1 युहन्नाये भन्डा येसुये भ्या उसिसरं झैज़्यावरं होसोनो बप्तिस्मा पनि योज़्यावरं वार्ने रोः फरिसीराई याठोयो। 2 (येसुये ओल माङ्क उसिसराई बप्तिस्मा यायोज़्यावरं।) 3 येसुये आव रोः ठा ओसोनो, होकाम यहुडिया राःडे फरि गालीललं ओवोलो। 4 गालीललं नाकं सामरिया प्रडेसलाग्यान नाने टाये।

5 होकाम येसु सामरियाला सुखार वार्ने नाङखारलं ओकेरिव। आव नाङखार याकुबये ओज़ा योसेफलाई ओयोव येःङलो ओछ्योकं परिये। 6 नलं याकुबलो उचुन्डा लेव। येसु बाडे ओठाकिवये नो चुन्डालो ओछ्योकं चुङडे उलिज़्याव। नो बेलाकं ठोकै डोपहर टाडे उलिज़्याव।

7 टोबो सामरी मेमा नकं रीः गप्ने ओराव। येसुये नोलाई हैओडोव, "ङालाई रीः ओँने गयाङ्के।" 8 येसुलो उसिसरं गाउँलं ज़्याने ज़्याव लःङने नाडे यालिज़्याव।

9 होकाम सामरी मेमाये येसुलाई हैओडोव, "नङ यहुडी टाडे पनि ङा सामरी मेमालो ङाकुइटाम कैजैडे रीः नोओँ?" (यहुडीराई सामरीरासं कडि समन्डज़ मानैरंये।)

10 येसुये नोलाई हैओडोव, "नङ परमेस्वरलो ओबरडान सोनो नङसं रीः निःने मीलाई नसरेखिन नङ ओल्स निःने नलेव, होकाम नोये नङलाई जीबन याने रीः यायानो हो।"

11 नो मेमाये येसुलाई हैओडोव, "ए प्रभु नङसं वाप्ने जा माले, होकाम चुन्डालं पनि रीः भ्या मेलं लिज़्या। होकाम नङ काङाम जीबन याने रीः नरै? 12 होकाम नङ गेसाखा याकुब भन्डा घ्योव नलिज़्याव डोरो? होये गेलाई आव चुन्डा झैडे ओयासिव, होकाम ओल सोनो ओसन्तानराई, ओलाला-बालाराई आव चुन्डाला रीः याओँव।"

13 येसुये नोलाई हैओडोव, "आव रीः ओँनेरं स्यान्टै फरि रीःछोने लेरं 14 बुरु जोये ङा ङायोज़्याव रीः ओँव नो खर्कज़ रीः छोने माले। जो रीः ङा नोलाई ङायो, हो खर्कज़ मासाने जीबनलो मुल टानेले!"

15 नो मेमाये येसुलाई हैओडोव, "ए प्रभु ङालाई नो रीः याङ, होकाम ङा खर्कज़ रीः छोने ङाम्ले, होसोनो आकं रीः गपरिने टाटाकं।"

16 येसुये नोलाई हैओडोव, "गनानके, नरेलाई खुल्डे गरैके।"

17 नो मेमाये हैओवारो, "ङारे माले।"

येसुये नोलाई हैओडोव, "नरे माले वार्डे नङ ठीकंज़ हैनवार्खे, 18 कडालेकं नङके पाँसगोटा नरेरं टाडे लेरं, होसोनो जो आर्क नङसं लिज़्या, नो नरे माङ्क ची। नङ आव डस्साज़ हैनोवारो।"

19 नो मेमाये येसुलाई हैओडोव, "ए प्रभु नङ अगमबक्ताज़ टाके। 20 गे सामरी गेसाखाराई आव डान्डाटं परमेस्वरलाई आराढना याडोव, होकाम जे यहुडीराई हैजेवार्ज़्या, आराढना डाने पोके यरुसलेम ची।"

21 येसुये नोलाई हैओडोव, "ए मेमा, ङालाई बिस्वास डाङ नो बेला रारिज़्या, बाबुलो ओआराढना न आव डान्डाटं, न यरुसलेमलं टानेले। 22 जे जो आराढना जेडोज़्या हो जेमसनये। गे जो आराढना गेडाज़्या हो गेसन्ज़्या, कडालेकं छुट्काराके यहुडीरंङाम राये। 23 हैनि पनि बेला राज़्या, नो बेला आर्कज़ ची, पक्का आराढना डानेराई बाबुलाई आत्मालं सोनो सत्यलं आराढना डाने लेरं। कडावार्क एटानाव आराढना डाने मीरंलाईज़ बाबुये खिमोरंये। 24 परमेस्वर आत्माज़, होसोनो परमेस्वरलो ओभक्तराई आत्मा सोनो सत्यलं आराढना डाव परिये।"

25 नो मेमाये येसुलाई हैओडोव, "ङा ङासंन, मसिह रा होकाम होयेज़ गेलाई स्यान्टै रोः हैडानेले।"

26 येसुये नो मेमालाई हैओडोव, "नङसं पाङज़्याव ङा होज़।"

27 हो बेलाकंज़ येसुलो उसिसरं याराव, होकाम येसुलाई टोबो मेमासं रोः ओडोज़्याव रःङडे छक्क यापरिव, हैनि पनि "नङलाई कडि ओचाहिज़्याव? होकाम नङ नो मेमासं कडाने रोः नोडोज़्याव?" वार्डे काङ्कायेज़ मापजैरंये।

28 होकाम नो मेमाये ओघारि राःडे नाङखारडे ओनाव होकाम मीरंलाई हैओडोवरं, 29 "गराच्योके, टोबो मीलाई रःङच्यो, जोये ङाडोव स्यान्टै येःन ङालाई हैओडाङो। सै नोज़ ख्रीस्ट के माङ्क?" 30 होकाम नोरं नाङखारलाम पुलुडे येसु लेवकं यानाव।

31 नो बेलाकंज़ उसिसराई येसुलाई ऐवार्डे बिन्ती डोडे यापजोयो, "रब्बी, ज़्याव गोज़्योके।"

32 होकाम येसुये नोरंलाई हैओडोवरं, "ङासं ज़्याने ज़्याव लिज़्या, नो जेलाई ठा माले।"

33 हैजैडे उसिसराई या-याज़ ऐयावारो, "काङ्काये येसुलाई ज़्याव रैडे यायोव सै कडि?"

34 येसुये नोरंलाई हैओडोवरं, "ङालाई परिःङनेलो उइछ्या स्यानाव डाने, सोनो होलो ओयेःन पुरा डानेज़ ङा ङाज़्याव ची। 35 कडा जे हैजेमवार्ये डोरो, ‘अजं चार मैना बाङ्कि लिज़्या, होकाम बालि क्याने बेला रा?’ ङा जेलाई हैङाडाच्यो, जे येःङडे रःङच्यो, बाली मिन्डे क्याने टाडेले। 36 जोये बालि क्यावये होये ज्याला डोयोये, होकाम खर्कज़ मासिने जीबन डैने लागिटं अन्न डुपोये, होकाम वाने सोनो क्यानेनि बोलोङ रेङनिये। 37 कडावार्क ‘टोबोये वावये, होकाम छुटंये क्यावये’ वार्ने बचन सत्य टाये। 38 ङा जेलाई नलं क्याव ङापरिःङच्यो नलं जे डुखं जेडाव माले। उरुराई डुखं डाडेनैरं, होकाम नोराई याडोव डुखंलो ओज्याला जे डैडेजेनै।"

39 "ङा जो ङाडोव येसुये ङालाई स्यान्टै हैओडाङो" वार्ने नो मेमालो ओगोहाइये ओडोव कारनये नो नाङखारला भ्याबिछु सामरीराई येसुलाई बिस्वास याडोव। 40 हैजैडे सामरीरं येसु लेवकं याराव, होकाम नोराई येसुलाई यासं लेने वार्डे बिन्ती याडोव, होकाम येसु नलं नेःला ओलेव।

41 होकाम येसुलो ओबचनलो कारनये उरु भ्या मीराई येसुलाई बिस्वास याडोव। 42 नो मेमालाई नोराई हैयाडोव, "आबो नङ हैनवारो रोःये गे बिस्वास गेडोव माङ्क बुरु गे गेज़ गेठोयो कारनये डस्साज़ प्रिठीबीलाई जोगैने नोज़ वार्डे गे सन्डे गेनै।"

43 नेःलाका नलाम पुलुडे येसु गालीललं ओनाव। 44 येसुये ओल्ज़ गोहाइ ओयोव, अगमबक्ताये ओल ओडेसलं मान माडोयो। 45 होकाम येसु गालीललं ओराव, येसुये यरुसलेमला पर्ब बेलाकं जो येःन ओडोव हो स्यान्टै येःन यारोःङोये गालीलला मीराई येसुलाई ओमान याडोड्योव, कडालेकं नोरं पनि पर्बटं राव लेवरं।

46 होकाम फरि येसु गालीलला काना वार्ने नाङखारलं ओराव, नलं येसुये ङाःडेज़ रीःलाई अङ्गुरलो उरीः ओझोयो। कफर्नहुमलं टोबो घ्योव कप्तान लेव, नोलो खेपा ओज़ा ठलिव लेव। 47 येसु यहुडियालाम गालीललं राडेले वार्ने ठैडे नो येसु लेवकं ओराव, होकाम राडे ङाज़ालाई ससमड्याङ वार्डे येसुलाई बिन्ती ओडोव, कडावार्क नोलो ओज़ा सिने ओपान्ज़्याव। 48 येसुये नोलाई हैओडोव, "जे चिन्न सोनो अचम्बला येःनरं जेमरःङया समं ओजमाज़ बिस्वास जेमडा।"

49 नो घ्योव कप्तानये येसुलाई हैओडोव, "ए प्रभु ङाज़ा सिने भन्डा ङाडेज़ राङन।"

50 येसुये नोलाई हैओडोव, "गनानके, नज़ा सम्नेले।" येसुये नोलाई हैओडोव बचन नो मीये बिस्वास ओडोव, होकाम ओनाव।

51 होकाम नो येमकं ओनाज़्याकं नोलो ओनौकरये नोसं डैसिडे नज़ाके यासम्डु वार्डे नोलाई हैओडोव।

52 खाडंङ बजियालं ओसोमो वार्डे नोलाई ओपजैकं नो नौकरये हैओवारो, "आज्यो लाकं एक बजिकाम नोलाई जोरोये ओराःव।" 53 येसुये नोलाई "नज़ा सम्नेले" हैओडोव बेलाकंज़ ओलेवलेव वार्डे कप्तानये ठा ओसोनो। होकाम ओल सोनो उज़ीःमला स्यान्टै ओझानराई बिस्वास याडोव।

54 यहुडियालाम गालीललं राडे येसुये ओडोव आव डोस्रा चिन्न लेव।