1 Hinu badili gha machuva ikumi na minjechi nikahuya kangi ku Yelusalemu nikiwela na Balinaba na hilahila ni kamtola Titusi. 2 Nenga niyendili kula kwaikiva gha kuyitikila kila anilongilile Sapanga yiwa niyendi haku, haku nikakongana na vilongosi weka yau. Nikawalongela hula ujumbi wa Habali Maha nitangasili kwa wandu wawela ng'ogha Wayahudi, nigholile nagha kwaikiva nipalile ng'ogha kulola lihengu lyangu lya mtumbulo au lya hinaa linguyalamika. 3 Titusi mwenikuwela na nenga, pamonga na yiwa awelile Myunani vilongosi hagha walasimisili ng'ogha kumyingisa jandu. 4 Pamonga na yiwa pawelili na walongo waghangi wa uhwangi wenikupala Titusi ayingiswi jandu. Wandu hagha wajiyingisili kwa ukambenga na kulolesa lolesa hula upekesu tuwela nau kukukonganika na Kilisito Yesu, ili wapati kutughola tuweli wahusutu, 5 ila katu tujumila ng'ogha chochosi wakipalile twenga tukikovekeli. Kwaikiva tupalile uchakaka wa Habali Maha uhighali vilavila kwa mwenga.

6 Ila kwa wala wawoneka yiwa ni vilongosi, paikawela vilongosi au ng'ogha nenga inyongesela ng'ogha chochosi kukila niwelili nikikitangasa, kwaikiva Sapanga kangulamula ng'ogha kwa kulola mighalu muwoneku wa panje. 7 Badili ghaki wakalola yiwa nipeghwa na Sapanga lihengu lya kutangasila Habali Maha wandu wawela ng'ogha Wayahudi, handa Petelo vila awelili kapeghwa kutangasa Habali Maha kwa Wayahudi. 8 Kwaikiva, Sapanga mwenikuwela akighola lihengu kuutumikila wa mndumindumi Petelo kwa Wayahudi, ndiwa yulayula mwenikughola lihengu kuundumindumi ghangu kwa wandu wawela ng'ogha Wayahudi. 9 Hinu, Yakobu na Petelo pamonga na Yohanawenikumanyika yiwa ni vilongosi wakulu kumapinga gha wenikumkwinila Kilisito, wakalola yiwa Sapanga kanihaghula kughola lihengu lyaki, hinu wakanijumila nenga pamonga na Balinaba. Wakalola yiwa ni maha twenga tukayendelela kughola lihengu paghati gha wandu Wayahudi ng'ogha, na weni wakayendelela kughola lihengu paghati gha Wayahudi. 10 Ila kindu kimonga hela watuluwili kiwelile tukotoho kuisemwa kuwatanga wandu wakapuku, na hau ndiwa mghalu niwela nau kumoyu ghangu na niwela na luhujulu lwa kuughola.

11 Ila Petelo pakahika ku Anitiokia nenga nikangingama nayu lipalalipala kwakikiva awelili kakosela. 12 Kwaikiva haku kuhyetu pambila gha amonga gha wandu wahumile kwa Yakobu kuhika, mweni Petelo awelile akilyegha pamonga na wandu Wayahudi ng'ogha. Ila badili gha Wayahudi kuhuma kwa Yakobu kuhika Petelo akatumbula kulilekanisa na wandu wenikuwela Wayahudi ng'ogha, kwaikiva gha kutila wala wenikukwinila kuyingiswa jandu. 13 Hinu Petelo akaghola umbindingu, na wakwinila waghangi kula ku Anitiokia wakakongana na mweni kuumbindingu hau. Wakamghola hata Balinaba kuwela handa weni. 14 Panilolile yiwa wangukovekela ng'ogha chakaka gha Habali Maha, nikamkalipila Petelo kuulongolo gha kila mmonga. Nikalonga, "Petelo wenga ni Myahudi uwelili ungulikala baha handa mundu kawela ng'ogha Myahudi. Hinu kwakyani unguyesa kuwalasimisa wala wawela ng'ogha Wayahudi kulikala handa Wayahudi?"

15 Twenga twaweni ni Wayahudi chakaka kuhuma tuweleka, na ng'ogha handa wandu wa milima mighangi weni sambi. 16 Ila tungumanya yiwa mundu kangujumilwa ng'ogha na Sapanga yiwa kammaha kwa matendu gha malaghilo gha Musa ila kwa kumkwinila Yesu Kilisito. Hinu twenga hilahila, tumkwinila Kilisito Yesu ili tupati kujumilwa na Sapanga kwa kukwinila kupitila Yesu Kilisito, ng'ogha kwa kupitila gha malaghilo gha Musa, kwaikiva kwa kukovekela malaghilo gha musa kwahela hata mundu mmonga atejumilwa na Sapanga yiwa kammaha. 17 Ikiwela twenga tungupalwa kugholwa wamaha na Sapanga kwa kukonganika na Kilisito, twenga weni tunguwoneka tuwela na sambi, ghuli, ng'ogha nagha? 18 Kwaikiva panichenga kangi yala mavulo gha malaghilo niwelile niyabomola kala, hinu nenga ninguhighilisa yiwa nitenyula laghilo. 19 Kwaikiva kukovekelana na malaghilo nenga nihova, na kihu haki kiyambuswa na laghililo. Ili nenga nipati kulama kwa kumkovekela Sapanga. Nenga nihova pamonga na Kilisito kunani gha lipingika. 20 Kwa nagha, ng'ogha nenga mwenikuwela ningulama, ila ni Kilisito mwenikulikala mghati gha nenga. Na inguwela nagha kwaikiva gha kumkwinila Mwana wa Sapanga mwenikunipala na kuhova kwaikiva gha nenga. 21 Nenga nikanila ng'ogha umaha wa Sapanga. Handa mundu angugholwa wamaha kwa kukovekela laghililo, hinu Kilisito ahovile yahiyahi.