1 Ihighalili machuwa maivili pambila gha kuhika mhambu gha Pasaka na gha mibumunda itayitwi ngʼogha ijejema. Watambika wakulu na wavula wa ulaghililo wavile wahakili njila gha kumkamula Yesu kwa ukalamuki ili wamkomi. 2 Ila walongili, "Tukotoho kumkamula lipindi lya mhambu wa Pasaka, ili wandu wakotoho kughola maghaso."

3 Yesu avile ku mlima wa Besania, ukaya kwa Simoni Mkalawa. Pavile ku mesa kulyegha mulyo, nyongo mmonga avile na supa gha liganga walikema alabasita ivile na mahuta yanungila gha mapesa ngulu akahika, akaibalula hila supa, akamwahila Yesu mahuta hagha ku mutu. 4 Wamonga gha wandu wavile pala wahyomili, wakajilongela, "Kwa kyani mahuta hagha yanguyalamika hela?" 5 Mahuta hagha yangewesa kuhuswa kwa dinali imia itatu, na kuwapegha wangali hindu mapesa hazi. Na wakamkalipila yula mdala nesu. 6 Ila Yesu akawalongela, "Mlekeni, kwa kyani mngumghasa? kanigholela mhalu wamaha. 7 wandu wavile na hindu ngʼogha machuwa yogha na mnguwesa kuwatanga lipindi lyolyosi pampalili, ila nenga nitevile ngʼogha pamonga na mwenga machuwa yogha. 8 Mdala hayu kaghola kila awesili, kalongola kupakala mahuta higha gha nenga kwa ikiva gha kusikwa. 9 Ninguwalongela, Una kokosi mlima wogha Lilandu Maha litetangaswa, mghalu hau agholili kitetangaswa kwa kumkumbwike mweni."

10 Hinu Yudasi Isikalioti, mmonga wa wala ikumi na ivili, ayendili kwa watambika wakulu ili kumhyuka Yesu. 11 Watambika wakulu pa wayoghanilili mghalu hula, wakahekelela, wakamlongela watempegha mapesa. Hinu, Yudasi Akatumbula kuhaka lipindi maha gha kumyuka Yesu.

12 Lichuwa lya mtumbula lya mhambu gha mikati itayitwi ngʼogha ujejema, lipindi livile mwana kondolu wa Pasaka uhinjwa, wayitikila ghaki wakamkonya Yesu, "Tukutengeli kugha mhambu gha pasaka." 13 Hinu Yesu akawalaghila waivili wa wayitikila ghaki akiwalongela, "Myendi kumbwani, na haku mtekongana na mlumi mmonga apapili ndeleku gha masi. Mumkovikeli," 14 mbaka kulighuta ateyingila, mkamlongeli mweni lighuta, "Mvula angulonga, ki kugha kyumba kya nenga pavile nitelyegha pasaka pamonga na wavulwa ghangu?" 15 Na mweni atewalangiha kyumba kikulu kya kunani kivikilwi maha na vyogha vidahilwa kwa twenga. "Mtutengeli hamu."

16 Wayitikila wakahuka wakayenda mmuji, walolili kila kindu maha handa yesu avile kawalongela. Wakatengela mulyo gha pasaka.

17 Pa ihikili lumihi, Yesu ahikili pamonga na wayitikila ghaki ikumi na ivili. 18 Pa wavile wakilyegha mulyo, Yesu akalonga, "Unagha ninguwalongela mmonga wa mwenga angulyegha pamonga na nenga, atenihyuka."

19 Pala wayitikila ghaki wakatumbula kulihola, wakamkonya mmonga mmonga, "Ghuli ni nenga?"

20 Yesu akawalongela, "Ni mmonga wa mwenga ikumi na ivili, yula anguchwika libumunda pamonga na nenga mlibakuli. 21 Kwa ikiva Mwana wa Mundu atehova handa mayandiko Makwilikihi yangulonga kwa mweni, ila itevile ihakili kwa yula mundu atemhyuka mwana wa mundu, ingevile mbaha kwa mweni akotoho kuwelekwa."

22 Pa wavile wangulyegha, Yesu akatola likati, akauhighila, hinu akametula na kuwapegha wayitikila ghaki, akilonga, "Mtole hau ndiwa higha ghangu." 23 Hinu a katola kitekelu, akamhighila Sapanga na akawapegha wayitikila, na weni wogha wakakinyweghela. 24 Na Yesu akawalongela, "Hau ndiwa mwahi ghangu wa lilaghano, mwahi unguyitika kwa lukani lya wandu ngenju. 25 Unagha ninguwalongela, nitenywegha ngʼogha kangi divai hai mbaka lichuwa lila paniteinywegha uhyonu mu Unduna wa Sapanga." 26 Hinu wakayimba uyimbo, wakahuka, wakayenda ku litumbi lya mizeituni.

27 Yesu akawalongela wayitikila ghaki, "Mwenga wogha mtegua, kwa ikiva mayandiko Makwilikihi yangulonga, ‘Nitemtova mhungaji, na kondolu watetikimuka haku na kula.’ 28 Ila panihinduka kala, nitewalongola ku Galilaya." 29 Petelo akamlongela Yesu, "Hata ikiva wogha ghangi wakikuleka nenga nitekuleka ngʼogha." 30 Yesu akamyanga Petelo, "Unagha ningukulongela, uhiku hau, pambila njogholu katova lilowi ngʼogha mihanja mi ivili, utevile unihyukakala mihanja mi itatu." 31 Ila Petelo akayendelela kulonga kwa makakala, "Hata itedahilwa nihovi pamonga na wenga, nitekuleka ngʼogha." Wayitikila wogha kangi wakalonga hilahila.

32 Hinu, wakahika kukitawa kikemilwi Getisemani. Yesu akawalongela wayitikila ghaki, "Mtami baha lipindi nenga ninguyupa." 33 Hinu akawatola Petelo na Yakobu na Yohanana kuyenda na weni. Akatumbula kulihola nesu na kughasika. 34 Akawalongela, "Ningulihola nesu mumoyu hata pabehi kuhova. Mtami baha na mvile mihu." 35 Akayenda kuulongolo mayaghani na weni, akajidanga pahi. Akayupa yiwa pa iwesekana, lisaa lila lya uhakili limuhuki kutali. 36 Akalonga, "Tati ghangu, kwa wenga mighalu yogha inguwesekana. Unihumisili kitekelu haki, ila ikotoho kuwela handa nipalili nenga, ila upalili wenga." 37 Hinu Yesu ahuyili kwa wala wayitikila waitatu, awawonili wawonja. Hinu, akamkonya Petulo, "Simoni, ghuli, kughonja? kuwesa ng'ogha kulikala mihu hata kwa lisaa limonga?" 38 Hinu akawalongela, "Mlikali mihu na kuyupa ili mkotoho kuyingila mumayeso. Mpumulo ungudahila ila higha iwesa ngʼogha." 39 Akayenda kuyupa kangi akihuyila milandu hila hila. 40 Hinu akahuya kangi, akawalola wawonjili. Mihu ghao ikolilwi nesu na lughono, na weni wasinditwi kumanya yiwa wamyangi niki. 41 Paahuyili kwa lihanja lya itatu, akawalongela, "Mmbila mnguwonja na kupumulila? muwonja nesu hinaa myimuki! lisaa lihika kala! Mwana wa Mundu anguyeghwa kwa wandu wahakata. 42 Muyimuki tuyende mlole, yula mundu atenikanila ahikili kala pabehi."

43 Yesu pakayomola ngʼogha kulonga, Yudasi, mmonga wa wala ikumi na ivili, akahika pamonga na lipinga lya wandu wavile na mipanga na mimbonga. Wandu wala wavile wayeghitwi na watambika wakulu, wavula wa ulaghililo na wagogolo. 44 Hinu Yudasi Isikalioti avile kawapegha kilangihi, "Yula nitembusi ndiwa mweni, mumkole na kumyegha pahi gha ugholokela." 45 Yudasi pa ahikili, akamuyendela Yesu na kumlongela, "Mvula." Kangi akamkusikila. 46 Hinu wala wandu wakamkola Yesu, wakamkamula na kumgholokela kwa pabehi. 47 Mmonga paghati gha wala wagholokili pamonga na Yesu, akahomola lipanga ghaki, akamtova mtumikila wa mtambika mkulu na akamdumula lipulikilo. 48 Yesu akawalongela, "Ghuli, mhika na mipanga na mimbonga kunikola handa wandu wayenda kumkola mpokola? 49 Kila lichuwa nivile pamonga na mwenga nikivula mu lighuta gha Sapanga, mnikola ngʼogha. Ila hinaa ingudahilwa Mayandiko Makwilikihi yagholwe." 50 Pala wayitikila wogha wamlekili, wakatula mbilo. 51 Ila msongolo mmonga avalili mgololi mbulete ayendelelili kumkovikela Yesu. Wakayesa kumkamula, 52 Ila mweni akatyelebuka akawalekesela mgolole mbulete hula na kutula mbilu akiva lipala ng'ogha nguu.

53 Hinu, wakamyegha Yesu kwa mtambika mkulu wavile vilongosi wa watambika wakulunga wogha, mambuyi na wavula wa ulaghililo wavile walikungula. 54 Petelu akamkovekela Yesu kwa utali, akayingila mghati mwa lyugha wa mtambika mkulu, akatama pamonga na wagholokela akilota liloto. 55 Wakulu wa matambiku wakulu na wandu wa njengakaya ngulu yogha wahakulili ulangihi wa kumghola Yesu ili wawese kumkomwa, ila waulolili ngʼogha. 56 Wandu watangala wayeghili ulangihi wa uhwangi kumsitaki Yesu, ila vilangihi ghao vilandinili ngʼogha. 57 Hinu ghangi wagholokili, wakayegha ulangihi wa uhwangi wakilonga, 58 "Tumyoghanilili mundu hayu akilonga, ‘Niteiyalamisa lighuta lya Sapanga hai ichengilwi kwa mawoko, na kwa machuwa itatu niteichenga ghangi ivile ichengwili ngʼogha na wandu.’" 59 Ila hata nagha ulangihi wa weni ulandinili ngʼogha. 60 Hinu, Mtambika Mkulu akagholoka kuulongolo ghao na kumkonya Yesu, "Ghuli, uyangi lilando ngʼogha? Wandu hagha wangukusitaki niki wenga?" 61 Ila mweni akatama nuu, alongilili ngʼogha hata lilando limonga. Matambika Mkulu akamkonya kangi, "Ghuli wenga ndiwa Kilisito, mwana wa Sapanga m mkwilikihi?" 62 Yesu akayanga, "Hina ndiwa nenga, Kangi mtemlola Mwana wa Mundu atamili upandi wa kuliyila wa yula Bambu avile na likakala, akihika mumahundi gha kundumba." 63 Pala Mtambika Mkulu akalakatula nguu zyake, akalonga, "Tungudahila ulangihi wa niki kangi wa kumsitaki. 64 Myoghanila weni amlighili Sapanga. Munguliwachila niki?" Wogha wakamulamula yiwa angupalwa ahovi. 65 Hinu ghangi paghati gha weni watumbulili kumuhunyila Yesu mata, wakamugubika mihu na kumtova, na kumlongela, "Uloti hinaa ni ghani akutovili!" Hata wagholokela wakamtola na kumtova mbandi.

66 Petelo pa avile ambila pahi mghati gha lyugha, mmonga wa watumikila wadala wa Mtambika Mkulu akahika pala. 67 Paamwonili Petelo akilota lyoto, akamlola na kumlongela, "Wenga hilahila uvile pamonga na Yesu wa Nazaleti." 68 Ila Petelo akamkanila, "Manya ngʼogha,wala nimanya ngʼogha unguyalongela!" Hinu Petelo akahuka, akayenda panji mliuwa. baha njogholu akatova lilowi. 69 Yula mtumikila pamlolili kangi Petelo akatumbula kangi kuwalongela wandu wavile wawolokili pala, "Mundu hayu ni mmonga wa weni." 70 Petelo akanili kangi. Lisaa mayaghani, wandu wavile wagholoka pala wakamlongela Petelo, "Kwa unagha wenga ni mmonga wa weni, kwa ikiva wenga ni Mgalilaya." 71 Ila Petelo akatumbula kulapila na kulapa akilonga, "Nenga ningummanya ngʼogha mundu hayu mngulonga habali zyaki." 72 Lipindi lilalila njogholu akatova lilowi lihanja lya ipili. Hinu Petelo akumbwike ikiva Yesu avile amlongelili, "Pambila njogholu kuhuyila ngʼogha lyanja lya ipili kutova lilowi, utenikanila miyanja itatu." Petelo ahumilwi na masosi.