1 सातालो पैला डिनछ्याम छकाल्ने जुसुमुसु उलिज़्याकंज़ मरियम मग्डलिनी खाडरलं ओराव, होकाम नोये पल्याटा खाडरलाम टङडे हाइसिव ओरोःङो। 2 नो सिमोन पत्रुस सोनो येसुये मया ओडोज़्याव उसिस लेवकं ज़ोःये-ज़ोःये ओनाव होकाम नोये हैओवारो, "नोराई प्रभुलाई खाडरलाम लाङडेची नैरं, प्रभुलाई काङं नैडे यानैज़्याव हो गेलाई ठा माले।"

3 होकाम पत्रुस सोनो टोबो प्रभुलो उसिसनि पाखा पुलुडे खाडरडे नेनाव। 4 नोनि बोलोङज़ नेज़ोःव, टोबो येसुलो उसिसये पत्रुसलाई ख्यानैडे खाडरलं ङाःडेज़ ओकेरिव। 5 खाडरलं घोम लेडे ओरःङकं, नोये ङाःडेङा पोसिव सुतिलो क्वारं याज़ ख्यासिव ओरोःङो, नो खाडरलं मापसिये। 6 सिमोन पत्रुस नोलो उछिन-उछिन ओराव, होकाम खाडरलं उपसिव, होकाम नोये पनि सुतिलो मोरो पोसिव क्वारंया मान्त्रा ख्यासिव ओरोःङो। 7 येसुलो ओङैःटा पोसिव रुमाल नो सुतिलो क्वारासं मालेव, अलगंज़ पटैडे टोबो पोकं नैसिव उलिज़्याव। 8 होकाम खाडरलं ङाःडे केरिव येसुलो उसिस पनि खाडरलं उपसिव, होकाम नोये नो रःङडे बिस्वास ओडोव। 9 कडालेकं नोराई येसु सिवलाम ज्युङडा टाडे सोनेज़ले वार्ने सास्त्रटा बचन आर्क समं यामबुझिटाव। 10 होकाम नो येसुलो उसिसरं वोल्डे याज़ीःमडे यानाव।

11 मरियम खाडरकाम पाखाकं च्याङसिडे ओघर्ज़्याव। नोये घोरोग्यान घोम लेडे खाडरलं ओरोःङो, 12 नलं येसुलो सिव ओक्याङ नैसिव लेव, नलं पलाङो क्वा क्वाइसिव नेबऱ्याङ स्वर्गटा कटंवालनि टोबो ओङैः लेव पोडे सोनो टोबो ओखङ लेव पोडे चुङडे निलिज़्याव नोये ओरोःङोनि। 13 नोनि मरियमलाई हैनेडोव, "मेमा, कडाने नघरज़्याव?"

नोये नोनिलाई हैओडोवनि, "नोराई ङाप्रभुलाई लाङडेनैरं, होसोनो होलाई काङ नैडेयानैज़्याव ङा ङामसन।"

14 आडङ हैवार्डे नो उझिन्डे ओवलो, होकाम नोये येसुलाई च्याङसिडे उलिज़्याव ओरोःङो, हैनि पनि नो येसुज़ वार्डे मासरेवये। 15 येसुये नोलाई हैओडोव, "ए मेमा, नङ कडाने नघरज़्याव? काङ्कालाई नखिम्ज़्याव?"

नोये येसुलाई बगैचा रःङने मी ची वार्डे हैओडोव, "ए प्रभु नङ येसुलाई आलाम नलाङो टावसं, काङं नैडे ननैज़्याव ङालाई हैडाङ, होकाम ङा येसुलाई लाङने ङाले।"

16 येसुये नोलाई हैओडोव, "मरियम!"

नोये वोल्डे येसुलाई हिब्रुङाम हैओडोव, "रब्बोनी," "ए गुरबा!"

17 येसुये नोलाई हैओडोव, "ङालाई छुवज़ टाछुसङ, कडावार्क ङा आर्क समं बाबु लेवकं ङामनाटा। ङाभाइरं लेवकं नाडे नोरंलाई हैडोरं, ‘ङाबाबु सोनो जेबाबु होसोनो ङापरमेस्वर सोनो जेपरमेस्वर लेवकं ङानारिज़्या।’"

18 मरियम मग्डलिनी ओनाव होकाम येसुलो उसिसरंलाई हैओडोवरं, "ङा प्रभुलाई ङारोःङो।" होसोनो येसुये हैओवारो रोः नोरंलाई नोये हैओडोवरं।

19 नो आइतबार छ्याम सातालो पैला डिन रिःम्डे, यहुडीराई याछ्यासैये येसुलो उसिसरं झला रुःप्डे ज़ीःमलं चुङडे यालिज़्याकं, येसु राडे नोराई याखार्ल ओच्याङसिव, होकाम नोरंलाई हैओडोवरं, "जेलाई सान्ति!" 20 आडङ हैवार्डे येसुये नोरंलाई उकुइ सोनो ओकोखा पनि सटन्डे ओयोवरं। प्रभुलाई रःङडे उसिसरं बनै यारेङो। 21 होकाम येसुये फरि नोरंलाई हैओडोवरं, "जेलाई सान्ति! जोस्याव बाबुये ङालाई उपरिःङसोङो, हैजैडे ङा पनि जेलाई ङापरिःङच्यो।" 22 आडङ हैवार्डे येसुये नोरंलाई ओसये उमुयोरं होकाम हैओडोवरं, "चोखो आत्मा हाँ। 23 जोराई यापाप छेमा जेडा, नोराई यापाप छेमा टाये, होसोनो जोराई यापाप जे छेमा जेमडा होराई यापाप छेमा टाने माले।"

24 येसु ओराज़्याकं बारं जना उसिसरंकाम टोबो, डिडुमस वार्ने ठोमा नोरासं मालेव। 25 हैजैडे उरु येसुलो उसिसराई नोलाई हैयाडोव, "गेके प्रभुलाई गेरोःङो।"

नोये होरंलाई हैओडोवरं, "जोका समं ङा येसुलो उकुइटा कान्टिलो उकुङ ङामरःङ, होसोनो कान्टि ठुकिसिव पोलं ङाकुइसै ङामझा, ओकोखालं ङाकुइ ङामझा, होका समं ङा बिस्वास ङामडो।"

26 आठ डिन येसुलो उसिसरं ज़ीःमलं लेवरं। ठोमा पनि नोरासं लेव। झलारं स्यान्टै रुप्सिव लेव, येसु ज़ीःमलं उपसिव, होकाम याखार्ल च्याङसिडे हैओवारो, "जेलाई सान्ति!" 27 होकाम येसुये ठोमालाई हैओडोव, "नकुइसै आलं टा, होसोनो ङाकुइरं रःङ। नकुइये ङाकोखा छाप। सङ्खा टाडो बिस्वासी टान।"

28 ठोमाये येसुलाई हैओडोव, "ङाप्रभु सोनो ङापरमेस्वर!"

29 येसुये नोलाई हैओडोव, "नङ ङालाई नरःङसोङो कारनये ङालाई बिस्वास नडाङो ची? रेङोरं ची नोरं, जोराई ङालाई यारःङसोङो माले, होटानि पनि बिस्वास डोरंये।"

30 येसुये उरु भ्या चिन्नरं उसिसराई याङाःकं ओडोव, नो आव कितापटं सर्सिव माले। 31 बुरु आव रोः आव कारनये सर्सिव ची, जे येसु परमेस्वरलो ओज़ा ख्रीस्टज़ वार्डे बिस्वास डाच्यो, होसोनो बिस्वासङाम येसुलो उमिनङाम जे जीबन जेडैकं।