Mateus 6

25 "Ivyo nawamba, msekuwa na matumatu uwanga ya khande na vidomeo hambu mii yenu mvae mbwai, kwaviya kwekaa kwenu khakukauwiiya khande du na mii yenu khaikauwiiya magwanda. 26 Wakauweni wadege wa uwanga khawahanda na khawabonda na khawana khande mwe taa dodose. Hata ivyo Tati yenu wa uwanga awaisa. Tambe nywie khamna yombe kusima aho? 27 Nindai gatigati yenu mwenye maatu muno adaha kweongeza msi wa kwekaa kwakwe?

28 "Kwambwai mwepisha kwaajii ya magwanda? Kauweni mauwa ya mzituni yatamavyo, khayagosoa ndima wala khayegosweeya magwanda yakwe. 29 Iya nawamba hata seuta Selemani mwenye na vintu vyakwe vyose khekuwahi kuvikwa vitana inga uwa dimweaho. 30 Naho ikawa Muungu ayavika ivi mani ya mwe minda ambayo ivyeo yaaho na kioi yasigwa mwe moto, Nywie wantu wenye uzumizi mdodo namba nywie enda awagosoee muno?

31 "Aho msekuwa na matumatu, ‘Tendatideni? Tendatidomee mbwai? Tendativae mbwai?’ 32 Kwaviya ayo yose yaondezwa na wantu wesaokummanya Muungu. Tate yenu wa uwanga amanya ati mwakunda vintu ivyo vyose. 33 Naho vokani kuuondeza Useuta wakwe, na kugosoa viya akundavyo Muungu na ayo yose mwendamwekhigwe na ngeeko. 34 Naho msekuwa na matumatu ya kioi, kwaviya kioi ina yakwe. Kiya msi ina suuba yakwe.