1 डोङ्क बचन लेव, बचन परमेस्वरसं लेव, होसोनो बचन परमेस्वर लेव। 2 ओल डोङ्क परमेस्वरसं लेव।

3 स्यान्टै बस्त परमेस्वरये ओलज़ उसिर्जोयो होसोनो ओल उसिर्जोयोकाम कडि बस्त पनि ओबाठङ मासिर्जिये। 4 ओल्स जीबन लेव, होकाम नो जीबन मीराई याज्योती लेव। 5 नो ज्योती अन्ड्यारोलं चम्किये, होकाम अन्ड्यारो नोसं माझ्याङडुये।

6 परमेस्वरङाम परिःङसिव टोबो मी लेव, नोलो उमिन युहन्ना लेव। 7 नोये मीरंलाई नो उज्यालोलो ओबारेलं गोहाइ यानेलो लागिटं ओराव, कडालेकं स्यान्टै मीराई नोलो ओसोर ठैडे बिस्वास गोडोरंकं। 8 हो ओलज़ नो ज्योती माङ्क बुरु नो ज्योतीलो गोहाइ याने ओराव। 9 स्यान्टै मीरंलाई उज्यालो याने सत्य ज्योती प्रिठीबीलं रारिज़्या।

10 नो प्रिठीबीलंज़ लेव, प्रिठीबी नो लेवङामज़ उसिर्जिव, हैटानि पनि प्रिठीबीये नोलाई मासरेवये। 11 नो ओल उमीरं लेवकंज़ ओराव, होटानि पनि उमीराई ओललाई ग्रहन माडोरंये। 12 होकाम जोराई येसुलाई ग्रहन डाडे ओल उमिन्ट बिस्वास याडोरं, नोरंलाई होये परमेस्वरलो ओसन्तान टाने अडिकार ओयोवरं। 13 नोरं न झीङाम, न क्याङलो इछ्याङाम, होसोनो न कोइ मीलो उइछ्याङाम जर्मीव टारंये बुरु नोरं के परमेस्वरङाम जर्मीवरं टारंये।

14 होकाम बचन क्याङ टाडे डया सोनो सत्यये ब्यालडे गेखार्ल बास ओडोव। गे येसुलो ओमहिमा गेरोःङो, नो महिमा बाबुङाम राःव टोबोयाज़ ओज़ालो स्याव लेव।

15 युहन्नाये येसुलो ओबारेलं गोहाइ यावग्यान डाडे कस्सिडे किःडे हैओडोवरं, "येसु नो मीज़, जोलो ओबारेलं ङा हैङावारो, ‘ङा भन्डा छिन्डे राने ङा भन्डा पनि घ्योव ले, कडालेकं नो ङा भन्डा ङाडेकामज़ लेव।’"

16 नो लेवङामटा पुरा डयाये गे टोबो डया तर्ट छुटं डया डैडेगेनै। 17 कडालेकं न्याम मोसाङाम यासिव लेव, हैनि पनि डया सोनो सत्यके येसु ख्रीस्टङाम ओराव। 18 परमेस्वरलाई काङ्कायेज़ खर्कज़ यारोःङो माले। बाबुसं लिज़्याव टोबो याज़ ज़ाये परमेस्वरलाई सटन्डे नोयो।

19 यरुसलेमला यहुडी अडिकारीराई सेवा डोने मीरं सोनो लेबीरंलाई नो लेवकं "नङ काङ्का?" वार्डे पजोयो यापरिःङोरं, होकाम युहन्नालो ओगोहाइ ऐटाव लेव। 20 नोये होरंलाई जबाफ योने ओभनो ङाम्यो मावार्ये, "ङा ख्रीस्ट माङ्कची ओवारो।"

21 होकाम नो राव मीराई युहन्नालाई यापजोयो, "होकाम नङ काङ्का? नङ एलिया रो?"

नोये हैओवारो "ङा माङ्कची।"

"होकाम नङ अगमबक्ता रो?"

नोये जबाफ ओयोवरं, "माङ्कची।"

22 नोराई नोलाई हैयाडोव, "नङ काङ्का गेलाई हैगडासिके, गेलाई परिःङनेरंलाई गे जबाफ याव गिढुकं। नङ नबारेलं नङ कैनंवार?"

23 नोये हैओवारो यसैया अगमबक्ताये हैओवारो मान्टि,

"घ्योव प्रभुलो ओयेम तयार झैच्यो"

वार्डे जङ्गललं किःने ङा टोबो मीलो ओगा ची।

24 नोरं फरिसीराई यापरिःङो सोर रैने मीरं लेवरं। 25 होकाम नोराई नोलाई यापजोयो "नङ ख्रीस्ट पनि माङ्क, एलिया पनि माङ्क, नो अगमबक्ता पनि माङ्क याटाखे भने कडाने बप्तिस्मा नयोज़्यावरं?"

26 युहन्नाये नोरंलाई हैओडोवरं, "ङाके रीःये बप्तिस्मा ङायोरं, बुरु जेखार्ल टोबो च्याङसिव लिज़्या, नोलाई जे जेमसरेये। 27 ङा भन्डा झिन्डे राःने नोज़। ङा नोलो ओपनैलो ओटस्मा पलाने हाडङ्का पनि ङाम्ले।"

28 आव रोः यर्डन भै होपंटं बेठानियालं ओटाव, नलं युहन्नाये बप्तिस्मा ओयोज़्यावरं।

29 ओपराटि युहन्नाये येसुलाई ओललेवडे ओराज़्याव रःङडे हैओवारो, "रःङच्यो प्रिठीबीला पापलाम छुटैडे लाङने परमेस्वरलो ओमार! 30 नो होज़, जोलो ओबारेलं ङा हैङावारो, ‘ङा भन्डा टोबो मी रानेले, नो ङा भन्डा घ्योव ले, कडालेकं नो ङा भन्डा ङाडेकामज़ लेव।’ 31 नो काङ्का ङा नोलाई ङासरेव मालेव, बुरु नोलाई इस्राएलला मीराई गसरेरंकं वार्डेज़ रीःलो बप्तिस्मा याये-याये ङाराव।"

32 युहन्नाये ऐवार्डे गोहाइ ओयोव, "ङा चोखो आत्मालाई परिवा स्यानाव स्वर्गटाम झरिडे राडे येसुलो ओतर्ट उचुङो ङारोःङो। 33 ङा नोलाई ङासरेव माले, बुरु जोये ङालाई रीःये बप्तिस्मा योरं वार्डे उपरिःङसोङो, होयेज़ ङालाई हैओडाङो, ‘जोलो ओतर्ट चोखो आत्मालाई नङ झरिडे चुङोग्यान ओडोज़्याव रःङनेनले, चोखो आत्माये बप्तिस्मा याने नोज़।’ 34 ङा ङारोःङोले, होसोनो गोहाइ ङायोवले, परमेस्वरलो ओज़ा नोज़।"

35 फरि ओपराटि युहन्ना उसिसरंकाम नेम्लोसं च्याङसिडे उलिज़्याकं। 36 नोये येसुलाई ओनाज़्याव रःङडे हैओवारो, "रःङच्यो परमेस्वरलो ओमार!"

37 नोये ऐओवार्ज़्याव ठैडे नो नेम्लो उसिसनि येसुलो उझिन्ट नेनाव। 38 येसुये वोल्डे ओरोःङो, होकाम नोनिलाई उझिन-उझिन नेराज़्याव रःङडे नोनिलाई ओपजोयोनि, "जिन कडि जिखिमज़्याव?"

नोनि येसुलाई हैनेडोव, "रब्बी (आवलो ओमाने, गुरबा), नङ काङ नलिज़्याव?"

39 येसुये नोनिलाई हैओडोवनि, "गराचिनके, होकाम जिन रःङने जेले।" नोनि नेनाव होकाम येसु ओबासिज़्याव पो नेरोःङो। नोनि नो छ्याम येसुसंज़ नेबासिव, कडालेकं ठोकै चार बजिडे उलिज़्याव।

40 युहन्नाये हैओवार्ज़्याव रोः ठैने सोनो येसुलो उझिन-उझिन बाने नो नेबऱ्याङनिकाम टोबो सिमोन पत्रुसलो ओभाइ अन्ड्रियास लेव। 41 होकाम नो ङाःडे ओडाज्यु सिमोनसं नेडैसिव, होकाम होलाई हैओडोव "गिन मसिहलाई (नोलो ओमाने ख्रीस्ट) गेडोयो।" 42 नोये सिमोनलाई येसु लेवकं ओरोयो।

येसुये नोलाई ओरोःङो होकाम हैओडोव, "नङ युहन्नालो ओज़ा सिमोनज़, नङलाई केफास (नोलो ओमाने, पहर) डासिने नले।"

43 नोलो ओपराटि येसुये गालीललं नाने युङ ओडोव। होकाम फिलिपसं डैसिडे येसुये नोलाई हैओडोव, "ङाछिन्ट गरानके।" 44 अन्ड्रियास सोनो पत्रुस मान्टि फिलिप पनि बेठसेडा गाउँलाज़ लेव। 45 फिलिपये नठानेलसं डैसिडे हैओडोव, "नोलो ओबारेलं मोसाये न्यामटं सोनो अगमबक्ताराई पनि सर्डे यानैज़्याव, हो नो योसेफलो ओज़ा नासरतला येसुलाई गे गेडोयो।"

46 नठानेलये नोलाई हैओडोव, "कडा नासरतलाम पनि चाव रोः राव ढुव डोरो?"

फिलिपये नोलाई जबाफ ओयोव, "राडे गरःङरिके।"

47 येसुये नठानेललाई ओललेवडे ओराज़्याव रःङडे नोलो ओबारेलं हैओवारो, "टोबो पक्का इस्राएलीलाई रःङच्यो, नोलो उयुङलं कडि छल कपटज़ माले।"

48 नठानेलये ओपजोयो, "नङ ङालाई कैजैडे नसरेसोङो?"

येसुये नोलाई जबाफ याडे हैओडोव, "फिलिपये नङलाई उखुल्सनज़्याव भन्डा ङाःडे, डीलो उसिङ खङलं ङा नङलाई ङारःङसोनो।"

49 नठानेलये येसुलाई हैओडोव, "रब्बी, नङ परमेस्वरलो ओज़ाज़, नङ इस्राएलला राजाज़।"

50 येसुये नोलाई जबाफ याडे ऐओडोव "ङा नङलाई डीलो उसिङ खङलं ङारःङसोनो ङावारोयेज़ नङ बिस्वास नडोव? नङ आव भन्डा अजं घ्योव रोःरं रःङनेनले।" 51 होकाम येसुये नोरंलाई हैओडोवरं, "डस्साज़ ङा जेलाई हैङाडाच्यो, जे स्वर्ग ओफैसिज़्याव सोनो परमेस्वरलो ओकटंवालरंलाई स्वर्गडे यानाज़्याव सोनो मानवालो ओज़ा लेवटं याराज़्याव रःङनेजेले।"