1 ताहां ईसु आरामोअ दिही खेतो मेहें रोत जातुतो, आन तियाआ सेला कोहें तोड़ी तोडीइ आथो वाअहीं सोलीत खाताज जाताते. 2 ताहां थोड़ाक फरिसी तियांहां कोयो, "कायदाअ अनुसार जो ठीक नाहां, तो काम तुमू आरामोअ दिहोअ दिही काहा कोअताहा?"

3 ईसु तियांहां उत्तर आप्यो, "केहें तुमू ओं नाहां वाश्यो के दाविद, जेहेलाम तो आन तियाआ हाती नेहें फुकल्‍या ओता तेहेलाम कि कोअयो? 4 तो केहें कोइत देवोअ कोअमेहें गोयू, आन भेटेए रोटू लेतावीत खादू, तियां रोटाहा कायदाअ पुरमाणे पुंजाराहा सोड़ीत बिहीरा कोडाहाज परवानगी ने ओती, तेबी तिये तियाआ हात्योहों बी तो रोटू आप्यू?"

5 आन ईसु तियांहां कोयो, "माहुंउं बेटुह्हू आरामोअ दिहोअ बी प्रभु होय."

6 एहेलोह ओवो के, एका आरामोअ दिहोअ दिही ईसु आराधनालयोमेहें जात कोइत संदेश देनू वोल्‍यु; आन तिहीं एक माहुंउं ओतो जियाआ हाजाड़्यू आथ उगात गोयूतो. 7 थोड़ाक कायदाआ मास्तरहों आन फरिसी आरोप लागाड़ीइलोअ कोअते हेंहींत बोठाते के, ईसु आरामोअ दिहोअ दिही हुदारेहे के नाहां. 8 पोन ईसु तियांआं विसार जांअतुतो; तियाहा काजे तिये उगाअला आथोवाला माहुंहूं कोयो, "उठ, विसमेहें उबू रो." तो उठीत उबू रोयू.

9 ईसु तियांहां कोयो, "आंय तुमुहूं फुसोहो के कायदाअ पुरमाणे आरामोअ दिही कि ठीक होय, हाजो कोइलोअ के बाक्तो कोइलो; जिव वासाड़ीइलोअ के माइलो?" 10 ताहां तिये शारी वोल नजर टाकीत कोइत तिया माहुंहूं कोयो, "ताआ आथ होल्लू कोअ." तिये तेहेंज कोअयो, आन तियाआ आथ फाशुउ हुदरीत गोयू.

11 पोन ते खिजवात तियां तियांआज गोठी कोआ वोल्‍या के आपू या ईसुउ कि कोअहूं.

12 तियां दिहोमेहें ईसु डोगोपोअ प्रार्थना कोउ गोयू, आखी रात पोइत देवोहो प्रार्थना कोअयी. 13 जेहेलाम दिही उगु तेहेलाम तियाआ सेलाहां हादीत तियां मेर्‍याआ बारा जोओंहों निवड़ीत लेदा, आन तियांहां प्रेशित*6:13 प्रेशित ईसुउ मोकलीइल्या खास खबर्‍या ओं नाव आप्यो: 14 आन ते ए होय: शिमोन जियाआ नाव पेत्र बी मिक्यो, आन तियाआ पाही आंद्रिया, याकोब, आन योहान, फिलीप, बार्थलमय, 15 मत्तय, थोमा, आल्फेयोअ बेटुह्हू याकोब आन शिमोन जियाहा जेलोतेस बी कोतेहे, 16 याकोबोअ बेटुह्हू यहुदा आन यहुदा इस्कार्योत जो तियाहा तोअनारु बोण्यु.

17 ताहां ईसु डोगोप रोत उतरीत सापाट जागाम उबू रोयू, तियाआ सेलाआ वोडी गर्दी, आन आखा यहुदीया, येरुसालेम, सुर आन सिदोनोअ दोर्‍याआ टेको पोअ रोत जाअखीलेहे माअहें तिहीं ओते, 18 जे तियाआ गोठी उनाइलोअ आन तियांआं बिमारीम रोत हुदरीइलोअ कोअते तियाआ जागे आवयेते. आन पुते तारास देद्ले एहलेहे माअहें बी हुदरीइतेते. 19 आखे तियाहा आथ लागाड़ुहूं होदतेते, काहाके तियामेहें रोत सेक्ती निहींत कोइत आखाहा हुदारतीते.

20 ताहां ईसु तियाआ सेलाअहें पालित कोइत कोयो,

"हाजे होय तुमू जें मोनो वाअहीं गरीब होये,

काहाके देवोअ राज तुमाआं होय."

21 "हाजे होय तुमू जें ओमे फुकल्‍ये होये,

काहाके तुमू तारात जाहा."

हाजे होय तुमू जें ओमे रोडतेहे, काहाके तुमू ओंहांहा!

22 हाजे होय तुमू जेहेलाम माहुंउं बेटाह्हाआ वोतीइ माअहें तुमाआं विरोद कोए, तुमुहूं काडी देय, आन तुमाआं निंदा कोए, आन तुमू खाराब होय कोय. 23 तेदिहीं खुसीवाअहीं उसलीइजा, काहाके पाला, तुमाआं कोअते होरगाम वोडो बक्शीस होय; काहाके तियांआं वेगाआ डायहां बी भविश्यवक्ताहांअरी तेहेंज कोअया कोअताते.

24 "पोन ओ मालदारों, तुमाआं केतीही विते!

काहाके तुमुहूं होक जोड़ीत गोयू."

25 ओ मात्ला, तुमाआं केतीही विते!

काहाके तुमू फुके लेवाअहा.

ओ ओंहनारा, तुमाआं केतीही विते!

काहाके तुमू विवलाहा आन रोडहा.

26 "तुमाआं जुदी वाजे! जाहां माअहें तुमुहूं हाजो कोय. काहाके तियांआं वेगाआ डायहां ठोग भविश्यवक्ताहांअरी बी एहेंज कोअया कोअताते."

27 "पोन आंय तुमुहूं कोहो जे उनाअतेहे: तुमाआं दुस्मोनोहों मेर कोआ; जे तुमाआं बाक्तो कोए तियांआं हाजो कोआ. 28 जे तुमुहूं हाराप आपे, तियांहां आशिर्वाद आपा; जे तुमुहूं डाणवे तियांआं काजे प्रार्थना कोआ. 29 जो ताआ एका गालोपोअ देय, तियाअहें बिहीरु गाल बी कोई दे; जो ताआ कोट बुउसे तियाहा आंगड़ो बी लेत जाअहूं दे. 30 जो कोडो तापोअ मागे तियाहा आप; आन जो कोडो ताआ वस्तु बुउसीत लेय, तियापोअ फाशुउ वोलीत मा फुसही. 31 जेहें कोइत माअहें तुमाअरी सालुहूं जोवे एहेलोह तुमुहूं लागतोय, तेहेंज कोइत तुमू बी तियांअरी साला."

32 आन जर तुमू तुमापोअ मेर कोअनारापोअ एतोज मेर कोअहा, ताहां तुमुहूं आशिर्वाद कि कोइत जोड़े? काहाके पापी माअहें बी तियां पोअ मेर कोअनारां पोअ मेर कोअतेहे. 33 जर तुमू तुमाआं हाजो कोअनाराआ एतोज हाजो कोअहा ताहां, तुमुहूं आशिर्वाद कि कोइत जोड़े? काहाके पापी बी एहेंज कोअतेहे.

34 जर तुमू फाशोअ वापिस लेअलाआ आशा वाअहीं उदारो आपहा, ताहां कि वोडी गोठ कोअयी? काहाके पापी माहें बी जेतो उदारो आपतेहे तेतोहो वापिस लेत लेतेहे. 35 पोन तुमाआं दुस्मोनोपोअ मेर कोआ, आन हाजे कामे कोआ, फाशोअ वापिस लेअलाआ आशा वाअहीं उदारो मा आपहा; तुमाआं कोअते वोडो बक्शीस रोय, आन तुमू वोडाम वोडा देवोअ पोर्‍ये गोणाअहा, काहाके जे आभार नाहां मानते आन बाक्ते होय तियांपोअ बी तो मायालु होय. 36 जेहलुहू तुमाआं देव बाह्हू दयालू होय, तेहलेज तुमू बी दयालू बोणा.

37 "बिहीराआ न्याय मा कोअहा ताहां देव बी तुमाआं न्याय ने कोए. बिहीरा पोअ आरोप मा लागाड़हा, ताहां तुमापोअ बी आरोप ने लागे. बिहीराहा माफ कोआ, ताहां तुमुहूं बी देव माफी कोए. 38 बिहीराहा बी आपा, ताहां तुमुहूं बी जोड़े. माअहें दाबी दाबीइ आन ठेहीं ठेहींइं आन सिकार पोइत उबाय ताअहूं जाआं टाके, काहाके जिया मापोवाअहीं तुमू मापित कोइत आपतेहे, तियाज मापोवाअहीं तुमुहूं बी मापित कोइत जोड़े."

39 फाशुउ ईसु एक काईं कोत आप्‍यी: "केहें आंद्लू आंद्लाहा वाट देखाड़ीत सेकेहे? केहें ते बेनू खाडाम ने टुटीत पोड़े के? 40 कोड्लूज बी सिकाअनारु तियाआ मास्तरो रोत वोडु कायनाहां, पोन तो सिकाअनारु पुरीज शिक्शणो वाअहीं पाक्कू ओत जाहे, ताहां तो तियाआ मास्तरोअ हारकुज ओत जाहे."

41 "तू ताआ पायहोअ डोआमेर्‍योअ हुकलो काहा पालेहे, सोताआज डोआमेहें मुहल ताहूं नाहां देखाअतो के? 42 जाहां ताहूं सोताआज डोआमेर्‍योअ मुहल ने देखाअतोय, ताहां तु ताआ पायहोहो कि कोइत कोत सेकेहे, ‘ए दादा, उबू रो, ताआ डोआमेर्‍योअ हुकलो काडी देअहूं दे?’ ए वोडार्‍या! पेल ताआ डोआमेर्‍योअ मुहल काड, ताहां जात ताहूं ताआ पायहोअ डोआमेर्‍योअ हुकलो देखाय, आन तु हाजी हुतायी काडीत सेकही."

43 एक हाजो साड़ खाराब फल नाहां आपतो, आन खाराब साड़ हाजो फल नाहां आपतो. 44 हारेक साड़ तियाआ फलोवाअहीं ओलखाअहे, काहाके माअहें काटाआ साटवाम रोते अंजिर*6:44 अंजिर उंबरोअ होस देखाअनारो ओं साड़ जास्ती कोइत इस्राएल देसोम देखुहूं जोड़ेहे. नाहां पाड़ते, आन नाहां साकरुमेहें रोत दाराक्शे तोड़ते. 45 हाजो माहुंउं तियाआ हाजा मोनोअ भांडारोम रोत हाजी गोठी काडेहे, आन बाक्त माहुंउं तियाआ बाक्ता मोनोम रोत बाक्ती गोठी काडेहे; काहाके जो मोनो मेहें होय, तोज सोबीमेहें रोत निहेंहें.

46 "माआं कोल्‍यी गोठी तुमू नाहां मानते ताहां काहा माहूं ‘ए प्रभु, ए प्रभु’ कोतेहे? 47 जो कोडो माआं जागे आवेहे आन माआं गोठी उनाइत कोइत तियींहीं मानेहे, आंय तुमुहूं देखाड़ोहो के, तो कोडाआ होसर्‍योअ होय: 48 तो एहेलाहा माहुंउं होसर्‍योअ होय, जिये कोअ बांदीइले वेले उंडे खुंईंत कोइत खडकापोअ पायू बांद्यु आन जेहेलामेहें खाडू आवयू, तेहेलाम पाअयोंअ सेलका तिया कोअहो आवित ठोकाअया, पोन तो कोअ आलित ने सेक्‍यो; काहाके तो पाक्को बांद्‍योतो. 49 पोन जो माआं शब्द उनाइत बी नाहां मानतो तो एहेलाहा माहुंउं होसर्‍योअ होय, जिये पुयीं पोअ बिगर पायाआ कोअ बांद्यो, आन जाहां तियापोअ वोडु खाडू आयू आन पाअयोंअ पुर आवयू ताहां तो ताबुड़ खोदलात पोड़्यो, आन निसे पोड़ीत तो नावासट आरवात गोयो."