João 16

1 जे जिबिस्वास टाघटिकं वार्डेज़ ङा आव रोः जेलाई हैङाडाच्योज़्याव ची। 2 नोराई जेलाई यहुडीरं याडुप्सिने ज़ीःमलाम पुलैने लेरं। डस्साज़ एटाव समय रारिज़्या, जेलाई सैःनेये परमेस्वरलो ओसेवा ङाडोज़्या वार्डे सुन्चीने ले। 3 नोराई आव येःन डानेलेरं, कडालेकं नोराई बाबुलाई यासरेव माले, होसोनो ङालाई पनि मासरेसङरंये। 4 आव रोः ङा जेलाई हैङाडाच्योव, जोकं नो समय रा, होकं जेलाई कैङाडाच्योव हो जे चेटैने जेले।

चोखो आत्मालो ओयेःन

ङाःडे जेलाई आव रोः हैङाम्डाच्योये, कडालेकं हो बेलाकं ङा जेसंज़ ङालेव। 5 "आबो ङा ङालाई परिःङने लेवडे ङानारिज़्या, ‘नङ कान्डे ननारिज़्याव?’ वार्डे जे काङ्काये पनि ङालाई जेमपजैसङये। 6 होटानि पनि ङा जेलाई आव रोः हैङाडाच्योव कारनये जे जियुङ सोगोये ब्यालडे ले। 7 होटानि पनि ङा जेलाई सत्य रोः हैङाडाच्यो, ङा ङानावज़ जेलाई फाइडा टानेले। कडालेकं ङा ङाम्नाखे भने, जेलाई गैने जेलेवकं राने माले। ङानाखे भने ङा नोलाई जेलेवकं परिःङने ङाले। 8 जोकं नो रा, नोये प्रिठीबीला मीरंलाई पापलो ओबारेलं, सत्यलो ओबारेलं होसोनो परमेस्वरये ओडोने नियालो ओबारेलं नोरं गलत लेरं वार्डे प्रमान यानेले। 9 नोरं पापलो ओबारेलं गलत लेरं कडालेकं नोराई ङालाई बिस्वास माडाङरंये, 10 नोये परमेस्वरलो ओङाःकं कडि रोः सत्यले नोज़ सटोनोये, कडालेकं ङा बाबु लेवकं ङाना, होकाम फरि जे ङालाई खर्क पनि रःङने जेमले। 11 होसोनो परमेस्वरलो उनियालो ओबारेलं, कडालेकं आव प्रिठीबीला सेःरलाई सजै याने टाडेले।"

12 "ङा जेलाई हैडाने रोः अजं भ्याज़ लिज़्या, आर्क जे नो रोः जेमसहिडु। 13 जोकं नो सत्यलो आत्मा रानेले, होकं नोये जेलाई स्यान्टै सत्यलं बैने ले। नो ओल उयुङलाम पाङने माले। नोये जो ठोयो, हो जेलाई हैडाने ले, होसोनो टारिने रोःरं जेलाई हैडाने ले। 14 ङा हैङावारो रोःरं जेलाई हैडाडे नोये ङामहिमा डाने ले। 15 बाबुसं लिज़्याव भरि स्यान्टै ङामीज़। हैजैडे ङा हैङावार्ज़्याव, जो ङासं लेव रोःर हो ङालेवङाम रैडे सत्यला आत्माये जेलाई हैडानेले।"

डुखं सोनो सुखं

16 "जामाका जे ङालाई रःङने जेमले, होकाम जामाका ङालाई फरि रःङने जेले।"

17 होकाम येसुलो कोइ-कोइ उसिसराई या-याज़ हैयावारो, "येसुये गेलाई आव कै ओडासिज़्याव? ‘जामाका जे ङालाई रःङने जेमले, होकाम फरि जामाका जे ङालाई रःङने जेले,’ कडालेकं ‘ङा बाबु लेवडे ङानारिज़्या।’" 18 नोराई हैयावारो, "येसुये ‘जामाका’ ओवारो कडि? गे गेम्सन, येसुये कैओवार्ज्याव।"

19 नोराई येसुलाई पजैने युङ डोज़्यारं वार्ने रोः येसुलाई ठा ओटाव, होकाम येसुये हैओवारो, "‘जामाका जे ङालाई रःङने जेमले, होसोनो जामाका ङालाई रःङनेजेले’ वार्ने रोःलो ओमाने कडि वार्ने बारेलं जे कडि रोः छलफल जेडोज़्याव? 20 डस्साज़, ङा जेलाई हैङाडाच्यो, जे घर्ने सोनो जेसोगो हाइने जेले, हैटानि पनि प्रिठीबी रेङनेले। जे जेसोगो हाइने जेले, होकाम जेसोगो रेङनेलं फेरैसिने ले। 21 बाल्ख जर्मैने बेलाकं मेमालाई बनै डुखं टाये कडालेकं नोलो ओबेला राव टाये, हैटानि पनि नोये बाल्ख जर्मोयोये, होकाम नोये नो डुखंलाई माचेटोयोये कडालेकं प्रिठीबीलं टोबो बाल्खलो ओजर्म ओटाव वार्ने रोःये नो बनै रेङये। 22 होमान्टिज़ आर्क जेलाई सोगो लागि, ङा फरि जेलाई रःङने ङाले, होसोनो जियुङ बनै आनन्ड टानेले। काङ्काये पनि जेआनन्ड जे लेवकाम नान्ने माले।

23 नो छ्याम जे ङालाई कडिज़ पजैने जेमले। डस्साज़ ङा जेलाई हैङाडाच्यो, जे ङामिनङाम बाबुसं जो जिनिः, होये नो जेलाई यानेले। 24 आर्क समं जे ङामिनङाम कडिज़ झिनिःव माले। निःच्यो, होकाम जे डैने जेले। हैजैडे जे जेआनन्ड पुरा ओटाकं।"

प्रिठीबी तर्ट झ्याङने

25 "आव रोः ङा जेलाई उखानङाम हैडाडे ङानैच्यो। बुरु समय रारिज़्या, आबो ङा जेसं फरि उखानङाम पाङनेङाम्ले, बाबुलो ओबारेलं जेलाई प्रस्टज़ हैङाडाच्यो। 26 नो छ्याम जेज़ ङामिनङाम बाबुसं निःने जेले। ङा जेलागिटं बाबुसं बिन्ती डाड्यानेङाले वार्डे जेलाई हैङामडाच्यो, 27 कडालेकं बाबुये ओल्ज़ जेलाई मया डाच्योव, कडावार्क जे ङालाई मया डाडे जेनैसङ, होसोनो ङा परमेस्वरङाम ङाराव वार्डे बिस्वास डाडेजेनैसङ। 28 ङा बाबु लेवङाम प्रिठीबीलं राडे ङाले, होकाम प्रिठीबीलाई राःडे ङा फरि बाबु लेवडे ङानारिज़्या।"

29 उसिसराई हैयावारो, "आबो नङ प्रस्टज़ नपाङज़्या, उखानङाम माङ्क। 30 आबो गे गिबुझिखे, नङ स्यान्टै रोःज़ नसनये, नङलाई काङ्काये पजोयो परिने माले। हैजैडे गे बिस्वास गेडा, नङ परमेस्वरङाम नराव ज़।"

31 येसुये नोरंलाई जबाफ ओयोवरं, "कडा जे आबो बिस्वास जेडा? 32 रःङच्यो, समय रारिज़्या, डस्साज़ राडे ले, जे चित्राङ पुत्राङ टाडे जेपोडे ज़ नाने जेले होकाम ङालाई ङाबाठङ राःने जेलेसङ। होटानि पनि ङा ङाबाठङ ङाम्ले, कडालेकं बाबु ङासं लिज़्या। 33 ङा जेलाई आव रोः आव कारनये हैङाडाच्योज़्या, ङा लेवकं जेलाई सान्ति ओटाकं। प्रिठीबीलं जेलाई आफट बिफट राने ले, हिक्मत डाच्यो, ङा प्रिठीबीलाई हारैडे ङानै।"