1 तियां दिहो मेहें महान राजा कैसर ओवगुस्तुसोअ वोगेहे रोत आदेश निहीयु के पुरी कोलीइ आखा माअहुंउं जनगणना ओवुहूं जोवे. 2 ए पेल्लीइ जनगणना ओती, ए तियां दिहोमेहें ओवी, जेहेलाम सिरियाअ राज्यपाल क्विरिनियुस ओतू. 3 बादे माअहें नाव टिपाड़ीइलोअ कोअते जिवज्योअ गावोंम जाते रोये.

4 योसेफ बी गालील राज्याआ नासरेथ सेहरोम रोत यहुदीया राज्यामेहें दाविदोअ होयर बेथलेहेमोम गोयू, काहाके तो दाविदोअ कुटूंबाआ आन पारवाड़ीइ ओतू. 5 काहाके मरिया जे तियाआ काजे फुसाअली ओती, तियीइरी नाव टिपाड़ीत सेके. ते पोटाअरी ओती. 6 ताहां एहेलोह ओवो के तें तिहींज ओते तेहेंज मरियाआ ठाल्ली पोडीइलाअ वेल आयी, 7 आन ते ठाल्ली पोड्‍यी आन तियीही पेल्लूउ सोऊ ओवू आन तियी तियाहा सिवरामेहें वेटालित गोवाणीमेहें मेक्यु; काहाके तियांहां रोअलाआ कोअते कोड्लूज जागू ने जोड़्यू.

8 आन तिया देसो मेहें वारुज मेडाआं सारवाली ओता, जे राती सापड़ा मेहें रोत कोइत तियांआं मेडाआं टोलाआ राखवाली कोअताते. 9 आन प्रभुउ एक दुत तियांआं जागे आवित उबू रोयू, आन देवोअ उजालो तियांआं सारी सोमकीर सोमक्‍यो आन ते जोबरा बित गोया; 10 ताहां देवदुते तियांहां कोयो, "मा बिहा; काहाके पाला, आंय तुमुहूं, हाजी बातमी कोहो, जे आखा माहुंउं काजे वोडी खुसीइ गोठ होये, 11 के आज दाविदोअ सेहरोम तारनारु जल्माहां आयुहू; आन ओज ख्रिस्त प्रभु होये! 12 आन तुमाआं काजेहे ए खुण होय के, तुमू एका पोर्‍याहा सिवरा मेहें वेटालित आन गोवाणीमेहें लोटाड़ीत मेकल्‍यो देखहा."

13 ताहां उसकाहीज तिया देवदुतोअरी देवदुत्होंओं सेनाहा देवोअ स्तुती कोअत्लाहा आन एहें कोत्लाहा होंबलाअयो के,

14 "जुगोम देवोअ महिमा,

आन धरती पोअ होक ओवे, जियां वाअहीं तो खुस होय!"

15 आन जेहेलाम प्रभुउ दुत तियांआं जागे रोत होरगाम जाता रोया, ताहां मेडाआं सारवाली तियां तियांआं कोयो, "साला, आपू बेथलेहेमोमेहें जात्ला, आन जे घटना ओवीही ते आपू पालुहूं."

16 आन तियां ताबुड़ जात कोइत मरिया आन योसेफोहो आन गोवाणीमेहें तिया पोर्‍याहा लोटीत रोल्‍यो देख्‍यो. 17 तो पालित कोइत तियां तिया पोर्‍याआ बाप्तिमेहें जे गोठी उनाअया, ते तियां आखाहा कोत देखाड्‍यी. 18 आन बादे यी गोठीइ उनाअनारे माअहें जे मेडाआं सारवाल्‍यों कोत देखाड्‍यी ते होंबलीत बोगलात गोये. 19 पोन मरिया ए बादी गोठी तियीइ मोनोमेहें मिकीत विसार कोअती रोयी. 20 आन मेडाआं सारवाल्योहों देवदुते कोयो तेहेंज कोइत बादो उनाइत आन देखीत कोइत, देवोअ महिमा कोअताज आन गावताज जाता रोया.

21 जेहेलाम हांत दिही पुरा ओवा आन तियाआ खतनाआं दिही आयू, ताहां तियाआ नाव ईसु मेक्‍यो, ओं नाव देवदुतों तियाआ उब्जीइलोअ पेलुज कोयोतो.

22 जेहेलाम मोशेए नियमोंअ पुरमाणे तियीइ सोका ओवीइलोअ दिही पुरा ओवा, ताहां योसेफ आन मरिया तिया पोर्‍याहा येरुसालेम सेहरोम प्रभुउ हुंबर लेत आवये. 23 जेहें कोइत प्रभुउ नियमोमेहें लेखल्यो‍ होय के, "हर एक पेल्‍लाअठीज उब्जीइल्यू पोर्‍यू देवोअ काजे सोकू ठरे," 24 आन प्रभुउ कायदाआ पुरमाणे ओलाआ एक जोड़ी नेत पेरवाआ बेन पिले लेतावीत गाराहा आपुहूं जोवे.

25 तेहेलामेहें येरुसालेमोमेहें शिमोन नावोअ एक माटी ओतू, आन तो माटी हाजू आन देवोहो बित सालनारु ओतू; आन इस्राएलोअ होकेए काजे वाट जोवतुतो, आन पवित्र आत्मा तियाअरी ओतू. 26 आन जाअहूं जाआं प्रभुउ ख्रिस्ताहा देखीत ने लेय ताअहूं जाआं तु ने मोअही कोत तियाहा पवित्र आत्मे प्रगट कोअयोतो. 27 शिमोन आत्माआं उनाइत कोइत मंदिरोम आयू; आन जाहां आयही आब्हू तिया हाना पोर्‍या ईसुहू नियमोंअ पुरमाणे कोइलोअ काजे मांय मंदिरोम लेत आवये, 28 ताहां शिमोन तिया हाना पोर्‍याहा तियाआ बोदाम लेदो आन देवोअ आभार मानित कोयो:

29 "ओमे, प्रभु, ताआ सेवकोहो,

तुमे कोअल्‍या वायदाआ पुरमाणे होकेहे जाअहूं दे,

30 काहाके आंय माआं डोआ वाअहीं ताआ सुटकाहा देखीत लेदीही,

31 जे तुमे बादा माअहोंअ सामने तियार कोअयिही,

32 याअ कोअते के तो बिगर यहुदी माअहोंहों उजालो आपे,

आन ताआ वावड़्या माअहुंहूं इस्राएलोअ कोअते महिमा लेत आवे."

33 योसेफेन पोर्‍याआ आयही यीं गोठी वाअहीं बोगलात गोये, जे शिमोने तियाआ बाप्तिमेहें कोयी. 34 ताहां शिमोने तियांहां आशिर्वाद आप्यू आन तियाआ आयही मरियाहा कोयो, "पाल, ओ पोर्‍यू ते देवोअ निवड़ीइल्यु होय याअ कोअते के मोए आन वारुज इस्राएलोअ माअहुंउं तारण ओवे. आन तो देवोअहीं रोत एक एहेलिही निशाणी ओवे के तियाआ विरोध ओवे. 35 आन तियांआं मोनोमेऱ्याआ विसार खुल्ला ओत जाय आन ताआ जिवोमेहें वाडाली तलवार बोसकीत जाय, ताआ दिल टुटीत जाय."

36 तिहीं हन्ना नावोअ एक डायी भविश्यवक्ती ओती. ते आशेर समाजोअ पनुएलोअ बेटिह्ही ओती, आन ते डायी ओती आन तियीइ माट्योअरी तियीही फक्त हांत वोऱ्ह्यें रोअहूं जोड़्योतो. 37 आन ओमे ते हांयशीन शार वोर्‍ह्‍योंअ रोंडाअली ओती, आन मंदिरोहो ने सोडतीते, पोन उपास आन प्रार्थना कोइ-कोईइ रातेन दिहे भक्ती कोअया कोअतीते. 38 आन ते तिहीं तियी बोराबर वेलेपोअ पोतीन प्रभुउ आभार मानी वोल्‍यी, आन तिहीं जे आखे जोएं येरुसालेमोअ सुटकाआ वाट जोवतेते तियां आखाहा तिया पोर्‍याआ बाप्तिमेहें कोनी वोल्‍यी.

39 जाहां योसेफ आन मरिया प्रभुउ नियमोंअ पुरमाणे आखी विधी पुरी कोइत लेदी, ताहां तें फाश्येए तियांआं सेहर नासरेथोअ गालीलोम आवते रोये. 40 आन पोर्‍यो वोडो ओवतो आन पोहाअतो, आन बुद्दी वाअहीं पाक्को बोणतो गोयो; आन देवोअ मेरवानी तियापोअ ओती.

41 ईसुउ आयही-आब्हू वल्हांडणोअ तिवारोम येरुसालेमोमेहें वोर्ह्योंअ जाया कोअतेते. 42 जाहां ईसु बारा वोरह्योअ ओवू, ताहां तें तिवार पाले वोरह्योअ डिठ जातेहे तेहें कोइत गोये. 43 जेहेलाम ते तिवारोअ दिही पुरा ओवा, ताहां तें कोअ वाट लागे, पोन तो ईसु तिहींज येरुसालेमो मेहें रोत गोयू; आन तियाआ आयहीन आब्हाहा ए गोठ ने मुंदू गोयू. 44 तियांहां लागो के तो बिहीराअरी ओये, आन दिही पोइत साल्‍ये ताहां जात तियाहा कोर्‍याआ माअहूं मेहें आन दोस्ती मेहें होदे निहींये. 45 ताहां तियांहां तो काज ने जोड़्यू, फाश्येए तें तियाहा येरुसालेम जाआं होदतेज गोये.

46 आन तीन दिही ओवा, ताहां तियाहा तिया मंदिरोम यहुदी गुरांअरी बोहीत तियांआं गोठी उनात्लाहा आन तियांहां प्रश्‍ने फुसत्लाहाज होदीत काड्‍यू. 47 जेते जोएं तियाआ गोठी उनाअतेते, तें बादे तियाआ उत्तरो वाअहीं बोगलात गोयेते. 48 ताहां तियाआ डाये तियाहा देखीत बोगलात गोये, आन तियाआ आयही तियाहा कोयो, "माआं बेटा, तुमे आमाअरी एहें काहा कोअयो? पाल, ताआ आब्हू आन आंय नेहें ताहूं बितेबिते होदते फिरत्‍ले?"

49 तिये तियांहां उत्तर आप्‍यो के, "माहूं काहा होद्त्ले? तुमुहूं ने मुंदू ओतू के माहूं माआं आब्हाआ कोअमेहें रोअलोअ गरज होय?"

50 पोन जो उत्तर तिये तियांहां कोयो तो तियांहां ने समजाअयो. 51 ताहां तो तियांअरी फाशुउ नासरेथ मेहें आयू, आन तो तियांआं गोठी मानतु रोयू, तियाआ आयही ए बादी गोठी तियीइ मोनोमेहें मेक्यी. 52 आन ईसु डिलाखू ओवू आन बुद्दी वाअहीं पोहाअतू गोयू, आन प्रभुउ आन माअहोंअ मेरवानी मेहें वादतू गोयू.