1 Azizaŋa ndi sɔŋ mɔr ne te anenen ben Arik ne atu ayi tanyɛme ne susun, ta yine sik susun ben Arik ne atu ayi Ŋgɔŋ amɔr Yesɔ Kristi. 2 Ne Gli ta aŋyaga ne tanyɛme ne didik kɛ Arik, ndi ta klikli me. Neme ta ŋur asa ne shur ayi ndi ta yime neyi ne gab ki ne Ngɔŋ kɛ Arik! 3 Tei na ŋur asa ne yik iyah mɔr, te tane zhi tedi iyik iyah iŋle kpa susun; 4 Ikpa susun duŋ Arik ata ta, ita ta maa duŋ tayi ne shur ayi. 5 Ishur ayi yiŋɛ ba tei zhɔk ta shisha ba, te Arik neka shur nyɛr maa ne asusun amɔr ndi amashir agbub ne tuk te nǝk ta Izhu Tsetser maa.

6 Nǝ mkpaŋ ndi tane yaŋ mgbyamgbyaŋ, Kristi ne ku netu abɛ lalɛ ne mkpaŋ ndi Arik ne hria. 7 Iyi ne dǝk te iner nuŋ abɛ ta iku kɛ iner tsetser aku mɔ. Inuŋ atei ya ku ne atu ayi iner ne na didik. 8 Ama Arik wa ne tsar nyɛr maa ne atu amɔr: Ndi tane ri yi abɛ na zumimin, Yesɔ ne ku ne atu amɔr! 9 Neme azhizhi amaa neka ŋla ta ashur tsetser ne zǝ Arik; anii ne dǝk, fena, atei ta ta shur ne mfu kɛ Arik! 10 Tane yi abɛ te zor ben Arik, ama ne atu iku kɛ Zu maa. Azizaŋa ta yi akpa amaa, aye nii ne dǝk ta ndi ita shur mɔr iyi tsitsir kɛ Kristi. 11 Fe bai yiŋɛ ankyak ba; ta nyɛr ne ki yiŋ ndi Arik ne nai ne Ŋgɔŋ amɔr Yesɔ Kristi, waŋ ndi ne akam ta ate akpa abɛ Arik.

12 Zumimiŋ ne yir gɔŋmimi netu yi ner zhiin, zumimiŋ maa ne Gli iku nyɛmɛ. Iyiŋɛ ne duŋ iku ne vuŋ aneshir bɔbɔk, te kɔte ner tawa ne na zumimiŋ. 13 Zumimiŋ ne men yine gɔŋmimi te duŋ icɛr iyi Musa ne nyɛ gɔgɔŋ; ama ne mkpaŋ keŋ ndi icɛr iyi Musa ne yaŋa, zumimiŋ neyi ne gɔŋmimi, bane Gli ina zumimiŋ mgbamgbaŋ ba. 14 Ama nak kam rɛ mkpaŋ kɛ Ademu te nyak mkpaŋ kɛ Musa, iku ne yi ne mgbyamgbyaŋ ne atu ayi aneshir bɔbɔk, te vuŋ abaŋ ndi bane lalɛ anenen ndi Ademu ba ndi ne kyak zǝ kɔr kɛ Arik. 15 Ama iki iyah yiŋɛ ba yi anenen ba, te ilalɛ yi Ademu yi nkaŋkaŋ ben Iki didik yi Arik ndi ner zhiin waŋa. Ayi zub aner tetɛk ne ku ne atu ayi zumimiŋ iyi ner zhiin waŋa. Ama iki didik yi nek Arik inaŋ, fe iki yi nek aneshir ne na didik kɛ ner zhiin waŋ ndi wa ayi Yesɔ Kristi, 16 Fena inǝk yi Arik iyi kaaŋkaŋ ben zumimiŋ yi ner zhiin. Nǝ goŋ kɛ lalɛ ner zhiin ma, ne Gli ambuk nyɛmɛ tena Gli,<< Ilalɛ nyɛmɛ>>; ndi ilalɛ ne yime tetɛk, iki didik yi nek Arik <<Bai lalɛ ba!>> 17 Ai lɛ kɛ zub te ilalɛ yi ner zhiin, iduŋ iku ne vuŋ aneshir bɔbɔk. Ama iki zhiin ndi ner zhiin waŋa, Yesɔ Kristi ne nai inaŋ kɔte nii, te duŋ abaŋ ndi ne ta iki didik yi Arik tetɛk atei yi ndɔ ben Kristi.

18 Fena, ndi ne atu ayi lalɛ ner zhiin ne duŋ iku ne yir ben aneshir bɔbɔk, ne ankɔŋ azhiin awaŋa ne na lɛ didik zhiin aneshir bɔbɔk ne ta izuk zhɔk. 19 Amɛ ndi ilalɛ yi ner zhiin ne duŋ aneshir bɔbɔk alalɛ, ne ankɔŋ azhiin awaŋa netu ayi na iki didik yi ner zhiin iduŋ aner tetɛk atei ta zuk zhɔk.

20 Icɛr iyi Musa ne bu alɛla teduŋ lalɛ bǝ yi tetɛk; Ama ndi ilalɛ iyir tetɛk, iki didik nak na yir tetɛk maayi, 21 Fena, ndi zumimiŋ vu aneshir gar ŋlɔk, iyi amɛ wa izuk zhɔk didik iyi Arik igli sɔŋ tsetser nyɛmɛ, te nǝk ta Ivli kɛ asese ne miŋ kɛ Yesɔ Kristi Ŋgɔŋ amɔr.