1 Kwa nagha kila ningupala kuwalongela ni yiwa yula mwenikupalwa kulihi pakawela mnung'una angulandana na mhusutu, Pamonga na yiwa vindu vyogha ni vya mweni. 2 Lipindi lya unung'una ghaki angupalwa kuwayitikila wala wahaghulilwa kumlongosa, mbaka lipindi lila livikwa na tati ghaki. 3 Hilahila na twenga tuwelili handa wana lipindi Kilisito kahika ng'ogha, tuwelili wahusutu wa ndyangilu gha wandu wa mlima wogha hau. 4 Ila lipindi lila livikwa na Sapanga palihika kala Sapanga akamlaghila Mwana ghaki kumlimawogha, hayu mweni kuwela mundu handa twenga na mweni akayitikila malaghilo gha Musa, 5 ili awakomboli wala wandu wenikuwela wakilongoswa na laghilo, Ili tupati kupokela zila hupo zitimila zya kugholwa wana wa Sapanga.

6 Hinu kwaikiva mwenga muwela wana, Sapanga akamlaghila Mpumulo wa Mwana ghaki kumioyu gha mwenga, mwenikutughola tumkemi Sapanga ni Tati wa twenga. 7 Kwa nagha wenga kwamuhusutu ng'ogha kangi, ila uwela mwana, na kwaikiva wenga kwa mwana, Sapanga kakughola hilahila wenga kuwela mpokela hupo zila alongilile atawapegha wana ghaki.

8 Haku dahile, pamuwelili mummanya ng'ogha Sapanga muwelili wahusutu wa kukovekela milungu iwelili gha uchakaka ng'ogha. 9 Ila hinaa mngummanya Sapanga wa chakaka, au nilongi Sapanga anguwamanya mwenga. Hinu kwakyani mnguhuyila kukovekela ndyangilu gha dahile yeni kulepelela kuwalokola na ghamaha ng'ogha? Mngupala iwagholi kangi muweli wahusutu? 10 Mmbila mngukovekela mihambu gha machuwa na miei na mipindi na machuva! 11 Ninguwela na holu kwa mwenga yiwa pangi lihengu nighola kwa mwenga ili kuwatanga mwenga linguwesa kuwela lya yaghiyaghi.

12 Walongo wa nenga ninguwaluwa muweli handa nenga, kwaikiva nenga ni handa mwenga mnigholela ng'ogha mghalu mhakata. 13 Mngumanya yiwa uvina niwelili nau, ndiwa kindu kinipeghili fwasi gha kuwatangasila mwenga Habali Maha. 14 Pamonga na yiwa kuvina kwa nenga kuwapeghili mwenga maghaso, mwenga mnikanila ng'ogha, ila mnipokelili handa mtumikila wa kundumba wa Sapanga, au handa Kilisito Yesu. 15 Lipindi lila muwelili na luheku nesu. Ghuli ni niki kiwahumila? Ninguwesa kulonga yiwa handa ingaliwesekana, mngalitupula hata mihu gha mwenga na kunipegha nenga. 16 Kwa hinaa nenga niwela mhakata wa mwenga kwa kuwalongela uchakakaa?

17 Wavula wogha wa uhwangi wanguyangala nesu kuwahekelesa mwenga, ila wangupala ng'ogha mwenga mpati ghamaha, kwaikiva wangupala mleki kuniyoghanila nenga na muwayoghanile weni. 18 Ni maha lipindi lyogha kughola mighalu ghamaha, na ng'ogha kughola nagha pamuwela na nenga hela. 19 Wana ghangu, nenga ningukolwa na lusungu nesu handa nyongo vila angukolwa na lusungu lipindi lya kuiwopola, na niteyendelela kuwela nagha mbaka ndyangilu gha Kilisito iwoneki mghati gha mwenga. 20 Niwela na luhujulu kulikala na mwenga hinaa, ili nilongeli na mwenga kwa unyalinyali, ningukolwa na holu kwa mwenga.

21 Amonga gha mwenga mngupala kulongoswa na laghilo. Ghuli, mwenga mngumanya laghilo vila lingulonga? 22 Kwaikiva iyandikwa kumayandiko gha Sapanga yiwa Abulahamu awelili na wana waivili walumi, mmonga kwa nyongo mwenikuwela mhusutu ghaki na mghangi kwa nyongo mwenikuwela mpekesu ghaki. 23 Yula mwana wa muhusutu ghaki awelekili handa wandu waghangi, ila yula wa mpekesu awelekili kwa vila Sapanga alaghanili. 24 Mighalu hai iwela mlandano, kwaikiva hagha waivili ni mlandano wa malaghano maivili. Lilaghano lya mtumbulo, ni lila ligholokili kulitumbi lya Sinai, lyeni kulela wana wa uhusutu. 25 Hinu Hajili angulandana na litumbi Sinai lyeni kuwela haku Alabuni, kangi kalandana na mbwani wa Yelusalemu vila uwela kumlimawogha kwaikiva wana ghaki wawela kuuhusutu gha malaghilo wapeghilwi kulitumbi lya Sinai. 26 Ila Sala, yula mhumbu mwenikuwela mpekesu, angugholokela Yelusalemu gha kundumba. Na mweni ndiwa nyongu gha twenga. 27 Kwaikiva Mayandiko gha Sapanga yangulonga,

"Uhekeleli wenga mdala mweni kuwela ungali kulela,

utovi lilowi, ukuwi vilulu,

wenga mweni kukolwa ng'ogha na lusungu,

kwaikiva wana wa mhumbu alekilwi ni watangala kupiti wa yula mwenikuwela na mngwana."

28 Hinu na mwenga walongo ghangu ni wana wa Sapanga weni kuweleka kukovekelana na kila akilongelile Sapanga handa iwela kwa Isaka. 29 Ila handa iwela machuwa ghala gha kuweleka wana yula mweni kuweleka handa wana waghangi akamchokola yula mweni kuweleka kwa makakala gha Mpumulo. Ndiwa inguwoneka na lelo. 30 Ila Mayandiko gha Sapanga yangulonga niki? "Mtimuli mhumbu muhusutu pamonga na mwana ghaki, kwaikiva mwana wa mhumbu muhusutu katu atelihi pamonga na mwana wa mhumbu mwenikuwela mpekesu." 31 Walongo wa nenga twenga twa wana wa mhumbu mwenikuwela mpekesu na ng'ogha yula mhumbu mwenikuwela mhusutu.