1 तिबिरियुस कैसर वोडा राजाअ पोनर वोर्‍ह्योंअ राजोम, जाहां यहुदीयाअ राज्यपाल पंतीयुस पिलात ओतू, आन तिया इलाखाअ शोवथा भागोअ राजहां मेएं हेरोद गालीलोअ राजा ओतू, आन तियाआ पाही फिलीप्प इतुरिया आन त्रखोनितीसोअ राजा ओतू, आन अबिलेने मेहें लिसानियास राजा ओतू, 2 आन जाहां हन्ना आन कैफा मुख्य पुंजारु ओता, तिया वाडोहो देवोअ शब्द जखर्‍याआ बेटाह्‍हा योहानोअ जागे पोतो. 3 तो यारदेन खाडीइ आसे पासेए आखा मुलखो मेहें फिरी-फिरीइ पापोअ माफीइ कोअते मोन फिरावोअ आन बाप्तिस्माआं परसार कोउ वोल्यू. 4 जेहलोहो यशया भविश्यवक्ताआ पुस्तको मेहें लेख्योहो:

"रानोमेहें कोडा तेबी बोंबलीइनाराअ शब्द होय:

प्रभुउ वाट तियार कोआ,

तियाआ सड़क हुदी कोआ.

5 हर एक खायारु बुजाइत जाय,

आन हर एक डोगोअ आन टेंबा निसे ओत जाय;

आन जे वाकड़ी-तिकड़ी वाट होय ते हुदी ओत जाय,

आन जों उसो-निसो होय, तों सापाट ओत जाय.

6 आन आखे माअहें देवोअ सुटकाहा देखे!"

7 जे माअहोंअ गर्दी बाप्तिस्मा लेअलोअ कोअते तियाआ जागे आवतीते, तियांहां तो कोतूतो, "ए हापोअ पिलां, तुमुहूं देवोअ आवनारा डोंडोम रोत वासाय तेहें कोडे कोत देदो. 8 ताहां मोन फिरावीलोअ खोरो फल आपा, आन तुमाआं मोनोम एहेलुहू विसार मा कोअहा के आमाआं आब्हू अब्राहाम होय; काहाके तुमुहूं कोहो के देव यां डोणोम रोत बी अब्राहामोअ कोअते पोर्‍ये उब्जाड़ीत सेकेहे. 9 आन कुवाड़ ओमेंज साड़ोअ थुड़ोम तोइत रोयोहो, तियाहा कोत जो साड़ हाजो फलवो ने आपे, तो साड़ वाडीत कोइत आगीम टाकात जाय."

10 ताहां माअहूं तियाहा फुशो, "ताहां आमू कि कोओ?"

11 तिये तियांहां उत्तर आप्यो, "जियापोअ बेन आंगड़े ओय, ताहां तो जियापोअ ने ओय तियाहा एक आंगड़ो आपुहूं जोवे आन जियापोअ रोटू ओय, तों बी तेहेंज कोअहूं जोवे."

12 जेहेलाम थोड़ाक नाकेदार बी बाप्तिस्मा लेअलोअ काजे तियाआ जागे आवया, ताहां तियाहा फुशो, "गुरुजी आमू कि कोओ?"

13 तिये तियांहां कोयो, "जेतू फालू लेअलोअ आधिकार होय तिया रोत जाअखु फालू मा लेहा."

14 थोड़ाक सिपायडां बी तियाहा ओं फुशो के, "आमाआं बाप्तिम कि? आमू कि कोअहूं जोवे?"

तिये तियांहां कोयो, "कोडा पोअ बी जबरजस्तीज पोशा मा लेहा आन ठोगोअ आरोप मा लागाड़हा आन तुमाआं जो पागार जोड़ेहे, तेताज पोअ खुस रोवा."

15 माअहें जेहेलाम वोडू आहरु कोइत वाट जोवतेते आन तियांआं मोनोम योहानोअ बाप्तिमेहें विसार कोअतेते के "मसीहा ओज ते नाहां" 16 ताहां योहाने तियां आखाहा कोयो, "आंय तोम तुमुहूं पाअयों वाअहीं बाप्तिस्मा आपोहो, पोन जो आवनारु होय तो माआं रोत जाअखु ताकतवालु होय; आंय तोम तियाआ बुटोअ दोअड़ी सोड़ीइलोअ बी लायक कायनाहां; तो तुमुहूं पवित्र आत्मा आन आगी वाअहीं बाप्तिस्मा आपे. 17 तियाआ आथोम तियाआ हुप होय आन तो तियाआ खोलामेर्‍याआ दाणा वारुहूं साप कोए; आन गोंवोंहों तियाआ मोठी मेहें टिगवाले; पोन पुहूटाहा केदिहींज ने उलाअनारी आगीम पेटाड़ी देय."

18 एहें कोइत वारुज आलांग आलांग पद्धती वाअहीं योहाने माअहुंहूं हाजी बातमीइ परसार कोअयू, आन तियांहां रावणी कोअयी के ते तियांआं जिवनोअ वाट बोदले. 19 पोन जाहां तिये हेरोद राजाहा तियाआज पाही फिलीप्पअ लाडी हेरोदियाअरी वेहवाल कोअल्यो कोते आन वारुज एहेलेहे खाराब कामें कोअल्ये कोत हेकाटी देदू, 20 ताहरुउ हेरोद योहानोहो जेलेम टाकीत जे खाराब कामें कोअये तिहीं मेहें फाशोअ एक जाआं वादार खाराब काम वादाड़ी देदो.

21 जाहां आखा माअहूं बाप्तिस्मा लेत लेदो आन ईसु बी बाप्तिस्मा लेत कोइत प्रार्थना कोअतुतो, तेहेलाम जुग उगड़ीत गोयो. 22 आन पवित्र आत्मा पेरवाअ होस शरीरोअ रुपोमेहें तियापोअ उतर्‍यू, आन जुगोम रोत एहेलुहू आवाज आयू के, "तु माआं मेरालू बेटुह्हू होय, आंय तावाअहीं खुस होय."

23 जेहेलाम ईसु तियाआ कामोंअ सुरवात कोअयी, तेहेलाम तो तीस वोर्‍ह्योंअ ओतू, माअहें विसार कोअत्ले के तो योसेफोअ बेटुह्हू होय आन योसेफ एलीइ बेटुह्हू ओतू, 24 आन एली मत्थातोअ, मत्थात लेवीइ, लेवी मलखीइ, मलखी यन्नयोअ, यन्नय योसेफोअ बेटुह्हू ओतू, 25 योसेफ मत्ताथियाआ बेटुह्हू ओतू, मत्ताथि आमोसोअ, आमोस नहुमोअ, नहुम एसलीइ, एसली नग्गयोअ बेटुह्हू ओतू, 26 नग्गय मआथोअ बेटुह्हू ओतू, मआथ मत्ताथियाआ, मत्ताथि सिमयीइ, सिमयी योसाखोअ, योसेख योदाआ बेटुह्हू ओतू.

27 योदा योहानानोअ बेटुह्हू ओतू, योहानान रेसाआ, रेसा जेरुब्बाबेलोअ, जेरुब्बाबेल शेल्तीएलोअ, शेल्तीएल नेरीइ बेटुह्हू ओतू, 28 नेरी मलखीइ बेटुह्हू ओतू, मलखी आद्दीइ, आद्दी कोसामोअ, कोसाम एल्मादामोअ, एल्मादाम एरोअ बेटुह्हू ओतू, 29 एर येशुउ बेटुह्हू ओतू, येशु एलिएजरोअ, एलिएजर योरिमोअ, योरिम मत्थातोअ, मत्थात लेवीइ बेटुह्हू ओतू.

30 लेवी शिमोनोअ बेटुह्हू ओतू, शिमोन यहुदाआ, यहुदा योसेफोअ, योसेफ योनामोअ, योनाम एल्‍याकीमोअ बेटुह्हू ओतू, 31 एल्‍याकिम मल्लयोअ बेटुह्हू ओतू, मल्लय मिन्नाआ, मिन्‍ना मत्तथाआ, मत्तथा नाथानोअ, नाथान दाविदोअ बेटुह्हू ओतू, 32 दाविद इसायोअ बेटुह्हू ओतू, इसाय ओबेदोअ, ओबेद बोवाजोअ, बोवाज सल्मोनोअ, सल्मोन नहशोनोअ बेटुह्हू ओतू, 33 नहशोन अम्मीनादाबोअ बेटुह्हू ओतू, अम्मीनादाब अदमीनोअ, अदमीन आर्ण्याआ, आर्ण्यु हेस्रोनोअ, हेस्रोन पेरेसोअ, पेरेस यहुदाआ बेटुह्हू ओतू, 34 यहुदा याकोबोअ बेटुह्हू ओतू, याकोब इसहाकोअ, इसाहाक अब्राहामोअ बेटुह्हू ओतू, अब्राहाम तेरहोअ, तेरह नाहोरोअ बेटुह्हू ओतू, 35 नाहोर सेरुगोअ बेटुह्हू ओतू, सेरुग रेवुउ, रेवु पेलेगोअ, पेलेग एबेरोअ, एबेर सेलेहाआ बेटुह्हू ओतू, 36 सेलेह केनानोअ बेटुह्हू ओतू, केनान अर्पक्शदोअ, अर्पक्शद सेमाआ, शेम नोहाआ, नोहू लामेखोअ बेटुह्हू ओतू, 37 लामेख मेथुसालेहोअ बेटुह्हू ओतू, मेथुसालेह हनोकोअ, हनोक यारेदोअ, यारेद महालेलोअ, महालेल केनानोअ बेटुह्हू ओतू, 38 केनान एनोशोअ बेटुह्हू ओतू, एनोश सेथोअ, सेथ आदामोअ, आदाम देवोअ बेटुह्हू ओतू.