लुक 9

ईसु बारा सेलाहां मोकलीइत्लू

1 ताहां ईसु बारा सेलाहां हादीत कोइत तियांहां आखा पुतों पोअ आन बिमारी हुदारीइलोअ सेक्ती आन आधिकार आप्‍यू. 2 आन तियांहां देवोअ राज्‍याअ परसार कोइलोअ काजे आन मांदवाड़्याहां हुदारीइलोअ काजे मोकल्‍या. 3 तिये तियांहां कोयो, "वाटेए कोअता किज मा लेहा, ने डेंगार, ने खोत्लू, ने रोटू, ने पोशा आन ने बेन-बेन आंगड़े. 4 जिया कोडाअ कोअमेहें तुमू जाहा, तिहींज रोवा, आन तिहींज रोत निहींत जावा. 5 जो कोडो तुमुहूं ने हादे, तिया होयरोम रोत निहींइली वेले, तियांआं विरुद्ध साक्शी रोअहूं जोवे कोत तुमाआं गुडाअरीइ तुलो तुमू फोकड़ीत टाका."*9:5 लुक 10:4-11; प्रेशित 13:51

6 ताहां ते गाँवों-गाँवों हाजी बातमी उनाड़ता, आन आखी वोगेहे माअहुंहूं हुदारताज फिर्‍या.