Lucas 1

ठियोफिलसलाई हैओडोव

1 गेखार्ल पुराटाडे खेमो घटनारं खाबलाकं, कैजैडे याटाव वार्ने बारेलं बनै भ्या मीराई सर्ने कोसिस डाडेनैरं। 2 होराई नो रोःरंज़ सर्डेनैरं जो रोःरं सुरुलामज़ याङाः यामिये रःङने सेवा डानेराई सोनो चाव सोर प्रचार डाने मीराई गेलाई हैयाडासिव। 3 मान डोयो ठियोफिलस, ङा सुरुलामज़ होस्यारसं स्यान्टै रोः खिम्डेङानै, होकाम टाव रोःरं नलागिटं चावसं मिलैडे सर्डे नैने चाव ङाङप्सिव, 4 कडालेकं नङलाई पैसिव रोःराई यासत्य नङलाई ठा ओटाकं।

बप्तिस्मा झैने युहन्ना उजर्मिने

5 यहुडियाला राजा, हेरोडलो ओपालालं, अबियालो ओसंमुहलं जकरिया उमिन लेव टोबो सेवा डोने मी लेव। होलो ओज्या हारुनलो ओखंलंकला लेव। होलो उमिन एलीसिबा लेव। 6 होनि नेबऱ्याङज़ परमेस्वरलो ओआग्य सोनो ओन्यामलं लेनिये, होकाम स्यान्टैराई भन्डा घ्योव परमेस्वरलो स्यान्टै ओआग्या सोनो ओन्याम अनंसार नेडोस मालेव लेवनि। 7 हैनि पनि होनि नेज़ारं मालेवरं, कडालेकं एलीसिबा बान्जिनी लेव, होनि नेबऱ्याङलोज़ नेबैसं नाडे उलिज़्याव।

8 टछा जकरिया परमेस्वरलो ओङाःकं ओसमुहला मीराई यापालालं सेवा डाने येःन ओडोज़्याव, 9 होकाम सेवा डोनेराई सेवा याडोने यारिति अनंसार गोला याझाकं स्यान्टैराई भन्डा घ्योव परमेस्वरलो उज़ीःमलं नाडे ढुपं सल्कैने येःन डोनेटं जकरियालो उमिन उपुलुव। 10 ढुपं सल्कैने बेलाकं स्यान्टै मीराई पाखाङ प्रार्ठना याडोज़्याव।

11 होकाम स्यान्टैराई भन्डा घ्योव परमेस्वरलो टोबो स्वर्गटा ओकटंवाल ढुपं सल्कैने ठानकाम वोःरडे च्याङसिडे उलिज़्याव ओरोःनो। 12 जकरियाये होलाई रःङडे छेडे ओआतिव। 13 हैनि पनि स्वर्गटा कटंवालये होलाई हैओडोव, "जकरिया टाछेङंन, कडालेकं नडोव प्रार्ठना परमेस्वरये ठैडेनोयो। आबो नज्या एलीसिबाये नलागिटं टोबो खेपा ज़ा डैने ले, होकाम नङ होलो उमिन युहन्ना नैड्यो। 14 नङ रेङने नले, होसोनो आनन्ड टाने नले, होकाम हो उजर्मिकं बनै भ्या मीरं रेङने लेरं। 15 कडालेकं नो स्यान्टैराई भन्डा घ्योव परमेस्वरलो ओङाःकं घ्योव टाने ले। नोये अङ्गुरलो उरीः सोनो उरुका मड्ड पनि खर्कज़ ओँने माले। होकाम वामालो ओगर्भलाम उजर्मिकज़ चोखो आत्माये ब्यालो टानेले। 16 नोये इस्राएललो ओसन्तानलं भ्यारंलाई स्यान्टैराई भन्डा घ्योव परमेस्वर लेवडे सोवोल्नेरं ले। 17 याबाबुराई यायुङ याज़ाराई लेवडे सोनो आग्या मामानिनेरंलाई सहि मीराई याबुड्डिलं बैनेरं, होसोनो प्रभुलो ओलागिटं सहि मीरं तयार झैडे येसु भन्डा ङाःडे नो एलियालो ओआत्मा सोनो ओसक्तिसं नानेले।"

18 होकाम जकरियाये स्वर्गटा कटंवाललाई हैओडोव, "आव ङा कैजैडे ठा सन्ने? ङा बड्डा ङाटाडुखे ङाज्यालो पनि ओबैसं नाडेची ले।"

19 होलाई स्वर्गटा कटंवालये हैओडोव, "ङा गब्रिएल ची, ङा परमेस्वरलो ओङाःकं च्याङसिडे ङालेये। नङसं रोः डाने सोनो आव चाव सोर सठैने ङालाई उपरिःङसोङो ची। 20 जो बेला समं आव रोः पुरा माटा, हो बेला समं नङ लाटाने नले कडालेकं नङ ङापाङो रोःटं बिस्वास नम्डोये, जो बचन ओबेलाकंज़ पुरा टाने ले।"

21 जकरियाये प्रार्ठना डोने ज़ीःमलं कुबुला ओझोयो, होकाम जकरियालाई केन्ज़्याव मीरं बक्क याटाव। 22 नो पुलुडे पाखाङ ओराकं होरासं ओजंमाज़ मापाङडुये होकाम होराई आवये प्रार्ठना ज़ीःमलं डर्सन ओरोःङोलेव वार्डे याबुझिव। जकरियाये होरंलाई उकुइये साहान डाडे ओयोवरं होकाम ओल लाटाज़ टाडे ओलेव।

23 जकरियालो प्रार्ठना ज़ीःमला सेवा ओडोने डिन ओखेमो पान्त्रा उज़ीःमडे ओनाव। 24 होकाम ओज्या एलीसिबा ज़ा डैने टाडे, पाँस मैना समं ऐवार्डे मोःसिडे ओलेव, 25 "परमेस्वरये मीराई याखार्ल ङाबिज्यात टाटाकं वार्डे ङालाई ऐजैडे डया ओडाङो ची।"

येसु उजर्मीने भबिस्यबानी

26 एलीसिबा ज़ाडैने ओटाव छ महिनाका गब्रिएल वार्ने स्वर्गटा कटंवाललाई परमेस्वरये गालीलला नासरत याडोज़्याव नाङखारलं उपरिःङो। 27 नो स्वर्गटा कटंवाल टोबो कन्या लुज़ा लेवकं सोर लाङडे ओनाव होलो उमिन मरियम लेव, होलाई डाउडलो ओसन्तानलं योसेफ वार्ने टोबो मीये वाःङडे ओनैज़्याव। 28 स्वर्गटा कटंवालये मरियम लेवकं नाडे हैओडोव, "ए परमेस्वरलो ओडया डोयो लुज़ा, नङलाई ढो ङाडानज़्या! स्यान्टैराई भन्डा घ्योव परमेस्वर नङसं लिज़्या।"

29 हैनि पनि नो रोः ठैडे हो बनै ओछेव, होकाम आवलो ओमाने कडि वार्डे उयुङलं उसुन्चिव। 30 स्वर्गटा कटंवालये होलाई हैओडोव, मरियम, "टाछेङंन, कडालेकं नङ परमेस्वरङाम डया डैडेननै। 31 रःङ, आबो नङ मुऱ्या टानेनंले, होकाम टोबो खेपा ज़ा डैने नले, नङ होलो उमिन येसु नैड्याने नले। 32 नो स्यान्टैराई भन्डा घ्योव टानेले, होकाम स्यान्टैराई भन्डा घ्योव परमेस्वरलो ओज़ा डोसिनेले, होकाम स्यान्टैराई भन्डा घ्योव परमेस्वरये होलाई उपुर्खा डाउडलो उसिहासन यानेले। 33 येसुये याकुबलो ओसन्तानलं एकसप्ड्या राज्य डोनेले, होकाम होलो ओराज्य खर्कज़ खेम्ने माले।"

34 मरियमये स्वर्गटा कटंवाललाई हैओडोव, "एटाव कैजैडे टा ड, कडालेकं ङा के टोबो कन्या ची।"

35 स्वर्गटा कटंवालये होलाई ऐवार्डे जबाफ ओयोव, "चोखो आत्मा नङ लेवटं रानेले, होकाम स्यान्टैराई भन्डा घ्योव परमेस्वरलो ओसक्तिलो ओछाँयाये नङलाई छुनेले, हैजैडे जो जर्मिनेले, होलाई चोखो सोनो परमेस्वरलो ओज़ा डोनेलेरं। 36 ठै, नङ ननाता परिने एलीसिबाये बड्डि टाडे पनि खेपाज़ा डैनेलिज़्या, जोलाई मीराई बान्जिनी याडोज़्याव, आर्क होलो उफुलं छ महिनाका गर्भ लिज़्या। 37 कडालेकं परमेस्वरये ओमडोडुवं कडि रोःज़ माले।"

38 होकाम मरियमये हैओडोव, "अँ, ङा स्यान्टैराई भन्डा घ्योव परमेस्वरलो ओकमार्नी ची, ङालाई नङ हैनडाङो स्यानाव ओटाकं।" होकाम हो स्वर्गटा कटंवाल मरियम लेवकाम ओनाव।

मरियम सोनो एलीसिबानी नेडैसिव

39 हो बेलाकं मरियम आतुरिसं डान्डाडे यहुडियाला टोबो नाङखारलं ओनाव, 40 होकाम जकरियालो उज़ीःमलं नाडे एलीसिबालाई ढो ओडोव। 41 होकाम एलीसिबाये मरियमये ढो ओवारो ओठोयोपान्ट्राज़ उफुला बाल्ख ओचलिव, होकाम एलीसिबालो ओक्याङटं चोखो आत्मा राडे ओब्यालो, 42 होकाम एलीसिबाये कस्सिडे किःडे हैओवारो, "मेमारंलाम नङ बनै आसिक डोयो ची, होसोनो नफुला बाल्ख बनै रेङो ची। 43 ङा कैजैडे एटाव डया ङाडोयो, ङाप्रभुलो वामा ङालेवकं ओराव। 44 कडालेकं रःङखेने, नङ ढो नवारो ङाठोयो मान्त्राज़ ङागर्भलं बाल्ख रेङडे ओचलिव। 45 नो बनै रेङो ची, जोये स्यान्टैराई भन्डा घ्योव प्रभुये हैओडोव रोः पुरा टा वार्डे बिस्वास ओडोव।"

मरियमये प्रसन्सा ओगयो

46 होकाम मरियमये हैओवारो,

"ङापोहोनये स्यान्टैराई भन्डा घ्योव प्रभुलो ओप्रसन्सा डोवये,

47 होकाम ङाआत्मा, ङालाई छुट्कारा याने ङापरमेस्वरटं रेङये।

48 कडालेकं परमेस्वरये ओकमार्नीलो उडुखं रःङडे नोयो,

रःङ, आबोकाम ङालाई स्यान्टै पुस्ताये बनै आसिक डोयो ची डानेलेरं।

49 कडालेकं जो परमेस्वर, बनै ओसक्ति लेव ले, हो परमेस्वरये ङालागिटं घ्योव येःन डाडेनोयो।

होलो उमिन चोखो ले।

50 परमेस्वरलो ओछ्या डोनेरंलाई होलो ओडया आर्काम पुस्ता-पुस्ता समं रहिने ले।

51 परमेस्वरये ओपाखुराटा ओसक्ति सटन्डेनोयो।

होये यायुङलं सुन्चिडे घ्योव झैसिनेरंलाई याबिचारसंज़ तत्तर बित्तर झैडेनोयोरं।

52 परमेस्वरये यासक्ति लेवरंलाई सिहासनटाम हाइडे नोयोरं,

होकाम न्यामलं रहिनेरंलाई घ्योव झैडेनोयोरं।

53 करेसं लेवरंलाई परमेस्वरये चाव बस्तये सवाङडे नोयोरं,

होकाम ढनीरंलाई परमेस्वरये रितो याकुइ परिःङडेनोयोरं।

54 परमेस्वरये इस्राएललाई डया डाडे ओयोव पाङ अनंसार

ओसेवा डोने नो इस्राएललाई सायटा योडेनोयो,

55 होकाम गेपुर्खारंलाई हैओडोवरं मान्टि, अब्राहाम सोनो राने ओसन्तानरंलाई

एकसप्ड्या डया डोडेनोयोरं।"

56 मरियम एलीसिबासं सोङमहिनाया लेडे वोल्डे उज़ीःमडे ओनाव।

बप्तिस्मा याने युहन्ना उजर्मीव

57 आबो एलीसिबालो सुर्क्याल्नि टाने ओबेला ओटाव, होकाम होये टोबो खेपाज़ा ओडोयो। 58 स्यान्टैराई भन्डा घ्योव प्रभुये नोलाई बनै घ्योव डया डाडेनोयो वार्ने रोः ठैडे ओछ्योयाला ओआफन्तरं ओल्स बनै यारेङो।

59 बाल्ख आठ डिनका ओटाकं नोरं खतना झैने याराव, होकाम नोलो उमिन ओबाबुलो उमिन मान्टि जकरिया नैड्याने यापान्ज़्याव, 60 हैनि पनि नोलो वामाये हैओवारो, "माङ्क, आवलो उमिनके युहन्ना नैड्याने ची।"

61 होराई नोलाई हैयाडोव, "नङ ननातालं के एटाव यामिन लेव काङ्काज़ मालेरं।"

62 होकाम नोराई बाल्खलो ओबाबुलाई साहान डाडे यापंजोयो "नङ आवलो उमिन कडि नैड्याने नपान्ज़्याव?" 63 होये टोबो सर्ने पाटी निःडे "नोलो उमिन युहन्ना ची" वार्डे ओसोरो। होकाम नोरं स्यान्टै छक्क याटाव। 64 होपान्ट्राज़ जकरियालो ओयाः ओपाङो होकाम पाङने टाडे होये परमेस्वरलो ओप्रसन्सा डाने सुरु ओडोव। 65 नोराई याछिमेकीरं स्यान्टै छक्क टाडे परमेस्वरसं याछेव। होकाम यहुडियाला पाहारडेङा स्यान्टै मुलुक भरि आव रोःलो ओबात्रा ओफैलिव। 66 आव रोः ठैनेरं स्यान्टैराई आव बाल्ख छिन्डे खेटाव टाके वार्डे यायुङलं यासुन्चीव। कडालेकं स्यान्टैराई भन्डा घ्योव प्रभुलो उकुइ नोसं लेव।

जकरियाये भबिस्यबानी ओपाङो

67 बाल्खलो ओबाबु जकरियाये चोखो आत्मालो ओबंल डैडे अगमबानी ओपाङो,

68 "इस्राएलला स्यान्टैराई भन्डा घ्योव परमेस्वरलो ओप्रसन्सा ओटाकं,

कडालेकं प्रभु परमेस्वर राडेले, होकाम उमीरंलाई छुट्कारा योडेनोयोरं!

69 परमेस्वरये गेलागिटं ओकमारा डाउडलो ओसन्तानलं टोबो

छुट्कारा याने ओसक्ति लेव मी सच्यान्डेनोयो,

70 कैजैडे परमेस्वरये डोङ्कामज़ चोखो ओअगमबक्ताराई यायाःलाम ओपाङो,

71 कडालेकं गेसुतंररं सोनो

गेलाई घिनैनेरं स्यान्टैराई याकुइटाम गेलाई छुट्कारा यानेले।

72 परमेस्वरये गेपुर्खारासं ओडोव चोखो बाचा चेटैडे

गेलाई डया डोडेनैसिव,

73 परमेस्वरये गेपुर्खा अब्राहामसं हैओवारो रोः डस्साज़ ङासुडुम वार्डे कबंल ओडोव

74 कडालेकं गे गेसुतंरराई याकुइटाम छुट्कारा डोयो गिढुकं,

होकाम बिना छ्या ओल ओसेवा डोने टानेगेले

75 गे स्यान्टै गेजीबन भरि चोखो

सोनो सहि टाडे परमेस्वरलो ओङाःकं लेडे ओसेवा डोव गेडैकं।

76 ए बाल्ख, नङ स्यान्टैराई भन्डा घ्योव परमेस्वरलो ओअगमबक्ता टाने नले,

कडालेकं नङ प्रभुलो ओङाः-ओङाः

होलो ओयेम बनैनाड्याने नले,

77 परमेस्वरलो उमीरंलाई पाप छेमा ओटाकं

छुट्कारा डैसिये वार्ने रोःलो ग्यान यानेलो लागिटं,

78 गेपरमेस्वरलो बनै चाव ओडयालो ओकारनये,

रोटं स्वर्गटाम गेलाई छुट्कारालो उज्यालो गे लेवङ परिःङने ले,

79 होकाम सिने सोनो अन्ड्यारोलो ओछायाँलं लेनेरंलाई उज्यालो टानेले,

होसोनो गेखङ सान्तिला येमडे बैसिनेले।"

80 होकाम बाल्ख युहन्ना घ्योवग्यान सोनो आत्मालं बल्ल्या टावग्यान ओडोव, होकाम युहन्ना इस्राएलीरासं डैसिने ओबेला ओमराया समं कडिज़ मालेव बनलं ओलेव।