Lucas 15

ङोयो खेपाज़ा

11 येसुये हैओवारो, "टोबो मीलो नेबऱ्याङ खेपाओज़ानि लेवनि। 12 कान्छाये ओबाबुलाई हैओडोव, ‘बाबु, ङालाई ङाभागलं परिने ङाढन सम्पति गयाङ्के।’ होकाम होये ओढन सम्पति ओज़ानिलाई भाडे ओयोवनि।"

13 "जामा डिनका कान्छा ओज़ाये ओसम्पति सिप्डे टाडाङा टोबो डेसलं ओनाव, होकाम होलं मोज मजाकला उजीबन बिठैडे स्यान्टै ओसम्पति ओखेमो। 14 होये स्यान्टै ओढन पैसा खेम्डेओनैज़्याव। हो बेलाकंज़ नो डेसलं बनै घ्योव अनिकाल टाडे नोलाई ज़्याने ओँने माडुमने ओटाव। 15 होकाम नोये नो डेसला टोबो मी लेवकं नाडे येःन उनीःव। हो मीये नोलाई ओयेःङलं वोरं छाने येःन ओयोव। 16 नोलाई काङ्कायेज़ कडि पनि मायोरंये, होकाम नोये वोराई याचारोलाम सेम्बेलो ओफोपोटा ज़्याडे उफु सवाङने पानोये।"

17 नोलो ओचेतं ओराव पाना, "नोये ऐ ओवारो, ‘ङाबाबुलो बनै भ्या ओनौकरराई याफु टसि ज़्याडे पनि येःलये, हैनि पनि ङा आलं ङाकरेये सिने ङापानज़्या। 18 ङा ङाबाबु लेवङ ङाना, होकाम बाबुलाई हैङाडो, बाबु, ङा स्वर्गलो उबिरोडलं सोनो नङाःकं पाप डोडेङानै। 19 आबोकाम ङा नज़ा ची हैवार्ने हाडङका ङाम्ले। ङालाई टोबो ननौकर स्यानाव झैडे नैसङ।’" 20 होकाम नो च्याङसिडे ओबाबु लेवङ ओनाव।

"हैनि पनि नो बनै टाडाङंज़ उलिज़्याकं ओबाबुये ओरोःङो, होकाम बनै उयुङ ओनाव, होकाम ज़ोनाडे होलाई उकुइये नारिडे म्वाइ ओडोव।"

21 "ओज़ाये होलाई हैओडोव, ‘बाबु, ङा स्वर्गलो उबिरोडलं सोनो नङाःकं पाप डोडेङानै। आबो ङा नज़ा ची वार्ने हाडङका ङाम्ले।’"

22 हैनि पनि ओबाबुये ओनौकररंलाई हैओडोवरं, "चानो आवलाई स्यान्टैराई भन्डा चाव क्वा रैडे क्वाइच्यो। आवलो उकुइटं उन्ठि, सोनो ओखङटं पनै सजाच्यो 23 होकाम टोबो सोयो मार पलच्यो, होकामटानि ज़्याडे ओँडे गेरेङके। 24 कडालेकं आव ङाज़ा सिव लेव, फरि ज्युङडा टाडेले, ङोयो लेव, डैडेङानै।" होकाम नोरं बनै यारेङो।

25 "होबेलाकं नोलो जेठा ओज़ा येःङलं उलिज़्याव, होकाम हो ज़ीःम छ्योकं ओकेराकं यास्याःज़्याव, गीतं यागैज़्याव ओठोयो। 26 नोये टोबो नौकरलाई ओछ्योकं खुल्डे ‘आव कडि याझैज़्याव?’ वार्डे ओपजोयो। 27 होये नोलाई हैओडोव, ‘नभाइ राडेले, होकाम नबाबुये ङाडे ओनैज़्याव सोयो मार पल्डेनोयो। कडालेकं नबाबुये नभाइलाई चाव गराङो वोल्डे ओराव ओरोःङो।’"

28 "होकाम नो रिसिडे ज़ीःमलं नाने माभनये, होकाम ओबाबुये पाखाङ राडे नोलाई बिन्ती डाडे ओसम्झोयो। 29 हैनि पनि नोये ओबाबुलाई हैओडोव, ‘रःङखेने, आढङ बर्स समं ङा नसेवा ङाडोज़्या, नअरैसोङो येःन स्यान्टैज़ ङाडोये, हैजैडे पनि नङ ङालाई ङानैरासं खुसि मानिने लागिटं टोबो पाठा पनि खर्कज़ नमयाङये। 30 हैनि पनि स्यान्टै नसम्पति लाङडे बेस्यारासं ओडैडे राने आव नज़ा ओराकं नोलो ओलागिटं ङाडे ननैज़्याव सोयो मार पल्डे नयोखे।’"

31 "होकाम ओबाबुये जेठा ओज़ालाई हैओडोव, ‘ङाज़ा, नङ के एकसप्ड्या ङासंज़ नलिज़्या, होकाम स्यान्टै ङासम्पति नमीज़ ची। 32 हैनि पनि गे खुसि टाडे आनन्ड मानिने ठीकंज़, कडालेकं आव नभाइ सिडे उलिज़्याव, फरि ज्युङडा टाडेले, ङोयो लेव डैडेगेनै।’"