1 निकोडेमस उमिन लेव टोबो फरिसी लेव। नो यहुडीराई यासेःर लेव। 2 नो रिलं येसु लेवकं ओराव, होकाम येसुलाई हैओडोव, "गुरबा, गे गेसन नङ परमेस्वरङाम गेलाई पैने नरावज़, कडावार्क परमेस्वर मीसं मालेखे भने नङ नडोज़्याव आव चिन्नरं काङ्कायेज़ माडोडुव।"

3 येसुये नोलाई जबाफ ओयोव, "डस्साज़ ङा नङलाई हैङाडान, कोइ मी साःरौ टाडे माजर्मीखे भने नोये परमेस्वरलो ओराज्य मारःङढुव।"

4 निकोडेमसये येसुलाई हैओडोव, "मी बड्डाडे कैजैडे जर्मीसिडु ड? सै वामालो ओकोखंलं फरि टखेप पसिडे जर्मीडु डोरो?"

5 येसुये जबाफ ओयोव, "डस्साज़ ङा नङलाई हैङाडानज़्या कोइ रीः सोनो आत्माङाम माजर्मीखे भने हो परमेस्वरलो ओराज्यलं मापसिडु। 6 कडालेकं क्याङटाम जर्मीव क्याङज़, होसोनो चोखो आत्माङाम जर्मीव आत्माज़। 7 ङा नङलाई साःरौ टाडे जर्मीने पानो ङाडानकं अचम्ब टाटाङन। 8 बतास जोडे ओमन लागि होडेज़ बगिये। नङ बतासलो ओगा याज़ नठैये, होकाम नो काङाम ओराज़्याव होसोनो कान्डे ओनाज़्याव, नो नमसंनये। आत्माङाम जर्मीव स्यान्टै मीरं हैटावज़ टारंये।"

9 निकोडेमसये येसुलाई ओपजोयो, "आव कैझैडे टाव ढुव?"

10 येसुये नोलाई जबाफ ओयोव, "नङ इस्राएलला यागुर टाडे पनि आव रोः नम्बुझिये? 11 डस्साज़ ङा नङलाई हैङाडान, गे जो गेसन हो हैगेवार्ये, होसोनो गे जो गेरोःङो होज़ गोहाइ गेयोये, हैनि पनि जे गेगोहाइ जिम्पतिये। 12 ङा जेलाई प्रिठीबीला रोः हैङाडाच्योकं पनि जे बिस्वास जेमडाये, होकाम जेलाई स्वर्गटा रोः हैङाडाच्योखे भने कैजैडे बिस्वास जेडा? 13 स्वर्गटाम झरिडे राने मानवालो ओज़ा बाहेक काङ्का पनि स्वर्गटं उपुलुव माले।

14 जोझैडे बनलं मोसाये गुललाई ओछेनो, हैजैडेज़ मानवालो ओज़ा छेन्सिव परिये, 15 होसोनो जो-जोये होलाई बिस्वास डोरं होराई खर्कज़ मासिने जीबन डैनेलेरं।" 16 "कडालेकं परमेस्वरये प्रिठीबीलाई ऐटाव मया ओडोव, परमेस्वरये टोबोका टोबो ओज़ालाई ओयोव, ओललाई बिस्वास डाने काङ्का पनि नास टाटाकं, बुरु नोये खर्कज़ माखेम्ने जीबन ओडोयोकं। 17 कडावार्क परमेस्वरये प्रिठीबीलाई डोसि ठहरैने वार्डे ओज़ालाई प्रिठीबीलं उपरिःङो माङ्क बुरु प्रिठीबी ओज़ाङाम ओबान्चिकं वार्डे उपरिःङो।

18 जोये येसुलाई बिस्वास डोव, नो डोसि ठहरिने माले, बुरु बिस्वास माडानेके ङाडेज़ डोसि ठहरिडेले, कडालेकं नोये परमेस्वरलो टोबोका टोबो ओज़ालो उमिन्ट बिस्वास ओडोव माले। 19 फासिला आवज़ उज्यालो प्रिठीबीलं राडेले, होकाम मीराई उज्यालोलाई भन्डा बुरु अन्ड्यारोलाई मया याडोव, कडालेकं नोराई यायेःन माचाव लेव। 20 माचाव येःन डाने स्यान्टैरं उज्यालोलाई घिनैरंये, होकाम उज्यालोटं मारारं, मानिके नोराई यायेःन रःन्नेले। 21 सत्यलं बाने मी उज्यालोटं रानेले, होकाम ऐजैडे नोये ओडोव येःनरं परमेस्वरङाम डासिवज़ वार्ने स्यान्टै रःन्नेले।"

22 होकाम येसु उसिसरासं यहुडिया प्रडेसलं ओनाव, होकाम नलं नोरासं जामा डिन ओलेव, होसोनो मीरंलाई बप्तिस्मा ओयोवरं। 23 युहन्नाये पनि सालीमलो ओछ्योकं एनोनलं बप्तिस्मा ओयोज़्यावरं, कडालेकं नलं बनै भ्या रीःलेव। नलं मीरं राडे बप्तिस्मा रैरंये। 24 नो बेला समं युहन्ना झ्यालखानालं उम्परिटाव।

25 नो बेलाकंज़ युहन्नालो उसिसरं टोबो यहुडीसं चोखैसिनेलो ओबारेलं यायुसिज़्याव। 26 युहन्ना लेवकं राडे नोराई युहन्नालाई हैयाडोव, "गुरबा यर्डन भै होपंटं जो नङसं लेव, जोलो ओबारेलं नङ गोहाइ नयोव, रःङखेने, नोये बप्तिस्मा योज़्यावरं, स्यान्टै नो लेवकं नाज़्यारं।"

27 युहन्नाये जबाफ ओयोवरं, "मीलाई स्वर्गटाम मायाया समं नोये कडिज़ माडोयोये। 28 ‘ङा ख्रीस्ट माङ्कची, बुरु ङालाई नो भन्डा ङाःडे परिःङसिव ची’ वार्ने ङागोहाइरं जेज़। 29 जोसं डुलही लिज़्या, डुलाहा नोज़। डुलाहालो ओनै नोज़ जो ओल्स ओछ्योकं च्याङसिव टाये, नोलो ओगा ठोयो होकाम बनै रेङये। हैजैडे आव ङाखुसि आबो पुरा टाडेले 30 येसु बडिने बुरु ङा के घटिनाव परिये।"

31 "रोटाम रारिज़्याव स्यान्टैराई भन्डा घ्योव ले। प्रिठीबीलाम टाने प्रिठीबीलोज़, होसोनो प्रिठीबीला रोःज़ पाङये। स्वर्गटाम राने स्यान्टैराई भन्डा घ्योव ले। 32 नोये जो रःङडे सोनो ठैडे नोयो, होलो ओगोहाइज़ योवये, हैनि पनि नोलो ओगोहाइ काङ्कायेज़ मापतिरं। 33 जोये नोलो ओगोहाइ पतिव, नोये परमेस्वर सत्य ले वार्ने रोःलो प्रमान योवये। 34 कडालेकं जोलाई परमेस्वरये उपरिःङो, नोये परमेस्वरलो ओपाङ पाङये, कडालेकं परमेस्वरये नोलाई ओआत्मा योवये। 35 बाबुये ओज़ालाई मया डोवये, होकाम स्यान्टै बस्तज़ उकुइटं याडेनोयो। 36 जोये ओज़ालाई बिस्वास डोवये, नोसं खर्कज़ मासिने जीबन ले। जोये ओज़ालो ओरोः माठोयोये, नोये जीबन रःङने माले, बुरु परमेस्वरलो उरिस नोलाई एकसप्ड्या रानेले।"