Lucas 18

रान्डिनि सोनो निया डोने

1 येसुये उसिसरंलाई एकसप्ड्याज़ प्रार्ठना गोडोरंकं वार्डे सोनो यायुङलं डुखि टाटारंकं वार्डे टोबो सात्रो झाडे ओयोवरं। 2 "टोबो सहरलं परमेस्वरलो ओछ्या माडोने सोनो मीरंलाई वास्ता माडोने टोबो निया डोने मी लेव। 3 हो सहरलंज़ टोबो रान्डिनि मेमा पनि लेव। नो मेमा निया डोने मी लेवकं एकसप्ड्याज़ राडे हैडोवये, ‘ङाझगऱ्यालो ओङाःकंज़ ङालाई निया डोड्याङ।’" 4 "नो निया डोनेये जामा डिन समं के गाइगुइ माडोवये हैनि पनि झिन्डे नोये उयुङलं उसुन्चीव ङा परमेस्वरलो ओछ्या पनि ङाम्डोये, मीराई यावास्ता पनि ङाम्डोये। 5 आव रान्डिनिये ङालाई हैरान याझैसङडुव, आवलाई के निया डोड्याने ची मानि के आव मेमा एकसप्ड्या राडे ङालाई वाक्क झैसोङोके।"

6 प्रभुये हैओवारो, "ठैच्यो, नो पापी निया डोनेये कै वार्ज़्या। 7 होकाम परमेस्वरये पनि ओल्लाई लाकं रिलं पुगारिने उरुजिव मीरंलाई निया माडोड्योवरं डोरो? होकाम होये कुबुला झोयो के डोरो? 8 ङा जेलाई हैङाडाच्योज़्या परमेस्वरये नोरंलाई चानोज़ निया डोड्यानेरं ले। हैनि पनि मानवालो ओज़ा ओराकं प्रिठीबीलं बिस्वास डैरिवके डोरो?"

फरिसी सोनो सिरमा डुप्नेराई यासात्रो

9 या-यालाईज़ भर डोडे सहि मी झैसिडे उरुरंलाई हेला डानेरं कोइ-कोइरंलाई येसुये ऐटाव सात्रो ओसठोयोरं। 10 "नेबऱ्याङ मीनि प्रार्ठना डोने ज़ीःमलं प्रार्ठना डाने नेनाव, नोनि टोबो फरिसी, होसोनो छुटं सिरमा डुप्नेनि लेवनि।"

11 फरिसीये च्याङसिडे उयुङ-उयुङलं ऐ वार्डे प्रार्ठना ओडोव, "ए परमेस्वर, ङा नङलाई ढन्याबाड ङायान, ङा माचाव मीराई मान्टि डुटाहा, असंतं डाने, ब्यभिचार डाने, होसोनो आका सिरमा डुप्ने स्यानाव पनि ङाम्ले। 12 ङा साताका नेखेप ङाउपासिये। ङा ङाडोयो स्यान्टै बस्तलो डस भा पनि ङायोये।" 13 हैनि पनि सिरमा डुप्ने के टाडाङंज़ च्याङसिडे स्वर्गडे पनि मारःङडे, ए परमेस्वर, ङा पापीलाई डया डाङ वार्डे ओछाती ढिम-ढिम उपिटीव।

14 "ङा जेलाई हैङाडाच्योज़्या, नो सिरमा डुप्ने मी होका फरिसी भन्डा सहि मी टाडे उज़ीःमडे ओनाव। कडालेकं जो मी घ्योव झैसि, हो मी आलिज़ा टानेले, हैनि पनि जो मी आलिज़ा झैसि हो मी घ्योव टानेले।"

येसु सोनो आलिज़ा बाल्खरं

15 येसुये छुडे गयासिवकं वार्डे मीराई बाल्ख याज़ारं येसु लेवकं यारोयोरं। हो रःङडे उसिसराई नो मीरंलाई याहक्लोयोरं। 16 येसुये उसिसरंलाई ओल लेवकं खुल्डे हैओडोवरं, "बाल्खरंलाई ङालेवकं राव याच्योरं नोरंलाई टावोङच्योरं। कडालेकं परमेस्वरलो ओराज्य ऐटानावराई ज़। 17 ङा जेलाई डस्साज़ हैङाडाच्योज़्या, जोये आलिज़ा बाल्खराई मान्टि परमेस्वरलो ओराज्यलाई मामानिव, हो मी खर्कज़ परमेस्वरलो ओराज्यलं पसिव डैने माले।"

ढनी मी

18 टोबो राजाये येसुलाई ऐ वार्डे ओपजोयो, "ए चाव अगंवा, खर्कज़ मासिने जीबन डैने ङा कैलेने?"

19 येसुये नोलाई हैओडोव, "नङ ङालाई कडाने चाव नडाङज़्याव? टोबो परमेस्वरकाम उरु काङ्काज़ चाव माले। 20 आग्यारं के नङ नसंनसानीड ‘ब्यभिचार टाडो, हत्या टाडो, टाकुङंन, झुठा गोहाइ टापाङ्ङन, नबाबु सोनो नामानिलाई मान डोनि।’"

21 होये हैओवारो, "आव स्यान्टै के ङा ढापा ङालेवकामज़ ङाडोव ची।"

22 आव रोः ठैडे येसुये नो मीलाई हैओडोव, "नङलाई अजं टोबो येःन डोने लिज़्या। नङसं सम्पति खाडंङ कडि कडि लिज़्या स्यान्टै येडे गरिबरंलाई भाडे गयोरंके, होकाम नङ स्वर्गटं डैने नले, होकाम राडे ङाछिन्ट राङन।" 23 होकाम आव रोः ठैडे नो बनै डुखि ओटाव कडालेकं नो राजा बनै ढनी लेव।

24 होकाम येसुये नो मीलाई रःङडे हैओवारो, "याढन सम्पति लेव मीरं परमेस्वरलो ओराज्यलं नाने बनै अप्ठारो ले। 25 कडालेकं ढनी मी परमेस्वरलो ओराज्यलं नाने भन्डा के उँटलाई गपलो उकुङलं छिरिने सजिलो टाये।"

26 होकाम ठैनेराई हैयावारो, "होकाम छुट्कारा काङ्काये डोयोके खेने?"

27 येसुये हैओवारो, "जो रोः मीराई माडोडुरं, हो परमेस्वर ये डोडुवये।"

28 होकाम पत्रुसये हैओवारो, "डे, गे के गिज़ीःम राःडे नझिन्ट राडे गेले।"

29 होकाम येसुये नोरंलाई हैओडोवरं, "ङा जेलाई डस्साज़ हैङाडाच्योज़्या, जोये परमेस्वरलो ओराज्यलो ओलागिटं उज़ीःम, ओज्या, ओज़ा, होसोनो वामा ओबाबु लाई राःव, 30 नोये आव बेलाकंज़ ओगोमोयो भन्डा बनै भ्या डैने ले, होकाम राने छुटं जुगुलं खर्कज़ मासिने जीबन डैने ले।"

येसुये सोङ्खेपका उसिने बारेलं भबिस्यबानी ओपाङो

31 येसुये बारंजना उसिसरंलाई याबाठङ खुल्डे हैओडोवरं, "डे, गे यरुसलेमडे गेनारिज़्या, होकाम मानवालो ओज़ालो ओबारेलं अगमबक्ताराई यापाङो स्यान्टै रोः पुरा टाने ले। 32 कडालेकं नो यहुडीरंकाम उरुका मीराई याकुइटं सुम्पिसिने ले, होकाम होराई नोलाई गिल्लैनेलेरं, नोसं माचाव बेहोरा डाने लेरं, होसोनो होलाई त्युःल्ने लेरं। 33 नोराई होलाई कोर्राये पोःने लेरं होसोनो सैःने लेरं होकाम सोङलाका नो फरि सिवलाम ज्युङडा टानेले।"

34 होकाम उसिसराई आव रोः टोबो पनि माबुझिरंये। नोराई यालागिटं आव रोःलो ओमाने गुप्तलं नैसिव लेव, होकाम येसुये ओपाङो नो रोः बुझिडुने नोराई याडिमाकज़ माडुमये।

येसुये अन्डला भिखारीलाई ओससोमो

35 येसु यरीहो लेवकं ओकेव। होकं टोबो अन्डला येम छ्योकं चुङडे भिख उनीःज़्याव। 36 बनै भ्या मीरं ओछ्योला ग्याःन्ट यानाज़्याव ठैडे हो मीरंलाई ओपंजोयोरं आव कडि?

37 नो मीराई होलाई हैयाडोव, "नासरतला येसु आलाग्यान्त नाज़्या।"

38 होकाम नो ऐ वार्डे उकिःव, "ए येसु डाउडलो ओज़ा, ङालाई डया डाङ।"

39 ङाःटा बानेराई नोलाई गाइगुइ टालेन वार्डे याहक्लोयो। हैनि पनि नो झन कस्सिडे उकिःव, "ए डाउडलो ओज़ा, ङालाई डया डाङ!"

40 येसु ठन ओअडिव, होकाम नो अन्डला मीलाई ओल लेवकं रैने हुकुम ओयोवरं। नो मी ओछ्योकं ओरावपान्त्रा येसुये ओपजोयो, 41 "नङ कै नवार्ज़्याव? ङा नलागिटं कडि येःन डाने?"

नोये हैओवारो "प्रभु, ङा रोःङो ङाडैकं।"

42 होकाम येसुये नो मीलाई हैओडोव, "नमिलंङ रःन्ने ओटाकं। नबिस्वासये नङलाई ससम्डे नैसोनो।"

43 होकाम होपान्त्राज़ नोलो उमिलङ ओरोःनो, होकाम परमेस्वरलो ओप्रसन्सा डोये-डोये हो मी येसुलो उझिन्ट ओबाव। आव रःङडे स्यान्टै मीराई परमेस्वरलो ओप्रसन्सा याडोव।