1 नलाग्यान्ट ओनाज़्याकं येसुये ओजर्मनकामज़ अन्डलाव टोबो अन्डलालाई ओरोःङो। 2 उसिसराई येसुलाई यापजोयो, "रब्बी, काङ्काये पाप ओडोव, आवये सै आवलो वामा-ओबाबुये, होकाम आव अन्डला उजर्मिव?"

3 येसुये जबाफ ओयोवरं, "न आवये पाप ओडोव न आवलो वामा ओबाबुये, बुरु आवलाई ससम्डे परमेस्वरलो ओसक्तिला येःन आव मीलो उजीबनटं गरःनकं वार्डे 4 ङालाई परिःङनेलो ओयेःन गेसं बेला उलिज़्याकंज़ डाव परिये। रि ओटाकंके, काङ्कायेज़ येःन माडोडुव। 5 ङा आव प्रिठीबीलं ङालेव समं ङा प्रिठीबीला ज्योती ची।"

6 आव रोः हैवार्डे येसुये नामलं उट्युलो, होकाम उट्युलये गम मुछिडे चिरिव झैडे उमिटं सेःडे ओयोव। 7 होकाम येसुये नोलाई हैओडोव, "गनानके, सिलोआमलो (जोलो ओमाने, परिःङसिव) कुन्डलं नाडे हुर।" नोये नाडे उहुरो, होकाम रःङने टाडे ओवोलो।

8 होकाम नोलो उछिमेकिराई जोराई नोलाई ङाःडे नोलाई भीख उनिज़्याव यारोःङो होराई हैयावारो, "कडा चुङडे भीख निःने मी आव माङ्क?"

9 कोइ-कोइये हैयावारो, "आव होज़।"

उरुराई हैयावारो, "माङ्क, आव के नो स्यावज़ रःनज़्या।"

नोये हैओवारो, "ङा होज़।"

10 होकाम नोराई होलाई यापजोयो, "नमि कैजैडे ओफैसिवखेने?"

11 नोये जबाफ ओयोवरं, "येसु वार्ने टोबो मीये गम मुछिडे ङामिटं सेःडे ङालाई हैओडाङो, ‘सिलोआमलं नाडे हुर।’ नाडे ङाहुरो होकाम ङा रःङने ङाटाव।"

12 नोराई नोलाई हैयाडोव, "नो काङ उलिज़्यावखेने?"

नोये हैओवारो, "ङा ठा ङाम्सन।"

13 हो अन्डला मीलाई नोराई फरिसीरं लेवकं यारोयो। 14 जो छ्याम येसुये गम मुछिडे हिला झैडे नोलो उमिलङटं सेःडे उमिलङ फैडेओयोव होछ्याम यहुडीरं यानाःसिने डिन लेव। 15 फरिसीराई नोलाई यापजोयो, "नङ कैजैडे रःङने नटाव?" नोये होरंलाई हैओडोवरं, "येसुये गम मुछिडे ङामिलङटं सेःडे ओयाङो, होकाम ङा ङाछेलाव होकाम रःङने ङाटाव।"

16 कोइ-कोइ फरिसीराई हैयावारो, "नो मी परमेस्वर लेवङाम राव माङ्कची, कडावार्क नोये नाःसिने डिन मामानिवये।"

होकाम उरुराई हैयावारो, "पापी मीये कैजैडे एटाव चिन्नरं डोडुव?" होकाम नोरं या-याज़ युसिने सुरु याडोव।

17 नोराई नो अन्डलालाई यापजोयो, "नो मीये नमि फैडेओयानो लेव आबो होलो ओबारेलं नङ कैनंवार?"

नोये जबाफ ओयोवरं, "नो के अगमबक्ता ची ओलेवलेव।"

18 उमि फैसिव मीलो वामा-ओबाबुलाई खुल्डे यामपजैया समं यहुडी अगंवाराई नो अन्डला ओलेव होकाम रःङने ओटाव वार्डे बिस्वास माडोरंये। 19 होकाम नोराई वामानि ओबाबुनिलाई यापजोयोरं, "आव जेज़ारो आव अन्डलाज़ उजर्मिव वार्डे जिन हैजेवार्डु? होकाम आबो कैजैडे रःङडुने ओटाव?"

20 नोलो वामा-ओबाबुनि नोरंलाई हैनेडोवरं, "गिन ठा गेसन आव गेज़ाज़, होसोनो अन्डलाज़ उजर्मिव। 21 होकाम आबो आव कैजैडे रःङडुने ओटाव गिन गेम्सन, होसोनो आवलो उमि काङ्काये फैडेओयोव नो पनि गिन गेम्सन। आवलो उउमेर योडेले, आवलाईज़ पजैच्यो। ओबारेलं नो ओल्ज़ पाङनेले।" 22 नोलो वामा-ओबाबुनि आव रोः हैनेवारो, कडावार्क नोनि यहुडी अगंवारासं नेछेव। कडालेकं कोइराई येसुके ख्रीस्ट ची वार्डे स्वीकार याडोरं भने, नोलाई यहुडीरं याडुप्सिने ज़ीःमलाम पुलैने वार्डे यहुडीराई ङाडेज़ सल्ला डाडे यानैज़्याव। 23 हैजैडे ज़ नोलो वामा ओबाबुनि ऐ नेवारो, "आवलो उउमेर योडेले आवलाईज़ पजैच्यो।"

24 होकाम नोराई नो अन्डला मीलाई फरि टखेप खुल्डे हैयाडोव, "परमेस्वरलाई महिमा यो। गे ठा गेसन आव मीके पापी ची।"

25 नोये जबाफ ओयोवरं, नो पापी सै माङ्क, ङा ङाम्सन। टोबो रोःयाज़ ङा ङासंन ङा अन्डला ङालेव, आबो ङारःङज़्या।

26 होकाम नोराई नोलाई हैयाडोव, "होये नङलाई कै ओझैसोनो? होये नमि कैजैडे फैडेओयानो?"

27 नोये नोरंलाई जबाफ ओयोवरं, "ङा जेलाई आछ्याज़ हैङाडाच्योव, जे जेमठैये। आबो फरि कडाने ठैने जेपान्ज़्याव? जे पनि नोलो उसिस टाने जेपान्ज़्याव सै कडि?"

28 नोराई नोलाई गाल डाडे हैयाडोव, "नङ ची नोलो उसिस, बुरु गेके मोसालो उसिसरं ची। 29 गेलाई ठा ले मोसासंके परमेस्वर ओपाङो लेव, बुरु गेलाई ठा माले आव मी काङा याटाया।"

30 नो मीये नोरंलाई जबाफ यारंडे हैओडोवरं, "खैटाव अचम्बला रोः! नो काङाम ओराव जे जेमसन्ये, बुरु होये ङामि फैडेओयाङो। 31 गे गेसन परमेस्वरये पापीराई यारोः माठोयोये, बुरु परमेस्वरलो ओछ्या डाने सोनो परमेस्वरलो उइछ्या मानिने मीलो ओरोः परमेस्वरये ठोयोये। 32 प्रिठीबी सुरु ओटावकामटा एटाव जर्मीव अन्डलालो उमिलङ काङ्कायेज़ फैडेओयोव रोः खर्कज़ माठैसिये। 33 होकाम आव मी परमेस्वरङाम ओमराव टावसं नोये कडिज़ माडाडुने लेव।"

34 नोराई नोलाई जबाफ याडे हैयाडोव, "नङके पापलं जर्मीडे पापलंज़ नघ्योव ची, होकाम कडाने नङ गेलाई पैने नपानसिज़्याव?" होकाम नोराई नो मीलाई यहुडीरं याडुप्सिने ज़ीःमलाम पाखाडे यापुलोयो।

35 नोराई नो समो अन्डला मीलाई पाखाडे यापुलोयो वार्ने येसुये ओठोयो, होकाम नोसं डैसिडे येसुये हैओडोव, "होकाम नङ मानवालो ओज़ालाई बिस्वास नोडो?"

36 नोये जबाफ याडे हैओवारो, "प्रभु हो काङ्का? ङा नोलाई बिस्वास डानेङाले?"

37 येसुये नोलाई हैओडोव, "नङ नोलाई रःङडेननै, नङसं पाङने होज़।"

38 होकाम नोये हैओवारो, "प्रभु ङा बिस्वास ङाडो" होकाम नोये येसुलाई ढो ओडोव।

39 होकाम येसुये हैओवारो, "ङा नियालो लागिटं आव प्रिठीबीलं ङाराव, होकाम मारःङनेराई गरःङरंकं होसोनो रःङनेरं अन्डला ओटारंकं।"

40 आव रोः ठैडे येसुलो ओछ्योकं लिज़्याव कोइ-कोइ फरिसीराई येसुलाई हैयाडोव, "कडा होकाम गे पनि अन्डलारंज़ रो?"

41 येसुये नोरंलाई हैओडोवरं, "जे अन्डलारं जेटाखिन्के पापलो डोसि टानेजेमलेव, बुरु जे ‘गेरःङज़्या’ जेवार्ज़्या, हैजैडे जे पापीज़ जिलिज़्या।"