1 होकाम येसु गालीलयालंज़ उडुलिव, येसुये यहुडियाडे नाने युङ माडोवये, कडालेकं यहुडीराई येसुलाई सैःने यापान्ज़्याव। 2 नो बेलाकं यहुडीराई छाप्रा झैडे यामानिने यापर्ब नजिकज़ ओराज़्याव। 3 हैजैडे येसुलो ओभाइराई येसुलाई हैयाडोव, "आव पो राःडे यहुडिया गनानके, होकाम नङ नोडोज़्याव येःनरं नसिसराई पनि गरःङरंकं। 4 जो मीये मिन कमैने युङ डोव, होये गुप्तलं येःन माडोव। नङ आव येःनरं नोडोज़्या नङ प्रिठीबीलाई सटन।" 5 कडालेकं येसुलो ओभाइरं पनि येसुलाई बिस्वास यामडोज़्याव।

6 येसुये नोरंलाई हैओडोवरं, "ङा अजं समं ठीकं ङाबेला माराटा, बुरु जेलागिटं के स्यान्टै बेलाज़ ठीकंज़ लिज़्या। 7 प्रिठीबीये जेलाई हेला माडाच्योवये, बुरु ङालाई के हेला डाङो, कडावार्क प्रिठीबीये ओडोव येःन माचाव लिज़्या वार्डे ओबारेलं हैङावार्ज़्या। 8 जे आव पर्बलं गनाच्योके। ङा आव पर्बलं ङाम्ना, कडालेकं ङा ङाबेला अजं पुरा माटाटा।" 9 नोरंलाई ऐडारंडे येसु गालीललंज़ ओलेव।

10 येसुलो ओभाइरं पर्बलं यानाव येसु पनि सतन्सिडे माङ्क, मोःसिडे ओनाव। 11 पर्बलं यहुडी अगंवाराई येसुलाई याखिमज़्याव, होसोनो "येसु काङ लिज़्या?" वार्डे यापजैज़्याव।

12 मीराई याखार्ल येसुलो ओबारेलं छलफल ओटारिव। कोइये हैयावार्ज़्याव, "नो चाव मीज़।" उरुराई हैयावार्ज़्याव, "माङ्क, आव मीये मीरंलाई अलंमलं झैज़्यावरं।" 13 हैनि पनि यहुडी अगंवाराई याछ्यासैये येसुलो ओबारेलं काङ्का पनि खुल्लालं याम्पाङज़्याव।

14 पर्ब खार्ल येसु प्रार्ठना डोने ज़ीःमलं उपसिव, होकाम सिछ्या ओयोवरं। 15 यहुडी अगंवारं अचम्ब टाडे ऐयावारो, "कडिज़ मापरिःडे आवये कैजैडे आडङ बिड्या ओपैसिव?"

16 होकाम येसुये नोरंलाई ऐवार्डे जबाफ ओयोवरं, "ङा ङासिछ्या ङामीज़ माङ्क, नोलो ची, जोये ङालाई उपरिःङसोङो। 17 कोइ मीये परमेस्वरलो उइछ्या मानिने युङ याडोवखे भने, ङासिछ्या परमेस्वरङाम सै ङा ङाज़ ङापाङो नो हो मीये सन्नेले। 18 जोये ओल उयुङङाम पाङये, होये ओल ओमहिमा खिमोये, बुरु जोये ओललाई परिःङनेलो ओमहिमा खिमो, हो सत्य मीज़, होसोनो नोसं छल कपट माटाये। 19 कडा मोसाये जेलाई न्याम ओयाच्योव माङ्क डोरो? हैटानि पनि जे काङ्काये पनि नो न्याम जेममानिये। जे कडाने ङालाई सैःने जेपानसङज़्याव?"

20 माहुले मीराई जबाफ यायोव, "नङलाई ज़्याः लागिडेले। काङ्काये नङलाई सैःने ओपान्सन्ज़्याव?"

21 येसुये नोरंलाई जबाफ यारंडे हैओडोवरं, "ङा टोबो अचम्बला येःन ङाडोव, होकाम जे स्यान्टै आव रोःटं छक्क जिपरिज़्या। 22 मोसाये जेलाई खतनालो न्याम याडे नैचेव (हो के, नो मोसाङाम के माङ्क, बुरु साखा पुर्खाङाम ची), होटानि पनि जे नाःसिने डिन छ्याम पनि जे मीरंलाई खतना जेजैरंये। 23 मोसालो ओन्याम भङ्ग टाटाकं वार्डे कोइ मीये नाःसिने डिनछ्याम खतना याडोवखे भने, ङा टोबो मीलाई यहुडीरं यानाःसिने डिनछ्याम पुरा ङाससोमो वार्डे जे ङासं रिस जेडोज़्याव? 24 मी रःङडे माङ्क बुरु चावसं निया डोच्यो।"

25 यरुसलेमला कोइ-कोइ मीराई हैयावारो, "होकाम आव नो मी माङ्कडोरो, जोलाई यहुडी अगंवाराई सैःने यापान्ज़्याव? 26 रङःच्योखेने आव के स्यान्टै मीराई याङाःकंज़ ची पाङज़्या, हैनि पनि नोराई आवलाई कैज़ माडोरंये! सै आवज़ ख्रीस्ट वार्डे यहुडी सेःरराई डस्साज़ ठा यासोनो? 27 बुरु गेलाई ठा ले, आव मी काङाम ओराव। डस्साका ख्रीस्ट ओराव बेलाकं, नो काङाम ओराव वार्डे काङ्कायेज़ ठा सन्नेमाले।"

28 होकाम येसुये प्रार्ठना डोने ज़ीःमलं ओपैज़्यारंकं, कस्सिडे किःडे हैओडोवरं, "होकाम जे ङालाई डस्साज़ जेसरेःसङ? होसोनो ङा काङाम ङाराव नो पनि जेसन? ङा ङाइछ्याये ङाराव माङ्क ची, बुरु जोये ङालाई उपरिःङसोङो नो सत्यले। जे नोलाई जेमसरेये, 29 बुरु ङा नोलाई ङासरेये, कडालेकं ङा नो लेवङामज़ ङाराव ची, होसोनो नोये ङालाई उपरिःङसोङो ची।"

30 हैजैडे नोराई येसुलाई क्योःने यापानो, हैनि पनि काङ्कायेज़ माक्योडुरंये, कडालेकं येसुलो ओबेला अजं ओमराटाव। 31 हैनि पनि नला लिज़्याव माहुले मीरंकाम भ्या मीराई येसुलाई बिस्वास याडोव। नोराई हैयावारो, "जो बेलाकं ख्रीस्ट रा, होकं आवये ओडोव भन्डा भ्या चिन्नरं होये डोवके डोरो?"

32 माहुले मीराई येसुलो ओरोः याडोज़्याव फरिसीराई याठोयो। होकाम मुख्या सेवा डोने मीराई सोनो फरिसीराई येसुलाई क्योःने मन्डिरला पालेरंलाई यापरिःङोरं। 33 येसुये हैओडोवरं, "अजं जामा समं ङा जेसंज़ ङाले, होकाम ङा ङालाई परिःङने लेवङ नानेङाले। 34 जे ङालाई खिम्नेजेले, हैनि पनि ङालाई डैने जेमले, होसोनो जोङ ङा ङाले होङ जे जेमराडु।"

35 होकाम यहुडीराई या-याज़ हैयावारो, "आव कान्डे नाने ओपान्ज़्याव, होकाम गे आवलाई माडैनेगेले? सै आवये ग्रीकराई याखार्ल चित्राङ पुत्राङ टाडे लिज़्याव यहुडीरं लेवकं नाडे ग्रीकरंलाई पैनेरं ओपान्ज़्याव? 36 आवये हैओवार्ज़्याव रोःलो ओमाने कडि? ‘जे ङालाई खिम्ने जेले, हैटानि पनि ङालाई डैने जेमले, होसोनो जोङ ङा ङाले, जे जेमराडु?’"

37 नो पर्ब ओखेमरिव बेलाकं, पर्बलो मुख्या डिनछ्याम, येसु च्याङसिडे कस्सिडे किःडे ऐओवारो, "कोइ मी रीः याछो भने ङा लेवकं राडे रीः ओओँवकं। 38 जोये ङालाई बिस्वास डाङो, सास्त्रये हैओवारो स्यानाव ‘नोलो उयुङलाम जीबन याने भैरं बगिडे पुलुने लेरं।’" 39 आव रोः येसुये चोखो आत्मालो ओबारेलं हैओवारो, नो चोखो आत्मा येसुलाई बिस्वास डानेराई डैने लेव। कडालेकं आर्क समं चोखो आत्मा यासिव मालेव, कडालेकं येसुलो ओमहिमा ओमटाटाव।

40 आव रोः ठैने कोइ-कोइ मीये हैयावारो, "आव के डस्साज़ अगमबक्ताज़ ओलेवलेव।"

41 उरुराई हैयावारो, "आव के ख्रीस्ट ची।"

होकाम कोइ-कोइराई हैयावारो, "कडा ख्रीस्ट गालीललाम राने माङ्क डोरो? 42 ख्रीस्ट के डाउडलो ओसन्तानलाम सोनो डाउडलो ओनाङखार बेठलेहेमलाम रा वार्डे सास्त्रटं सर्सिव माले डोरो?" 43 येसुलो ओकारनये ऐजैडे मीराई याखार्ल फाटो ओटाव। 44 नोरंकाम कोइ-कोइराई येसुलाई क्योःने यापानो, हैनि पनि काङ्काये पनि येसुलाई माक्योडुरंये।

45 होकाम मन्डिरला पालेरं सोनो मुख्या सेवा डोने मीरं फरिसीरं लेवकं याराव। नोराई आवरंलाई हैयाडोवरं "जे नोलाई कडा जेमरै?"

46 पालेराई जबाफ यायोवरं, "आव मीये स्यावके खर्कज़ काङ्का मीये पनि मापाङये!"

47 फरिसीराई नोरंलाई हैयाडोवरं, "जेलाई पनि मुर्ख ओझैच्योव सै कडि? 48 कडा गेसेःररं सोनो फरिसीरं कोइराई नोलाई बिस्वास डाडेयानैज़्याव डोरो? 49 आव माहुले मीरं जोराई न्याम मासनरं, हैटानि पनि नोरं सराप लागिवरं ची।"

50 नोरंकाम टोबो निकोडेमस, जो ङाडे टखेप येसुलाई डैने ओनाव, नोये हैओवारो, 51 "कडा, गे गेन्यामये ङाःडे मीराई यागोहाइ माठैडे, सोनो नोये कडि डाडेनोयो हो मासन्डे नोलाई डोसि ठहरैडुव?"

52 नोराई नोलाई जबाफ यायोव, "कडा नङ पनि गालीलला रो? सास्त्र चावसं परिःन, होकाम नङ रःङने नले, गालीललाम अगमबक्ता मारा।" 53 होकाम स्यान्टै याज़ीःम-याज़ीःमडे यानाव।