1 Ine Poolo, mtumwi wa Kilisito Yesu, ngati umo wakondela Mnungu, nalembela wandhu yao asanghidwa ni Mnungu, yawo ali Kuefeso yao amkhulupilila Kilisito Yesu. 2 Tikupembhelani ubwino ni mtendele, kwa Mbuye wathu Yesu Kilisito.

3 Watamandidwe Mnungu, Atate wa Ambuye wathu Yesu Kilisito! Ndande ya kulunjana ni Kilisito watipacha mwawi wambili wa mzimu kuchoka kumwamba. 4 Jhiko likali losaumbwidwe, Mnungu wadatisangha tikhale wao pakulunjana ni Kilisito, dala tikhale wandhu yawo tasanghidwa ni Mnungu, yawo tilibe chimo pachogolo pake. Ndande ya chikondi chake, 5 jhiko likali losaumbidwe Mnungu kutisangha, tikhale wana wake kupitila Yesu Kilisito nde umo wadakondela ni chifuno chake mwene.

6 Chimwecho, timtamande Mnungu kwa ulemelelo wa ubwino wake uwo watipacha ife kwakupitila mwana wake wa payokha. 7 Kwakupitila mwazi wake Kilisito ife taomboledwa, mate yake talekeleledwa machimo yathu. Kuchokana ni kuchuluka kwa ubwino wake, 8 uwo adatipacha kwambili, kwa hekima ni kujhiwa konjhe. 9 Mnungu wadatijhiwicha vindhu vake ivo vidabisika va chikondi chake, umo wamafunila, kupitila Yesu Kilisito. 10 Ndhawi yake yapo idafika wadachita icho wachifuna ni kukusa voumbidwa vonjhe, kila kandhu kumwamba ni pajhiko, panjhi pa Kilisito.

11 Kwa kulunjana ni Kilisito, ife tasanghidwa kukhala wake jhiko likali losaumbidwe kwa dala lake, iye wachita vindhu vonjhe ngati umo waafunila. 12 Mnungu wadachita chimwecho, dala ife Ayahudi tachogolela kumkhulupilila Kilisito tiutamande ukulu wake!

13 Chimchijha namwenjho, wandhu yawo asatia Ayahudi mudauvela Uthenga wa uzene, uthenga uwo wakupelekelani uomboli. Mudamkhulupilila Kilisito, ni kukuikani chizindikilo kulangiza kuti wake kwa kukupachani Mzimu yujha Mnungu wadatikambila kuti siwatupache. 14 Mzimu umenewo ndeuwo wachita tiyapate yonjhe yayo wadatikambila Mnungu kwa wandhu wake, chindhu ichi chitilangiza kuti Mnungu siwaombole wandhu wake onjhe. Ife tiutamande ulemelelo wake.

15 Kuchokela yapo nidavela umo mwakhulupilila Ambuye Yesu, ni chikondi chanu kwa wandhu a Mnungu, 16 sinidasiye kumuyamika Mnungu ndande yanu. Yapo nimpembha Mnungu nikukumbukilani. 17 Niyendekela kumpembha Mnungu wa Ambuye wathu Yesu Kilisito, Atate aulemelelo, akupachenu Mzimu wao uwo siukuchiteni mkhale woyela ni kukuvunukulilani kumjhiwa Mnungu. 18 Nimpembha Mnungu wamasule mitima yanu ione dangalila, mkhoze kujhiwa chikhulupililo chijha akutanilani ni ulemelelo waukulu ni mbhaso iyo waikila wandhu wake. 19 Mmpembha Mnungu mujhiwe kukhoza kwake ni umo wali wakulu kwa ife timkhulupilila. Wakhoza kuchita njhito mkati mwathu kulingana ni ijha mbhavu yake yaikulu kupunda, 20 ijha mbhavu idamuhyucha Kilisito, nikumkalicha bendeka la kwene la ulemu kumwamba. 21 Kumeneko kumwamba Kilisito walamulila ufumu wonjhe, ulamuli, mbhavu ni ukulu, ni walamulila kila icho chichulidwa, pajhiko lino ni jhiko ilo likujha. 22 Mnungu waika vindhu vonjhe pa ulamulilo wake, adamuika kukhala wamkululu wa vindhu vonjhe kwa gulu la wandhu amkhulupilila. 23 Gulu la wandhu amkhulupilila Kilisito nithupi la Kilisito, nianyiiwo akwanilichidwa niiye, uyo wakwanila kwa vindhu vonjhe kila pamalo.