Lucas 19

सिरमा डुप्ने जखायेस

1 येसु यरीहोलं नाडे होलाग्यान्ट ओनाज़्याव। 2 नलं जखायेस उमिनलेव टोबो मी लेव। नो सिरमा डुप्नेराई यासेःर लेव, होकाम ढनी पनि लेव। 3 येसु काङ्का वार्डे रःङने नोलो उयुङ लेव। हैनि पनि आलिज़ा कचरा ओटावये मीराई याखार्लाम नोये येसुलाई मारःङडुवये। 4 नो मी येसुलाई रःङने वार्डे मीराई याङाःडे ज़ोनाडे टोबो डीलो उसिङटं उपुलुव। कडालेकं येसु होलाग्यान्टज़ ओनारिज़्याव। 5 येसु होकं ओकेरिकं, येसुये ङला लेडे रःङडे हैओडोव, "ए जखायेस, चानो झरिडे गरानके, कडालेकं ङा आछिम नज़ीःमकं बासिने ङारारिज़्या।"

6 नो होपान्त्राज़ झरिडे ओराव। होकाम रेङये-रेङये येसुलाई खुल्डे मान ओडोव।

7 स्यान्टै मीराई नो यारोःङो पान्त्रा, नोरं ऐ वार्डे गन-गन यालेव, "येसु पापीलो उज़ीःमलं पाहुना उचुङसिनाव।"

8 जखायेस ठर-च्याङसिडे प्रभुलाई हैओडोव, "प्रभु, डे, आबो ङा ङासम्पतिलाई नेभा झैडे टभा गरिबरंलाई ङायोरं, होकाम कोइराई लेवङाम अनिया डाडे कडिरं रैडे ङानैखे भने ङा नोलाई चारगुना सोवोल्ड्यानेङाले।"

9 होकाम येसुये नोलाई हैओडोव, "आछिम आव ज़ीःमलं छुट्कारा राडेले, कडालेकं आव पनि अब्राहामलो ओज़ा ची। 10 कडालेकं मानवालो ओज़ा माःवरंलाई खिम्ने सोनो बचैने ओराव ची।"

सुनलो पैसालो सात्रो

11 नोराई आव रोः याठैज़्याकंज़ येसुये नोरंलाई टोबो सात्रो झाडेओयोवरं। येसु यरुसलेम छ्योकंज़ उलिज़्याव, होकाम मीराई परमेस्वरलो ओराज्य चानोज़ रारिज़्या वार्ने बुझिडे यानैज्याव। 12 येसुये हैओडोवरं, "टोबो घ्योव मी टोबो राज्य ङामी झैडे वोल्डे ङारा वार्डे टाडा डेसडे ओनाव। 13 नोये डस जना ओनौकररंलाई खुल्डे नोरंलाई सुनलो डस गोटा ढ्याक याडे हैओडोवरं, ‘ङा वोल्डे ङामराया समं आवये बैपार डोच्यो।’" 14 "हैनि पनि नोलो ओप्रजाराई नोलाई घिनैरंये, होकाम नोराई नो मीलो उझिन्ट ऐ वार्डे कटंवालरं यापरिःङोरं, ‘नो गेराजा ओटाव गे चाव गेम्ङप्सिये।’"

15 होकाम राज्य उमिन्ट झैडे वोल्डे ओराव पान्त्रा सुनलो पैसा ओयोव नौकररंलाई ओल लेवकं खुल्ने हुकुम ओयोवरं, होकाम बैपार डाडे खाडंङ पैसा याझैरंया वार्डे सन्ने युङ ओडोव। 16 होकाम ङाःडे टोबो राडे ऐ ओडोव, "ए साहु, नयाङो टोबो ढ्याकये अजं डस गोटा ढ्याक कमैडेङानै।" 17 होये नो नौकरलाई हैओडोव, "स्याबास चाव इमानडारी नौकर, नङ आलिज़ा येःन्ट बिस्वासी नटाखे, नङ आबो डस गोटा सहरलो अडिकार डैने नले।" 18 डोस्रा नौकर राडे ओसाहुलाई हैओडोव, "नयाङो ढ्याकये ङा पाँसगोटा कमैडेङानै।" 19 "नोये होलाई पनि हैओडोव, ‘नङ पनि पाँस गोटा सहरलो अडिकार डैने नले।’"

20 "होकाम छुटं राडे ऐ ओवारो, ‘ए साहु, गरःङके, नढ्याक। ङा आव रुमालटं पोडे ङानोयो। 21 ङा नङसं ङाछेव, कडालेकं नङ मी कर्रा नले। जो नमनोयो हो नलाङये, जो बालि नमवाव होज़ नक्याये।’" 22 "होये नोलाई हैओडोव, ‘नयाःये नपाङो रोःटामज़ ङा नङलाई निया डोड्याने ङाले, ए नयुङ माचाव नौकर! जो ङामनै हो ङालाङ होसोनो जो बालि ङाम्वा हो क्याने ङा मी कर्रा ङाले वार्ने के नङलाई ठाज़ लेव सानिडं। 23 ङाढ्याक ब्याङ्कलं कडा नमनोयो नी? ङा राडे ओब्याजसं नो ङाडैखे हो।’"

24 "होकाम होका च्याङसिवरंलाई हैओडोवरं, ‘नोलाई नो पैसा नानडे डस गोटा पैसा लेवलाई याच्यो।’" 25 नोराई हो साहुलाई हैयाडोव, "नोसं के डस गोटा पैसाज़ लिज़्या सानिडं।" 26 "‘ङा जेलाई हैङाडाच्योज़्या, जोसं लिज़्या होलाई अजं भ्या यासिने ले, हैनि पनि जोसं माले होसं लेव पनि नान्सिने ले। 27 हैनि पनि ङा जेखार्ल राज ङाडोव चाव माङप्सिने ङासुतंररंलाई आकं रैच्योरं, होकाम नोरंलाई ङाङाःकंज़ सैःच्योरं।’"

येसु राजा मान्टि यरुसलेमलं ओनाव

28 येसुये आव रोः हैओवारो पान्त्रा यरुसलेमडे ओनाव। 29 येसु बेठफागे सोनो बेठानिया नी नेछ्योकं जैतुन याडोज़्याव डान्डाटं याकेरिव पाना, येसुये उसिसरंलाम नेबऱ्याङनिलाई ऐ वार्डे उपरिःङोनि, 30 "आका गेङाःका नाङखारलं नाचिन होकाम नाङखारलं जिपसिनारिज़्याकं जिन टोबो गडाहालाई सुर्सिव उलिज़्याव रःङने जेले, नोलाई आर्क समं काङ्काराई पनि याचेपो माले। नोलाई पलाडे आकं रैचीन। 31 कोइराई कडाने जेपंलाज़्याव? वार्डे यापजैचिनरंखे भने, ‘प्रभुलाई आव चाहिज़्या’ वार्डे हैडाचिनरं।"

32 होकाम होनि नेनाव, होनिलाई येसुये जोस्यानाव हैओडोवनि हैटावज़ नेडैनाव। 33 नोनि गडाहा नेपलाज़्याकं नो गडाहालो ओर्गेराई यापजोयोरं, "जिन आव गडाहा कडाने जेपंलाज़्याव?"

34 नोनि हैनेडोवरं, "प्रभुलाई आव चाहिज़्या।" 35 उसिसनि गडाहालाई येसु लेवकं नेरोयो, होकाम उसिसराई याक्वा हाईडे गडाहालो ओजङटं तान्डे येसुलाई यासुचुनो। 36 येसु होटं पुलुडे ओनाकं मीराई याक्वा हाईडे येमलं यातान्ड्योव।

37 येसु जैतुन डान्डाटा उरालालं ओकेरिकं स्यान्टै उसिसराई, यामिलङयेज़ यारोःङो स्यान्टै सक्तिला येःनलो ओलागिटं रेङडे, कस्सिडे किःडे परमेस्वरलो उगुन यागयो,

38 "स्यान्टैराई भन्डा घ्योवलो उमिननी राने राजा बनै चाव ची।

स्वर्गटं सान्ति होकाम घ्योव परमेस्वर ओलेने पोटं महिमा।"

39 होकाम होला लेव कोइ-कोइ फरिसीराई येसुलाई हैयाडोव, "ए गुरबा नसिसरंलाई हक्लैरं।"

40 हैनि पनि येसुये हैओडोवरं, "ङा जेलाई हैङाडाच्यो, आवरं-गाइगुइ मालेरंखे भने लुङरंज़ किःने लेरं।"

41 येसु नजिक ओकेरिव, होकाम सहरलाई ओरोःङो, होकाम नो सहरलो ओलागिटं येसु ऐ वार्डे ओघोरो, 42 "सान्ति कैजैडे राये वार्डे नङ आजिकाल पनि ठा नसंनखीनके याटा हो! आबो नो नङाः नमिकाम मोःसिडे खेम्डे ची ले। 43 कडालेकं नङलाई ऐटानाव डिन रानेले, नसुतंररं नो छ्योयालं टाना मारिडे नङलाई घिरिनेलेरं, होकाम चारकोनाङाम नङलाई वोङने लेरं। 44 नोराई नङलाई सोनो नज्युङलं लेने नसन्तानरंलाई नामलं फङ-फङ टने लेरं, होकाम टोबो लुङ तर्ट छुटं लुङ पनि रःन्ने माले। कडालेकं नङलाई परमेस्वरये ओडानो डया नमसःरेडुये।"

येसु प्रार्ठना डोने ज़ीःमलं

45 होकाम येसु प्रार्ठना डोने ज़ीःमलं उपसिनाव, होकाम होला बैपारिरंलाई उपुलोयोरं, 46 नोरंलाई ऐ ओडोवरं, "सास्त्रटं सर्सिव ले, ङाज़ीःम प्रार्ठनालो ज़ीःम टाने ले, हैनि पनि जे के आवलाई डाङ्कुरं याडुप्सिने पो झैडे जेनै।"✝1९:४६ यसैया ५६:७; यर्मिया ७:११

47 येसुये डिनका पतिज़ प्रार्ठना ज़ीःमयालं नाडे पोयोरंये। हैनि पनि मुख्या सेवा डोने मीरं, न्याम पैनेरं, सोनो जनताराई यासेःरराई येसुलाई सैःने पानरंये। 48 नोराई येसुलाई सैःने उनिउ माडैरंये, कडालेकं स्यान्टै मीरं येसुलो ओरोः बनै चावसं याठैज़्याव।