहीरा सेलाअ जागे जिया पोअ ईसु मेर कोअतुतो, आवित कोइत कोयो, "ते प्रभुहू माहणोमेहें रोत काडीत लेत गोयेहे, आन आमुहूं नाहां मुंदू के तियाहा का मिकी देदुहू."

3 ताहां पेत्र आन तो बिहीरु सेलू निहीत कोइत माहणोंअहें जाना वोल्या. 4 ते बेनू आरी-आरीज गुगदीइताते, पोन बिहीरु सेलू पेत्राहा फासाड़ी टाकीत कोइत कबरेपोअ पेल पोत्यु; 5 आन उसावित कोइत कफनोअ साअके पोड़ीत रोल्ये देख्ये, तेबी तो मायते नाहां गोयू. 6 ताहां शिमोन पेत्र तियाआ फाटी-फाटीज पोत्यु, आन कबरेए मायते गोयू आन साअके पोड़ीत रोल्ये देख्ये; 7 आन तो रुमाल जो तियाआ मुंडोअरी बांद्युतो साअकाअरी पोड़ीत रोल्यू नाहां, पोन आंगेज एकी जागे सुंउडु वालित कोइत मिकल्यू देख्यू. 8 ताहां बिहीरु सेलू बी जो कबरेपोअ पेल पोत्युतो, मायते गोयू आन पालित कोइत विश्वास कोअयू. 9 ते बेनू ओमे जाआं वसनोअ ते गोठी ने समज्याते के तियाहा मोल्यामेहें रोत जिवीत उठीइलोअ ठरल्योज होय.

10 ताहां ए सेला तियांआं कोअ वोलीत जाता रोया.

11 पोन मरिया रोड़ती रोड़ती कबरेए आहनेज बारथे उबी रोयी, आन रोड़ी-रोड़ीइ कबरेमेहें उसावित पाल्यो, 12 जिहीं ईसुउ तोड़ मिक्योतो तिहीं उजले आंगड़े पोवित कोइत बेन देवदुतोहो एकाहा मुंडोअहें आन एकाहा गुडाअ वोलेहे बोहीत रोल्या देख्या.

13 तियां तियीही कोयो, "ए बाय, तू काहा रोड़ेहे?"

तियी तियांहां कोयो, "ते माआं प्रभुहू आखलीत लेत जाते रोये आन माहूं नाहां मुंदू के तियाहा का मिक्युहू."

14 ओं कोत कोइत ते फासाड़ी फिर्‍यी आन ईसुहू उबू रोल्यू देख्यू, पोन ने ओलख्यु के ओ ईसु होय.

15 ईसु तियीही कोयो, "ए बाय, तू काहा रोड़ेहे? कोडाहा होदेहे?"

तियी बोईं बोगिसाअ राखवाली समजीत कोइत तियाहा कोयो, "मालिख, जर तुमू तियाहा लेत गोयेय ताहां माहूं कोत द्या, तियाहा का मिक्युहू, आन आंय तियाहा लेत जाहीं."

16 ईसु तियीही कोयो, "मरिया!" ते फासाड़ी फिरीत कोइत तियाहा इब्रीमेहें कोयो, "रब्बुनी!" मोन्ज्ये "गुरुजी"

17 ईसु तियीही कोयो, "माहूं आथ मा लागाड़ही, काहाके आंय ओमे जाआं देव आब्हाआ जागे उसे नाहांजी गोयू, पोन माआं पायहोंअ जागे जात कोइत कोत दे, के आंय माआं देव आब्हू आन तुमाआं देव आब्हू, आन माआं देव आन तुमाआं देवोअ जागे उसे जाहो."

18 मरिया मग्दालिनी जात कोइत सेलहांहां कोयो, "आंय प्रभुहू देख्यू, आन तिये माहूं ए गोठी कोयी."

19 तेदिहींज दितवारोअ दिही, हांजेए वेले जेहेलाम यहुदीइ बिके वाअहीं जिहीं सेला ओता तिहींइं बाअणे बोंद ओते, तेहेलाम ईसु तिहीं आवित आन तियांआं विसमेहें उबू रोत कोइत तियांहां कोयो, "तुमुहूं शांती जोड़ुहूं जोवे."

20 आन ओं कोत कोइत तिये तियाआ आथ आन तियाआ खुकी तियांहां देखाड़्यी. ताहां सेला प्रभुहू देखीत कोइत जास्ती खुस ओवा.

21 ईसु फाशुउ तियांहां कोयो, "तुमुहूं शांती जोड़ुहूं जोवे; जेहेंकोइत देव आब्हे माहूं मोकल्युहू, तेहेंज कोइत आंय बी तुमुहूं मोकलोहो."

22 ओं कोत कोइत तिये तियांपोअ फुक्यो आन तियांहां कोयो, "पवित्र आत्माहां ल्या! 23 जर एखाआ पाप तुमू माफ कोअतेहे, ताहां तियांआं काजे माफ कोआयेहे; जिया एखा तुमू मिकतेहे, ताहां तें रोत गोयेहे."

24 पोन बारा जोओंमेर्‍युउ एक, मोन्ज्ये थोमू जो दिदमुस मोन्ज्ये जेड़ख्यू कोवाअहे, जाहां ईसु आवल्यु ताहां तियांआं आरी ने ओतू. 25 जाहां बिहीरा सेला तियाहा कोना वोल्या, "आमू प्रभुहू देख्युहू,"

ताहां तिये तियांहां कोयो, "जाअहूं जाआं आंय तियाआ आथोमेहें खिलाआ डुसाला ने पालीत लेंव, आन खिलाआ डुसालामेहें माआं आंगली ने टाकीत पालित लेंव, ताअहूं जाआं आंय विश्वास ने कोअनारु."

26 एका आठीवड़ाआ फासाड़ी तियाआ सेला फाशाअ कोअमेहें ओता, आन थोमू बी तियांअरी ओतू; आन बाअणे बोंद ओते, ताहां ईसु आयू आन तियांआं विसमेहें उबू रोत कोइत कोयो, "तुमुहूं शांती जोड़ुहूं जोवे." 27 ताहां तिये थोमाहां कोयो, "ताआ आंगुउ इंहीं लेतावीत माआं आथोम टाकित पाल आन ताआ आथ माआं खुकिम टाक, विणविश्वाशु मा रोही, पोन विश्वासी बोण."

28 ओं उनाइत थोमे उत्तर आप्यो, "माआं प्रभु, माआं देवा!"

29 ईसु तियाहा कोयो, "तुमे माहूं पाल्युहू, केहें याअ काजे विश्वास कोअयुहू? धन्य ते होय जियां विण देख्येज विश्वास कोअयू."

30 ईसु फाश्येए बी जाअखीलेहे समत्कारोअ कामे सेलाआं सामने देखाड़्ये, जें या पुस्तकोमेहें नाहां लेखाअये; 31 पोन एं याअकाजे लेखाअयेहे के तुमू विश्वास कोअहूं जोवे के ईसुज देवोअ बेटुह्हू ख्रिस्त होये, आन विश्वासो वाअहीं तियाआ नावसे तुमुहूं जिवन जोड़ुहूं जोवे.