Lucas 23

33 नोरं खप्परे याडोज़्याव डान्डाटं केडे येसुलाई क्रुसटं याटाङगिव, होकाम नेबऱ्याङ अपराडिनीलाई पनि टोबोलाई येसुकाम वोःरडे छुटंलाई डाबऱ्याडे क्रुसटं याटाङगिव। 34 होकाम येसुये हैओवारो, "ए बाबु, आवरंलाई छेमा डोरं, कडालेकं आवरं कडि याडोज़्याव हो मासनरंये।" होकाम नोराई येसुलो ओक्वा गोला झाडे याभाव।

35 मीरं च्याङसिडे यारःङज़्याव। न्याम पैने अगंवाराई येसुलाई ख्याल डाडे हैयाडोव, "आवये उरुरंलाई ओजोगोयोरं, आव परमेस्वरलो उख्रीस्ट होसोनो परमेस्वरये उरुजिव मी टावसं आवये ओल्लाईज़ गबचोयोकं।"

36 सिफाइँरं पनि राडे येसुलाई स्युरो मड्ड याडे ऐ वार्डे यागिल्लोयो, 37 "नङ यहुडीराई याराजा टावसं नङलाईज़ गबचैके।"

38 "आव यहुडीराई याराजा" वार्ने डोस पाटी येसुलो ओङैः तरसैज़ाकं लेव।

39 क्रुसटा टाङ्गिसिव अपराडिनिङाम टोबो अपंराडिये येसुलाई गिल्लैडे हैओवारो, "होकाम नङ ख्रीस्ट माङ्क डोरो? नङ नङलाई पनि बचै, गिनलाई पनि बचैसी।"

40 हैनि पनि नो टोबो अपराडिलाई हक्लैडे छुटं अपंराडिये हैओवारो, "नङ पनि आव डन्डलंज़ परिडे नले, हैनि पनि परमेस्वरलो ओछ्या नम्डोयेरो? 41 गिन गेडन्ड के निया अनंसारज़ लिज़्या, कडालेकं गिन के गेडोव येःनलो ओयेः गेडैज़्या, हैनि पनि आव मीये के माचाव येःन कडिज़ माडोवये।"

42 होकाम नोये हैओवारो, "ए येसु, नङ नराज्यलं नराकं ङालाई चेटैसंङ।"

43 येसुये नोलाई हैओडोव, "ङा नङलाई डस्साज़ हैङाडानज़्या, आछिमज़ नङ ङासं सुखं लेव पोलं लेने नले।"