1 Mwenga wandu wa kumlima wa Galatia, mwenga mwa wandyungi! Ni ghani mweni kuwagholela uhawi? Kwaikiva habali zya kuvambwa kwa Yesu Kilisito kulipingika zilongelilwi lipala lipala kwa mwenga. 2 Nenga ningupala kumanya mghalu mmonga hela, ghuli, mpokelili Mpumulo wa Sapanga kwaikiva mtimilisa malaghilo gha Musa au kwa kuhyoghanila na kukwinila Habali Maha? 3 Mwenga mwa wandu wa ghuli? Mwenga mtumbulile hyogha kwa mtanga wa Sapanga, Hinu kwa kyani hinaa mngupala kuhyomola kwa makakala gha mwenga maweni? 4 Ghuli, mngupala kutulangiha yiwa kila mghasikili kiwelili kya yaghi? Nenga ngana yawela ng'ogha gha yaghi! 5 Ninguwakonya kangi, ghuli mnguliwachila yiwa Sapanga anguwapegha Mpumulo ghaki na kughola makangaso paghati gha mwenga kwaikiva mnguyitikila malaghilo ampeghili Musa au kwaikiva mkwinila Habali Maha mhyoghanilile kupitila Kilisito?

6 Handa vila mayandiko yangulongela kwa Abulahamu, "Mweni amkwinilile Sapanga, na Sapanga akamjumila kuwela mmaha." 7 Hinu mngupalwa kumanya yiwa wala wenikukwinila ndiwa wana wa Abulahamu. 8 Mayandiko yalongelili kila kingalihumila kumachuwa gha kuulongolo. Mayandiko hagha yailongile yiwa Sapanga angaliwaghola wala wawela ng'ogha Wayahudi kuwela wajumilwa na mweni kuulongolo ghaki kwa kupitila kukwinila. Sapanga alongelili Habali Maha hazi kwa Abulahamu pambila gha kuhumila hagha. Sapanga amlongelili Abulahamu, "Kwa kupitila wenga, nitewahighila wandu wogha kumlimawogha." 9 Hinu, Sapanga atewahighila vilavila wandu wogha weni kumkwinila Kilisito handa aighola kwa Abulahamu vila amkwinilile Sapanga.

10 Wala wenikulikala kwa kuwachila hela kutimilisa malaghilo, watekolwa na mahakata, kwaikiva Mayandiko gha Sapanga yangulonga, "Akolwi na mahakata mundu yeyosi mweni kutimilisa ng'ogha hyogha yayandikwa kukihitabu kya malaghilo na kuyitikila." 11 Hinu kwahela mundu mweni kujumilwa na Sapanga kwa kutimilisa malaghilo. Mayandiko gha Sapanga hilahila yangulongela, "Mundu mweni kujumilwa na Sapanga atelikala kwa kunikwinila." 12 Malaghilo apeghilwi Musa yangupala ng'ogha mundu mweni kuyatimilisa aweli na kukwinila ila ayatimilisi. Kumayandiko gha Sapanga iyandikwa, "Mundu atewela mkomu kwa kutimilisa hyogha yenikupalwa kumalaghilo gha Musa."

13 Hinu tungulola yiwa Kilisito atukombolile kuhuma kukukolwa na mahakata kwaikiva gha kutola mahakata gha twenga, kwaikiva kumayandiko gha Sapanga iyandikwa, "Kakolwa na mahakata mundu yula mweni kuning'iniswa kunani mwa lubiki." 14 Mgholu hau uhumilili, lukani hila highili apeghilwi Abulahamu iwahikili wandu wa milima mighangi kwa njila gha Kilisito, ili kwa kukwinila, tumpokeli yula Mpumulo Sapanga atulongelile yiwa atetupegha.

15 Walongo wa nenga, nitetumila mlandano mmonga wa ngalilu gha kila lelo. Ikiwela mjumilana kwa kuyandika na mundu kukindu kitenu, kwahela mundu mwenikuwesa kughalambula au kuhumisa mghalu hau. 16 Sapanga avikili lilaghano kwa Abulahamu na waweleka ghaki. Mayandiko yangulonga ng'ogha yiwa na "Waweleka ghaki." Kulangiha yiwa watangala, ila Mayandiko yangulonga, "Ka mheleka ghaki" kulangiha ni mundu mmonga na mweni ndiwa Kilisito. 17 Kila ningupala kukilongela ni yiwa, malaghilo gha Musa yeni kuhika machuva gha imia njechi na iselasini yanguwesa ng'ogha kughalambula lilaghano lya Sapanga lyeni kuwela pambila. 18 Ikiwela hupo gha Sapanga ingupeghwa kwa kukovekela laghilo, hinu kupeghwa hupo hai kutewesa ng'ogha kutegemela lilaghano lya Sapanga. Ila Sapanga ampeghili hupo Abulahamu kwaikiva amlaghinili.

19 Hinu kwakyani pakawela na laghilo? Lilaghano liyeghilwi kuulongolo kwaikiva gha mahakata yala wangughola wandu. Ila laghilo lingayendelela kughola lihengu mbaka kuhika kwa mheleka wa Abulahamu. Hayu ni mheleka mweni kukemwa kulilaghano lilongelilwi na Sapanga. Ila lilaghano liyeghilwi kupitila watumikila wa kundumba wa Sapanga kwa kumtumila mghola ndulumu. 20 Kiuchakaka mghola ndulumu kangupalwa ng'ogha kuwela, ikiwela mghalu weni ni wa mundu mmonga, na Sapanga ni mmonga hela.

21 Ghuli malaghilo, yangungingamana na lilaghano lya Sapanga? Ng'ogha nagha! Handa malaghilo ghala yayeghilwi yangaliwesa kuwapegha wandu ukomu, hinu kujumilwa na Sapanga tungalipeghwa kwa kupitila malaghilo. 22 Ila Mayandiko gha Sapanga yangulonga yiwa sambi ingumlongosa kila mmonga, hinu weni kukwinila wapati hila hupo walaghinilwi na Sapanga kwa kumkwinila Yesu Kilisito.

23 Pambila gha kuhika kwa kukwinila, laghilo lituvikili mkihungu mbaka lipindi hali lya kugubutulwa kukwinila. 24 Hinu laghilo liwelili handa kilongosi mbaka Kilisito pakahika, ili kwa kumkwinila mweni tupati kujumilwa na Sapanga. 25 Ila hinaa kumkwinila Kilisito kuhika kala, hinu tungulongoswa ng'ogha kangi na laghilo.

26 Mwenga wogha kwa kupitila Kilisito Yesu muwela wana wa Sapanga kwa njila gha kumkwinila Yesu Kilisito. 27 Hinu mwenga wogha wenikukonganika na Yesu Kilisito kwa njila gha kubatiswa, ni handa vila mumvala Kilisito. 28 Kwa nagha, muwela ng'ogha na mlekanu paghati gha Myahudi na Myahudi ng'ogha, mhusutu na mundu mweni kulekeselwa, mlumi na mdala. Wogha mngulandana ku Kilisito Yesu. 29 Kangi kwaikiva mwenga ni wandu wa Kilisito, hinu mwenga mnguwela waweleka wa Abulahamu. Mwenga ndiwa mtepokela highili zyogha zila Sapanga amlongelile Abulahamu.