1 Pa kulangalili, Watambika Wakulu wagholili lilando pamonga na wagogolo, wavula wa ulaghililo na wandu wa njengakaya yogha, wakamuwopa Yesu ngoi, wakamyegha na kumtula kwa Pilatu. 2 Pilatu akamkonya Yesu, "Ghuli, wenga ni Nnduna wa Wayahudi?" Yesu akamyanga, "Hina ivile handa ulongili." 3 Watambika Wakulu wakamsitaki Yesu kwa mighalu itanala. 4 Pilatu akamkonya kangi Yesu, "Wenga uyangi ngʼogha lilando? Uloli milandu hagha yogha wangukusitakila" 5 Ila Yesu ayangili ngʼogha lilando lolose kangi, hata Pilatu akalikangasa.

6 Kila lipindi lya mhambu wa Pasaka, Pilatu asyoelelili kuwawoposelela wandu muwopwa mmonga, yula wamdahila. 7 Pavile na muwopwa mmonga, akemilwi Balaba, awopilwi pamonga na wandu walipingili ulongosi na wavile wayambusili wandu kuhova mumaghaso. 8 Wandu wakamyendela Pilatu, wakatumbula kumluwa awagholeli handa agholili kula kuyetu. 9 Pilatu akawayanga, "Mngudahila niwawoposeleli Nduna wa Wayahudi?" 10 Pilatu alongili vila kwaikiva amanyili yiwa Watambika Wakulu wamyeghili Yesu kwa mweni kwa ikiva gha wifu. 11 Ila Watambika Wakulu wakawatumisila wandu wamluwi Pilatu awawoposeleli Balaba. 12 Pilatu akawakonya wandu kangi, "Hinu mngudahila nighole niki na hayu mumkema Nduna wa Wayahudi?" 13 Wandu wogha wakatova lilowi kangi, "Amvambi kumsalaba." 14 Ila Pilatu akawakonya, "Kwa niki! Kaghola uhakata liki?" Ila weni wakayendelela kutova lilowi nesu, "Amvambi kumsalaba." 15 Kwa ikiva Pilatu apalili kulihekelelesa lila lipinga lya wandu. Hinu, akamuwoposola Balaba kuhuma ku uwopwa. Akawalongela wamtovi Yesu hyatu, hinu akamyegha wamvambi kumsalaba.

16 Hinu watovangondo wamyeghili Yesu mghati gha lyugha lya lighuta lya Mkulu wa mlima gha Yudasia na weni wakakema lipinga lyao lyogha walikungulili. 17 Wakamvika nguu zya zambalau na wakamfyokotolela kindu handa likokoma ligholitwi kwa mihomi, wakamvikila Yesu kumutu. 18 Hinu wakatumbula kumjambusa, wakilonga, "Kayimuka Bambu, Nduna wa Wayahudi!" 19 Wakamtova lidengi kumutu, wakamuhunyila mata, wakamuyinamila na kumtundamila kuulongolo ghaki. 20 Pawayomolili kumupughanya, wakamuwoposola hila nguu gha Zambalau wakamvika nguu zyaki, hinu wakamyegha panji kuyenda kumuvamba kumsalaba.

21 Pawavile mnjila. Wakonganili na mundu mmonga akemilwi Simoni, mweni kaya wa Kulene. Avile tati ghao Alekisanda na Lufu, na lipindi lila avile anguhuma mlitawa. Hinu, wakamng'ang'anisa atoli apapi lipingika lya Yesu. 22 Hinu wamyeghili Yesu mbaka mahala pakemilwi Goligota, imanyika mahala pa lifufu lya Mutu. 23 Wampeghili divai ihanganyiliwi na mtela ukemilwi manemane ila mweni alemili kunywegha. 24 Hinu, wamvambili ku lipingika, wapeghanili nguu syake kwa kuyavalangila kula walamuli ni ghani apokeli kyani. 25 Iwelili isaa itatu malawila pawamvambili kulipingika. 26 Likayandikwa litangasu lya lisitaka ghaki mulibau yiwa, "Nduna wa Wayahudi." 27 Pamonga na mweni wawavambili kumipingika ghao wapokola waivili, mmonga upandi wa mweni wa kulihila na ghangi upandi ghaki wa shotu. 28 Pala ndiwa mayandiko makwilikihi yatimilili yalongili, "Avalangililwi lipinga limonga na wahakata." 29 Wandu wavile wakityanga mahala pala wamlighili, wakatikaha mitu ghao na kulonga, "Iii! Wenga, Wenga baha upalili kubomola lighuta gha Sapanga na kuchenga lingi kumachuwa itatu, 30 Hinaa, ughuluki kumsalaba ujilokoli mwenibaha." 31 Na hilahila Watambika Wakulu pamonga na wavula wa ulaghililo wampughanyili wakilonga, "Awalokolili wandu ghangi, ila mweni awesili ng'ogha kujilokola. 32 Uleki tulole hayu ni Kilisito ahaghulilwi na Sapanga, Nduna wa Waizilaeli, ajighulusi hinaa kunani gha msalaba, ili na twenga tuwese kulola na kukwinila." Hata wala wavambilwi kumisalaba pamonga na mweni wamlighili hilahila.

33 Pa ihikili isaa isita gha pamuhi, lwisa litopehu lilandalili ku mlima wogha mbaka isaa itisa. 34 Saa itisa Yesu akalila kwa lilowi likulunga, akalonga, "Eloi, Eloi, lama sabakitani?" Hilahila ingumanyika, "Sapanga wa nenga, Sapanga wa nenga, ghuli ungunileka?" 35 Na wandu wamonga wawolokili pala pa wayughanilili vila, wakalonga, "Uyughanili! Angumkema Elia." 36 Na mmonga wa weni akatula mbilo, akachwika lidodoki mghati mwa divai isasili na kuwopela kunani gha lidenge. Akampegha anyweghi akilonga, "Mleki tuloli handa Elia atehika kumughulusa kunani gha lipingika!" 37 Ila Yesu akalila kwa lilowi likulunga, akahova. 38 Hinu, lipazia lya lighuta libalukili vipandi vi ivili kuhuma kunani mbaka pahi. 39 Mkulu wa watovangondo avile kagholoka kuulongolo gha Yesu, paailolili ghuli angudumuka mpumulo, akalonga, "Ni unagha mundu hayu avile Mwana wa Sapanga." 40 Pavile na wadala wamonga walolili kwa utali. Paghati gha weni kuwela na Malia ahuma ku Magidala na Malia nyongo gha msongolo Yakubu na Yusufu na mdala ghangi Salome. 41 Wadala hagha ni wala wamkovekelili Yesu na kumutumikila lipindi avile ku Galilaya. Wadala ghangi watangala wamkovekelili mbaka Yelusalemu wawelili pala hilahila.

42 Lipindi lya lumihi pa lihikakala, hai iwelili lichuwa gha kuvika maha, hali lichuwa liilongolili lichuwa lya kupumulila. 43 Pala akahika Yusufu mwenekaya wa Alimataya, mjumbi wa njengakaya ngulu gha Wayahudi, atundamiliwi nesu. Mweni kangi awelili akilindila kuhika kwa Unduna wa Sapanga. Hinu, amuyendelili Pilatu kahela holu, akaluwa apeghwi higha wa Yesu. 44 Pilatu akangasilwi kuhyoghanila ikiva Yesu avile kahova kala. Hinu akamkema mkulu wa watova ngondo, akamkonya yiwa Yesu avile kahova lipindi litali lipitili. 45 Pilatu pahighilisiwi na yula Mtovangondo mkulu wa watovangondo yiwa Yesu avile kahova kala. Akamlongela Yusufu atole higha ghaki. 46 Yusufu akahemela sanda, akaughulusa pahi hula higha, akautindilila sanda. Akavika ku limambi liwelili lihongoliliwi mliganga likamala, hinu akalibilibisa liganga likulunga kuulongolu gha mlyango. 47 Na weni Malia ahuma ku Magidala na Malia nyongo ghaki Yusufu wapalolili pala awonjisiliwi.