1 Amumun, ayi ndum min kǝ zǝ Kristi tǝ izhin bǝ zǝ lɛ kɛ atetɛ min, te waŋa ayi ki didik iyi na. 2 <<Ubǝ bǝ nǝk tetɛ mi bǝn iyaa mi ŋgɔŋ>> te waŋa ayi nkan lɛ ndi iyi nǝ kpa nyak yi nyaŋa. 3 <<Tǝ duŋ bɔbɔk abɛ tsǝn anenen amɛ, tǝ izhin bǝ tǝ asɛ tǝtɛk nǝ gɔŋmimi.>>

4 Atetɛ, kǝr zhin bǝ duŋ amumun amin atǝ mfu ba, ama izhin bǝ gli ba gligli didik, tena tsar ba iki didik yi na, tǝna nǝk ba lɛ didik.

5 Agɛn, izhin bǝ zǝ lɛ kɛ atukɔ min tǝ nǝk ba ngɔŋ men ne zǝkuu bǝn sisik, ne susun didik, ir keŋ ndi izhin zǝ Kristi. 6 Kǝr zhin bɛ zǝ ba te bɛ yik te nyɛr ankyak ba, ama ndi agɛn abɛ Kristi, ana ikiyiŋ ndi Arik ne di bɛ nai nɛ asusun amen. 7 Izhin bɛ na ndum min ndi agen susun zhin nǝ nyɛr, ndi izhin naa Ŋgɔŋ, bai neshir ba. 8 Shu zhi tǝ Ŋgɔŋ atei nǝk kɔte ŋɔwa idǝk maa, ka ayi gɛn ka ayi sha, nǝ ndum didik kǝŋ ndi ta nǝ na.

9 Atukɔ, izhin bɛ na agɛn amin iki didik. kǝr zhin bɛ sak ba ya ba, te zhin ne zhi te Arik ane atukɔ ben agɛn ndi ayi nǝ gbarshu, ba tei na zhi ayi ba.

10 Nǝ klɛtu, izhin bǝ klik ŋgɔŋ ne lɛ kɛ Arik ne mgbamgbaŋ maa. 11 Izhin bǝ su iki yi tǝ kum yi Arik bɔbɔk, te zhin bǝ tsǝ klɛ mgbamgbaŋ tǝ yar shetan. 12 Tǝ ikum mɔr ba yi bǝn neshir ne yi ne kpa bǝn azhizhi ba, ama iyi nɛ atu iye izhu mimin, abaŋ ndi agli gɔŋmimi, ne atu ayi waŋ ndi ayi ne mgbyamgbyaŋ kɛ kiki yi bu ben mgbyamgbyaŋ kɛ ane rim ben abaŋ ndi abwak ne gbar shu. 13 Ne me, su zhin bɔbɔk kiki iyi tǝ kum yi Arik, te yi ndi iber mimin te nyɛ, izhin tei klɛ mgbamgbaŋ ndi izhin te na kiki bɔbɔk izhin bɛ klɛ mgbamgbaŋ. 14 Kli zhin mgbamgbaŋ, bǝn zub ndi ririk ne tiŋ ne,bǝn tsǝn anenen ndi adamgbaŋ anǝ ta kab, 15 bǝn gar kǝ akpaza mi abe yi ndi ŋub gar bla lɛ didik kǝ men kǝ sɔŋsǝk. 16 Kɔte mkpaŋ takǝ bɔbɔk tanyɛmɛ bǝ yi ndi baŋ adamgbaŋ anǝ ta kab; tǝ ai yi izhin tei ŋub bɔbɔk ikab iyi ta lu iyi tyak ner mimin ŋɛ. 17 Izhin bǝ baŋ akatak ndi ane tyak ikum ndi ata aneshir ashur, ben ikab yi izhu tsetser, ndi ayi lɛ kɛ Arik. 18 Izhin bǝ ben Arik ne Izhu Tsetser didik ne kɔte kpaŋ takɛ, kɔte bɛr tayi, te blaa zhin Arik kiki yiŋ ndi idam zhin bɔbɔk, izhin bɛ sɔŋ shur ayi te ben Arik ne atɔ abɛ zǝu bɔbɔk.

19 Izhin bena ben Arik ne tu amuŋ, ndi mte yik mgbemgbeb kɛ du lɛ didik kǝ men, te mbla lɛ kɛ suyir keŋ ndi yi didik. 20 Ne atu yi du lɛ didik kǝŋe M yi shar, neme M yi nǝ jaru. Ben me zhin Arik tǝm klik susun nǝ du lɛ didik kǝŋe nǝ zhɔk susun.

21 Tikikus, izumɔr bǝn tanyɛmɛ igɛn nǝ min kǝ na ndum kǝ Ŋgɔŋ, atei bla zhin kɔte nii bɔbɔk ne atu muŋ, te izhin bǝ zhi ir keŋ ndi mǝ yimɛ bǝn ki yiŋ ndi mnai. 22 Waŋa ai ki yiŋ ndi M sharu bǝnɛ bɛzhin nǝ lɛ kǝŋe, tǝ abe bla zhin ir keŋ ndi bɔbɔk mɔr ta yimɛ tǝ nǝk zhin lɛ didik.

23 Arik Tetɛɛ bǝn Ŋgɔŋ Yesɔ Kristi abɛ nǝk bɔbɔk abǝ zǝu sɔŋ kǝ sǝk bǝn nyɛr bǝn tanyɛmɛ. 24 Iki didik bɛ yi bɔbɔk benɛ abaŋ ndi ne tanyɛmɛ bǝn ŋgɔŋ Yesɔ Kristi nǝ nyɛr iyi yaŋ klɛ.