1 Hali ni Lilando lya maha lya Yesu Kilisito, Mwana wa Sapanga.

2 Itumbulili handa iyandikilwi kukihitabu kya mlota wa Sapanga Isaya,

"Sapanga ailongile, ‘Ningumlaghila mndumindumi wa nenga akulonguleli,

avile atekuyandalila njila.’

3 Lilowi lya mtumikila wa Sapanga lingukema mluvagha,

Mumgholeli Bambu njila ghaki,

mgholi mula atetyanga."

4 Yohanambatisa ahumilili mluvagha, akawatangasila wandu na

kuwabatisa akilonga, "Mleki sambi na Sapanga awalekeseli sambi zyenu." 5 Wandu kuhuma mlima wogha wa Yudasia na wandu wogha wa mbwani wa Yelusalemu wakamyendela, wakasileka sambi syao na kumhyukila Sapanga, na mweni akawabatisa mulweni Joludani. 6 Yohanaawelile akivala nguu igholilwi na mipuku gha mkokolo

angukemwa ngamiya na luhunga lya ngosi kukibulibulilo kyaki. Mulyo ghaki uwelili nzige na bhuche. 7 Mweni atangasili akilonga, "Kanguhika badili gha nenga mweni makakala kumbita nenga, na nenga nipalilwi ng'ogha hata kuyinama na kuwoposola lughoyi lya hilatu ghaki. 8 Nenga ninguwabatisa kwa masi, ila mweni atewabatisa kwa Mpumulo wa Sapanga."

9 Machuwa ghala, Yesu akahuma Nazaleti, kumbwani wa Galilaya, abatiswi kulweni Yoludani na Yohana. 10 Palapala paahumili mmasi, akalola kundumba kuwopoka na Mpumulo wa Sapanga akimyingila Yesu lipindi paahumili mmasi akiwela na muwoneko wa ngunda. 11 Lilowi liyughanililwi kuhuma kundumba, "Wenga ni Mwana wa nenga mpalwa, ningupaliwa na wenga." 12 Palapala akalongoswa na Mpumulo wa Sapanga kuyenda kuluvagha, 13 alikalili kula machuwa ialobaini, na kula Nkosi wa mahoka limuyesili. Awelili kula pamonga na mikokolo gha kumwitu, na watumikila wa kundumba wa Sapanga wakawela wangumtumikila.

14 Yohanapakavikwa muuwopwa, Yesu ayendili ku mlima wa Galilaya, akatangasa Lilandu Maha lya Sapanga, 15 Akilonga, "Lipindi lihika kala, na unkosi wa Sapanga upabehi. Mleki sambi mumhyukile Sapanga na kuyitikila Lilandu Maha!" 16 Lipindi Yesu pakawela akityanga mmbali mwa lihiwa Galilaya,

awawonili walopola waivili, Simoni na Andelea mlongu ghaki wangutanda homba kwa wafu.Mundu angutanda homba kwa wafu 17 Yesu akawalongela, "Mnikovikeli, nenga nitewavula kuwayegha wandu handa walopola wanguyegha homba." 18 Palapala wakaleka nyafu zyao na kumkovikela. 19 Yesu paayendelelili kuulongolo, akawalola Yakobu na Yohana

wana wa Zebedayu. Wakiwela mghati gha whatu wakihonjola nyafu zyao. 20 Yesu akawakema lipindi lilalila, na weni wakamleka tati ghao Zebedayu mghati gha whatu akiwela na watumikila ghaki, wakayenda kula kawela Yesu.

21 Yesu na wavulwa ghaki wakahika kumbwani Kapelinaumu, na bwitu paihikili lichuwa lya kupumulila, Yesu akayingila mlighuta lya kukonganika lya Wayahudi, akatumbula kuvula. 22 Wandu wogha wamyoghanilili walikangasilwi na mavula gha mweni kwaikiva awelile ng'ogha akivula handa wavula ghao wa ulaghilo ila handa mundu kawela na ukulu. 23 Saa hila, mundu mmonga akolilwi na lihoka mula mghati mwa

lighuta lya kukonganika lya Wayahudi. Akatumbula kutova lilowi, akilonga handa mundu avile na ukulu, 24 "Kuwela na lilando liki paghati gha wenga na twenga, wenga Yesu wa Nazaleti? Uhika kutuyalamisa? Ningukumanya wenga ni ghani, wenga ni yula mhaghulwa kwaikiva gha Sapanga!"

25 Yesu akalikalipila hali lihoka akilonga, "Utami nuu, Uhuki kwa mundu hayu!"

26 Lila lihoka likamtikatika mundu yula kwa makakala, akatova

lilowi likamuhuka. 27 Wandu wogha walikangasili, wakakonyana,"Ni mighalu liki hai? Ghuli, ni mavulo gha hyonu? Mundu hayu kana uweso wa kuwapegha malaghilo mahoka, na weni wakamuyitikila!"

28 Milandu gha Yesu ilandalili kwa kuloposela mahala kogha mu

Galilaya.

29 Yesu na wavulwa ghaki wakahuka kulighuta lya kukonganika Wayahudi, wakayenda mbaka ku ukaya kwa Simoni na Andelea. Na Yokobu na Yohanawakayenda pamonga na mweni. 30 Hinu nyongo mkwahanu wa Simoni, akiwela mkindanda anguvina nesu. Wakamlongela Yesu lipindi pahikili. 31 Yesu akamyendela yula nyongo, akamkola liwoku, akamyinula. Hula uvina ukamlekesela, akatumbula kuwatelekela. 32 Lumihi, lichuva palihongili kala, wakamyeghela Yesu wavina

wogha na wandu wakolilwi na mahoka. 33 Wandu wogha wa mmbwani hula walikungulili kuulongolo gha lighuta. 34 Mweni Yesu akawalamisa wandu watangala weni kuwela na mavina wekaweka, awawingili mahoka matangala, ila kawakanila mahoka kulonga chochosi kwaikiva wammanyili mweni ni ghani.

35 Kilau ghaki pambila na mhana, Yesu ahukili, akayenda mahala pawela ngʼogha na wandu kumyupa Sapanga. 36 Simoni na wayaki wakayenda kumhaka. 37 Pawamlolili, wakamlongela, "Kila mundu angukuhakula!"

38 Yesu akawalongela, "Tuyendi kumimbwani ghangi gha pabehi. Nikawatangasile kula kangi, kwaikiva nihikili kwa hayi."

39 Hinu, akayenda kila mahala kula mlima Galilaya akitangasa ku

malighuta gha kukonganika Wayahudi na kuwinga mahoka

40 Mundu mmonga mweni kuwela na ukalawa amyendili Yesu, kamtundamila kwa manung'una, akamlongela, "Paupala, unguwesa kunighulula!" 41 Yesu akamwonela luhungu, akalangiha liwoku lyaki, akamkola

na kumlongela, "Ningupala ghululiki!" 42 Palapala ukalawa ukamleka mundu yula, akaghululika. 43 Hinu Yesu akamlongela ayendi zyaki na kumlongela, 44 "Uloli ukotoho kumlongela mundu yoyosi lilando hali, ila uyendi ukajilangihi kwa mtambika na ukawapeghi litambiku kwaikiva kwa kuhululwa kwa wenga handa alaghilili Musa kuwahighilisa yiwa ulama."

45 Ila mundu yula akayenda, akatumbula kulongela milandu hila kila milima na kulonga mighalu itangala hata Yesu kawesa ng'ogha kangi kuyingila kumbwani wowosi lipala, impalili kutama panji gha mlima, mahala pawela ngʼogha na mundu. Hata nagha, wandu wamhikilili kuhuma kogha kogha.