1 Nenga Paulo mwenikuwela mndumindumi ng'ogha kwa uweso wa mundu ila kwa uwesa wa Yesu Kilisito, ninguyandika lihamba hali kwa makakala gha Sapanga Tati mwenikumuhindula Yesu, 2 na wandu wogha wenikwimkwinila Kilisito pamonga na nenga, tunguwajambusa mwenga lipinga lya wenikumkwinila Kilisito weni kuwela haku Galatia.

3 Ningumyupa Tati Sapanga wa twenga pamonga na Bambu wa twenga Yesu Kilisito awapeghi umaha ghaki na mlikali kwa kuponga. 4 Yesu ajihumisili mweni aweli litambiku kwaikiva gha kuhumiswa sambi sya twenga ili atuviki pekesu kuhuma kuuhakata wa mlima wogha hau. Hali ndiwa Sapanga Tati wa twenga alipalile.

5 Sapanga ni mkulu na angupalwa asifilwi machuwa hyogha bila mwihu! Hina.

6 Nenga ningulikangasa kwa mwenga kumleka Sapanga kwa kuloposela kulipindi lihupi, hayu mweni kuwakema mwenga kwa kupitila Kilisito, na kuhyukila habali gha njila ghangi, 7 kwahela Habali Maha ighangi, ila kunguwoneka kuwela na wandu weni kuwahanganya, wakipala kubyodosa Habali Maha gha Kilisito. 8 Twenga tuwatangasilile mwenga ujumbi wa Habali Maha weka. Hinu Sapanga amnyokoli yeyosi mweni kuwatangasila mwenga ujumbi mghangi, hata paiwela mmonga paghati gha twenga au mtumikila wa kundumba wa Sapanga! 9 Tulilongela kala hali, ila hinaa nitelongela kangi. Mkotoho kujumila ujumbi wowosi kihyetu na hula tuwavulile. Paikawela yeyosi kawavula ujumbi mghangi, Ningumyupa Sapanga amnyokoli nesu!

10 Kwa nagha nenga ningupala kumuhekelesa ghani, kuwahekelesa wandu au Sapanga? Ningalipala kuwahekelesa wandu ningaliwela ng'ogha mndumindumi wa Kilisito.

11 Walongo wa nenga ningupala kuwamanyisa yiwa Habali Maha niwatangasilile iwelili ng'ogha gha kimundu. 12 Kwaikiva niipokelili ng'ogha kwa wandu wala kuvulwa na wandu, ila Yesu Kilisito ndiwa mweni kunigubutulila.

13 Mwenga myoghanila kala vila niwelili nikilama haku kuhyetu paniwelili kunjila gha kumyupa Sapanga gha Kiyahudi, vila nilihakilile lipinga lya wamkwinila Kilisito bila luhungu na kupala kuliyalamisa. 14 Nenga niyangalile nesu kuyendana na njila gha kumyupa Sapanga gha Kiyahudi kupiti Wayahudi waghangi wa machuva ghangu, na kukola mawachilo gha wagogolo wa twenga.

15 Ila Sapanga, kwa umaha ghaki, awelili kanihaghula kuhuma mumtima wa nyongo ghangu akanikema nimtumikili. 16 Pala paalamulile kumlangiha Mwana ghaki lipalalipala kwa nenga, lukani nitangasi Habali Maha ghaki kwa wandu wawela ng'ogha Wayahudi, lipindi hali nimlongela ng'ogha mundu yoyosi mghalu hau, 17 wala kuyenda ku Yelusalemu kwa wala wapatile undumindumi pambila gha nenga, niyendili huti kumlima wa ku Alabia, hinu nikahuya kangi kummbwani wa Damasiki. 18 Hinu badili gha machuva maitatu nikakwela kuyenda ku Yelusalemu kukongine na Petelo na nilikalile na mweni kwa lipindi lya machuwa ikumi na mhano. 19 Haku nimlolile ng'ogha mndumindumi mghangi yoyosi ila Yakobu, mlongo ghaki Bambu Yesu.

20 Sapanga mweni angumanya yiwa hagha ninguwayandikila ni chakaka.

21 Kuulongolo ghaki nikayenda kumlima wa Silia mahala wekaweka na Kilikia. 22 Lipindi lila nenga niwelili ng'ogha nikimanyika kulipinga lya wandu weni kumkwinila Kilisito gha kula kumbwani gha Yudasia. 23 Ila yawelili yakiyoghanila hela yiwa, "Mundu yula mwenikuwela akituhakila haku dahile hinaa angutangasa Habali Maha gha ukwinila hula awelili akiyesa kuuyalamisa." 24 Hinu wakamsifila Sapanga kwaikiva gha nenga.