1 लाजरस उमिन लेव टोबो मी ठलिडे उलिज़्याव। नो मरियम सोनो नोलो ओनाना मार्ठानि नेगाउँ बेठानियाला लेव। 2 प्रभुलाई मङ-मङ बासिने ठी ठिडे ओखङटं ओचेमये सिड्याने मरियम आवज़। आवलो ओभाइ लाजरस ठलिव लेव। 3 आव नाना बैनीनि येसु लेवकं ऐवार्डे सोर निपरिःङो, "प्रभु, जोलाई नङ मया नडोये, नो ठलिडे ले।"

4 होकाम येसुये आव ठैडे हैओवारो, "आव जोरोये मी मासोयो, बुरु आव परमेस्वरलो ओमहिमा टाने लागिटं ची, कडालेकं आव मीटाम परमेस्वरलो ओज़ालो ओमहिमा गटाकं।"

5 येसुये मार्ठा, सोनो नोलो ओबैनी होसोनो लाजरसलाई मया डोवरंये, 6 हैटानि पनि लाजरस ठलिज़्या वार्ने ठैडे येसु जोङ उलिज़्याव, होङ अजं नेला ओलेव। 7 होकाम येसुये उसिसरंलाई हैओडोवरं, "बा आबो गे फरि यहुडियालं वोल्डे गेनाके।"

8 उसिसराई येसुलाई हैयाडोव, "रब्बी, बाभाज़ यहुडीराई नङलाई लुङये झोम्ने यापानसोनो, होकाम फरि नङ नलंज़ नना?"

9 येसुये जबाफ ओयोवरं, "कडा लाभरिलं बारं घन्टा माटाये डोरो? लाकं बानेलो ओखङ टुःम्ने माले, कडालेकं नोये आव प्रिठीबीला ज्योती रःङज़्याव, 10 हैनि पनि रिलं बानेलो ओखङ टुःमये, कडालेकं नो मीसं उज्यालो माटाये।" 11 होकाम येसुये नोरंलाई हैओडोवरं, "गेनै लाजरस ङल्डेले, नोलाई सोचैने ङा नलं ङाना।"

12 येसुलाई उसिसराई हैयाडोव, "प्रभु, नो ङःल्डे ओलेखिन्के सम्नेले।"

13 येसुये नो सिडे उलिज़्याव रोः हैओवारो, होकाम उसिसराई उमिरं राडे ङल्डे उलिज़्याव वार्डे हैओवार्ज़्याव वार्डे यासुन्चीव। 14 येसुये नोरंलाई प्रस्ट झैडे हैओडोवरं, "लाजरस सिडेले। 15 जे ङालाई बिस्वास डाङच्यो वार्डे ङा नलं चानो ङाम्नाव। जो ओटानि पनि ङा खुसि ङालिज़्या बा गे नो लेवकं गेनाके।"

16 होकाम डिडुमस याडोज़्याव ठोमाये ओनैरंलाई हैओडोवरं, "बा, गे पनि गेनाके, होकाम येसुसंज़ सिने टानि पनि गेसिके।"

17 येसुरं याकेरिव, होकाम लाजरसलाई खाडरलं यानोयो चार डिन टाडे उलिज़्याव येसुये ठा ओसोनो। 18 बेठानिया यरुसलेमकाम नजिकज़ ठोकै सोङ किलो मिटर याज़ टाडा टाये। 19 भ्या यहुडीरं मार्ठा सोनो मरियम लेवकं राडे यालिज़्याव। कडालेकं नोनि नेभाइ उसिव डुखंलं सम्झैने राडे यालिज़्याव।

20 येसु राज़्या वार्ने ठैडे मार्ठा नाडे येसुलाई ओडैनाव। मरियम ज़ीःमकंज़ ओलेव। 21 होकाम मार्ठाये येसुलाई हैओडोव, "प्रभु, नङ आकं नलेखिन्के ङाभाइ मासि हो। 22 आबो पनि ङा ङासंन, नङ परमेस्वरसं जो ननिः, परमेस्वरये नङलाई यानेले।"

23 येसुये नोलाई हैओडोव, "नभाइ फरि ज्युङडा टानेले।"

24 मार्ठाये येसुलाई हैओडोव, "ङा ङासंन, नो आखिरला ज्युङडा टाने डिनलं फरि सिवलाम ज्युङडा टाडे सोनेले।"

25 येसुये नोलाई हैओडोव, "सिवलाम ज्युङडा झैने सोनो जीबन ङाज़ ची। ङालाई बिस्वास डाने उसिनि पनि ज्युङडा टानेले। 26 होसोनो ङालाई बिस्वास डाडे बान्चिने मी खर्कज़ सिने माले। होकाम नङ आवरोः बिस्वास नोडो?"

27 मार्ठाये येसुलाई हैओडोव, "अँ प्रभु, ङा बिस्वास ङाडो, नङ प्रिठीबीला राने परमेस्वरलो ओज़ा ख्रीस्टज़।"

28 आडङ हैवार्डे नो ओनाव, होकाम ओबैनी मरियमलाई खुल्डे खुसुक्क हैओडोव, "गुरबा ओकेरिव, नङलाई खुल्सनज़्याव।" 29 आवरोः ठैडे मरियम चानोज़ च्याङसिडे येसु लेवकं ओनाव। 30 नो बेला समं येसु नाङखारलं ओमकेरिटाव, येसु नो पोकंज़ उलिज़्याव जोकं मार्ठाये येसुलाई ओख्यानोयो। 31 नोलाई सम्झैने ज़ीःमलं राव यहुडीरं मरियम ठर्च्याङसिडे पाखाडे ओनाज़्याव रःङडे, आव के नो खाडरलं नाडे ओघर्नाज़्याव ची वार्डे, नोलो उझिन-उझिन यानाव।

32 होकाम मरियम येसु उलिज़्याव पोकं राडे येसुलाई ओरोःङो, होकाम ऐवार्डे येसुलो ओखङटं उफुलुप्सिव, "ए प्रभु, नङ आकं नलेखिन्के ङाभाइ मासि हो।"

33 नो ओघर्ज़्याव होकाम नोसं राने यहुडीरं पनि याघर्ज़्याव येसुये ओरोःङो, होकाम येसु आत्मालं बनै ओसोगो हाइडे बनै डुखि ओटाव। 34 येसुये नोरंलाई ओपजोयोरं, "जे नोलाई काङं नैडे जेनैज़्याव?"

नोराई येसुलाई हैयाडोव, "प्रभु, राडे गरःङरिके।"

35 येसु ओघोरो। 36 हैजैडे यहुडीराई हैयावारो, "रःङच्यो येसुये नोलाई खाडंङ मया ओडोज़्याव लेव।"

37 कोइ-कोइराई हैयावारो, "आवये अन्डलारंलाई यामि फैड्योरं आव मीलाई पनि सिवङाम माबचैडुव डोरो?"

38 होकाम येसु फरि बनै ओसोगो हाइडे खाडरलं ओनाव। आव खाडर टोबो उडारलं लेव। नोलो ओयाटं टोबो पल्याटाये कप्सिव लेव। 39 येसुये हैओवारो, "पल्याटा होडे झाच्यो।"

सिव मीलो ओनाना मार्ठाये येसुलाई हैओडोव, "ए प्रभु, आबला समं के नो असिङःरने यापान्डुव हो, कडालेकं नो उसिव चार डिन याटाडु।"

40 येसुये नोलाई हैओडोव, "कडा ङा नङलाई हैङाडानो माङ्क, ‘नङ बिस्वास नडोखे भने परमेस्वरलो ओमहिमा रःङनेनले?’" 41 नोराई पल्याटा याहायो। होकाम येसुये स्वर्गडे रःङडे हैओवारो, "ए बाबु, ङा नङलाई ढन्याबाड ङायान, कडालेकं नङ ङाबिन्ती नोठोयो। 42 ङालाई ठाले ङाबिन्ती एकसप्ड्याज़ नठैये। हैनि पनि आका च्याङसिडे लिज़्याव माहुले मीराई यालागिटं ङा आव हैङावार्ज़्याव ची, कडालेकं नङ ङालाई नपरिःङसोङो ची वार्डे नोराई बिस्वास गोडोरंकं।"

43 आव रोः हैओवारो पाना येसु कस्सिडे उकिःव, "लाजरस, पाखाडे पुलुडे गरानके।" 44 नो सिव मी नोलो ओखङ-उकुइ पट्टीये पोसिव सोनो ओङाः रुमालये कप्सिव सोनो क्वाये लुम्बैसिवज़ पाखाडे पुलुडे ओराव। येसुये नोरंलाई हैओडोवरं, "नोलो ओबन्डन पलाड्याच्यो, होकाम नोलाई नाव याच्यो।"

45 मरियम लेवकं राव भ्या यहुडीराई येसुये ओडोव येःन रःङडे येसुलाई बिस्वास याडोव। 46 नोरं कोइ-कोइरं फरिसीरं लेवङ यानाव, होकाम येसुये ओडोव येःनरं हैयाडोवरं।

47 होकाम मुख्या सेवा डोने मीरं सोनो फरिसीराई घ्योव यासभाला सडस्यारंलाई याखुलोरं होकाम नोरंलाई हैयाडोवरं, "आबो गे कै लेने? कडालेकं आव मीये भ्या चिन्नरं डोज़्याव। 48 आवलाई सोजोज़ राःने याटा भने स्यान्टैये आवलाई बिस्वास डानेलेरं होकाम रोमीरं राडे गे चोखो गेमन्डिरं सोनो गेडेसलाई नास जैनेलेरं।"

49 नोरंकाम टोबो कैयाफा, नो बर्सला मुख्या सेवा डोने मी लेव, नोये होरंलाई हैओडोवरं, "आव कडि ओटाज़्याव वार्डे जे कडिज़ जेमसन! 50 स्यान्टै डेसज़ नास टाने भन्डा बुरु मीराई यालागिटं टोबो मी सिनेज़ जेलागिटं चाव टानेले वार्डे जे जेमबुझि।" 51 नोये आव ओल्ज़ हैओवारो माङ्क, बुरु नो बर्सला मुख्या सेवा डोने मी ओटावये डेसराई यालागिटं येसु सिव परिये वार्ने अगमबानी ओपाङो ची। 52 डेसलो ओलागिटंया मान्त्रा नोये आव हैओवारो माङ्क, बुरु चित्राङ पुत्राङ टाव परमेस्वरलो ओसन्तानरंलाई टोबोकं डुप्नेरं लागिटं आव हैओवारो।

53 ऐझैडेज़ नो छ्यामकाम नोराई येसुलाई सैःने सल्ला याडोव। 54 हैजैडे येसु फरि यहुडीराई याखार्ल सतन्सिडे माबाये, येसु उसिसरासं मरुभुमिलो ओछ्योकं लिज़्याव एफ्राईम वार्ने सहरलं ओनाव, होकाम नलंज़ ओलेव।

55 यहुडीराई निस्तार-यापर्ब नजिकंज़ ओराज़्याव, होकाम गाउँ-गाउँलाम बनै भ्या मीरं या-यालाई चोखैने वार्डे निस्तार-पर्ब सुरुटाने भन्डा ङाडेज़ यरुसलेमडे यानाव। 56 नोराई येसुलाई याखिमो, होकाम नोरं प्रार्ठना डोने ज़ीःमलं च्याङसिडे यालिज़्याकं या-याज़ हैयावारो, "जेलाई खैटाव लागिज़्या, नो पर्बलं राके डोरो?" 57 मुख्या सेवा डोने मीरं सोनो फरिसीराई येसुलाई क्योःने वार्डे नो काङ लिज़्या, कोइये ठा जेसनखे भने सोर डाच्यो वार्डे आग्या यायोवरं।