Lucas 5

18 मीराई ओखङ उकुइ सिव टोबो मीलाई चारपाईटं झाडे यारोयो, होकाम नोराई हो मीलाई ज़ीःमलं येसुलो ओङाःकं रैने यापानो। 19 हैनि पनि मीरं भ्या याटाव कारनये नोलाई ज़ीःमलं लाङने येम माडैडे ज़ीःम ढुरिटं यापुलुव, होकाम ज़ीःमलो ओछाने कोडे हो मीलाई ओचारपाईसंज़ येसुलो ओङाःकं यारोयो। 20 होकाम येसुये हो मीराई याबिस्वास रःङडे ओजोरो राव मीलाई हैओडोव, "नपाप छेमा याटाडु।"

21 होकाम न्याम पैने मीरं सोनो फरिसीरं ऐ यावारो, "परमेस्वरलो उबिरोड डाने आव काङ्का? पाप के परमेस्वरये मान्त्राज़ छेमा डोडुव।"

22 हैनि पनि नोराई हैवार्ने यापान्ज़्याव रोः ठा सन्डे येसुये होरंलाई ऐ वार्डे जबाफ ओयोवरं, "जे जियुङलं कडि जिसुन्चिज़्याव? 23 ‘नपाप छेमा याटा’ वार्ने सै ‘सोडे बाडे नान’ वार्ने, कैवार्ने सजालो उलिज़्याव? 24 हैनि पनि मानवालो ओज़ालाई प्रिठीबीलं पाप छेमा डाने अडिकारले वार्ने जे सन्डे नैच्यो।" होकाम येसुये हो ओखङ उकुइ सिव मीलाई हैओडोव, "ङा नङलाई हैङाडानज़्या, सोङंन होकाम नचारपाई छेन्डे नज़ीःमडे गनानके।"

25 होकाम होपान्ट्राज़ होराई याङाःकंज़ सोडे, ओल गलङडे उलिज़्याव चारपाई घुर्डे परमेस्वरलो ओमहिमा डोये-डोये उज़ीःमडे ओनाव।