1 Hinaa tuwela pekesu, kwaikiva Kilisito atuvikili pekesu, hinu muweli mgangamala kuupekesu hau. Mkotoho kumlekesela mundu yeyosi awayingisi kuuhusutu kangi.

2 Mhyoghanili! Nenga, Paulo, ninguwalongela yiwa handa pamjumila kuyingiswa jandu ili mjumilwi na Sapanga, hinu Kilisito yala agholili yatewela ng'ogha na fwaida kwa mwenga. 3 Kangi ningulongela kwa kila mmonga wa mwenga, mweni kuyingiswa jandu yiwa angupalwa kutimilisa malaghilo hyogha. 4 Mwenga wandu wenikupala muwoneki wamaha kupitila malaghilo mlekaniswa na Kilisito, kangi mkanila umaha wa Sapanga. 5 Ila twenga tungulindila kwa litumaini, kwa makakala gha Mpumulo wa Sapanga, atugholi tujumilwi na Sapanga kwa kumkwinila Kilisito. 6 Handa mundu pakawela na Kilisito Yesu, kuyingiswa jandu au kukotoho kuyingiswa jandu vinguwela ng'ogha na fwaida yeyosi. Ungupalwa kuwela na kukwinila ili kuwapala waghangi.

7 Muwelili na ndyangilu gha maha, hinu ghani kawaghola mkotoho kuyitikila chakaka? 8 Ghuli, Sapanga mweni kuwakema ndiwa mweni kuyambusa hali? 9 Handa ingulongwa, "Amila mayaghani ingusasisa ukowa wogha," 10 kwaikiva mwenga mngukongana na Bambu Yesu. Nenga niwela na litumaini yiwa mtekovekela ng'ogha milando gha wandu waghangi, ila mtekovekela milando gha nenga. Kangi yeyosi mweni kuwakologhanisa mwenga, hayu atetoswa pamonga na yiwa kawela ghani.

11 Ila walongo wa nenga, ikiwela nenga ningutangasa yiwa mwenikuyingiswa jandu angujumilwa na Sapanga, handa ingaliwela ningughola nagha, kwakyani hinaa ninguhakilwa? Handa ningaliyendelela kutangasa kuyingiswa jandu, hinu kutangasa kwa nenga habali zya lipingika lya Yesu kungawesa ng'ogha kuwahyomelesa. 12 Ningalipala wala wogha weni kuwabyodosa mwenga wailingisi jandu weni na wangalidumula vikongonu vya kulitundila.

13 Walongo wa nenga mwenga mkemilwi na Sapanga ili muweli pekesu, ila mkotoho kutumila upekesu hau handa njila gha kukovekela lumata mata lwa mlima wogha, ila mtumikilani mwenga kwa mwenga kwa upalo. 14 Kwaikiva laghilo lyogha zya Musa lingutimila kuamuli imonga, "Mpali myako handa ungulipala umweni." 15 Ila handa mtelumana na kulalulana handa mikokolu, mkali mihu mkotoho mkayalamisana.

16 Hinu, ninguwalongela, mlikali kwa kulongoswa na Mpumulo wa Sapanga, katu mtetimilisa ng'ogha lumatamata lwa kihigha, 17 kwaikiva lumatamata lwa mlima wogha lingujumilana ng'ogha na mighalu yeni kupalwa na Mpumulo wa Sapanga, na mighalu gha Mpumulo ingungingamana na lumatamata lwa kumlimawogha, mighalu hai miivili ingujumilana ng'ogha, kwa nagha mtewesa ng'ogha kughola ghala mnguyapala weni baha. 18 Ila pamulongoswa na Mpumulo wa Sapanga, mtewela ng'ogha wahusutu wa malaghilo apeghilwi Musa.

19 Hinu mighalu gha kihigha ingumanyikana na yeni ni hai, ngongola na ndyangilu gha maha ng'ogha na matendu gha honi, 20 kuyupa ming'omung'omu na uhawi na uhakata na magombi na wifu na lilaka na uwimi na kubisana na makologhanyu, 21 ukotoho kuvika lumatamata kuhindu gha myako, ulowela, kulyegha lyegha na mighalu mighangi handa hai. Ninguwalongela kangi handa niilongile, wandu wenikughola mighalu handa hai wateupokela ng'ogha unkosi wa Sapanga uweli wa weni.

22 Ila pamlongoswa na Mpumulo wa Sapanga mweni atewaghola muweli na kupalana na luheku na kuponga na kufumilila na umaha na kutangana na uchakaka, 23 unyalinyali na kuikanisa mweni. Kwahela laghilo lyeni kuwesa kulonga mighalu hai ni mihakata. 24 Wandu wogha wenikuwela wa Kilisito Yesu wavamba kala ngalilu ghao gha kimundu pamonga na lumatamata lwaki lwa kihigha. Walekana na umundu hau wa dahile weni ndyangilu gha kimlimawogha na wenikuwapala wagholi mighalu mihakata. 25 Mpumulo wa Sapanga kayambusa twenga tulami, hinu tungupalwa tumkovekeli mweni atulongosi. 26 Hinu tukotoho kuitutumula wenibaha, tungupalwa ng'ogha kuchokolana kwa kusindana twenga kwa twenga au kulolelana wifu.