1 Anyiimwe mudafa ndande ya volakwa ni machimo yanu. 2 Nyengo zijha mmakhala kwa kuchata mtundu wa jhiko lino, ni kumvela mfumu wa chiwanda cha mbhavu ya mlengalenga, chiwanda chalaamulila wandhu yawo chipano samvela Mnungu. 3 Ife nafe taonjhe timakhala ngati anyiiwo, timachata makhumbilo yathu ya jhiko ni kuchita ivo vikwadilicha matupi ni njelu zathu. Nafe mmayambo tidali ngati anyiiwo, timafunika tilangidwe ni Amnungu.

4 Nambho Mnungu ni alisungu kupunda. Adatikonda kwa chikondi chachikulu, 5 ata ngati tidamwalila ndande ya machimo, adatichita amoyo pamojhi ni Kilisito. Kwa ubwino wa Mnungu anyiimwe mwaomboledwa. 6 Kwakulunjana ni Kilisito Yesu, Mnungu wadatihyucha pamojhi ni iye, tikalamulile pamojhi nayo kumwamba, 7 dala alangize kuchuluka kwa ubwino wao nyengo izo zikujha kwa kulunjana kwa kwathu ni Kilisito Yesu. 8 Mwaomboledwa kwa ubwino wa Mnungu kwa knjila ya kukhulupila, asati kwa vichito vanu vabwino. Iyi ni mbhaso kuchoka kwa Mnungu. 9 Asati kwa vichito vanu mwachinawene, chimwecho mundhu waliyonjhe siwadajhielekela. 10 Ife taumbidwa ni Mnungu kwa kulunjana ni Kilisito Yesu, dala tichite vichito vabwino ivo adatikonjekela tivichite kuyambila mmayambo.

11 Kumbukilani kale anyiimwe asati Ayahudi kwa kubadwa Ayahudi adakutanani, "Wosachitidwe mdulidwe," Nambho anyiiwo ajhitana, "Wochitidwa mdulidwe" ndande chijha achitidwa mmatupi yawo. 12 Kumbukilani kuti nyengo imeneyo mudalibe Kilisito, simudali wandhu aku jhiko la Izilaeli, mdali alendo yawo mudalibe malo muvipangano ivo wadakamba Mnungu. Mudali ngati wandhu osakhulupilile ni wandhu yawo siamjhiwa Mnungu pano pajhiko la panjhi. 13 Nambho chipano, kwa kulunjana ni Kilisito, anyiimwe yawo mdali patali mmayambo mwali pafupi kwa njila ya mwazi wa Kilisito. 14 Kilisito nde uyo watipacha mtendele wandhu asati Ayahudi ni Ayahudi kukhala amojhi. Kwakulichocha thupi lake likhale njhembe ya nyifa, wadaucho udani uwo udatichichekeleza ngati phupha. 15 Wadang'anamula thauko la Musa, malamulo ni maagizo ya Ayahudi, dala wachite awili achameneo akhale chindhu chimojhi ni kupeleka mtendele. 16 Kilisito wadauwananga udani wao kwa kupitila nyifa yake mtanda, chimwecho wadaavanichana onjhe awili ni Mnungu. 17 Chimwecho Kilisito wadajha kulalikila mtendele ngati Uthenga Wabwino, kwa anyiimwe wandhu asati Ayahudi yao samamjhiwe Mnungu ni kwa Ayahudi yao amamjhiwa Mnungu. 18 Kwa kupitila iye ife taonjhe Ayahudi ni wandhu asati Ayahudi tikhoza kwa wandikila Atate kwa mzimu wa Mnungu.

19 Chimwecho anyiimwe asatinjho alendo, ni asati wandhu opita njila, nambho ni wenyejhi pamojhi ni wandhu a Mnungu, ni wandhu akhamu la Amnungu. 20 Mwamangidwa pa mwamba pa msingi uwo waikidwa ni atumwi ni alosi, Kilisito mwene walingana ni nde mwala waukulu uwo ugwililila nyumba. 21 Iye ndeuyo walunjanicha nyumba yonjhe ni kuikweza ikhale yaikulu ngati nyumba ya Mnungu mwene ndande ya Ambuye. 22 Kwa kulunjana niiye anyiimwe namwe mwamangidwa pamojhi ni wina onjhe, mukhale nyumba ya Mnungu kupitila mzimu wake.