João 15

येसु असली अङ्गुरलो ओलंरा

1 सड्डेका अङ्गुरलो ओलंरा ङाज़ ची, ङाबाबुके किसान ची। 2 ङासं लेने स्यान्टै हाङ्गारं जोये ओसै माजाव होलाई बाबुये पोलोये होसोनो ओसै झाने स्यान्टै हाङ्गारंलाई झन भ्या गसैरंकं वार्डे बाबुये चावसं छान्टिवये। 3 ङा जेलाई हैङाडाच्योव बचनये जे ङाडेज़ चोखो टाडे जेले। 4 ङासं टोबोटं लेच्यो, ङा जेसं टोबोटं लेनेङाले। जो स्याव अङ्गुरलो ओहाङ्गा उसिङटं मालेखे भने नो ओहाङ्गाये ओबाठङ ओसै माजाडुव, हो मान्टिज़ जे पनि ङासं जेमलेखे भने जे पनि जेसै जेमजाडु।

5 "अङ्गुरलो मुल ओलंरा ङाज़ ची, जे के ओहाङ्गारं ची। कोइ ङासं टोबोटं याले भने, होसोनो ङा नोसं टोबोटं ङालेखे भने, नोये भ्या ओसै ससैने ले, कडावार्क ङाकाम भासिडे जे कडि पनि जेमझैडु। 6 कोइ मी ङासं टोबोटं मालेखे भने, हो नो हाङ्गा मान्टि टाने ले जो पाखाडे मिल्कैसिने ले, होकाम नो ठङ्ये। एटानाव हाङ्गारंलाई मीराई डुपरंये होकाम मेःल ख्यारंये, होकाम नो चाङडे खेम्ये। 7 जे ङासं जेलेखे भने, होसोनो ङापाङो रोःरं जेसं यालेखे भने, जेलाई जो जेइछ्या लागि निःच्यो, होकाम नो जेलागिटं टानेले। 8 जे भ्या सै सैडे ङासिसरं ची वार्ने प्रमान जेजैखे भने आवटंज़ ङा ङाबाबुलो ओमहिमा टाने ले।"

9 "बाबुये जोस्याव ङालाई मया डाङोये, ङा पनि जेलाई मया ङाडाच्यो। जे ङामयाटं लेच्यो। 10 होकाम ङाआग्या जेमानिखे भने जे ङामयाटं लेनेजेले, जोस्याव ङा ङाबाबुलो ओआग्या ङामानिज़्या होसोनो ङाबाबुलो ओमयाटंज़ ङालिज़्या। 11 ङा आव रोः जेलाई आव कारनये हैङाडाच्योज़्या, ङा ङाआनन्ड जेसं ओलेकं, होकाम जे जेआनन्ड पुरा ओटाकं।"

12 "ङाआग्या आवज़, ङा जेलाई जोस्याव मया ङाडाच्योव, जे पनि जे-जेज़ होस्याव मया डासिच्यो। 13 ओनैराई यालागिटं उज्यु सुम्पिने भन्डा घ्योव मया उरु काङ्कालोज़ माटाये। 14 ङा जेलाई जो आग्या ङायाच्यो, नो जे जेमानिखे भने, जे ङा ङानैरं ची। 15 आबोकाम ङा जेलाई नौकर ङाम्डाच्यो, कडालेकं नोलो ओसाहुये कडि डोव नौकरये मासोनोये। ङा के जेलाई ङानैरं ङाडाच्योज़्या, कडालेकं जो ङा ङाबाबु लेवङाम ङाठोयो, नो स्यान्टै जेलाई हैडाडे ङानैच्योव। 16 ङालाई जे जेरुजिसोङो माङ्कची, ङा जेलाई ङारुजिच्योव ची होकाम जेलाई ङा ङारुजिच्योव, होकाम जे नाडे बनै भ्या सैच्यो, होकाम जेसं नो जेसै एकसप्ड्याज़ ओलेकं हैजैडे जे बाबुसं ङामिनङाम जो जिनिः बाबुये जेलाई हो यानेले। 17 ङा जेलाई आव आग्या ङायाच्योज़्या, टोबोये छुटंलाई मया डासिच्यो।"

प्रिठीबीलो हेला

18 "प्रिठीबीये जेलाई याघिनैच्योव भने, जे ठा सन्च्यो, जेलाई घिनैने भन्डा ङाडे नोये ङालाई घिनैडेनैसोङो। 19 जे आव प्रिठीबीलारं जेटाखिन्के प्रिठीबीला मीराई जेलाई आपना मानिडे मया डाने यालेव। जे आव प्रिठीबीलारं माङ्कची। जेलाई प्रिठीबीलाम ङा ङारुजिच्योव ची, हैजैडे प्रिठीबीला लेने मीराई जेलाई घिनैच्योरंये। 20 ङा जेलाई हैङाडाच्योव बचन चेटैच्यो, ‘नौकर ज़ीःमला साहु भन्डा घ्योव माटाये।’ नोराई ङालाईज़ सहटैसङज़्यारं भने जेलाई पनि सटैनेज़ लेरं होकाम नोराई ङासिछ्या यामानिरंखे भने जेसिछ्या पनि मानिने लेरं। 21 बुरु आव स्यान्टै नोराई ङामिनलो ओकारनये जेलाई डानेलेरं, कडालेकं नोराई ङालाई परिःङनेलाई मासरेरंये।"

22 ङा ङामराखिन सोनो नोरंलाई हैमाडोरंखिन के नोरं पापलो डोसि माटाने यालेव, आबोके यापापलो लागिटं नोरंलाई कडि बाहानाज़ माले। 23 जोये ङालाई घिनैसोङो, होये ङाबाबुलाई पनि घिनोयोये। 24 ङा जो येःन ङाडोव हो नोराई यारःङखिन्के नोरं पापलो डोस मालागिने ओलेव बुरु नोराई ङालाई सोनो ङाबाबुलाई घिनैसिरंये। आबो नोराई ङालाई सोनो ङाबाबुलाई नेबऱ्याङलाईज़ रःङडे नैसिरं होसोनो घिनैडेनैसिरं। 25 न्यामटा सर्सिव आव बचन पुरा टानेलो लागिटं आव ओटाव, "नोराई ङालाई सोझोज़ याघिनैसोङो।"

26 "ङा बाबुलो ओतराफङाम जेलाई गगैच्योवकं वार्डे सत्यला आत्मा जेलेवकं परिःङनेङाले, होकाम नोयेज़ ङा ङाबारेलं गोहाइ यानेले। 27 जे सुरुकामज़ ङासं जेलेवये, जे पनि ङासाचीरंज़।"