1 माआं पाव्हीइला, आपाआ महिमावाला प्रभु ईसु ख्रिस्तापोअ विश्वास कोअनारे तुमू सोब पालीत भेदभाव मा कोअहा. 2 जर एखु तुमाआं मंडड़ीम होनाआं मुंदी पोवित आन जाअखे बाहरी आंगड़े पोवित आवे आन तिहींज मेणाअले आंगड़े पेवित एखु गरीब बी आवे. 3 आन तुमू तिया बाहरी आंगड़े पेवित आवनाराअ वोल खास दिहान आपित कोहा, "तु इंहीं हाजी जागे बोहेए," तिया गरिबोहो कोहा, "तु ओहों उबू रो," नेताहां "इंहीं माआं गुडाअहीं बोहो." 4 ताहां तुमू इंहींज भेदभाव ने कोअयू के? आन वाईट विसारो वाईं न्यायनिवाड़ु कोअनारे ने बोण्ये के?

5 माआं मेराला पाव्हीइला, उनाआ! जें गरीब होये तियांहां विश्वासोम कुन्बी ओवे तेहें काजे आन तियापोअ मेर कोअनाराहां तियाआ राजोअ वारिस ओवे तेहें देवे नाहां निवड़्ये के? 6 पोन तुमू गरिबोअ बेइजती कोअयी. मालदार माहें तुमापोअ दाबाव टाकीत तुमुहूं कोर्ठाम ओडीत नाहां लेत जाते के? 7 जों हाजाम हाजो नाव तुमुहूं जोड़्योहो तिया नावोअ तें निंदा नाहां कोअते के?

8 खोरीज जर तुमू, "जेहेलिही सोतापोअ तेहेंज कोइत तु जागेवालापोअ मेर कोअ," या वसनोम लेखल्या राजमान्य कायदाआ पालन कोअतेय ताहां तुमू हाजो कोअतेहे. 9 पोन जर तुमू रंगरुप पालित भेदभाव कोअतेय ताहां पाप कोअतेहे; आन कायदु तुमुहूं दोशी ठरवेहे.✝2:9 लेवी 19:15 10 काहाके जों कोडो आखा नियमोंअ पालन कोअहे, पोन एकीज गोठीम सुकीत जाहे, तेबी तो आखी गोठीजमेहें दोशी ठरेहे. 11 काहाके जिये कोयो, "तु सिनालो मा कोअही," तियेज ओं बी कोयो के, "तु खुन मा कोअही," तिहीं वाईं जर तुमे सिनालो ताहरोअ ने कोअयोय, पोन खुन कोअयो तेबी तु नियमोंअ तोड़नारु बोण्यु. 12 जियांआं न्यायनिवाड़ु सोड़वीइनारा कायदाअ परमाणे ओवे तियां माअहुंउं होस तुमू वसन कोवा आन काम बी कोआ. 13 काहाके जिये दया ने देखाड़्यी, तियाआ न्यायनिवाड़ु बिगर दयाआ ओवे: पोन दया न्यायोपोअ जिकीत जाहे.

14 माआं पाव्हीइला, जर एखू कोतोय के आंय विश्वास कोअहो, पोन तों तियाआ परमाणे काम ने कोअतोय, ताहां तियाहा कि फायदू? एहेलुहू विश्वास तियाहा केदिहीं वासाड़ीत सेकेहे के? 15 जर एखा पाव्हीइलाहा आंगड़ा-पोतड़ाआ गरज ओय, आन आज्यीइ वेलेए खाअलोअ ने ओय, 16 आन एहेला माहुंहूं तुमामेएं एखू कोये, "हाजी हुतायी जाजा आन, उने आंगड़े पेवजा, वारुहूं तारात खाजा," पोन जोवे ते वस्तू तियांहां ने आप्यी, ताहां की फायदू? 17 तिहींज वाईं, कर्मा सिवाय विश्वास बी मोल्यू होय.

18 पोन एखू कोये, "ताआ विश्वास होये आन माआं कर्म होये." "तू ताआ कर्मासिवाय विश्वास देखाड़, आन आंय ताहूं कर्मावाईं माआं विश्वास देखाड़ीहीं." 19 एकुज देव होय, एहेलुहू तु विश्वास कोअहे के? ताहां तु हाजो कोअहे, पुते बी तेहेंज कोइत विश्वास कोअतेहे आन थुरथुर कापतेहे. 20 पोन फोगा! ताहूं एतो बी नाहां समजाअतो के, कृती सिवाय विश्वास खाली होय? 21 आपाआ बाहू अब्राहाम ये तियाआ पोर्‍या इसहाकोहो आगीइ देवान्यापोअ गाराहा कोअयू तेहेलाम तो कृतीवाईं धर्मी ने ठऱ्युतो के? 22 ओमे तुमे देखीत लेदोहो के तियाआ विश्वास आन तियाआ कृतीनेहें काम कोअयो; तियाआ विश्वास कृती वाईं पुरु ओवू. 23 आन वसनोअ ओं लेख्यो पुरो ओवो, "अब्राहामे देवोपोअ विश्वास मेक्यु, आन इंहींवाईं तो धर्मी ठऱ्यु आन तो देवोअ दोस्ती कोत गोणाअयु."✝2:23 उत्प 15:6 24 ताहां ओमे देखीत लेदो के माहुंउं विश्वासो वाईं एतोज नाहां कृती वाईं धर्मी ठरेहे.

25 तेहलोज राहाब नावोअ एक रांडी ओती. तियी इस्राएली तिरवाशाहां*2:25 तिरवाशाहां बिहीरा गांवोंअ मोनेज माहिती काडनारा कोअमेहें निकाड़्या आन बिहीरी वाटे मोकली देदा. ताहां या कामों वाईं ते धर्मी ने ठर्‍यी के?✝2:25 इब्री 11:31

26 जेहेलोहो आत्मा सिवाय डिल मोल्यो होय, तेहेलोज विश्वास बी कृती वासी मोल्यू होय.