1 Yesu ahukili pala akayenda mbwani Yudasia, hata ku mwambo gha lweni lwa Joludani. Lipinga lya wandu likamyendela kangi, na mweni akawavula kangi handa aigholile.

2 Hinu, Mafalisayo wakamyendela, na kwa kumyesa wakamkonya, "Ghuli, malaghililo yangumlekelela mlumi kumleka mdala ghaki?"

3 Yesu akawayanga, "Musa awapeghilile malaghililo ghani?"

4 Na weni wakalonga, "Musa atulaghilili mlumi kumyandikila lihamba gha kulekana na kumpegha mdala ghaki na amleki."

5 Yesu akawalongela, "Musa awayandikilili lilaghilo hali kwa ikiva gha utatala wa mitima gha mwenga."

6 Ila kahuma kuwumbwa kwa mlima wogha, Sapanga awumbili mlumi na mdala. 7 Hinu mlumi "Atemleka tati ghaki na nyongo ghaki na mweni atekongana na mdala ghaki." 8 Na weni wavili watevile higha imonga. Kwa nagha weni ng'ogha wavili kangi ila ni higha imonga. 9 Hinu, "Akikonganisili Sapanga, mundu akotoho kukilekanisa." 10 Pawayingilili kangi mghati mwa lighuta, wayitikila ghaki wakamkonya kwa lilando lila.

11 Yesu akawalongela, "Na yula amleka mdala ghaki na kuposa mdala ghangi, angughola ngongola. 12 Hilahila, kila mdala amlekilili mlumi ghaki na kutolwa na mlumi ghangi angughola ngongola."

13 Wandu wamyeghilili Yesu wana wanungʼuna ili awayavisi, ila wayitikila ghaki wakawakalipila. 14 Yesu Pa alolili nagha, ayomilili akawalongela, muwaleke wana wahiki kwa nenga, mkotoho kuwakanila kwa ikiva Ufalumi wa Sapanga ni kwa wandu handa wana hagha. 15 Ninguwalongela unagha, "Ikiva mundu yoyosi aupokela ng'ogha Unduna wa Sapanga handa wana wanung'una ateyingila ng'ogha hamu." 16 Hinu akawapokela wana wala na kuwakumbata akawavikila mawoko kwa kuwahighila.

17 Yesu pa atumbulili mwanja ghaki, mundu mmonga akamuhikila akitula mbilo, akitova manungʼuna kuulongolo ghaki, akamkonya, "Mvula maha, nighole kyani ili niwese kulihi ukomu wa machuwa yayendelela?"

18 Yesu akamyanga, "Ghuli ungunikema mmaha? Kwa hela mundu avile maha ila ni Sapanga weka ghaki. 19 Unguyamanya malaghililo: ‘Ukotoho kughola ngongola, ukotohu kukoma wandu, ukotohu kuhija, ukotoho kungupikiha uhwangi, ukotoho kuzyanga, uwatundamili tati ghako, nyongo ghako.’" 20 Na mweni akamyanga, "Mvula, hagha yogha niyagholakala

kuhuma usongolo ghangu." 21 Yesu akamlola, akampala, akamlongela, "Ulepelelili na kindu

kimonga. Uyendi ukawuse kila kindu ukolili, uwapeghi wandu wavile na hindu ngʼogha hazi mapesa, na wenga utevile mundu mweni vindu ngoo kundumba, hinu uhiki na kunikovekela." 22 Ila msongolo yula pa ahyoghanilili milandu hila, aliholili, na kujiyendela mawachilo ghaki yakiva yayaghanika, kwa ikiva avilili mundu avile na mbia nesu. 23 Yesu akalola kogha na kogha, akawalongela wayitikila ghaki,

"Ni utatala wandu wavile na hindu ngoo kuyingila ku Unduna wa Sapanga." 24 Wayitikila wakangasitwi na milandu ghaki. Yesu akawalongela

kangi, "Wana wa nenga, ni utatala nesu kuyingila ku Unduna wa Sapanga. 25 Ni yuyughu nesu likokolo walikema ngamia kuyingila ku kilanga kya sindanu, kupita mundu avile na hindu ngoo kuyingila ku Unduna wa Sapanga." Ngamia 26 Wayitikila ghaki wakangasitwi nesu wakakonyana, "Ni ghani

nagha anguwesa kulokolwa?" 27 Yesu akawakwenjulila mihu, akawalongela, "Kwa mundu

iwesekana ng'ogha, ila kwa Sapanga ngʼogha nagha, kwa ikiva kwa Sapanga yogha yanguwesekana." 28 Petelo akamkonya, "Twenga tuleka yogha, tukakukovekela

wenga." 29 Yesu akalonga, "Nagha ninguwalongela, kila mundu alekilili

lighuta ghaki, au mlongu ghaki, au mhaja ghaki, au nyongo ghaki, au tati ghaki, au wana au matawa kwa ikiva gha nenga na kwa ikiva gha lilando maha. 30 Atepokela mianja imia nesu lipindi hali lya hinaa. lighuta na mlongu na mhaja na nyongo na wana na matawa pamonga na mahakili na ku lipindi lya kuulongolo atepokela ukomu wa machuwa yogha ng'ogha kuyomoka. 31 Ila watangala ghao wavile wa mtumbula watevile wa mwihu, na wavile wa mwihu watevile wa mtumbula."

32 Yesu na wayitikila ghaki wavile mu njila, wakikwela kuyenda Yelusalemu, mweni akalongola kuulongolo gha weni. Wayitikila wakakolwa na holu, na wandu wavile kuyetu watilili. Yesu akawatola kangi wayitikila ghaki ikumi na ivili, na kutumbula kuwalongela mighalu itemkola. 33 Akawalongela, "Tungukwela kuyenda Yelusalemu na kula Mwana wa Mundu atehumiswa kwa wakulu wa matambiku na kwa wavula wa ulaghililo. Na weni watemlamula ahuweghi na kumyegha ku mawoku gha wandu wavile ng'ogha Wayahudi. 34 Na weni watempughanya, watemhunyila mata, watemtova hyatu na kumkoma. Ila ku lichuwa lya itatu atehinduka."

35 Hinu, wana waivili wa Zebedayo, wala Yakobu na Yohana, wakamhikila Yesu na kumlongela, "Mvula, tungudahila utugholeli lilando tutekuluwa." 36 Yesu akawakonya, "Mngudahila niwagholeli niki?" 37 Na weni wakamyanga, "Pala utetama ku kikalilo kyako kikulu kya Unduna tungukudahila utami pamonga na twenga upandi ghako wa kulihila na ghangi upandi wa shotu." 38 Yesu akawalongela, "Mmanya ngʼogha mukiluwa! Ghuli, mnguwesa kuhakika kwa njila handa nenga nitehakika? Au mtevile maha kuhwegha handa nitehwegha?" 39 Na weni wakamuyanga, "Tunguwesa." Yesu akayendelela kuwalongela, "Unagha mnguwesa kuhakika handa nitehakika, na kuhwegha handa nitehwegha. 40 Ila ni ghani atetama kulihila au shoto kwa nenga si lihengu lya nenga. Ni Sapanga weka hela atewavika wandu ku mahala pala awavikilili maha." 41 Wayitikila ghangi ikumi pa wayoghanila hagha, watumbulili kuwahyomela Yakobu na Yohana. 42 Hinu, Yesu akawakema akawalongela, "Mngumanya yiwa wala wanguwachilwa kuvile vilongosi wa mamilima huwalongosa wandu ghao kwa makakala, na wakulu hagha huwagholesa lihengu handa wahusutu ghao. 43 Ila kwa mwenga ikotoho kuvile nagha, ila adahila kuvile mkulu paghati mwa mwenga, angudahilwa avile mundu wa kuwatumikila mwenga. 44 Mundu yeyose adahilili kuvile Mkulu angudailwa, avile anguwatumikila wogha. 45 Kwaikiva Mwana wa Mundu kahika ngʼogha kutumikilwa, ila kutumikila, na kuhumisa ukomu ghaki kwa kuwakombola wandu watangala."

46 Hinu wakahika Yeliko, na mweni Yesu pa avile anguhuka ku mlima hula akiva na wayitikila ghaki pamonga na upinga mkulunga wa wandu, angalimihu, mwana gha Timayu akemilwi Batimayu, avile kalikala mmbali gha njila, anguluwaluwa. 47 Batimayu paayughanilili yiwa ni Yesu wa Nazaleti avile angutyanga mahala baha, atumbulili kutova lilowi, "Yesu, mwana wa Daudi, uniwoneli luhungu." 48 Wandu watangala wakamkalipila na kumlongela alikali nuu, ila mweni akayendelela kutova lilowi, "Mwana gha Daudi, Niwoneli luhungu." 49 Yesu akagholoka, akalonga, "mumkemi." Hinu wakamkema yula angalimihu, wakamlongela, "Ujigahili moyu. Ugholoki, angukukema." 50 Batimayu akaidanga nguu ghaki, akajumba kwa kuloposela na kumyendela Yesu. 51 Yesu akamkonya, "Ungupala nikugholeli kyani?" Hayu angalimihu akamlongela, "Mvula, ninguluwa mbati kulola." 52 Yesu akamlongela,"Uyendi ukwinila ghako ukulamisa," Lipindi lilalila yula angalimihu akawesa kulola, akamkovekela na kuyenda pamonga na Yesu.