1 Yesu ayingilili kangi ku lighuta gha kukokanganika na Wayahudi na mula mghati mvile na mundu avile na liwoku lihova. 2 Wandu wavile mula wangumlindila amlamisi mundu yula Lichuwa lya kupumulila ili wapali kumsitaki. 3 Yesu akawalongela hayu mundu avile na liwoku lihova, "Uhiki baha kuulongolo." 4 Hinu akawakonya, "Kwa kulandana na malaghililo gha twenga niki tungudahilwa kughola," au "kyani malaghililo gha twenga zingutulongela kughola?"

Ila weni walongili ng'ogha lilando.

5 Yesu akawakwenjulila mihu wogha kwa lilaka, moyu ukamluma kwa ikiva gha utatala wa mioyu ghao. Hinu akamlongela yula mundu, "Ulangihi liwoku lyaku!" Mweni akalilangihi liwoku lyake, likavile likomu kangi. 6 Lipindi lilalila Mafalisayo wakahuma panji, wakalikungula pamonga na wandu wa kipinga kya Helodi wakahaka njila gha kumkoma Yesu.

7 Yesu na wayitikila ghaki wakayenda mmbali mwa lihiwa lya Galilaya, na lipinga likulu lya wandu, kuhuma mlima Galilaya wakamkovekela, 8 hila hila Yelusalemu, Idumea, kumwambu gha lweni Joludani, Tilo na Sidoni. Wandu wala watangala wamyendilili Yesu kwa ikiva gha kuyughanila mighalu itangala ivile kaighola. 9 Yesu akawalongela wayitikila ghaki wamvikili maha whatu imonga, ili lipinga lya wandu likotoho kumtindila. 10 Avile kawalamiha wandu watangala, na wavina wogha wavile wangumtindila ili wapati kumyavisa. 11 Wandu wavile na mahoka pawamlola Yesu, wakaguwa kuulongolu ghaki na kutova lilowi, wakilonga, "Wenga ni mwana wa Sapanga." 12 Ila Yesu akawakanyika kwa kuyoghoha wakotoho kulonga

kwa wandu yiwa mweni ni ghani.

13 Yesu akwelili kukitumbi akawakema wala awapalili. Hinu, wakamyendela, 14 Mweni akawahaghula wandu ikumi na waivili ikiva akawakema wandumindumi, walikali na mweni, awayeghi kutangasa 15 na wavile na uweso wa kuwawinga mahoka. 16 Wala ikumi na waivili awahaghulili ni hagha: Simoni, Yesu

ampeghili lihina lya Petelo, 17 Yakobu na mlongu ghaki Yohana, wogha waivili wavile wana wa Zebedayu, Yesu awapeghili lihina lya Boaneligi, limanyikana handa "Wana wa mlindimu," 18 Andelea na Filipu na Batolomayo na Matayu na Tomaso na Yakobu mwana wa Alifayu na Simoni mweni kaya wa Kaanani na 19 Yudasi Isikaliyoti yula avile kamyuka Yesu.

20 Hinu Yesu akahuya ukaya. Lipinga lya wandu wavile walikungula kangi, hata Yesu na wayitikila ghaki wapata ng'ogha lipindi lya mulyo, 21 Walongu ghaki na wandu ghangi pawayughanilili mghalu hula wakahuka kuyenda kumtola kwa ikiva wangulonga "kana lukwali."

22 Na weni wavula wa ulaghililo wavile wahuma Yelusalemu, wakalonga, "kana lihoka, kangi, anguwawinga mahoka kwa likakala lya ukulu wa Belizebuli avile mkulu wa mahoka."

23 Hinu Yesu akawakema, akawalongela kwa milandano, "Ghuli lihoka linguwesa kuliwinga lyeni?"

24 Wandu wa Unkosi mmonga pawatovana na kulikala mapinga mapinga yangulipinga yeni kwa yeni, hinu Unkosi hula uteguwa. 25 Kangi ikiva walongu wamonga ikiva watepalaghanyika lipinga lipinga yangulipinga, walongu hagha wateyalamila. 26 Ikiva hinu, ulongosi wa lihoka ukapalaghanyika mapinga mapinga unguwesa ng'ogha kuyendelela, ila uteyalamiswa nesu. 27 "Kwahela mundu anguwesa kuvamila lighuta lya mundu mweni makakala na kumpokola hindu ghaki ila atumbuli kamuwopa yula mundu avile na makakala, baha ndiwa awesi kumpokola hindu ghaki."

28 "Nenga ninguwalongela uchakaka, wandu watewesa kulekeselwa sambi ghao wogha na malighu ghao hyogha kwa Sapanga. 29 Ila mundu amlighili Mpumulo wa Sapanga atelekeselwa ng'ogha mahakata zyake, atewela na uhakata wa machuva yogha ng'ogha mwihu." 30 Yesu akalonga nagha kwaikiva wavile wangulonga, "Kana mahoka."

31 Nyongo ghake Yesu na walongu ghake wafikili pala. Wakawoloka panji, wamtumili mundu wa kumkema. 32 Lipinga lya wandu wavile walikala pala wakamtindila. Hinu, wandu wakamlongela, "Nyongo ghako na walongu ghako wakiva panji, wangukukema."

33 Yesu akawayanga, "Nyongo ghangu na walongu ghangu ni ghani?" 34 Hinu akawalola wandu wavile wamtindila, akalonga, "Hagha ndiwa nyongo ghangu na walongu ghangu. 35 Mundu yoyosi mweni aghola yampalili Sapanga, hayu ndiwa mhaja ghangu na mhacha ghangu na nyongo ghangu."