1 पोन ईसु जेयतुन डोगोपोअ गोयू. 2 आगल्येए दिहे वेगर्‍युउ सिंजीवड़ाअरीही तो फाशुउ मंदिरोम आयू. आखे माहें तियाआ जागे आये आन तो बोहीत कोइत तियांहां सिकाड़ु वोल्यू. 3 ताहराअ कायदाअ मास्तर आन फरिसी एकी बायीही लेताया, जे सिनालामेहें तोआयीते, आन तियीही विसमेहें उबी राखीत ईसुहू कोयो, 4 "गुरु, ए बोईं सिनालो कोअत्लीज सापड़्यीही. 5 कायदामेहें मोशे आमुहूं आदेश आप्युहू के एहेली बोईंहीं डोणाट्जा. ताहां तू यी बोईंइ बाप्तिम कि कोहे?" 6 ते तियाहा फोसाड़ीइलोअ काजे ए गोठ कोयी, काहाके तियापोअ दोश लागाड़ीइलोअ काजे एखू गोठ सापड़े. पोन ईसु टुंगू पोड़ीत ईंगाअठी वाअहीं पुंयींपोअ लेखू वोल्यू.

7 जेहेलाम ते तियाहा फुशाज कोअताते, ताहां तो होल्लुज उबू रोत कोइत तियांहां कोयो, "तुमामेहें जों पापी ने ओय, तोंज माहुंउं पेल यीही डोण देये." 8 आन फाशुउ तो टुंगू पोड़ीत पुंयींपोअ ईंगाअठी वाअहीं लेखू वोल्यू. 9 पोन ते ओं उनाइत कोइत डाये माअहें बाकी एकाअ फाटी एक निहींत गोये, आन ईसु एखलुज रोत गोयू, आन ते बोईं तिहींज उबी रोत गोयी. 10 ईसु उबू रोत कोइत तियीही कोयो, "ए बाय, तें आखे का गोये? केहें एखे तापोअ दोश लागाड़्यु?"

11 तियी बोईं कोयो, "प्रभु, कोडेज नाहां."

ईसु कोयो, "आंय बी ताहूं डोंडोअ आदेश नाहां आपतू; जा, आन फाशीइ पाप मा कोअही."

12 ईसु फाशुउ फरिसीहीं कोयो, "दुन्याअ उजालो आंय होय; जों माआं फासाड़ी आवे, तों आंदारामेहें ने साले, पोन जिवनोअ उजालो तियाहा जोड़े."

13 फरिसी माट्यों तियाहा कोयो, "तू ताआ साक्शी सोताहा आपेहे, ताआ साक्शी खोरी कायनाहां."

14 ईसु तियांहां उत्तर आप्यो, "भले आंय माआं साक्शी सोताहा आपोहो, तेबी माआं साक्शी खोरी होय, काहाके माहूं मुंदू होय के आंय का रोत आयुहू, आन का जाहो? पोन तुमुहूं ने मुंदू के आंय का रोत आवोहो आन का जाहो. 15 तुमू माअहोंअ न्याय शरीरोअ पुरमाणे कोअताहा; आंय कोडाअ न्याय नाहां कोअतू. 16 आन जर आंय न्याय कोओ बी, ताहां माआं न्याय खोरु रोय; काहाके आंय एखलुज नाहां, पोन आब्हू जिये माहूं मोकल्युहू तो माअरी होये. 17 तुमाआं कायदामेहें बी लेख्योहो के बेन जोओंअ साक्शी मिलीत कोइत खोरी ठरेहे; 18 एक तोम आंय सोताहा माआं साक्शी आपोहो, आन बिहीरु आब्हू माआं साक्शी आपेहे जिये माहूं मोकल्युहू."

19 तियां तियाहा कोयो, "ताआ आब्हू का होय?"

ईसु उत्तर आप्यो, "नाहां तुमू माहूं ओलखीइता, नाहां आब्हाहा जर तुमू माहूं ओलखीइता ताहां आब्हाहा बी ओलखीइता."

20 ए गोठी ईसु मंदिरोम सिकाडतु जात एकी खुलीमेहें कोयी, जिहीं अर्पणोअ पेटी मेक्यीते.आन कोडेज तियाहा ने तोअयु, काहाके तियाआ वेल ओमे जाआं ने आयीते.

21 फाशोअ ईसु तियांहां कोयो, "आंय जातु रोहीं, आन तुमू माहूं होदहा, पोन तुमू तुमाआं पापोमेहें मोअहा; जिहीं आंय जाहो, तिहीं तुमू नाहां आवित सेकते."

22 ताहां यहुदी आधिकार्‍यों कोयो, "केहें विसार कोअताहा के तो सोताहा मोइत जानारु ओये, जो कोहे के, ‘जिहीं आंय जाहो तिहीं तुमू नाहां आवित सेकते?’"

23 ईसु तियांहां कोयो, "तुमू निसेए होय, पोन आंय उसेए होय; तुमू यी दुन्याम रोत होये, आंय यी दुन्याम रोत कायनाहां. 24 तियाहा काजे आंय तुमुहूं कोयो, के तुमू तुमाआं पापोमेहें मोअहा, काहाके जर तुमू विश्वास नाहां कोअता के ‘आंय जो होय तोज होय,’ ताहां तुमू तुमाआं पापोमेहें मोअहा."

25 तियां तियाहा फुशो, "तू कोडू होय?" ईसु तियांहां उत्तर आप्यो, "तोज होंव जो सुरुवातिही रोत तुमुहूं कोतू आयुहू. 26 माआं तुमुहूं वारुज गोठी कोअलोअ, आन वारुज गोठीइ निर्णय कोइलो होये; पोन माहूं मोकलीइनारु खोरु होय, आन आंय जो तिया पोअ रोत उनाअयुहू तोज दुन्याहा कोहो."

27 तियांहां ओं ने समजाअयो के ईसु तियांहां आब्हाआ बाप्तिमेहें कोहे. 28 ताहां ईसु तियांहां कोयो, "जेहेलाम तुमू माहुंउं बेटाह्हाहा उसे सोढवाहा, तेहेलाम तुमू जाईंत लेहा के ‘आंय जो होय तोज होंव,’ ताहां तुमू सोताहाज जाईंत लेहा के आंय माआं सोताआ आधिकार वाअहीं कीज नाहां कोअतू, पोन आंय जेहलोहो माआं आब्हे माहूं सिकाड़्युहू तेहलोज कोहो. 29 आन माहूं मोकलीइनारु माअरी होय; तिये माहूं एखलू नाहां सोड़्यु, काहाके आंय सादा तोंज काम कोअहो जों तियाहा पोटेहे."

30 तो ए गोठी कोयाज कोअतुतो के डाहटे जोएं तिया पोअ विश्वास कोअयू.

31 ताहरुउ ईसु तियापोअ विश्वास कोअनारा तियां यहुदीही कोयो, "तुमू माआं वसनोमेहें रोहा, ताहां हादामक्याज माआं सेला ठरहा. 32 तुमू सत्याहा ओलखाहा, आन सत्य तुमाआं सुटका कोए."

33 तियां ईसुहू उत्तर आप्यो, "आमू ते अब्राहामोअ पारवाड़ीइ होये, आन केदिहीं कोडाआज नोवकर नाहां बोण्या. ताहरुउ तू कि कोइत कोहे के तुमू मोकला ओत जाहा?"

34 ईसु तियांहां कोयो, "आंय तुमुहूं खोरीज कोहो के जो कोडो पाप कोअहे, तो पापोअ नोवकर होये. 35 कोडू बी नोवकर सादा कोअमेहें नाहां रोतू; फक्त बेटुह्हू सादाज रोहे. 36 तियाहा काजे जर बेटुह्हू तुमुहूं मोकलू कोए, ताहां हादामक्याज तुमू मोकला ओत जाहा. 37 माहूं मुंदू होये के तुमू अब्राहामोअ पारवाड़ीइ होये; तेबी माआं वसनोहो तुमाआं मोनोमेहें जागू नाहां जोड़तू, तियाहा काजे तुमू माहूं माईंत टाकीइलोअ कोशित कोअताहा. 38 आंय तोंज कोहो, जो माआं बाह्हाआ जागे देख्योहो; आन तुमू तोंज कोअतेहे, जो तुमू तुमाआं बाह्हाप रोत उनाअयेहे."

39 तियां तियाहा उत्तर आप्यो, "आमाआं आब्हू तोम अब्राहाम होय." ईसु तियांहां कोयो, "जर तुमू अब्राहामोअ पोर्‍या रोता, ताहां अब्राहामोअ होस काम कोअता. 40 पोन ओमे तुमू माआं सारका माहुंहूं माईंत टाकीइलोअ कोअताहा, के ये तुमुहूं तों खोरो वसन कोताप्यो, जों देवोअहें रोत उनाअयू; एहेलोह ते अब्राहाम ने कोअयोतो. 41 तुमू तुमाआं बाह्हाअ होस काम कोअताहा."

तियां तियाहा कोयो, "आमू सिनालोअ नाहां उबज्या, आमाआं एक आब्हू होये मोन्जे देव."

42 ईसु तियांहां कोयो, "जर देव तुमाआं आब्हू रोतु, ताहां तुमू मापोअ मेर कोअता; काहाके आंय देवोअहें रोत आयुहू. आंय माआं आधिकारो वाअहीं नाहां आयू, पोन तियेज माहूं मोकल्यू. 43 तुमू माआं गोठीही काहा नाहां समजीइता? याअ काजे के तुमू माआं वसन उनाइत नाहां सेकता. 44 तुमू तुमाआं आब्हा सैतानोअ पोर्‍या होये आन तुमाआं आब्हाआ ईश्शाहा पुरी कोअहूं होदताहा. तो ते सुरुवाती रोतुज खुनी होये, आन सत्या पोअ मजबुत नाहां रोयू, काहाके सत्य तियामेहें कायनाहां. जाहां तो ठोगेहे, ताहां तो तियाआ सोभावो वाअहींज गोगेहे; काहाके तो ठोग होय आन ठोगोअ आब्हू होय. 45 पोन आंय जो खोरो कोहो, तियाहाज काजे तुमू माआं विश्वास नाहां कोअता. 46 तुमामेर्‍योअ कोडो माहूं पापी ओवीइलाआ दोश लागाड़ेहे? जर आंय खोरो कोहो, ताहां तुमू माआं विश्वास काहा नाहां कोअता? 47 जो देवोअहें रोत होये, तो देवोअ गोठी उनाअहे; आन तुमू याअकाजे नाहां उनाअता काहाके देवोअहें रोत कायनाहां."

48 यहुद्यां तियाहा कोयो, "केहें आमू बोराबर ने कोताते के तू शोमरोन वालू होये, आन तामेहें पुत होये?"

49 ईसु उत्तर आप्यो, "मामेहें पुतोअ आत्मा कायनाहां; पोन आंय तोम माआं आब्हाअ मानपान कोअहो, आन तुमू माआं अपमान कोअतेहे. 50 पोन आंय माआं आदर नाहां कोअतू; होव, एक होय जो इतवेहे आन न्याय बी कोअहे. 51 आंय तुमुहूं खोरीज कोहो, जर एखु माहुंउं माआं हिकवोण माने, तो केदिहींज ने मोए."

52 यहुदी तियाहा कोयो, "ओमे आमू जाइंत लेदो के तामेहें हुदाअलीज पुतोअ आत्मा होये. तेतोज नाहां पोन अब्राहाम मोइत गोयू, आन भविश्यवक्ता बी मोइत गोया; आन तू कोहे, ‘जर एखु माआं हिकवोण लेत साले, ताहां तो मोतोअ होवाद केदिहींज ने साके.’ 53 आमाआं आब्हू अब्राहाम तोम मोइत गोयू. केहें तू तियाआ रोत वोडू होय कोत पुरावू कोअहे? आन भविश्यवक्तां बी मोइत गोया. तू सोताहा कि समजेहे?"

54 ईसु उत्तर आप्यो, "जर आंय सोताआ महिमा कोओ, ताहां माआं महिमा किज नाहां;पोन माआं महिमा कोअनारु माआं आब्हू होय, जियाहा कोतेहे के तो आमाआं देव होय. 55 तुमू तोम तियाहा केदिहींज नाहां ओलख्यु: पोन आंय तियाहा ओलखोहो. जर आंय कोंव के आंय तियाहा नाहां ओलखीइतू, ताहां आंय तुमाआं होस ठोग ठरिहीं; पोन आंय तियाहा ओलखोहो आन तियाआ शब्दा पोअ सालोहो. 56 तुमाआं आब्हू अब्राहाम माआं दिही देखीइलाअ आशा वाअहीं खुब खुस ओतू; आन तिये देख्यू आन खुसी कोअयी."

57 यहुदी तियाहा कोयो, "ओमेज तू पोन्नास वोरह्योअ जाआं नाहां, तेबी तुमे अब्राहामोअ देखीत लेदू?"

58 ईसु तियांहां कोयो, "आंय तुमुहूं खोराखोर कोहो के, अब्राहामोअ उबजीइलाअ पेल आंय होंव."

59 ताहरेए ते तियाहा माईलाअ काजे डोणे विशे, पोन ईसु निकाइत कोइत मंदिरोमेहें रोत निहींत गोयू.