1 ✝ 18:1 लुक 22:24 ताहां सेला ईसुउ जागे आवित फुसा वोल्या, "होरगाआ राजोमेहें वोडो कोडो होय?"

2 ताहां ईसु एका हाना पोर्‍याहा आहने हादीत तियांआं विसमेहें उबो कोअयो, 3 ✝18:3 मार्क 10:15; लुक 18:17 आन कोयो, "आंय तुमुहूं खोरो कोहो, के जाअहूं जाआं तुमू ने बोदलाअहा आन हाना पोर्‍याआ होस ने बोणहां, ताअहूं जाआं तुमू होरगाआ राजोमेहें नाहां जात सेकता. 4 जो कोडो सोताहा या पोर्‍याआ होस हानो बोणावे, तो होरगाआ राजोमेहें वोडो बोणे. 5 आन जो कोडो माआं नावसे एक एहेला पोर्‍याहा स्विकार कोअहे, तो माहूं स्विकार कोअहे.

6 "पोन जों कोडो मापोअ विश्वास कोअनारा यां हानामेहें रोत एकाहा बी अटकाव कोए, तियाआ गोलामेहें वोडु बी कोअटीइ पुड़ बांदीत कोइत, आन तियाहा उंडा दोर्‍याम टाकी देय तों जाआं पुरड़े. 7 विश्वासोम अटकाव कोअनाराअ वोजेसे दुन्याआ केतीही खाराब हालत ओवे! अटकाव ते नक्की ओवे, पोन जों अटकाव कोअहे तिया माहुंउं केतीही खाराब हालत ओवे!

8 ✝ 18:8 मत्तय 5:30 "जर ताआ आथ, नेत गुडू ताहूं अटकाव कोए, ताहां तियाहा वाडीत टाकी दे! बेन आथेन बेन गुडा लेत जलमजुग्‍यीइ आगीमेहें पोड़ीइलोअ यापरोत जाअखो हाजो ते ठुटो नेत लेंगड़ो ओत कोइत हादाफल्याआ जिवनोमेहें जाअलोअ पुरड़्यो. 9 जर ताआ डोऊ ताहूं विश्वासोम अड़सन टाकतुये, ताहां तियाहा काडीत टाकी दे! बेन डोआ लेत नरकाआ आगीम पोड़ीइलो यारोत हाजो ते एक डोऊ लेत हादाफल्याआ जिवनोमेहें जाअलोअ ताआ काजे पुरड़्यो.

10 "पाला, तुमू या हानामेहें रोत एकाहा बी निसे मा मानहा, काहाके आंय तुमुहूं कोहो के होरगामेहें तियांआं दुत होरगामेऱ्याआ माआं आब्हाआ सोब हादाजोलम देखताहा. 11 काहाके माहुंउं बेटुह्हू टाकाअलाहां वासाड़ू आयुहू.*18:11 थोड़हा जुना लेख्यामेहें ओं वसन नाहां जोड़तो.

12 "तुमू कि विसार कोअताहा? जर एकदा माहुंउं होव मेडे ओये, आन तियांमेहें रोत एक टाकाइत जाय, ताहां तो एक कमी होव मेडे सोड़ी देत तिया टाकाअला मेडाहा डोगोमेहें ने होदो जाय के? 13 आन जर तों मेडो जोड़ीत गोयो, ताहां आंय तुमुहूं खोरीज कोहो के, जेतिही खुसी तियाहा बाकी नवह्यान्नव मेडा वाअहीं ने ओविये, एतीही खुसी तिया एका मेडाआ वाखरी ओवे. 14 तेहलोज यां हानाम रोत एक बी ने आरवाअहूं जोवे एहलिही तुमाआं होरगामेऱ्याआ आब्हाआ इश्शा होय.

15 "जर ताआ पाही ताआ विरुद्दाम गुनू कोए, ताहां जा, आन तियाहा एखलाम लेत जात कि गुनू ओवुहू तो गोठी कोइत समजाड़, जर तो ताआ उनाय, ताहां तु ताआ पायहोहो जिकीत लेदू. 16 पोन जर तो ने उनाय, ताहां एक नेत बेन जोओंहों ताअरी लेत जा, काहाके जेहलोहो कायदाआ पुस्तकोम लेख्योहो के, ‘एक गोठ बेन नेत तीन साक्शीदारोअ विसमेहें ओवुहूं जोवे.’ 17 जर तो तियांआं बी ने माने, ताहां मंडड़ीही कोत दे. पोन जर तो मंडड़ीइ बी ने माने, ताहां तू तियाहा बिगर यहुदी आन फालू लेनारा नाकेदारोअ होस मानजी.

18 "आंय तुमुहूं खोरीज कोहो के, जों किबी तुमू धरतीपोअ बांदहा, तों होरगामेहें बांदाय, आन जों किबी तुमू धरतीपोअ सोड़हा, तों होरगामेहें सुटे.

19 "फाशुउ आंय तुमुहूं कोहो के, जर तुमामेहें बेन जोओं धरतीपोअ कोड्ली बी गोठ एक मोन ओत कोइत तियापोअ मागहा, ताहां माआं होरगामेऱ्याआ आब्हाआ वोगेहे रोत तियांआं काजे ते गोठ ओत जाय. 20 काहाके जिहीं बेन नेताहां तीन माआं नावोमेहें टोलू ओवतेहे, तिहीं आंय तियांआं विसमेहें रोहो."

21 ताहां पेत्र ईसुउ जागे आवित कोयो, "प्रभु, जर माआं पाही गुनू कोअतू रोय, ताहां आंय तियाहा केतीही वाआ माफ कोओ, केहें हांत वाआ जाआं?"

22 ईसु तियाहा कोयो, "आंय ताहूं ओं नाहां कोतू के, तू हांत वाआ कोअ, पोन हांतोअ सत्तर वारी माफ कोअजी." 23 "तियाहा काजे होरगाआ राज तिया राजाआ होस होय के, जिये तियाआ पावरोअ ईसाब लेअलोअ ठरव्यो. 24 जेहेलाम तो ईसाब लेनु वोल्यू, तेहेलाम एका जोओंहों तियाआ सामने लेताये जो करोड़ो रुप्याआ कर्जावालू ओतू. 25 जाहां तियापोअ कर्ज फिटीइलोअ काजे किज ने ओतो, ताहां तियाआ मालख्ये कोयो, ‘याहा आन याआ बोईंन पोर्‍याहा आन जों किबी याआ ओय, तों आखो वेसी द्या, आन कर्ज फिटी द्या.’ 26 ताहां तिये पावरे पागे पोड़ीत कोयो, ‘मालिख थोड़ाक दिही जाआं थोबेए, ताहां आंय आखो कर्ज फिटी देहीं!’ 27 ताहां मालख्ये तिया पावरोहो किइमाय कोइत सोड़ी देदू, आन तियाआ कर्ज बी माफ कोइ देदो.

28 "पोन जाहां तो पावर बाअथे निठू, आन तियाआ आरीइ पावरोमेहें रोते एकाहा मिल्यू, ताहां तियाआ होव रुप्याआ कर्ज ओतो. तिये तियाहा तोइत तियाआ गोलू दाबीत कोयो, ‘तापोअ माआं जों बी लेणो होय तों फिटी दे.’ 29 ताहां तियाआ हाती पावर जारी जारीइ रावणी कोउ वोल्यू, ‘थोड़ाक दिही थोबेए, आंय आखो फिटी देहीं.’ 30 तो ने मान्यू; पोन तियाहा कर्ज फिटे ताअहूं जाआं जेलेम टाकी देदू. 31 ताहरुउ ओं देखीत कोइत तियाअरीइ हाती पावर खुब नाराज ओवयू, आन जात कोइत तियाआ मालख्योहो आखी गोठी कोत आपी देदी. 32 ताहां तियाआ मालख्ये तियाहा हादीत कोयो, ‘ए रिकामा पावर! तुमे माहूं रावणी कोअयी, ताहां आंय ताआ आखो कर्ज माफ ने कोअयो के? 33 ताहरोअ जेहलीही आंय तापोअ किइमाय कोअयी, तेहेंज कोइत तु बी ताआ हाती पावरोपोअ किइमाय ने कोअहूं जोवतीते के?’ 34 आन ताहरुउ तिये मालख्ये खोतेए बाल्लायी, तिया पावरोहो पुरो कर्ज ने फिटे ताअहूं जाआं जेलेम टाकी देदू."

35 आन सेवटीपोअ ईसु कोयो, "एहेंज कोइत जर तुमामेहें हारेक जोंओं सोताआ पायहोहो जाअहूं जाआं पुरा मोनसे माफ ने कोए, ताअहूं जाआं माआं आब्हू जो होरगामेहें होय, तो बी तुमाअरी तेहलोज कोए."